10/12/2025
शोक वक्तव्य
नेपाली कम्युनिस्ट पार्टीका होनहार युवा नेता, वाइसिएल नेपालको पुर्व केन्द्रीय सदस्य, जनयुद्धकालिन प्रतिबद्ध क्रान्तिकारी नेता कमरेड काशी महतो (करण) को यहि २२ मंसिर, २०८२ मा भएको असामयिक निधन प्रति हाम्रो गौरवशाली संगठन वाइसिएल नेपाल गहिरो शोक र दुःख व्यक्त गर्दछ । उहाँको निधनले हाम्रो पार्टी, संगठन र नेपाली श्रमजिवी वर्गको लागि अपूरणीय क्षति भएको छ ।
कमरेड काशी महतो (करण) २०३२ साल मंसिर १५ गते महोत्तरी (हाल गौशाला नगरपालिका, बेलगाछी) मा जन्मनु भएको थियो । सामाजिक सेवाको माध्यमबाट राजनीतिमा प्रवेश गरी २०५६ सालमा तत्कालिन नेकपा (माओवादी) मा सामेल भएपछि उहाँ पूर्णकालिन कार्यकर्ता बन्नुभयो । ‘करण’ उपनामले जनयुद्धको इतिहासमा परिचित कामरेड ‘करण’ले लगातार पार्टीका विभिन्न जिम्मेवारी सम्हाल्नु भयो । महोत्तरी जिल्ला समिति सदस्यदेखि एरिया इन्चार्ज, राज्य समिति सदस्य, योङ कम्युनिस्ट लिग नेपालको केन्द्रीय सदस्य, महोत्तरी जिल्ला संयोजक र नेकपा (माओवादी केन्द्र) को प्रदेश समिति सदस्य सम्मको भूमिका निर्वाह गर्नुभयो । २०६४ सालको संविधानसभा निर्वाचनमा उम्मेदवार रहेका कामरेड काशी महतो (करण) सधैं सक्रिय, जुझारु र जनताका नजरमा स्थापित नेता थिए ।
५० वर्षको अल्पायुमा नै उहाँको यस रूपमा भौतिक बिदाइ हाम्रो लागि अत्यन्त पीडादायी छ । उहाँले आफ्नो सम्पूर्ण जीवन देश र जनताको लागि समर्पित गर्नुभयो । दलित, पिछडिएका र शोषित वर्गको अधिकार, समानता र न्यायको लडाइँमा समर्पित गर्नुभयो ।
हामी कमरेड काशी महतो (करण) को अमर स्मृतिलाई श्रद्धाञ्जली गर्दछौं र उहाँको जीवन र आदर्शबाट प्रेरणा लिँदै समाज रुपान्तरणमा उहाँको प्रतिवद्धतालाई थप अगाडि बढाउने प्रतिबद्धता जाहेर गर्दछौं ।
यस दुःखद क्षणमा हामी उहाँ प्रति पुनः श्रद्धाञ्जली अर्पण गर्दै उहाँको शोकाकुल परिवारजन प्रति गहिरो समवेदना व्यक्त गर्दछौं ।
२४ मंसिर, २०८२
वाइसिएल नेपाल, केन्द्रीय समिति