20/03/2021
နောက်ဆုံးတိုက်ပွဲ ဆီသို့ ... ။
________________________________________________
အညံ့မခံခဲ့တဲ့ ( မြို့ )
သိင်္ဂုတ္တရ ကုန်းတော်ပေါ်က
အသာစီး ကြည့်လိုက်ရင်ဖြင့်
ရန်ကုန် ဆိုတာ လှလိုက်ပါဘိသနဲ့
သူ့ကျောပေါ်မှာ လွယ်ပိုးထားတဲ့ သမိုင်းက
ခေတ်ကို အစုန် / အဆန် ခရီးနှင်ခဲ့တာပေါ့ ။
လှိုင်မြစ် နဲ့ ပဲခူးမြစ်
ပုဇွန်တောင်ချောင်း ဆုံတဲ့ အရပ်ဆီက
ရေလမ်းနဲ့တသွယ် ကုန်းလမ်းနဲ့တနည်း
ရေချိုခရီးလား / ရေငန်ခရီးလား
ဘယ်ခရီးကို နှင်နှင် ခရီးတွင်သတဲ့
ပင်လယ်ဝနဲ့ အကွာအဝေး က ( ၁၉ )မိုင်
ရေအရှင်သုံးခွဆိုင်မှာ မုဆိုးထိုင် ထိုင်လို့ ။
ရန်ကုန်က ကြီးတယ်တို့
ရန်ကုန်က ကျယ်တယ်လို့
ငါတို့တော့ မပြောမိကြပါဘူး
ကျောချစရာတနေရာရဖို့ မလွယ်မှန်းသိတယ်
ရန်ကုန်ဆိုတာ ပညတ်အမည် တခုပါပဲ
ဘဝတွေ တသွင်သွင် စီးဆင်းနေတာနေ့နေ့ညည ။
အခုလည်းကြည့် !
ပျားပန်းခပ် နေတဲ့ လူတွေမရှိတဲ့ည
ဘယ်မှာလဲမြို့တော် ဘယ်မှာလဲမြို့ကြီး
ကတ္တရာလမ်းမတွေက ကျောပြောင်ကြီးတွေနဲ့
တနေ့လုံး ပူခဲ့သမျှ အေးအေးလူလူ အနားယူလို့
" လူမရှိတဲ့ပွဲတော်ကြီးကို " ဆင်နွဲနေကြသတဲ့
ပြည်လမ်းက ပြုံးလို့ ကမ်းနားလမ်းက မော်လို့
အင်းယားက လှိုင်းကြက်ခွပ် တွေနဲ့ မြူးလို့ ။
ရန်အပေါင်းကို ကုန်စင်စေဖို့
ရန်ကုန်လို့ အမည်ပေးခဲ့သတဲ့
သို့ပေမယ့် ....
များလိုက်တဲ့ (ရန်) မဟန်လှပါဘူး
ရသမျှတော့ (ခံချ)တဲ့ ပြည်သူတွေက မနည်းမနော
တချိန်ချိန်တော့ ...
( ရန် ) တွေလည်း ( ကုန် ) နိုင်ကောင်းပါရဲ့ ။
နောက်ဆုံးတော့ ရန်တွေကုန်မှာပါ
အဲ့ဒီအခါကျမှ ( ရန်ကုန် ! ဟေ့ ) လို့
ပြည်လမ်းပေါ်ကတက်ပြီး အော်အော်
ကမ်းနားလမ်းပေါ်က အော်အော်
လမ်းမတော်က အော်အော်
ကြိုက်သလိုသာ အော် ..
အညံ့မခံခဲ့တာကို ကျေးဇူးတင်နေမှာ ။
___________________________________________
ညိုမောင်
၁၆၊ မတ်လ ၊ ၂၀၂၁
