05/03/2026
*हाम्रो प्रतिरोध–यात्रा जारी रहनेछ*
निर्वाचन अभियानमा साथ दिने मतदाता, सहयोगी, शुभचिन्तक सबैमा आभार !
––––––––––
आदरणीय दिदीबहिनी, दाजुभाइ तथा साथीहरू
प्रतिनिधिसभा सदस्यको निर्वाचन परम्परागत तौरतरिकामा सम्पन्न भएको छ । यस निर्वाचनमा सचेत मतदाताका बीचमा जनपक्षधर एजेन्डामा संवाद होस् भन्ने हेतुले हामी पनि निर्वाचन विशेष अभियानमा सामेल भएका थियौं । हाम्रो संवाद–अभियानमा तपाईंहरुले देखाउनुभएको चासो, उत्साह, साथ–सहयोग र आलोचनात्मक सुझावहरु हाम्रा लागि अमूल्य अनुभव र सिकाइ बनेका छन् । दाङ जिल्लाको निर्वाचन क्षेत्र नम्बर २ मा साङ्केतिक रुपमा स्वतन्त्र उम्मेदवारी दिएर हामीले यस निर्वाचनलाई त्यस क्षेत्रका भुइँतहका कर्मशील जनताको अवस्था र उहाँहरुका आकाङ्क्षा बुझ्ने, उहाँहरुसँग संवाद स्थापना गर्ने र जनपक्षीय राजनीतिक एजेन्डामा उहाँहरुसँग कुराकानी गर्ने अवसरका रुपमा लियौं । हाम्रो यस अभियानमा प्रत्यक्ष–अप्रत्यक्ष रुपमा सहभागी हुने साथीहरु, विभिन्न किसिमका सहयोग गर्ने शुभचिन्तकहरु, हामीलाई सुझाव दिने मित्रहरु र हाम्रो संवाद–अभियानमा सामेल भई हामीलाई मतदान गर्ने मतदाताहरु – सबैमा हामी हार्दिक धन्यवाद तथा आभार व्यक्त गर्दछौं।
निर्वाचन अवधिमा हामीले जनसंवाद अभियान सञ्चालन गर्नुको अर्थ अहिलेको संसदीय प्रणालीभित्र हार वा जीतको खेलमा सहभागी हुनु थिएन । यो निर्वाचनमा सहभागी हुनु हाम्रा लागि यसै व्यवस्थाका नियमहरु अँगालेर शासक बन्ने वा शासक चुन्ने खेलको साक्षी बस्नु पनि थिएन । यो त हाम्रा लागि नयाँ समतामूलक व्यवस्था निर्माणको लामो यात्राका लागि प्रारम्भिक एक पाइला अघि बढाउने प्रयास थियो । हामीलाई थाहा छ, गत २३–२४ को (जेनजी) नवयुवा विद्रोहको परिणाम देश नयाँ निर्वाचनमा होमिएको हो । नवयुवा विद्रोहका आधारभूत मागहरु सम्बोधन गर्नतिर नलागी परम्परागत संसदीय प्रणालीकै मध्यावधि शैलीमा यो निर्वाचन आयोजना गरिएको थियो । भ्रष्टाचार नियन्त्रणको पहल नलिइकन, २३–२४ भदौको आन्दोलनबारे बनेको छानबिन समितिको प्रतिवेदन पनि सार्वजनिकै नगरिकन र निर्वाचन प्रणालीमा जनताले खोजेको परिवर्तनलाई सम्बोधन नगरिकन पुरानै शैलीमा निर्वाचन सम्पन्न भएको छ । तसर्थ, भ्रष्टाचार, कुशासन, बेरोजगारी र आर्थिक विभेद व्याप्त रहेको नेपाली समाजलाई सुशासनयुक्त सरकार एवम् स्वतन्त्र, समतामूलक र आत्मनिर्भर अर्थतन्त्र भएको सुन्दर समाजमा फेर्ने अभियान पूरा भएको छैन । त्यो अधुरो अभियान पुनः जारी राख्न हामी प्रतिबद्ध छौं । राजनीतिक अस्थिरता, कमजोर शासकीय स्वरूप र विदेश–निर्भर अर्थतन्त्रमा परिवर्तन गर्ने र नयाँ समाजवादी प्रणाली स्थापना गर्ने हाम्रो दीर्घकालिक प्रतिरोध–यात्रा जारी छ । रुपान्तरणकारी आन्दोलनको जुझारु बाटो हुँदै समग्र राज्यसंरचनामा हेराफेरी गर्ने जिम्मेवारी श्रमजीवी वर्गको सङ्गठित पहल र उन्नत नेतृत्वले मात्रै पूरा गर्न सक्छ भन्नेमा हामी प्रष्ट छौं। त्यसकारण नयाँ, सबल र गतिशील सङ्गठन निर्माणको अभियानमा हामी निरन्तर जनताबीच हुने प्रतिबद्धता दोहो-याउँछौं।
––––––––––––––––––
२०८२ फागुन २१, बिहीबार
*प्रमोद धिताल*
(संयोजक)
तथा
प्रतिनिधि सभा सदस्य उम्मेदवार, दाङ- २
Pramod Dhital
#प्रतिरोध
