19/05/2026
सुरक्षित वैदेशिक रोजगारी सम्बन्धी अभिमुखीकरण कार्यक्रम
सूर्यविनायक नगरपालिका आयजना र रोजगार शाखा र सुरक्षित आप्रवासन केन्द्र (सामी परियोजना) को सहकार्यमा सुरक्षित वैदेशिक रोजगारी तथा वैदेशिक रोजगारसम्बन्धी सेवालाई प्रभावकारी र संस्थागत बनाउने उद्देश्यले अन्तरक्रिया तथा अभिमुखीकरण कार्यक्रम सम्पन्न गरिएको छ।
नगरपालिकाले वैदेशिक रोजगारमा जाने नागरिकहरूको सुरक्षा, सहजीकरण तथा अधिकार संरक्षणलाई प्राथमिकतामा राख्दै सञ्चालन गरेको उक्त कार्यक्रममा नगरपालिकाभित्रका वडा अध्यक्षहरू , कार्यपालिका सदस्यहरू, शाखा प्रमुखहरू, वडा सदस्यहरू, मेलमिलापकर्ताहरू तथा विभिन्न सरोकारवालाहरूको सहभागिता रहेको थियो।
कार्यक्रममा बोल्दै उपप्रमुखले सुरक्षित वैदेशिक रोजगारी केवल वैदेशिक रोजगारमा जाने प्रक्रियासँग मात्र सीमित नभई नागरिकको सुरक्षा, सूचना पहुँच, कानुनी सहजीकरण तथा स्थानीय तहको जिम्मेवारीसँग जोडिएको विषय भएको हुनाले नगरपालिकाभित्र रहेका सम्पूर्ण शाखा, जनप्रतिनिधि तथा वडा तहसम्म समान बुझाइ र समन्वय आवश्यक रहेको भन्दै यही उद्देश्यका साथ कार्यक्रम आयोजना गरिएको स्पष्ट पार्नुभयो।
सूर्यविनायक नगरपालिकाबाट हालसम्म करिब ८ सय ५० व्यक्ति वैदेशिक रोजगारीमा गएको तथ्य उल्लेख गर्दै उनीहरूको अवस्था, समस्या तथा आवश्यकताको तथ्याङ्क संकलन गरी व्यवस्थित अभिलेख तयार गर्ने विषयमा छलफल गरिएको जानकारी दिनुभयो। उहाँले वैदेशिक रोजगारीका क्रममा विभिन्न समस्या, ठगी, दुर्घटना, उद्वार तथा मृत्युजस्ता दुःखद घटनामा परेका व्यक्तिहरू र तिनका परिवारलाई आवश्यक सहजीकरण गर्ने कार्य सुरक्षित आप्रवासन केन्द्रमार्फत गरिने र त्यसको समन्वय नगरपालिको रोजगार शाखाले गर्ने बताउनुभयो।
उहाँका अनुसार न्यायिक समिति अन्तर्गत प्रत्येक वडामा रहेका मेलमिलापकर्ताहरूले वैदेशिक रोजगारमा जान लागेका, विदेशमा समस्यामा परेका वा परिवारजनलाई कानुनी सहजीकरण आवश्यक परेका व्यक्तिहरूलाई सम्बन्धित निकायसम्म पुर्याउने र आवश्यक सहयोग उपलब्ध गराउन महत्वपूर्ण भूमिका खेल्नेछन्। सोही कारण दसवटै वडाका मेलमिलापकर्ताहरूलाई कार्यक्रममा सहभागी गराइएको बताइएको छ।
आर्थिक विकास समितिका संयोजकको अध्यक्षतामा सम्पन्न उक्त कार्यक्रममा वडा अध्यक्षहरू, सामाजिक विकास समितिका संयोजक, नगर प्रवक्ता, विधायन समितिका संयोजक लगायतले
नेपालको संविधानले रोजगारीको हक सबै नागरिकलाई सुनिश्चित गरेको उल्लेख गर्दै स्थानीय तहको प्राथमिकता स्थानीय स्तरमै रोजगारी सिर्जना गर्नु रहेको धारणा राख्नुभएको थियो। तथापि व्यक्तिगत इच्छा, आवश्यकता तथा बाध्यताका कारण वैदेशिक रोजगारीमा जाने नागरिकहरूको संख्या बढिरहेको सन्दर्भमा उनीहरूलाई सुरक्षित, व्यवस्थित र मर्यादित वैदेशिक रोजगारतर्फ अभिमुख गराउन आवश्यक रहेकोमा जोड दिइएको थियो।
उहाँहरूले सुरक्षित आप्रवासनसम्बन्धी साझा कार्ययोजना निर्माण, वडा तहको सक्रिय भूमिका, नागरिकमा सचेतना अभिवृद्धि तथा सम्बन्धित निकायबीच प्रभावकारी समन्वयात्मक कार्यप्रणाली विकास गर्नुपर्ने आवश्यकता औंल्याउँदै वैदेशिक रोजगारमा जाने व्यक्तिहरूलाई समयमै सही सूचना, परामर्श र सहजीकरण उपलब्ध गराउन स्थानीय तहको भूमिका महत्वपूर्ण रहने बताउनुभएको थियो।
कार्यक्रममा सामी परियोजनाको तर्फबाट कार्यक्रम संयोजकले कार्यपत्र प्रस्तुत गर्दै वैदेशिक रोजगारमा जाने व्यक्तिहरूलाई प्रदान गरिने अभिमुखीकरण, सूचना तथा परामर्श सेवा, सुरक्षित आप्रवासनसम्बन्धी जनचेतनामूलक कार्यक्रम, सीप विकास तथा संकटमा परेका नागरिकहरूको सहजीकरणका विषयमा विस्तृत जानकारी दिनुभएको थियो। साथै वैदेशिक रोजगारका क्रममा हुने सम्भावित जोखिम न्यूनीकरण, ठगीबाट बच्ने उपाय तथा स्थानीय तहबाट प्रदान गर्न सकिने सहयोगका विषयमा समेत छलफल गरिएको थियो।
नगरपालिकाले आगामी दिनमा प्रत्येक वडाबाट वैदेशिक रोजगारमा गएका व्यक्तिहरूको अवस्था अद्यावधिक गर्ने, सुरक्षित वैदेशिक रोजगारीबारे स्थानीय स्तरमै सूचना प्रवाह गर्ने तथा समस्यामा परेका नागरिक र परिवारलाई प्रभावकारी सेवा उपलब्ध गराउने प्रतिबद्धता जनाएको छ।
