Sagar Dhakal, Satyawati, Gulmi Tamghas (2026)

17/05/2026

" कसैले कहाँ को बौलायो नभन्नुस् है। " गुल्मीको एक किसान। १५०+ रोपनिबाट अब ३०००+ रोपनिमा जाँदै छौँ। यो शुरु भएको छ। हामी केही हप्ता अगाडी उहाँहरुसँग रातभरि नै बसेका थियौँ। व्यापारि, नेता वा ट्रेडर होइन उध्योगिलाई मेरो २४ सै घण्टा खुला छ, राति सुतेको बेलामा आएर उध्योगीले‌ मलाई उठाए पनि फरक पर्दैन।

14/05/2026

आज मात्र १२ घण्टा!!! ५ बर्षमा ??? संसदीय अभ्यास भन्दैमा बेलायतको हुबहु 'फोटोकपी' नै गर्नुपर्छ भन्ने छ र? अलि फरक तरिकाले सोचौँ न।

भारतमा साँझ ५ बज्दा बेलायतमा बिहानको करिब ११ बज्दो रहेछ। बेलायतले आफ्नो कार्यालय समयमा आनन्दले भारतको बजेट सुन्न मिलोस् भनेर त्यस्तो समय मिलाएको रहेछ। पछि, प्रधानमन्त्री वाजपेयीले यो परिपाटी पूर्ण रूपमा परिवर्तन गरिदिए र साँझको सट्टा बिहान बजेट ल्याउन थालियो। कल्पना गर्नुस्, यति सामान्य कुरा बुझ्न पनि भारतलाई बेलायती शासनबाट मुक्त भए पछि पनि ५२ वर्ष लाग्यो।५२ वर्षसम्म भारतले आफ्नो सामान्य विवेक समेत प्रयोग गरेन; जे छ त्यसैलाई सहेर बस्यो। एक हिसाबले मानसिक हत्कढी लगाएर बस्यो। कसैले फरक ढंगले सोचेन र 'यस्तै हो, यस्तै चल्नुपर्छ' भन्ने मानसिकता हाबी रह्यो।

मैले यसअघि जहाँ काम गर्दा पनि कहिल्यै यति लामा बैठकहरू गरेको थिइनँ—बढीमा २ घण्टा। तर राजनीतिमा लागेपछि बैठकै-बैठक, गफ र भाषणको ओइरो लाग्ने तर काम भने निकै कम हुने देखियो। गफ- भाषण र खानेपानीको समस्याको समाधान कुन ठाउमा गएर मिल्छ? अलिअलि बोल्नु त ठीकै हो, तर हाम्रो पूरै प्रणाली नै भाषण, बोली र तालीमा अड्किएको छ।

आज संसदमा नीति तथा कार्यक्रममाथि छलफल भयो। बिहान ११ बजे सुरु भएको बैठक राति करिब ११ बज्दा बल्ल सकियो। सबैजना हाई-हाई गर्दै पट्यारलाग्दो अवस्थामा पुगिसकेका छन्; शारीरिक र मानसिक रूपमा सबै थाकेका देखिन्छन्। नीति तथा कार्यक्रममा जम्मा १०० बुँदा छन्, जुन छोटकरीमा राख्दा करिब २० पेज मात्र हुन्छ। यदि यो काम वैज्ञानिक ढंगले गर्ने हो भने अहिलेको भन्दा निकै कम समयमा अझ बलियो नीति तथा कार्यक्रम ल्याउन सकिन्छ।
प्रतिपक्षको कडा भन्दा कडा आपत्तिलाई पनि विश्वभरका अनुसन्धानका आधार (Research Papers) प्रस्तुत गरेर वैज्ञानिक ढङ्गले निकै छोटो समयमा सुल्झाउन सकिन्छ।

यो बेलायतबाट आएको परम्परागत संसदीय अभ्यास वर्तमान युगमा कुनै पनि कोणबाट वैज्ञानिक छैन। परम्परा भन्दै चुप लागेर नबसौँ।

मैले आज धेरै सांसदहरूलाई सोधेँ, तर यसको चित्तबुझ्दो उत्तर कसैसँग रैनछ। धेरैको सुझाव यस्तो थियो— बोल्ने क्रममा 'प्रिजेन्टेसन स्क्रिन' राखौँ, नीति तथा कार्यक्रम सार्वजनिक नै हुन्छ, त्यसलाई 'गुगल डक्स' जस्ता प्लेटफर्ममा राखेर अनलाइनमै सबैको सुझाव लिऊँ। प्रजातन्त्र र विज्ञानमा प्रतिपक्ष नै आधार स्तम्भ हो। सुझाव पछि, हरेक बुँदामा ठुलो गोलो टेबुलमा बसेर 'रिसर्च पेपर'मा जस्तै गहन बहस गरौँ। यसो गर्दा आफ्नो सुझाव किन समेटिएन भन्ने विषयमा पनि छलफल हुन्छ र प्रक्रिया थप खुला, स्वच्छ र पारदर्शी बन्छ। प्रजातन्त्र निकै बलियो बन्छ।

हामीले विश्व इतिहासमै दुर्लभ रेकर्ड राख्ने युवा प्रधानमन्त्री पाएका छौँ। अब संसदीय अभ्यासलाई पनि—प्रजातन्त्रका आधारभूत खम्बाहरूको पूर्ण रक्षा गर्दै—वैज्ञानिक बनाएर विश्वलाई नै केही नयाँ सिकाउन सकिन्छ कि?

जे छ, त्यसलाई नै अकाट्य सत्य मान्नुपर्छ भन्ने छैन—चाहे त्यो सयौँ वर्ष पुरानो होस् या ५ वर्ष। म आफै बेलायतमै पढेको भन्दैमा बेलायतकै 'धङधङी' दिमागमा राखेर संसदमा बस्नुपर्छ भन्ने छैन। सधैँ पश्चिमा दृष्टिकोण मात्र बोक्नुपर्छ भन्ने पनि छैन।

अबको युग एसियाको युग हो र एसियाले बाँकी विश्वलाई सिकाउने सामर्थ्य राख्छ।बेलायतबाट सिक्ने मात्र होइन अब बेलायतलाई पनि सिकाउन सक्नुपर्छ।

भारतलाई सामान्य विवेक प्रयोग गर्न ५२ वर्ष लाग्यो, हामीलाई परम्पराको नाममा बसेको मानसिक हत्कडी हटाउन वा सुधार्न कति लाग्ने हो, त्यो हेर्न भने बाँकी छ।

🙏🙏🕉️🕉️🙏🙏

13/05/2026

"बोल्नुभन्दा काम गरेरै देखाउन पाए हुन्थ्यो"

कति धेरै काम गर्न बाँकी छ। जनता कति पीडामा छन्। साच्चै नै यो रातदिन नभनी, नबोलिकन काम गर्नुपर्ने समय हो। मलाई पनि सकेसम्म बोल्नै नपरे हुन्थ्यो भन्ने लाग्छ। जनताले हामीलाई काम गर्न पठाएका हुन् । प्रतिपक्ष जति बोल्दा पनि हुन्छ, हामीलाई बोल्न कम पारिदिए हुन्थ्यो। सदनमा पनि भाषण गर्नुभन्दा बरु वन्यजन्तु, खानेपानी, प्रविधि, ऊर्जा र सिँचाइ लगायतका नीति- योजनाहरू बनाउन मन पर्छ। कतै विवाह, व्रतबन्ध वा सभा-समारोहहरूमा पनि नबोलाइदिए हुन्थ्यो जस्तो लाग्छ।

मैले जीवनमा कहिल्यै बोलेर पेट पालेको वा कमाएको छैन। तर प्रतिपक्ष हाम्रो सोचको विपरीत ध्रुवमा हुनुहुन्छ। परिवर्तन ल्याउन हामी कटिबध्द छौँ, हामी आफ्नो क्षमताले भ्याएसम्म पक्कै राम्रो गर्छौँ।

हामी सबैभन्दा ठूलो दल र अभिभावकको भूमिकामा भएकोले सदन अवरुद्ध भएकोमा म क्षमाप्रार्थी छु। हामी सक्तिशालि‌ छौँ तर यो प्रमाणित गर्ने हाम्रो शालिनताले हो उग्रताले‌ होइन, संयमता र करूणाले हो। हामी यसमा सचेत छौँ।

प्रतिपक्षलाई मिलाएर र सहमतिमा ल्याएर भए पनि हामी जनताले चाहेको विकास दिनेछौँ।

सदन अवरुद्ध भएपनि काम भने निरन्तर चलिरहन्छ।

12/05/2026

अहिले रातिको १० कटिसक्यो, हामी अझै हजुरहरुकै लागि काम गरिरहेका छौँ। सोचे अनुसार अझै उपलब्धि हासिल हुन सकेको छैन । वैज्ञानिक रूपले काम गर्न पालिका तहका साथिहरुलाई धेरै तालिम दिनुपर्ने आवश्यकता छ। गर्नुपर्ने काम धेरै छन्। उपलब्ध समय र स्रोतको योभन्दा बढी सदुपयोग गर्ने अर्को ठाउँ छैन। सकेको प्रयाश गरिराखेकै छौँ।

08/05/2026

**अब डिजिटल आत्मनिर्भरता पनि!** 🇳🇵

ऊर्जा र खाद्यान्न जस्ता क्षेत्रमा मात्र आत्मनिर्भरताको पहल गरिरहँदा, डिजिटल आत्मनिर्भरतामा नेपालले पाइला चाल्न केही ढिलो भइसकेको थियो। अब हामी त्यो कमीलाई मेटाउँदै नयाँ सुरुवात गर्दैछौँ।

नेपालको आफ्नै डाटा, आफ्नै प्रविधि र आफ्नै एआईलाई अगाडि बढाउने तरखरमा छौँ! हामी नेपालको लागि Sovereign AI (सार्वभौम एआई) को विकास र प्रवर्द्धनमा जुटेका छौं।

यस महत्वपूर्ण कार्यको लागि हेम चौधरी, डा. सुदन झा, नव प्रवर्धनलाई विषेश पहल गर्ने मन्त्री र सहयोग गर्ने सबै साथिहरुलाई धन्यवाद।

07/05/2026

**न्यायालय मात्र होइन, अब सबै नियुक्तिहरू यसै गरी हुनेछन् **

अब उमेर र वरिष्ठतालाई मात्र होइन; काम, दृष्टिकोण (भिजन) र योग्यतालाई प्राथमिकता दिइनेछ। कपाल फुल्दैमा र अनुभवका बर्ष थप्दैमा उ उत्कृष्ट हुन्छ भन्ने मानसिकता त्याग्नु पर्छ। लगभग सबै मन्त्रालय र निकायहरूमा बुझ्दा के देखियो भने, जो-जो पहिलेको सिस्टममा वरिष्ठ हुनुहुन्छ, उहाँहरूको कार्यसम्पादन निकै नै कमजोर रहेको छ। न काम गर्ने जाँगर न परिवर्तन गर्ने अठोट।

प्रत्यक्ष अनुभव गर्दा पनि हामीले नियुक्ति अगाडी प्रस्तुतीकरण र योजना मागेका थियौँ; तर पुरानो प्रणालीमा 'अगाडि' रहेका व्यक्तिहरू यो नयाँ प्रणालीमा करिब 'अन्तिम' स्थानमा पर्नु हुँदो रहेछ। उदाहरण अहिलेका प्रधान न्यायाधीश नियुक्ति प्रक्रिया। सबै ठाँउमा यस्तै हो। वरिष्ठतम जति पहिलोमा होइन अन्तिम पर्नको लागि संघर्ष गर्नुहँदो‌ रहेछ।

यो पुरानो कामै नलाग्ने सिस्टममा प्रधानमन्त्रीले नै ठप्प ब्रेक लगाइदिनुभएकोम‌ा धेरै धेरै धन्यवाद।

अब यसरी चल्दै चल्दैन। यो प्रणाली पूर्ण रूपमा परिवर्तन हुनुपर्छ। अस्ति रिक्त रहेका १५०० भन्दा बढी पदहरूमा निमित्त नियुक्ति गर्दा पनि हामीले कम्तिमा सामान्य योजना, भिजन र कार्यसम्पादनको अनुभवलाई नै आधार बनाउने सोचेका छौँ।

हामी 'हाम्रो' होइन, 'राम्रो' छान्ने प्रणाली बसाल्दै छौँ। यसमा तपाईंहरू सबैको सहयोग र सकारात्मक साथको अपेक्षा गर्दछौँ।

02/05/2026

३ वर्षअघिका ३ एजेन्डा — १ एजेण्डा पूरा भयो, २ पुरा हुँदैछन्। ४० मुनिको प्रधानमन्त्री बनाउने लक्ष्य पूरा भयो। आज राष्ट्रपतिले अध्यादेश पारित गरेसँगै एकै झट्कामा करिब १,५०० (१,५९४) जनाको राज्य सन्चालन गर्ने पद खाली भएको छ जुन क्षमतामा होइन राजनीतिक रंगमा नियुक्त भएका थिए, देशलाई धमिराले जस्तै गरि खाएका थिए। अब यी पदहरू जमिनदेखि विश्व बुझेका नेपालीहरूको विज्ञताको आधारमा निष्पक्ष तरिकाले छान्दा मात्र देश अघि बढ्न थाल्छ। जम्मा १ महिनामै ३० वर्षमा नभएको काम हुँदैछ। जनताले लिएको परिक्षामा करिब ८०% हासिल हुँदा २०% पूरा भएको छैन, त्यसैले कतिपयलाई दुःख भएको छ, बुझेका छौँ,माफि पनि चाहन्छौँ।

हाम्रो उद्देश्य कसैलाई दुःख दिनु होइन, देशलाई अगाडि बढाउनु हो। सबैलाई सधैं खुशी पार्न सकिँदैन, तर यति कुरामा ढुक्क हुन सकिन्छ—आज हामी सबै खुशी नभए पनि, सल्यक्रियापछि रोग सन्चो हुँदा हामी सबै खुशी हुनेछौँ। माफ गर्नुहोस्, अब पनि रोग पालेर मृत्यु कुर्दै बस्न हुँदैन; अपरेसन गर्नै पर्छ, रोग हटाउनै पर्छ, जीवन जोगाउनै पर्छ।

देश अगाडि बढाउनै पर्छ। यो मौका अब कैहिल्यै फर्केर आउँदैन, गरेर देखाउनै पर्छ।

01/05/2026

अहिंसा परमो धर्म: शब्द होइन जीवन शैली बन्ने उत्प्रेरणा जागोस्

आज २५७० औं बुद्ध जयन्ती। बुद्ध केवल एक व्यक्ति होइनन्, बुद्ध एक विचार हुन्, एक शान्तिको मार्ग हुन्। मेरो जीवनको मूल मन्त्र पनि यही हो— कसैको मन नदुखाउनु, कसैको प्राणी हत्या नगर्नु र सात्विक जीवन जिउनु।

जहाँ जादा पनि मैले यो विचार जिवनमा प्रतक्ष उतार्ने प्रयास गरेको छु। एक जनप्रतिनिधिको रूपमा मेरो प्रयास सधैं समाजमा शान्ति र सन्तुष्टि फैलाउने रहनेछ।

सबैको मनमा बुद्धत्व जागोस्। बुद्ध जयन्तीको हार्दिक शुभकामना!

27/04/2026

** नाइट बसमा काठमाडौँतिर लागे **

यसपटक होटलमा लगभग बसिएन; अधिकांश समय कृषकको घरमा बास बसेर उहाँहरूका दुखेसो सुनेँ। "६ महिनामा एक पटक त आउनुहुन्छ नि?" भन्ने जनताको प्रश्नमा मैले "त्योभन्दा धेरै छिटो आउनेछु" भनेको थिएँ। अहिले त्यही बाचा पूरा गर्दै छु।

यसपालि सबै ठाउँमा पुग्न सकिनँ, तर समय मिलाएर बिस्तारै सबैतिर पुग्ने नै छु र हजुरहरूका आवाज सुन्दै जानेछु। अब तिनै आवाज र समस्याहरूको समाधान खोज्न काठमाडौँतर्फ जाँदै छु। छिट्टै फेरि भेट्ने बाचासहित!

हजुरको सेवक,
सागर ढकाल

26/04/2026

** रात- दिन उद्यमीसँग ** गुल्मी र स्याङ्जामा **

हाम्रो पहिलो पहिलो र पहिलो प्राथमिकता नै उद्योग र उद्योगी हुन्। राजनीति र विश्वविद्यालय चलाउने नै उद्योग हो। अब १००-१५० रोपनिका साना मोडेल १० गुणा होइन कम्तिमा १०० गुणा कसरि बनाउने भनेर सोच्नु पर्नेछ। गफ होइन काम सुन्न म जुनसुकै समय रात-दिन जति टाढा भएपनि तपइकै ठाँउमा आउन तयार छु । सबै मिलेर देश बनाउँ।

20/04/2026

गुल्मीमा काफल पाक्यो । अब विकास निर्माणको काम पनि शुरु हुँदैछ। सबैले सिस्टम पालना गरौँ है। पार्टी र पालिका दुवैको संरचना छ, आवाज राख्नु होला । म पनि आवाज सुन्न हजुरको गाउँ घर आएको छु।

Sagar Dhakal

17/05/2026

14/05/2026

13/05/2026

12/05/2026

08/05/2026

07/05/2026

02/05/2026

01/05/2026

27/04/2026

26/04/2026

20/04/2026

Address

Website

Alerts

Contact The Organization

Shortcuts

Share

Category