07/07/2026
हाल बागलुङ जिल्लाका विभिन्न खानेपानीका मुहानहरूको परीक्षण गर्दा केही मुहानहरूमा कोलिफर्म (Coliform) जीवाणु भेटिएको छ( ३६९ मुहानको परीक्षण गर्दा ७७ वटा मुहान पोसेटिभ)। यसै अवधिमा हाम्रो अस्पतालमा पखाला, पेट दुख्ने, ज्वरो आउने, वाकवाकी लाग्ने, खाना नरुच्ने तथा आँखा र शरीर पहेँलो हुने लक्षण भएका बिरामीहरूको संख्या उल्लेखनीय रूपमा बढेको छ। आवश्यक स्वास्थ्य परीक्षणका क्रममा केहि बिरामीमा हेपाटाइटिस ए (Hepatitis A) संक्रमण पुष्टि भएको छ। अनुसन्धानबाट संक्रमितमध्ये धेरैजसो व्यक्तिहरू एउटै समुदायका रहेको र एउटै खानेपानीको मुहान प्रयोग गर्ने गरेको तथ्य पनि देखिएको छ।
यस अवस्थालाई मध्यनजर गर्दै यस अस्पतालका मेडिकल अधिकृत डा सन्दिप केसी लगायत, स्वास्थ्य कार्यालय बागलुङ तथा सम्बन्धित स्थानीय तहको स्वास्थ्य शाखाको टोलीले संयुक्त रूपमा प्रभावित क्षेत्रमा स्थलगत निरीक्षण, खानेपानीको गुणस्तर परीक्षण, विद्यालयहरूमा स्वास्थ्य शिक्षा तथा जनचेतना कार्यक्रम सञ्चालन गरिरहेका छन्। साथै सुरक्षित खानेपानीको प्रयोगबारे जानकारीमूलक सामग्री वितरण तथा समुदायस्तरमा सचेतना अभिवृद्धि गर्ने कार्य पनि भइरहेको छ।
यस अवसरमा सम्पूर्ण नागरिकहरूलाई केही महत्वपूर्ण स्वास्थ्य सन्देसः
१ः पहिलो, मुहान, धारा वा खोलाबाट आएको पानी सिधै नपिउनुहोस्। पानीलाई कम्तीमा १ देखि ३ मिनेटसम्म राम्रोसँग उमालेर मात्र पिउनुहोस् वा प्रमाणित शुद्धीकरण विधि अपनाउनुहोस्।
२ः दोस्रो, खानेपानी राख्ने भाँडालाई सधैं सफा र ढाकेर राख्नुहोस्। सफा पानी पुनः दूषित हुन नदिन विशेष ध्यान दिनुहोस्।
३ः तेस्रो , खाना खानुअघि, शौचालय प्रयोग गरेपछि र खाना बनाउनुअघि साबुनपानीले कम्तीमा २० सेकेन्डसम्म राम्रोसँग हात धुनुहोस्।
४ः चौथो, खाना राम्रोसँग पकाएर मात्र खानुहोस् र सफा तथा सुरक्षित खाद्य पदार्थको प्रयोग गर्नुहोस्।
५ः पाँचौं, खुला दिसा नगर्नुहोस् र आफ्नो घर तथा वरपरको वातावरण सफा राख्नुहोस्। व्यक्तिगत र सामुदायिक सरसफाइले धेरै संक्रामक रोगहरूबाट बचाउन मद्दत गर्छ।
यदि तपाईं वा तपाईंको परिवारका कसैलाई पखाला, ज्वरो, पेट दुख्ने, वाकवाकी लाग्ने, खाना नरुच्ने वा आँखा तथा शरीर पहेँलो हुने जस्ता लक्षण देखिएमा घरमै बसिरहनु हुँदैन। तुरुन्त नजिकको स्वास्थ्य संस्थामा सम्पर्क गरी चिकित्सकको सल्लाह अनुसार उपचार गराउनुहोस्।
सम्पूर्ण बागलुङवासी तथा सबै नेपाली दाजुभाइ तथा दिदीबहिनीहरूलाई विनम्र अनुरोध छ—
मुहानको पानी सफा देखिए पनि त्यसमा आँखाले नदेखिने रोग सार्ने सूक्ष्म जीवाणु हुन सक्छन्। त्यसैले सुरक्षित, उमालेको वा उचित रूपमा शुद्धीकरण गरिएको पानी मात्र पिउने बानी बसालौं।
सुरक्षित खानेपानी हाम्रो साझा जिम्मेवारी हो। स्वस्थ परिवार, स्वस्थ समाज र स्वस्थ नेपाल निर्माणका लागि सबै मिलेर सुरक्षित खानेपानीको प्रयोग गरौं।
धन्यवाद। नमस्कार 🙏🙏
