13/08/2026
HORTENSIA - Hydrangea - fine om hausten
Hortensia er ei plante eg vaks opp med:
Mor og far hadde ei klatrehortensia som framleis er i god vekst ved vegmuren på Bleievegen bort mot brua.
Og så er det litt større buskane av syrenhortensia - kvite blomar som lyser lang veg i alt det grøne no.
Foreldra mine hadde også ei hagehortensia med fine ljoseblå blomar.
Kun ei.
Den måtte me prøva å flytta då ein bygde litt på gardshuset i 1990-åra - den var då så gammal og stor at ei gravemaskin gjorde det.
Til mi fortviling datt den heilt ifrå kvarandre, og eg trudde den var gåen for godt. Det var den slett ikkje.
For nesten kva einaste grein hadde sine eigne røter!
"Er der liv er der håp" tenkte eg ... og stappa dei i jorda.
Resultatet er at no har denne eine planta blitt til ca 15 nye spreidd rundt i tun og hage - og lyser så flott no med med sine himmelblåe blomer.
For meg er desse eit fint minne etter foreldra mine - og barndomens hage 🩵💙
----------------------------------
Den andre hortensiaen på bileta her har også ein artig historie.
Den var ei lita potteplante av stovehortensia som overlevde ein vinter -- og eg fann ut eg skulle berre planta og sjå kva det vart utav den.
I fleire år stod den berre der og tudra .. overlevde så vidt. Men så sette den i gang med å veksa , utan at eg hadde gjort noko spesielt.
No dekkar den snart fleire meter i diameter - om den hadde fått lov - eg må faktisk skjera av den for å halde vekst i sjakk.
Men den får lov å vida seg utover på bålpanneplassen ved elva og apeskrekken, for den har nokon aldeles nydelege blomar: først kvitaktige som endrar seg til lilla og fiolett - og den er snart eit syn no når dei alle kjem ut. 🩷💜
Og - eg anar ikkje kva sorten heiter. Men den er ei fantastisk haustplante i hagen.
Vil prøva laga meg fleire av denne.
.. og ja, det kunne vore luka litt meir ein del stader i hagen, men håpar de ser det som er vakkert likevel.
Armane min har hatt sine avgrensingar i lengre tid - mange år - men no har eg fått klarsignal etter kontroll av nye protesar i begge skuldrar; " ingen restriksjonar lenger" 🥰
Det betyr likevel ikkje at eg har fått att all mobilitet, og langt i frå styrke .. det kjem vel aldri tilbake slik det var -- men det går framover både med meg og hagen -- om enn begge deler kanskje må ha eit år til på seg 💚💛
