04/12/2022
၂၀၂၂ခုနှစ်၊ #ဒီဇင်ဘာလ(၃)ရက်နေ့တွင် ကျရောက်သော #အပြည်ပြည်ဆိုင်ရာမသန်စွမ်းသူများနေ့ အထိမ်းအမှတ် အခမ်းအနားကို ဒီဇင်ဘာလ ၃ ရက်နေ့၊ နံနက် ၁၀ နာရီအချိန်က မကွေးတိုင်းဒေသကြီးလူမှုဝန်ထမ်းရုံးကြီးကြပ်မှုအောက်ရှိ မကွေးမူလတန်းကြိုကျောင်းခန်းမ၌ ကျင်းပပြုလုပ်ရာ တိုင်းဒေသကြီးအစိုးရအဖွဲ့ဝန်ကြီးချုပ် ဦးတင့်လွင်၊ တိုင်းဒေသကြီးအမျိုးသမီးအားကစားအဖွဲ့နာယက၊ တိုင်းဒေသကြီး မသန်စွမ်းသူများ၏ အခွင့်အရေး များဆိုင်ရာ ကော်မတီဝင်များနှင့် အပြည်ပြည်ဆိုင်ရာမသန်စွမ်းသူများနေ့ အကြိုလှုပ်ရှားမှု အားကစား ပြိုင်ပွဲတွင် ဆုရရှိသည့် အားကစားသမားများတက်ရောက်ခဲ့ကြသည်။
အခမ်းအနားတွင် မကွေးတိုင်းဒေသကြီးမသန်စွမ်းသူများ၏ အခွင့်အရေးများဆိုင်ရာ ကော်မတီဥက္ကဌ၊ တိုင်းဒေသကြီးဝန်ကြီးချုပ် ဦးတင့်လွင်က အပြည်ပြည်ဆိုင်ရာမသန်စွမ်းသူများနေ့ကို ၁၉၉၂ ခုနှစ်၊ အောက်တိုဘာလ(၁၄)ရက်နေ့တွင် ကျင်းပသော(၄၇)ကြိမ်မြောက် ကမ္ဘာ့ကုလသမဂ္ဂ အထွေထွေညီလာခံကြီးက ဂုဏ်ပြုသတ်မှတ်ခဲ့ပြီး မိမိတို့မြန်မာနိုင်ငံ အနေဖြင့် ၂၀၁၁ ခုနှစ်၊ ဒီဇင်ဘာ လ(၇)ရက်နေ့တွင် မသန်စွမ်းသူများ၏ အခွင့်အရေးများဆိုင်ရာ ကုလသမဂ္ဂကွန်ဗင်းရှင်းအား အတည် ပြုလက်မှတ်ရေးထိုးကာ ၂၀၁၅ ခုနှစ်တွင် မသန်စွမ်းသူများ၏ အခွင့်အရေးဥပဒေကို အတည်ပြုပြဌာန်း ခဲ့ပြီး နည်းဥပဒေကို ၂၀၁၇ ခုနှစ်၊ ဒီဇင်ဘာလ(၇)ရက်နေ့တွင် အတည်ပြုပြန်ဌာန်းနိုင်ခဲ့ပါကြောင်း၊ ဒါ့အပြင် မသန်စွမ်းသူများသည် သန်စွမ်းသူများကဲ့သို့ တန်းတူအခွင့်အရေး ရရှိစေရန်၊ မသန်စွမ်းသူ များ၏ ဂုဏ်သိက္ခာကို အလေးပြုလာစေရန်နှင့် မသန်စွမ်းသူများ၏ စိတ်ဓာတ်အင်အားမြင့်မားလာ စေရန် ရည်ရွယ်ချက်များဖြင့် နှစ်စဉ် ဒီဇင်ဘာလ(၃)ရက်နေ့တွင် အပြည်ပြည်ဆိုင်ရာမသန်စွမ်းသူများ နေ့ အထိမ်းအမှတ် အခမ်းအနားများကို နေပြည်တော်အပါအဝင် တိုင်းဒေသကြီး/ ပြည်နယ် အသီးသီးတွင် ကျင်းပလျက်ရှိရာ ယခုနှစ်ဆောင်ပုဒ်အနေဖြင့် “အားလုံးပါဝင် ဖွံ့ဖြိုးဖို့ ဆန်းသစ်တီထွင် အဖြေရှာစို့၊ အားလုံးလက်လှမ်းမီညီမျှရေး၊ တီထွင်ဖန်တီးမှုစွမ်းအားဖြင့် ဆောင်ရွက်ပေး” ဖြစ်ပါ ကြောင်း ဒါ့အပြင် မသန်စွမ်းသူများအား လူ့အဖွဲ့အစည်းတွင် တန်းတူရည်တူ ရှိသော တန်ဖိုးရှိသော သူများအဖြစ် ပါဝင်ရပ်တည်နိုင်အောင် ဘေးဖယ်ချန်လှပ်ထားခြင်းနှင့် ခွဲခြား ဆက်ဆံခြင်းများအား ရှင်းလင်းဖယ်ရှားပြီး လူ သားအားလုံးအတွက် လက်လှမ်းမီသော၊ တတ်စွမ်းနိုင်သော၊ ပေါင်းစည်း ပါဝင်သော ပတ်ဝန်ကျင်းကို ဖန်တီးပေးရန်လိုပါကြောင်းနှင့် မသန်စွမ်းသူများအား ခွဲခြားချန်လှပ် မထားဘဲ လူ့အသိုးအဝိုင်းအတွင်း ဝန်ဆန့်နိုင်ပြီး ဂုဏ်သိက္ခာ၊ စွမ်းဆောင်ရည်နှင့် လူ့အခွင့်အရေးတို့ကို အလေးဂရုပြု ဖော်ထုတ်အသိအမှတ်ပြုကြရန် လိုအပ်ပါကြောင်း ပြောကြားခဲ့ပြီး အပြည်ပြည်ဆိုင်ရာမသန်စွမ်းသူများနေ့ မှတ်တမ်းတင်ဗီဒီယိုကလစ်အား ပြသခဲ့ပါသည်။ ဆက်လက်ပြီး အပြည်ပြည်ဆိုင်ရာမသန်စွမ်းသူများနေ့ အထိမ်းအမှတ်အကြို အားကစားပြိုင်ပွဲများတွင် ဆုရရှိခဲ့သည့် အားကစားသမားများအား တိုင်းဒေသကြီးဝန်ကြီးချုပ်နှင့် တာဝန်ရှိသူများက ဂုဏ်ပြုဆုငွေများ ပေးအပ် ချီးမြှင့်ခဲ့ပြီး စုပေါင်းမှတ်တမ်းတင်ဓာတ်ပုံရိုက်ကူးကာ အခမ်းအနားရုပ်သိမ်းခဲ့ပါသည်။
မကွေးတိုင်းဒေသကြီးလူမှုဝန်ထမ်းရုံး 💙
