27/05/2026
कोशी प्रदेश ट्राफिक व्यवस्थापन सम्बन्धी “प्रादेशिक गोष्ठी २०८३” सम्पन्न................................................................................
कोशी प्रदेश प्रहरी कार्यालय विराटनगरले कोशी प्रदेशमा ट्राफिक व्यवस्थापन प्रभावकारी बनाई सवारी दुर्घटना न्यूनीकरण गरी सडक प्रयोगकर्तालाई पूर्ण सुरक्षाको प्रत्याभूति दिलाउन कोशी प्रदेश ट्राफिक व्यवस्थापन प्रादेशिक गोष्ठी २०८३ को आयोजना गरिएको छ । जेठ १३ गते सुनसरीको इटहरी उप-महानगरपालिका-४ स्थित दुर्गा पार्टी प्यालेसमा कोशी प्रदेश प्रहरी प्रमुख प्रहरी नायव महानिरीक्षक विनोद घिमिरेको प्रमुख आतिथ्यतामा एक दिवसिय गोष्ठीको उद्घाटन भएको थियो ।
प्रहरी नायव महानिरीक्षक विनोद घिमिरे को प्रमुख आतिथ्यमा सम्पन्न कार्यक्रममा ट्राफिक व्यवस्थापनमा देखिएका चुनौती, सडक सुरक्षा र प्रविधिमैत्री समाधानका विषयमा विस्तृत छलफल गरिएको थियो । कार्यक्रममा इन्जिनियर बिबेक सिंहले आधुनिक प्रविधिको प्रयोगमार्फत ट्राफिक व्यवस्थापन सुधार गर्न सकिने उपायबारे प्रस्तुतीकरण गर्नु भएको थियो भने कार्यक्रमलाई सम्बोधन गर्दै प्रमुख अतिथिज्यूले लागूऔषध नियन्त्रण अहिले प्रदेशकै ठूलो चुनौती बनेको उल्लेख गर्दै विराटनगरबाट सुरु गरिएको अभियान १४ वटै जिल्लामा विस्तार गरिने बताउनुभयो । वहाले ट्राफिक व्यवस्थापन प्रभावकारी बनाउन सबै निकायबीच समन्वय अपरिहार्य रहेको धारणा व्यक्त गर्नु भएको थियो ।
नेपाल प्रहरी प्रधान कार्यालय कार्य विभाग राजमार्ग सुरक्षा तथा ट्राफिक व्यवस्थापन महाशाखा नक्सालका प्रहरी वरिष्ठ उपरीक्षक भुवनेश्वर तिवारी ज्यूले सडक सुरक्षा तथा ट्राफिक व्यवस्थापन सम्बन्धी कार्यपत्र प्रस्तुत गर्नु भएको थियो ।
गोष्ठीमा सहभागी पक्षहरूले सडक दुर्घटना न्यूनीकरणका लागि संयुक्त प्रतिबद्धता जनाउँदै सुरक्षित सडक प्रणाली अवलम्बन, कानुन कार्यान्वयन सुदृढीकरण तथा सडक पूर्वाधार सुधारमा सहकार्य गर्ने निर्णय गरेका छन् । प्रतिबद्धता पत्रमा ब्ल्याक स्पट पहिचान, सडक संकेत तथा रोड मार्किङ सुधार, हेल्मेट र सिटबेल्टको अनिवार्य प्रयोग, मादक पदार्थ सेवन, लागु पदार्थ सेवन गरी सवारी चलाउने कार्य नियन्त्रण तथा सुरक्षित सार्वजनिक यातायात प्रवर्द्धनमा विशेष जोड दिइएको छ ।
कार्यक्रममा आन्तरिक मामिला मन्त्रालय, प्रदेश प्रहरी कार्यलय धरानका प्रहरी वरिष्ठ उपरिक्षक ज्ञानेन्द्र प्रसाद फुयाल, कोशी प्रदेश प्रहरी कार्यालय बिराटनगर, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी, जिल्ला प्रहरी कार्यालय सुनसरी, मोरङ, नेपाल प्रहरी बिशेष सुरक्षा गण दुहबीका प्रहरी उपरीक्षक ज्युहरु, प्रहरी नायव उपरीक्षक, सवारी यातायात शाखा, यातायात व्यवस्था कार्यालय इटहरी, यान्त्रिक कार्यालय इटहरी, सडक विभाग, सडक आयोजना, बिमा संस्थान, यातायात व्यवसायी, १४ वटै जिल्ला ट्राफिकका प्रमुख, जिल्ला प्रहरीका प्रतिनिधिहरु,नागरिक समाज इटहरी, स्थानीय जनप्रतिनिधि, ड्राईभिङ्ग स्कुल, यातायात व्यवसायी, यातायात मजदुर संघ संगठन, विभिन्न संघ संस्था, सञ्चारकर्मी लगायत स्थानीय बुद्धिजिवि महानुभावहरुको उपस्थिति रहेको थियो ।
