Fureneset forskingsstasjon ligg ved kysten i Fjaler kommune i Sogn og Fjordane. Lokaliseringa er representativ for kystsona i midtre og ytre fjordstrok på Vestlandet, med milde vintrar, mykje nedbør og vind. Det har vore drive forsking på Fureneset sidan 1938. Arbeidsområde:
Hovudarbeidsområdet for medarbeidarane ved Fureneset er drenering, husdyrgjødsel, auka arealproduktivitet i grovfôrdyrking, klimatilpassing av gras og kløver, klimagassemisjon og skjøtsel av kulturlandskap. Fureneset har arbeidd mykje med spørsmål knytt til regionen Vestlandet. Fureneset vart oppretta i 1938, og det vart då vist til at ein særleg skulle dekka Hordaland, Sogn og Fjordane, Sunnmøre og delar av Romsdal. Jord, skog og forsøksfelt:
Jorda på Fureneset er mykje morenejord, dominert av kornfraksjonane sand og silt, og med eit lite og vekslande innslag av leire. Noko av morenejorda var i utgangspunktet karakterisert som grunn myr, men er no etter lengre kultivering mineraljord med moderat til høgt innhald av organisk materiale i matjordlaget. Noko av arealet er djup organisk jord, men her også med morenejord under. På Fureneset er det i drift tre forsøksfelt under gruppa langvarige tidsseriar, som har synt seg å vera interessante i forsøkssamanheng dels ut frå andre grunnar enn det dei i si tid var lagt ut for at ein skulle granska. Det er to felt lagt ut på organisk jord, det eine er tilført stigande mengde morenejord og skjelsand i overflata ved etablering (1977). Det andre er også lagt ut på organisk jord, middels djup med mineraljord under. Her er dyrkingsmåten omgraving med skråstilte lag (1977). Det siste er eit felt lagt ut i 1972 der ein granskar effekten av ulik lengde på engomløp;
•Kortvarig eng (3 år)
•Middels omlaupstid (6 år)
•Langvarig eng (fornya etter ca. 20 år)
•Varig eng
Desse felta er i dag nytta til å granska klimagassemisjon etter ulik dyrkingsmåte og driftsopplegg, og til å granska karbondynamikk i jord. Dyrka areal på Fureneset er om lag 230 dekar. Av dette vert om lag 90 dekar nytta til forsøksareal, inkludert areal i «kvileår» mellom forsøksperiodane. Størst areal vert nytta til grasfelt på oppdrag for GRAMINOR, dette omfattar m.a. såkalla «vestleg utprøving» av nytt sortsmateriale. Fureneset leiger også areal til forsøksfelt innanfor drenerings-, jordfysikk- og klimagasspørsmål. Dette gjeld dreneringsfelt, eitt med tradisjonell grøfting i Askvoll der det er bygd ut med ei omfattande instrumentering (12 dekar), og eitt felt med omgraving som dreneringsmåte i Fræna, Møre og Romsdal (3 dekar). Det er fleire samarbeidspartar med i dette prosjektet, som har hovudfinansiering frå NFR (FFL/JA), men med ei betydeleg medfinansiering frå næring og region på Vestlandet (fylkesmenn og fylkeskommunar), og eigenfinansiering frå NIBIO. Fureneset har også lysimeteranlegg, men dette er ikkje i forsøksmessig drift no. Jordarealet (ca. 120 dekar) som ikkje vert nytta til forsøksareal vert leigd bort til gardbrukarar i området. Utmarksarealet består både av areal som kan dyrkast, og av skog. Skogen er dels naturleg bjørk- og furuskog, dels planta skog av gran, sitkagran, furu (kystfuru), contortafuru og buskfuru/bergfuru. Ein god del av plantingane er leplantingar som tek av for framherskande vindretningar og som har betra det lokale klimaet. Bygg og infrastruktur:
Då Fureneset fekk nytt kontor og laboratoriebygg i 1994, var dette kompakt bygd og innreia. I kjellaretasjen er det arbeidsrom for grasprøver/handtering av grasforsøk med tørkeskap, hakke og mølle m.m. I første høgd er det innreia for laboratorium (jordlab., og det som i si tid var laboratorium for planteforedling m.a. med sterilbenk), i tillegg til nokre kontor. Andre høgd er rein kontorhøgd, og i loftsetasjen er det møterom. Det er også eit veksthus på Fureneset, opphaveleg bygd til grasforedling, men no meir sporadisk nytta. I kjellaren er det arbeidsrom med tørkeskap for grasprøvar, og kjøle- og fryserom. Fureneset er bra utstyrt for feltforsøk i jord- og plantekultur, både kva gjeld maskiner og teknisk utstyr elles. Nettverk og samarbeidspartnarar:
Norsk Landbruksrådgjeving (NLR) Vest og TINE leiger kontorplass på Fureneset. NLR er også ein viktig samarbeidspartnar. Elles har Fureneset hatt tett og nært samarbeid med Fylkesmannen i vestlandsfylka, dette har gjeve grunnlag for fleire prosjekt med finansiering frå NFR, særleg, FFL/JA, og elles frå SLF. Samarbeidspartar elles er Universitetet i Bergen, NMBU, Høgskulen i Sogn og Fjordane, Klimadirektoratet (tidlegare DirNat), og GRAMINOR. Samarbeidet med andre einingar i NIBIO har vore omfattande, og dette ligg til grunn i den nye modellen. Samarbeidsråda for landbruket i Hordaland og Sogn og Fjordane har ein eit tett og godt samarbeid med, sameleis i Møre og Romsdal, men der litt meir lausleg organisert
