29/06/2026
माननीय सागर ढकालज्यूको भावुक अपिल सहितको धन्यबाद!!
आदरणीय पालिका सभापतिज्यूहरू, र सम्पूर्ण आमाबुवा, दाजुभाइ, दिदीबहिनी तथा आत्मीय साथीहरू!
संसद्को यो व्यस्त यात्राका बीच तपाईंहरूले गुल्मीको माटो र यहाँको भविष्यलाई लिएर सोध्नुभएका प्रश्नहरूका लागि हृदयदेखि नै धेरै-धेरै धन्यवाद। यी प्रश्नहरूले मलाई झकझकाएका मात्र छैनन्, गुल्मी परिवर्तनको भोक हामी सबैमा कति गहिरो छ भन्ने कुरा पुनः प्रमाणित गरेका छन्।
प्रश्नहरूको उत्तर दिनुअघि, म मेरो छातीमा गर्व र आँखामा कृतज्ञताका आँसु राखेर तपाईंहरू सबैलाई एउटा कुरा स्मरण गर्न र गराउन चाहन्छु। भर्खरै सम्पन्न हाम्रो राष्ट्रिय प्रथम ऐतिहासिक अधिवेशनमा गुल्मी जिल्ला लगायत देशका कुना-कुनाबाट आउनुभएका सम्पूर्ण प्रतिनिधि साथीहरूले ममाथि जुन अगाध विश्वास देखाउनुभयो, म त्यसका अगाडि नतमस्तक छु। तपाईंहरूको त्यही अमूल्य र पवित्र मतकै बलमा मलाई चौथो स्थानमा विजयी गराई केन्द्रीय नेतृत्वमा पुर्याउनुभयो। यो जित केवल सागर ढकालको जित होइन, यो गुल्मीको आवाज र आम नेपालीको भरोसाको जित हो। मलाई यो उचाइ र जिम्मेवारी दिनुहुने सम्पूर्ण आदरणीय प्रतिनिधिज्यूहरूमा हार्दिक धन्यवाद र आभार व्यक्त गर्दछु। तपाईंहरूले मलाई मत मात्र दिनुभएको छैन, यो देश बदल्ने एउटा ठुलो धर्म र जिम्मेवारी सुम्पिनुभएको छ।
गत चैत्र १२ गते मैले सांसदका रूपमा शपथ लिँदा मेरो मनमा एउटै संकल्प थियो— वर्षौँदेखि पछाडि पारिएको हाम्रो गुल्मीलाई देशकै नमुना बनाउने। शपथ लिएयताका यी दिनहरू बजेट निर्माण, मन्त्रालयका नीतिगत छलफल र संसदीय जिम्मेवारीहरूमा निकै व्यस्त रहे। तर, यो व्यस्तताका बीच पनि मैले गुल्मीलाई एक पलका लागि पनि बिर्सेको छैन। यही व्यस्तताकै बीच म दुई पटक तपाईंहरूकै आँगनमा पुगिसकेको कुरा पनि स्मरण गराउन चाहन्छु।
सांसद भएको आज करिब ९० दिन मात्र पुग्दैछ, जबकि यो माटोको सेवा गर्न मेरो कार्यकालका अझै करिब १,७०० दिनहरू बाँकी छन्। त्यसैले, मैले निर्वाचनका बेला सार्वजनिक रूपमा गरेका प्रत्येक प्रतिबद्धताप्रति म पूर्ण रूपमा स्पष्ट र दृढ छु। तिनका लागि आवश्यक कार्ययोजना, समयसीमा र कार्यान्वयनको प्रक्रिया क्रमशः अघि बढिरहेका छन्।
हाम्रो सपनाको 'गुल्मी कृषि मोडेल' (Gulmi Agriculture Model) ले बिस्तारै गति लिन थालेको छ, जसले हाम्रो उत्पादन र कृषक दाजुभाइको पसिनालाई सिधै बजारसँग जोड्नेछ। यसका साथै, हाम्रा आमाबुवा र बालबालिकाको स्वास्थ्य सुनिश्चित गर्न 'गुल्मी हेल्थ मोडेल' को प्रारम्भिक खाका तयार भई कार्यान्वयनको दिशामा अघि बढिरहेको छ। आगामी दिनमा कुन-कुन पालिकामा कुन बजेट कसरी विनियोजन भएका छन् र तिनले गाउँको मुहार कसरी बदल्नेछन् भन्ने विस्तृत विवरण म छिट्टै तपाईंहरूमाझ पारदर्शी रूपमा राख्ने नै छु।
मेरा आदरणीय साथीहरू,
महाधिवेशनको ऐतिहासिक ऊर्जा बोकेर अब हामी स्थानीय तहमा संगठनलाई अझ सशक्त, उत्तरदायी र जनमुखी बनाउने ऐतिहासिक मोडमा आइपुगेका छौँ। हिजो हामी प्रश्न सोध्ने ठाउँमा थियौँ, आज हामी जनतालाई उत्तर दिने र भरोसा दिने जिम्मेवार ठाउँमा पुगेका छौँ।
"विगत ३५ वर्षमा हुन नसकेको परिवर्तन अब आगामी ५ वर्षमा हामी सबै मिलेर सम्भव बनाउनुपर्छ। परिवर्तन कुनै जादुको छडी होइन र यो कुनै एक व्यक्तिले मात्र गरेर सम्भव पनि हुन्न। केन्द्रीय महाधिवेशनमा तपाईंहरूले मत दिएर मलाई जुन चौथो स्थानको शक्ति र जिम्मेवारी दिनुभएको छ, त्यसलाई म गुल्मीको माटो र जनताको सेवामा सतप्रतिशत लगानी गर्नेछु।"
म छिट्टै नै हाम्रा गाउँ-गाउँ र टोल-टोलमा आउँदैछु। म आउनुअघि मेरो एउटा विनम्र अनुरोध छ— तपाईंहरू प्रत्येक पालिकाका सभापतिज्यूहरूले आफ्नो क्षेत्रका लागि आगामी ५ वर्षमा गर्न सकिने व्यावहारिक र ठोस योजनाहरूको सूची तयार पार्दै जानुहोस्। हामी सँगै बसेर, सँगै सल्लाह गरेर ती योजनालाई साकार पार्नेछौँ।
र अन्त्यमा, प्रश्न सोध्न र हामीलाई जिम्मेवार बनाउन कहिल्यै नछोड्नुहोला। तपाईंहरूका रचनात्मक प्रश्न, खबरदारी र मार्मिक सुझावले नै मलाई संसद् र केन्द्रीय समितिमा अझ बढी दृढताका साथ आवाज उठाउन ऊर्जा दिनेछन्।
आउनुहोस्, निराशालाई आशामा बदलौँ र आफ्नो गुल्मी आफैँ बनाौँ।
धन्यवाद! 🙏
माननीय सागर ढकाल
प्रतिनिधि सभा सदस्य, गुल्मी क्षेत्र नं.१
Sagar Dhakal Sagar Dhakal जिताउ अभियान
