नेपालको कुल क्षेत्रफल मध्ये १.७३% भू-भाग ओगटेको सिन्धुपाल्चोक जिल्ला मध्यमाञ्चल विकास क्षेत्रको १९ वटा जिल्लाहरु मध्ये क्षेत्रफलका दृष्टिले सबैभन्दा ठूलो (२५४२ वर्ग कि.मि.) जिल्ला हो । यस जिल्लाको क्षेत्रफल २५४२ वर्ग मि.मि. रहेको छ । विश्व मानचित्रमा २७.२७ डिग्री देखि २८.१३ डिग्री उत्तरी अक्षांश र ८५.२७ डिग्री देखि ८६.०६ डिग्री पूर्वी देशान्तरसम्म फैलिएर रहेको छ । यस जिल्लाको पूर्वमा मित्र राष्ट्र
चीनको स्वशासित क्षेत्र तिव्वत र दोलखा जिल्ला रहेको छ । दक्षिणमा काभ्रेपलाञ्चोक र रामेछाप जिल्ला, पश्चिममा काठमाडौं र नुवाकोट जिल्लालाई छोएको छ भने उत्तर तर्फ रसुवा जिल्ला र चीनको स्वशासित क्षेत्र तिब्बतसँग जोडिएको छ । सदरमुकाम चौतारा समुद्री सतहबाट १४१८ मिटरको उचाईमा अवस्थित छ । जिल्लाको पुर्व पश्चिम तर्फो औसत चौर्डाई ४९.३८ कि.मि. र उत्तर दक्षिण तर्फो औसत लम्बाई ५३.०६ कि.मि. रहेको छ ।
सिन्धुपाल्चोक जिल्ला प्राकृतिक सम्पदा र सुन्दरताका दृष्टिले अधिराज्यका उत्कृष्ठ जिल्लाहरुको दाँजोमा आउँदछ । यस जिल्लाका प्रमुख प्राकृतिक विशेषताहरुमा जलश्रोत, जङ्गल र हिमाली टाकुराहरु प्रमुख हुन् । तातोपानी धारा, बञ्जीजम्प र हेलम्बु लगायतका सु-विख्यात पर्यटकीय स्थलहरुको उपस्थितिले जिल्लाको पहिचानलाई देश भित्र र देश बाहिर समेत उजिल्याएको छ । जिल्लाको उत्तरमा रहेको चर्चित भन्सार विन्दु तातोपानी यसै जिल्लामा पर्दछ । कोदारी राजमार्ग मुलुकका लागि प्रमुख पारवहन मार्ग हो भने जिल्लाका निम्ति गौरव गर्ने विषय वनेको छ ।
जिल्लाको कुल भू-भाग मध्ये लाङटाङ राष्ट्रिय निकुञ्जले करिब एक चौथाई भूभाग ओगटेको छ । शिवपुरी राष्ट्रिय निकुञ्जको सानो क्षेत्र समेत यस जिल्लामा पर्दछ । लाङपोघ्याङ (२३२३८ फिट) जिल्लाकै सबभन्दा अग्लो टाकुरा हो भने साँगाचोक गा.वि.स. स्थित माझीगाउँ र बिन्दीटार आसपास सुनकोशी नदीतटमा सबभन्दा होचो -२४५० फिट) भूसतह रहेको छ । भोटेकोशी, सुनकोशी, इन्द्रावती, बलेफी, मेलम्ची, सिन्धुखोला, हाँडीखोला, झयाँडीखोला, महादेवखोला आदि यहाँका प्रमुख नदीनाला तथा खोलाहरु हुन् ।
