18/11/2022
प्रेस विज्ञप्ती
आदरणीय भक्तपुरका आम मतदाताहरु,
भक्तपुर क्षेत्र नं. २ प्रतिनिधि सभा सदस्य र प्रदेश सभा सदस्य भक्तपुर क्षेत्र नं. २ (क) का लोकतान्त्रिक बाम गठबन्धनका साझा उम्मेदवारहरु जिल्ला सभापति दुर्लभ थापा र महासमिति सदस्य बिष्णुराज कार्की विरुद्ध एक अनलाइन पोर्टल एभरेष्ट मिशन डटकममा प्रकाशित समाचार प्रति नेपाली कांग्रेस भक्तपुरको गम्भिर ध्यानाकर्षण भएकोछ ।
समाचार जुन तल्लो स्तरको गाली गलौजको शैलीमा प्रकाशन भएकोछ, यसले पत्रकारिताको मर्यादा, आचार संहिता र निर्वाचन आचार संहिता २०७९ विपरित रहेकोछ ।
भक्तपुरमा तेब्बर मतान्तरले जित्ने दावी गर्दै आएकाहरु निर्वाचनमा हार निश्चित भएपछि आफ्ना नजिकका अनलाइन मार्फत तल्लो स्तरको गाली गलौजमा उत्रेको, कांग्रेस र उसका उम्मेदवारको चरित्र हत्यामा उत्रेको कांग्रेसको ठहर छ ।
विगतमा भक्तपुर अस्पतालका मेसु मार्फत अस्पताल निर्माणमा भइरहेको कार्यबाट खाइरहेको कमिशन बन्द भएको, हनुमन्ते करिडोरका नाममा भएको अनियमितता सार्वजनिक भएको, नेपाल इन्जिनियरिङ कलेज आफ्नो स्वार्थ अनुरुप सञ्चालन गर्न नपाएको, गुण्डुमा यातायात कार्यालय निर्माणमा कमिशन खान नपाएको, विगतमा आफुले गरेको वाचा अनुसार जनतालाई खानेपानी उपलब्ध गराउन नसकेको कारण जनताबाट तिरस्कृत हुने अवस्था आएपछि निर्वाचनको मौन अवधी शुरु हुनै लाग्दा नेकपा एमाले र महेश बस्नेत लगायत केही कांग्रेस माथि दोष थोपारेर पानी माथिको ओभानो बन्न खोजेको कांग्रेसको ठहर छ ।
पहिला आफ्ना आसेपासेलाई सस्तो दरमा जग्गा किन्न लगाउने त्यसपछि बजेटको व्यवस्थापन नभई विर अस्पताल निर्माणको योजना राख्ने र सोही कारण देखाउँदैं महँगोमा जग्गा बिक्रि गरी खाएको कमिशनका कारण अफ्ठ्यारो स्थिती उत्पन्न भएपछि त्यसबाट जोगिन एमालेले कांग्रेसले विर अस्पताल बन्न नदिएको भनी भ्रम सिर्जना गर्न खोजेको छ ।
यसैगरी पहिला हनुमन्ते खोलाको धार परिवर्तन गर्न नदिने पक्षमा आन्दोलन गर्ने र धार परिवर्तन गर्नेलाई भूमाफियाको संज्ञा दिएका महेश बस्नेत आफैं नेतृत्व गरी हनुमन्ते करिडोरका नाममा खोला सार्ने कार्यको नेतृत्व गरेर भूमाफियाको नाईके प्रमाणित भएको तथ्यलाई धाकछोप गर्न एमाले गाली गलौज जस्तो तल्लो स्तरको राजनीतिमा ओर्लिएको हो । कांग्रेस नेतृत्वको सरकारले भक्तपुरका कुनै पनि योजनाको बजेट कटौती नगरेको तथ्य पनि स्पष्ट पार्न चाहन्छौं ।
सूर्यविनायक नगरपालिकामा नेकपा एमालेकै नेतृत्व र बहुमत रहेको छ । यस तथ्यलाई बंग्याएर उपभोक्ता समितिमा दलका कार्यकर्ता पोसेको भन्नु कतिको साँचो हो, जनता स्वयम्ले प्रष्टसँग बुझेको छ ।
कांग्रेसमा अहिले अभुतपुर्व सहकार्य र एकता रहेको छ । कांग्रेसमा मात्र होइन गठबन्धनमा रहेका दलहरुबीच समेत बलियो एकता र सहकार्य रहेको छ । यसबाट त्रसित विपक्षीहरु कांग्रेस र गठबन्धनमा रहेका दलहरुलाई भाँड्ने षडयन्त्र गरिरहेका छन । यही षडयन्त्रबाट चुनाव जित्न सकिन्छ भन्ने मानसिकतामा रहेको छ ।
जिल्ला सभापति दुर्लभ थापा विभिन्न पेशा व्यवसायमा संलग्न भएको जानकारी गराउँदैं आफ्नै पौरखको कमाईले विद्युतीय गाडी र जग्गा खरिद गर्न सकिने तथ्य जगजाहेर हुँदा हुँदैं उम्मेदवारको टिकट खरिद बिक्री गरेर विद्युतीय गाडी र जग्गा उपहार लिएको भनी भ्रम सिर्जना गर्न खोजेको कांग्रेसको ठहर छ ।
समाचारमा भक्तपुर क्षेत्र नं. २ (क) प्रदेश सभा सदस्यका उम्मेदवार विष्णुराज कार्कीप्रति लक्षित गरी अस्पताल जस्तो पवित्र व्यवसाय गरी भक्तपुरलगायत छिमेकी जिल्लाबासीलाई समेत सरल, सहज र सुपथ मूल्यमा अत्याधुनिक स्वास्थ्य सेवा उपलब्ध गराउँदैं आएको तथ्यलाई बंग्याएर विपक्षी दल र उम्मेदवार भ्रमको राजनीतिमा उत्रेको छ ।
कांग्रेस कुनै पनि भ्रमको राजनीतिबाट अलग रहेको छ र रहिरहन्छ । कांग्रेस कुनैपनि अनियमितता र भ्रष्टाचारको खिलापमा रहेको छ । कांग्रेस जुनसुकै घटनाको छानविन गरी कानुन बमोजिम कारवाही हुनुपर्छ भन्ने मान्यता राख्दछ । कांग्रेस त्यसमा सहयोग गर्न सदैव तयार समेत रहन्छ ।
अन्त्यमा,
विगतमा आफ्नो गलत आचरण र गैर राजनीतिक क्रियाकलापबाट आफ्नो प्रतिष्ठामा आँच पुग्ने निश्चित भइसकेकपछि त्यस्ता घटनालाई धाकछोप गर्न विपक्षी उम्मेदवारको चरित्र हत्या गर्ने उद्देश्यले प्रायोजित रुपमा अनेक लाञ्छना लगाउने जस्तो तल्लो स्तरको गैरराजनीतिक क्रियाकलापमा उत्रेका दल र तीनका उम्मेदवारको विपक्षमा मतदान गरी मंसिर ४ गते आफ्नो अमूल्य मत मार्फत गतिलो जवाफ दिन कांग्रेसले आम मतदातालाई आग्रह गर्दछ ।
जय नेपाल !
प्रवक्ता
रविन्द्र प्रधान
२०७९ मंसिर १, भक्तपुर !
