07/03/2026
धमलाहरूको उद्गम थलो अछाममा धमाला सेवा समाजको नयाँ नेतृत्व: अध्यक्षमा जग प्रसाद (जीवन)
तुर्माखाँद, अछाम धमला जातिहरूको ऐतिहासिक उद्गम स्थल मानिने सुदूर पश्चिम जिल्लाको तुर्माखाँद गाउँपालिका-८, धमालीमा धमाला सेवा समाजको नयाँ जिल्ला कार्यसमिति गठन गरिएको छ। समाजको विधान र मर्मलाई आत्मसात् गर्दै अछामको सांगठनिक संरचनालाई नयाँ उचाइ दिन नयाँ नेतृत्व चयन गरिएको हो।
धमाला समुदायका जुझारु व्यक्तित्व जग प्रसाद धमाला (जीवन) को अध्यक्षतामा १५ सदस्यीय नयाँ जिल्ला कार्यसमिति सर्वसम्मत रूपमा चयन भएको छ। यसअघि छत्र प्रसाद धमालाको अध्यक्षतामा रहेको जिल्ला कार्यसमितिलाई पुनर्गठन गरी नयाँ जोस र जाँगरका साथ यो टोली निर्माण गरिएको हो।
सुदूर पश्चिम प्रदेश संयोजक इन्द्र प्रसाद धमालाका अनुसार, यो गठन प्रक्रिया धमाला सेवा समाजको मौजुदा विधान बमोजिम सम्पन्न भएको हो। संस्थालाई थप चलायमान बनाउन र जिल्लाभर छरिएर रहेका धमाला बन्धुहरूलाई एउटै सूत्रमा बाँध्नका लागि नेतृत्व पुनर्गठन गरिएको जानकारी संयोजक धमालाले दिनुभयो।
धमला समुदायको पुर्ख्यौली पहिचान र ऐतिहासिक विरासत बोकेको धमालीमा भएको यो भेलाले विशेष महत्व राख्दछ। नवनिर्वाचित समितिले मुख्यतया निम्न लक्ष्यहरू राखेको छ:
1. एकता: जिल्लाभर रहेका धमाला बन्धुहरूलाई एकीकृत गर्ने।
2. संस्कार जगेर्ना: कुल परम्परा, संस्कार र संस्कृतिको संरक्षण गर्ने।
3. सामाजिक विकास: स्थानीय स्तरमा सामाजिक सेवा र विकासका कार्यहरूमा सक्रिय भूमिका खेल्ने।
ऐतिहासिक थलोबाटै नयाँ नेतृत्व चयन हुनुले देशभर रहेका धमाला समुदायमा सकारात्मक सन्देश प्रवाह भएको र यसले पुर्ख्यौली पहिचानलाई संस्थागत गर्न कोसेढुङ्गा साबित हुने विश्वास लिइएको छ।
