10/09/2026
अमलेखगञ्जमा ट्रामाडोलको ठूलो खेप बरामद ।
बसको हुडभित्र दुईवटा क्यारी ब्याग, १८ हजार ३०० क्याप्सुलसहित १९ वर्षीय युवक पक्राउ
बारा — वीरगञ्जबाट नारायणगढतर्फ जाँदै गरेको यात्रुवाहक बसबाट १८ हजार ३०० क्याप्सुल ट्रामाडोल हाइड्रोक्लोराइड बरामद भएको छ। जितपुरसिमरा उपमहानगरपालिका–२१ स्थित वडा कार्यालयनजिक पूर्व–पश्चिम राजमार्गमा चेकजाँचका क्रममा बसको हुडभित्र ‘CAT’ लेखिएका दुईवटा कालो क्यारी ब्याग फेला परेका थिए।
प्रहरीका अनुसार ब्यागभित्र Tramanil (Tramadol Hydrochloride Capsules) भेटिएको हो। घटनामा पर्साको वीरगञ्ज महानगरपालिका–१६ निवासी १९ वर्षीय आनन्द चौरसिया पक्राउ परेका छन्। प्रहरीले बरामद सामग्री नियन्त्रणमा लिएर अनुसन्धान अघि बढाएको जनाएको छ।
यति ठूलो परिमाणमा ट्रामाडोल भेटिएपछि यो व्यक्तिगत प्रयोगका लागि थियो वा यसको पछाडि संगठित ओसारपसारको सञ्जाल छ? भन्ने प्रश्न उठेको छ। प्रहरीले यसको स्रोत, वास्तविक मालिक, आपूर्तिकर्ता र गन्तव्यबारे गहिरो अनुसन्धान गरेमा ठूलो नेटवर्कसम्म पुग्न सक्ने देखिन्छ।
एक युवक पक्राउ पर्नु प्रारम्भिक सफलता हो, तर १८ हजार ३०० क्याप्सुलको स्रोत र सञ्जालसम्म प्रहरी पुग्नु नै अबको मुख्य चुनौती बनेको छ। 🚨
