30/10/2025
https://www.facebook.com/share/17JHdP4As8/
နွေဦးတော်လှန်ရေးထဲမှာ ငွေကြေးနဲ့ပတ်သက်ပြီး မရိုးသားမှုများစွာရှိခဲ့တာကြောင့် တော်လှန်ပြည်သူ၊ fundraiser နဲ့ ရဲဘော်တွေလည်း စိတ်ပျက်အားလျော့ပြီး တော်လှန်ရေးကိုလည်း အနှောင့်အယှက်ဖြစ်စေခဲ့တာပါ။ အခုထိလည်း အဲ့ဒါတွေကို ကိုင်တွယ်ဖြေရှင်းနေကြရတုန်းပါပဲ။
လူရယ်လို့ဖြစ်ရင် လိုချင်တပ်မက်မှုလောဘဖြစ်တတ်ပါတယ်။ ကျနော်တို့မှာတော့ "စစ်သားဖြစ်ခြင်းကြောင့် လိုအပ်ချက်ပဲဖြစ်ရမယ်၊ လိုချင်တာမဖြစ်ရဘူးဆိုတာ" နဲ့ ထိန်းကျောင်းတယ်ဆိုတာကို တင်ပြခဲ့ဖူးပါတယ်။ ရဲဘော်တိုင်းရဲ့ အခြေခံ စားသောက်နေထိုင်ရေး၊ ကျန်းမာရေးလိုအပ်ချက်တွေကို တပ်ကနေပဲ တာဝန်ယူဖြည့်ဆည်းပေးပါတယ်။ အခုနောက်ပိုင်းဆို ရဲဘော်တွေရဲ့ မိသားစုအခက်အခဲကို တပ်ရန်ပုံငွေကနေ တတ်နိုင်သလောက် ထောက်ပံ့ကူညီပါတယ်။ ဒါမှလည်း ရဲဘော်တွေက နောက်ဆံမတင်းဘဲ တော်လှန်ရေးတာဝန်တွေကို ကိုယ်၊စိတ်နှစ်ပြီး လုပ်နိုင်မှာဖြစ်ပါတယ်။ ခွင့်ပြုထားတဲ့ တာဝန်ရှိသူမှအပ ရဲဘော်တဦးချင်းစီက ရန်ပုံငွေရှာဖွေခွင့်၊ ငွေကိုင်သုံးစွဲခွင့်မရှိပါဘူး။
အခုလိုမျိုး ကျနော်တို့ BPLA ရဲဘော်ကို မှတ်ချက်လာပေးတဲ့အခါ များစွာဂုဏ်ယူရပါတယ်။ ရဲဘော်ကလည်း သူ့ရဲ့ လိုချင်မှုဆန္ဒကို ထိန်းချုပ်နိုင်တဲ့အပြင် သူ့အတွက်အခြေခံလိုအပ်ချက် မရှိနေမှသာ မိသားစုနဲ့ ပြည်သူကို ပြန်ငဲ့ကြည့်နိုင်ကြတာပါ။ ရဲဘော်တဦးချင်းစီရဲ့ လိုအပ်ချက်ကို ဖြည့်တင်းနိုင်တာဟာလည်း ထောက်ပို့ပြည်သူများရဲ့ ပံ့ပိုးမှုကြောင့်ပဲဖြစ်တယ်ဆိုတာကို ထပ်လောင်းကျေးဇူးတင်ဂုဏ်ပြုအပ်ပါတယ်။
