02/06/2026
မိုးနှစ်ရက်ရွာပြီး စလင်းချောင်းရေကြီးလို့ တောင်သူစိုက်ခင်းများစွာ ဆုံးရှုံး
TNV၊ ဇွန် ၁
ဟေဇယ်
မကွေးတိုင်း၊ စလင်းမြို့နယ်မှာ မေ ၃၀ ရက်နဲ့ ၃၁ ရက်နေ့တွေက မိုးသည်းထန်စွာ ရွာသွန်းခဲ့တာကြောင့် စလင်းချောင်းရေတက်ကာ ချောင်းဘေးနားတစ်လျှောက် ကျေးရွာအများအပြားက တောင်သူတွေ စိုက်ထားတဲ့ နှမ်း၊ မြေပဲ၊ ငရုတ် စတဲ့ သီးနှံစိုက်ခင်းတွေ ပျက်စီးခဲ့ပါတယ်။
ငသန်ခေါင်းကျေးရွာအုပ်စုအတွင်းရှိ ငသန်ခေါင်းရွာနဲ့ ဂွေးကုန်းရွာတစ်လျှောက်အပြင် ပန်းတောကြီးကျေးရွာအုပ်စုနဲ့ စည်ဆွဲကျေးရွာအုပ်စုအထိ ချောင်းရေကြီးခဲ့တာဖြစ်လို့ သီးနှံဆုံးရှုံးမှု အတော်များတယ်လို့ စုံစမ်းသိရပါတယ်။ ပမာဏအတိအကျတော့ မသိရသေးဘူး။
သမြင်ကင်းကျေးရွာအုပ်စုက ကညှပ်ရွာသားကတော့ အခုလိုပြောပါတယ်။
"ဧက ၃၀ ကျော်လောက် ပါသွားတာ၊ တစ်ရွာထဲတော့ မဟုတ်ဘူး။ စလင်းချောင်းဘေး ကိုင်း၊ ကျွန်းတွေမှာ စိုက်ထားတာလေ။ မြေပဲတို့ နှမ်းတို့က ရေအိုင်သွားရင် မရတော့ဘူး။ ငရုတ်ကတော့ ရဦးမယ်ထင်တယ်ဗျ"
တချို့ရွာတွေဟာ ကိုင်း၊ ကျွန်း အနိမ့်ပိုင်းတွေမှာရှိပြီး နှစ်စဉ် လုပ်ကိုင်စိုက်ပျိုးကြပေမယ့် အခုနှစ်မှာတော့ ရေစီးကြောင်းက ကုန်းပိုင်းဘက်ကို ဆင်းလာတာကြောင့် အခုလို စိုက်ခင်းတွေ ရေနစ်ပျက်စီးရတာလို့ သူက ရှင်းပြပါတယ်။ အခုလို ချောင်းရေတက်တာကြောင့် ဒေသခံတောင်သူတွေအနေနဲ့ သီးနှံတွေအပြင် စိုက်ပျိုးစရိတ်တွေပါ ဆုံးရှုံးခဲ့ရတယ်လို့ ဆိုပါတယ်။
တောင်သူတွေဟာ စစ်ကြောင်းထိုးတာနဲ့ တိုက်ပွဲဖြစ်ပွားနိုင်တာတွေကိုလည်း စိုးရိမ်နေကြရတယ်လို့ The Nation Voice ကို ပြောပါတယ်။
"မနှစ်ကဆိုရင် ကျွန်တော်တို့ မျိုးစေ့တွေ ကြဲပြီးချိန်ပေါ့။ ရွာဘက်မှာ တိုက်ပွဲဖြစ်တော့ ဘာမှ အပင်တွေ ဂရုမစိုက်နိုင်ဘူး။ ရိတ်ချိန်တန်လည်း မရိတ်ရဘူး။ ရွာဘေးမှာလည်း မိုင်းတွေ ထောင်ထားတော့ မသွားရဲဘူး။ မလွယ်ပါဘူးဗျာ" လို့ စလင်းဒေသခံတစ်ဦးက ပြောပါတယ်။
ပြီးခဲ့တဲ့နှစ်က ပဲတီစိမ်းတွေ ကောက်ရမယ့်အချိန်မှာ ဒေသခံကာကွယ်ရေးအဖွဲ့တွေက လမ်းဖွင့်မပေးတာကြောင့် ပဲတွေ မကောက်လိုက်ရဘဲ ဆုံးရှုံးခဲ့ရဖူးတယ်လို့ ဆိုပါတယ်။
"ကျွန်တော်တို့ စားဝတ်နေရေးအတွက်ဆိုပြီး လုပ်ရတာပေါ့။ စီးပွားရေးအရတော့ မလုပ်နိုင်ဘူး။ မလုပ်ရင်လည်း ငတ်တော့မှာဗျ။ ခုက စစ်ကြီးဖြစ်နေတော့ ကျွန်တော်တို့ တောင်သူလယ်သမားတွေလည်း မလွယ်ပါဘူးဗျာ" လို့ အဆိုပါ ဒေသခံတောင်သူက ငြီးငြူပါတယ်။
မကွေးတိုင်းမှာ နေရာကွက်ကျား မိုးထစ်ချုန်းရွာနိုင်တယ်လို့လည်း မိုးလေဝသ သတင်းတွေက ကြေညာထားပါတယ်။ နှစ်ရက်တာ မိုးသည်းထန်စွာ ရွာသွန်းပြီး ယနေ့မှာတော့ မိုးလေငြိမ်သက်နေတယ်လို့ တောင်သူတွေက ပြောပါတယ်။
