GAD Bogalay

09/06/2026

☁️ ညနေစောင်းရင်... မိုးက ရွာပြီ 🌧️
နေဝင်ရီတရော ညနေစောင်းပြီဆိုတာနဲ့ ကောင်းကင်ပြာပြာကြီးက တိမ်မည်းညိုတွေနဲ့ ဖုံးလွှမ်းလို့ မိုးက ရွာချပြန်ပြီ။ မိုးဦးကျ ညနေခင်းတွေရဲ့ ထုံးစံအတိုင်း လေအေးအေးလေးနဲ့အတူ မိုးနံ့သင်းသင်းလေးက စိတ်ကို တစ်မျိုးလေး အေးချမ်းသွားစေတယ်။
ဒါပေမဲ့ ဒီလိုအချိန်ဆို အိမ်အပြန်လမ်းပေါ်မှာ အလုပ်ရှုပ်နေကြသူတွေလည်း အများသား...
🧺 "အဝတ်လှမ်းထားတာ သိမ်းကြဦးဟေ့" လို့ အိမ်ပေါ်က အော်သံတွေနဲ့ အိမ်ရှင်မတွေရဲ့ အလုပ်ရှုပ်တဲ့အချိန်၊
🛵 မိုးမမိအောင် ဆိုင်ကယ်လေးကို အမြန်မောင်းပြီး အိမ်အရောက် ပြေးနေရတဲ့ အိမ်အပြန်လမ်းက လူတွေ၊
☕️ လမ်းဘေးက လက်ဖက်ရည်ဆိုင်လေးမှာ မိုးခိုရင်း ရေနွေးကြမ်းပူပူလေး သောက်၊ မိုးရွာတာကို ငေးကြည့်နေရတဲ့ အေးချမ်းမှုလေးတွေ၊
ညနေစောင်း မိုးရွာတာက တစ်ခါတလေတော့ အိမ်အပြန်လမ်းကို နှောင့်နှေးစေပေမဲ့ ရင်ထဲကိုတော့ တစ်အိအိနဲ့ အေးမြတဲ့ ခံစားချက်လေး ပေးစွမ်းနိုင်ပါတယ်။
"မိုးရွာထဲ သွားလာလှုပ်ရှားနေကြတဲ့ တစ်ယောက်ချင်းစီတိုင်းလည်း ဘေးကင်းကင်းနဲ့ အိမ်အမြန်ဆုံး ပြန်ရောက်ကြပါစေဗျာ။ အပြင်ထွက်ရင်လည်း ထီးနဲ့ မိုးကာလေး ဆောင်သွားဖို့ မမေ့ကြနဲ့နော်။" ❤️

09/06/2026

ဘိုကလေးမြို့နယ်၊ စက်ဆန်းကျေးရွာ၌ ဆိုလာမီနီဂရစ် ဘက်ထရီသိုလှောင်ရုံ မီးလောင်ကျွမ်းမှုဖြစ်ပွား၊ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌနှင့် တာဝန်ရှိသူများ ကွင်းဆင်းစစ်ဆေး
၂၀၂၆ ခုနှစ်၊ ဇွန်လ(၉)ရက်
ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်၊ စက်ဆန်းကျေးရွာအုပ်စု၊ စက်ဆန်းကျေးရွာ၊အမှတ် (၄) ရပ်ကွက်ရှိ မီးလင်းရေးဆိုလာမီနီဂရစ် ဘက်ထရီသိုလှောင်ရုံ၌ ယနေ့ (ဇွန်လ ၉ ရက်) နံနက်ပိုင်းက ဘက်ထရီများ အပူလွန်ကဲရာမှတစ်ဆင့် မီးလောင်ကျွမ်းမှု ဖြစ်ပွားခဲ့‌ကြောင်းသိရသည်။
ဖြစ်စဉ်မှာ ဇွန်လ ၉ ရက်နေ့ နံနက် ၉ နာရီ ၄၅ မိနစ်အချိန်ခန့်တွင် အလျား ၂၄ ပေ၊ အနံ ၁၂ ပေခန့်ရှိ ဆိုလာမီနီဂရစ် ဘက်ထရီသိုလှောင်ရုံအတွင်းရှိ ဘက်ထရီအိုး (၅၄) လုံးမှာ အပူလွန်ကဲရာမှတစ်ဆင့် လျှပ်စစ်ဝါယာရှော့ဖြစ်ပြီး မီးစတင်လောင်ကျွမ်းခဲ့ခြင်းဖြစ်သည်။
မီးလောင်မှုဖြစ်ပွားရာသို့ စက်ဆန်းနယ်မြေမီးသတ်စခန်းမှ လက်ထောက်မီးသတ်ဦးစီးမှူး ဦးဇင်မင်းထက် ဦးစီးသည့် မီးသတ်တပ်ဖွဲ့ဝင် (၉) ဦးနှင့် ဒေသခံရွာသူရွာသား အင်အား (၁၅၀) ဦးခန့်တို့က ဝိုင်းဝန်းငြှိမ်းသတ်ခဲ့ကြရာ နံနက် ၁၀ နာရီ ၂၅ မိနစ်အချိန်တွင် မီးထိန်းနိုင်ခဲ့ပြီး နံနက် ၁၀ နာရီ ၃၀ မိနစ်အချိန်တွင် မီးအပြီးသတ် ငြှိမ်းသတ်နိုင်ခဲ့သည်။ မီးလောင်ကျွမ်းမှုကြောင့် လူနှင့် တိရစ္ဆာန် ထိခိုက်ဒဏ်ရာရရှိမှုနှင့် သေဆုံးမှု မရှိခဲ့ကြောင်း သိရသည်။
အဆိုပါ မီးလောင်မှုဖြစ်ပွားရာသို့ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးဇော်ဝင်းလှိုင်၊ ခေတ္တမြို့နယ်ရဲတပ်ဖွဲ့မှူး ရဲမှူးအောင်မင်း နှင့် တာဝန်ရှိသူများက မီးလောင်ကျွမ်းမှုဖြစ်ပွားရာနေရာသို့ ချက်ချင်းသွားရောက်ကာ ကွင်းဆင်းစစ်ဆေးမှုများ ပြုလုပ်ခဲ့ကြသည်။
တာဝန်ရှိသူများ၏ ကွင်းဆင်းစစ်ဆေးချက်များအရ မီးလောင်ကျွမ်းရခြင်းမှာ ဘက်ထရီအိုးများ အပူလွန်ကဲရာမှ မီးစတင်လောင်ကျွမ်းခြင်းဖြစ်ပြီး မီးလောင်မှုကြောင့် ဘက်ထရီသိုလှောင်ရုံနှင့် ဘက်ထရီအိုးများ အပါအဝင် စုစုပေါင်း ဆုံးရှုံးမှုတန်ဖိုး ကျပ်သိန်း (၂၃၀) ခန့် ပျက်စီးဆုံးရှုံးခဲ့ကြောင်း သတင်းရရှိပါသည်။

09/06/2026

09/06/2026

သဘာဝဘေးအန္တရာယ်ဆိုင်ရာ ကြိုတင်ကာကွယ်ရေး အသိပညာပေး လက်ကမ်းစာစောင်များ ဖြန့်ဝေ
ဘိုကလေး၊ ဇွန် ၉
ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်အတွင်းရှိ မိဘပြည်သူများ သဘာဝဘေးအန္တရာယ်အမျိုးမျိုး ကျရောက်လာပါက ကြိုတင်ကာကွယ်ရမည့် နည်းလမ်းများကို သိရှိနားလည်ပြီး ဘေးအန္တရာယ်ဒဏ်ကို အောင်မြင်စွာ တုံ့ပြန်ကျော်လွှားနိုင်ရေးအတွက် ယနေ့ (ဇွန်လ ၉ ရက်) နံနက် ၉ နာရီအချိန်က မြို့ဝင်မြို့ထွက်ဂိတ်များ၌ သဘာဝဘေးအန္တရာယ်ဆိုင်ရာ အသိပညာပေး လက်ကမ်းစာစောင်များ ဖြန့်ဝေခြင်းလုပ်ငန်းကို ဆောင်ရွက်ခဲ့ကြကြောင်း သိရသည်။
ထိုသို့ ဆောင်ရွက်ရာတွင် ဘိုကလေးမြို့နယ် သဘာဝဘေးအန္တရာယ်ဆိုင်ရာစီမံခန့်ခွဲမှုကော်မတီ ဥက္ကဋ္ဌ ဦးဇော်ဝင်းလှိုင် ဦးဆောင်၍ မြို့နယ်အဆင့် ဌာနဆိုင်ရာ တာဝန်ရှိသူများ၊ မြို့နယ်မိခင်နှင့်ကလေးစောင့်ရှောက်ရေးအသင်း ဥက္ကဋ္ဌ ဒေါ်ခိုင်သီတာမြင့်နှင့် အဖွဲ့ဝင်များ၊ မြို့နယ်အမျိုးသမီးရေးရာအဖွဲ့ဝင်များနှင့် မြို့နယ်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှ တာဝန်ရှိသူများ ပူးပေါင်းဆောင်ရွက်ခဲ့ကြသည်။
အဆိုပါ ပူးပေါင်းအဖွဲ့သည် ဘိုကလေးမြို့၏ မြို့ဝင်မြို့ထွက်ဂိတ်များတွင် ဖြတ်သန်းသွားလာနေကြသည့် ခရီးသွားပြည်သူများ၊ ဒေသခံမိဘပြည်သူများနှင့် မော်တော်ယာဉ်မောင်းနှင်သူများထံသို့ သဘာဝဘေးအန္တရာယ်အလိုက် ပြည်သူများ ကြိုတင်ပြင်ဆင် ဆောင်ရွက်ရမည့် အချက်အလက်များ၊ ဆောင်ရန်/ရှောင်ရန်များနှင့် အရေးပေါ် ဆက်သွယ်ရမည့် ဖုန်းနံပါတ်များ ပါရှိသည့် အသိပညာပေး လက်ကမ်းစာစောင် စုစုပေါင်း (၅၀၀)စောင်ကို လိုက်လံဖြန့်ဝေပေးခဲ့ကြသည်။
ယခုကဲ့သို့ လက်ကမ်းစာစောင်များ အသိပညာပေး ဖြန့်ဝေပေးခြင်းဖြင့် ဒေသခံပြည်သူများ သဘာဝဘေးအန္တရာယ်အပေါ် ပိုမိုအလေးထား သတိပြုလာနိုင်မည်ဖြစ်ပြီး၊ သဘာဝဘေးအန္တရာယ် ကျရောက်လာပါက ဆုံးရှုံးမှုများကို အနည်းဆုံးဖြစ်အောင် ကြိုတင်လျှော့ချနိုင်မည်ဖြစ်ကြောင်း သတင်းရရှိသည်။

08/06/2026

မိခင်နှင့်ကလေး သေဆုံးမှုလျော့ကျစေရေးအတွက် အရန်သားဖွားဆရာမများ မွမ်းမံသင်တန်း ဖွင့်လှစ်
ဘိုကလေး၊ ဇွန် ၈
ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ် ပြည်သူ့ကျန်းမာရေးဦးစီးဌာနသည် ကျေးလက်ဒေသများ၌ မိခင်နှင့်ကလေးသေဆုံးမှု လျော့ကျစေရေးနှင့် ကျန်းမာရေးစောင့်ရှောက်မှုကဏ္ဍ ပိုမိုမြင့်မားလာစေရေးတို့ကို အရှိန်အဟုန်မြှင့် ဆောင်ရွက်လျက်ရှိရာ ယနေ့ (ဇွန်လ ၈ ရက်) နံနက်ပိုင်းတွင် ဘိုကလေးမြို့နယ် ပြည်သူ့ကျန်းမာရေးဦးစီးဌာန၌ အရန်သားဖွားဆရာမများ မွမ်းမံသင်တန်း ဖွင့်ပွဲအခမ်းအနားကို ကျင်းပပြုလုပ်ခဲ့ကြောင်း သိရသည်။
အဆိုပါ သင်တန်းဖွင့်ပွဲ အခမ်းအနားသို့ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌ ဦးဇော်ဝင်းလှိုင် တက်ရောက်၍ နယ်မြေအသီးသီးမှ တက်ရောက်လာကြသည့် သင်တန်းသူများအနေဖြင့် မိမိတို့ဒေသ၏ မိခင်နှင့် ကလေးကျန်းမာရေးကို လက်တွေ့ကျကျ အကျိုးပြုစောင့်ရှောက်ပေးနိုင်ရေးအတွက် သင်တန်းမှ ပို့ချချက်များကို ဂရုတစိုက် လေ့လာသင်ယူကြရန် အဖွင့်အမှာစကား ပြောကြားခဲ့သည်။
အဆိုပါ မွမ်းမံသင်တန်းကို (၈-၆-၂၀၂၆) ရက်နေ့မှ (၁၂-၆-၂၀၂၆) ရက်နေ့အထိ (၅) ရက်တိုင်တိုင် စနစ်တကျ ဖွင့်လှစ်သင်ကြားပေးသွားမည်ဖြစ်ပြီး သင်တန်းတွင် ကျွမ်းကျင်သင်တန်းဆရာ (၅) ဦးမှ ဦးဆောင်၍ သင်တန်းသူ အရန်သားဖွားဆရာမ (၅၄) ဦးတို့အား သားဖွားမှုဆိုင်ရာ အခြေခံဗဟုသုတများ၊ လက်တွေ့လုပ်ငန်းစဉ်များနှင့် အရေးပေါ်ပြုစုစောင့်ရှောက်နည်းများကို အသေးစိတ် သင်ကြားပို့ချပေးလျက်ရှိကြောင်း သိရသည်။
ယခုကဲ့သို့ အရန်သားဖွားဆရာမများအား မွမ်းမံသင်တန်း ပို့ချပေးခြင်းဖြင့် ကျေးလက်နေ မိခင်များနှင့် မွေးကင်းစကလေးငယ်များ၏ အသက်အန္တရာယ်ကို အချိန်မီ ကာကွယ်စောင့်ရှောက်ပေးနိုင်မည့်အပြင် မြို့နယ်အတွင်းရှိ မိခင်နှင့်ကလေး သေဆုံးမှုနှုန်းကိုလည်း ထိရောက်စွာ လျှော့ချပေးနိုင်မည်ဖြစ်ကြောင်း သတင်းရရှိသည်။

08/06/2026

ဘိုကလေးမြို့၌ ပညာရေးဒီဂရီကောလိပ်မှ ဝန်ထမ်းဆရာ/ဆရာမများနှင့် ကျောင်းသား/သူများအား Pfizer ကိုဗစ်-၁၉ ကာကွယ်ဆေး ထပ်ဆောင်းထိုးနှံပေး
၂၀၂၆ ခုနှစ်၊ ဇွန်လ(၈)ရက်
ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ် ပြည်သူ့ကျန်းမာရေးဦးစီးဌာနအောက်ရှိ မိခင်ကလေးကျန်းမာရေးဌာနသည် ကာကွယ်ဆေးဖြင့် ကာကွယ်၍ရသော ရောဂါများ ကာကွယ်နိုင်ရန်အတွက် အစဉ်တစိုက် ကြိုးပမ်းလျက်ရှိရာ ယနေ့ (ဇွန်လ ၈ ရက်) တွင် ဘိုကလေးမြို့နယ် ပညာရေးဒီဂရီကောလိပ်ကျောင်း၌ ဝန်ထမ်းဆရာ/ဆရာမများနှင့် ကျောင်းသား/သူများအား Pfizer ကိုဗစ်-၁၉ ကာကွယ်ဆေး ထပ်ဆောင်းထိုးနှံပေးခြင်း လုပ်ငန်းများ ဆောင်ရွက်ခဲ့ကြကြောင်း သိရသည်။
ထိုသို့ Pfizer ကာကွယ်ဆေး ထပ်ဆောင်းထိုးနှံပေးရာတွင် မိခင်ကလေးကျန်းမာရေးဌာနမှ ဝန်ထမ်းများက စနစ်တကျ ထိုးနှံပေးခဲ့ကြပြီး အဆိုပါ အခမ်းအနားသို့ မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌနှင့် အဖွဲ့ဝင်များ၊ မြို့နယ်မိခင်နှင့်ကလေးစောင့်ရှောက်ရေးအသင်း ဥက္ကဋ္ဌနှင့် အဖွဲ့ဝင်များ၊ မြို့နယ်အမျိုးသမီးရေးရာအဖွဲ့ ဥက္ကဋ္ဌနှင့် အဖွဲ့ဝင်များက တက်ရောက်ကာ လိုအပ်သည်များကို ကူညီပံ့ပိုးပေးပြီး အားပေးကြည့်ရှု ဆောင်ရွက်ခဲ့ကြသည်။
ယနေ့ ဆေးထိုးနှံမှုလုပ်ငန်းတွင် ဘိုကလေးပညာရေးဒီဂရီကောလိပ်မှ ဝန်ထမ်းဆရာ/ဆရာမများနှင့် ကျောင်းသား/သူ စုစုပေါင်း (၄၇၄) ဦးအား Pfizer ကာကွယ်ဆေးကို စနစ်တကျ ထိုးနှံပေးနိုင်ခဲ့ကြောင်း သိရှိရသည်။

08/06/2026

ဘိုကလေးမြို့မဈေးကြီး သန့်ရှင်းသာယာလှပရေးနှင့် ရေစီးရေလာကောင်းမွန်ရေးလုပ်ငန်းများ အရှိန်အဟုန်မပြတ် ဆက်လက်ဆောင်ရွက်လျက်ရှိ

​ဘိုကလေး၊ ဇွန် ၈

​ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ် စည်ပင်သာယာရေးအဖွဲ့မှ မြို့မဈေးကြီးအတွင်းအပြင် သန့်ရှင်းသာယာလှပရေး၊ ဈေးသူ/ဈေးသားများနှင့် ပြည်သူများ ကျန်းမာရေးနှင့် ညီညွတ်စွာ ရောင်းဝယ်ဖောက်ကားနိုင်ရေးအတွက် စုပေါင်းသန့်ရှင်းရေး လုပ်ငန်းများကို အရှိန်အဟုန်မပြတ် ဆက်လက် ဆောင်ရွက်လျက်ရှိကြောင်း သိရသည်။

​ထိုသို့ဆောင်ရွက်ရာတွင် မြို့နယ်စည်ပင်သာယာရေးအဖွဲ့၊ ဈေးကော်မတီဝင်များနှင့် တာဝန်ရှိသူများ ပူးပေါင်း၍ ဈေးနောက်ဘက် မြစ်ကမ်းဘေးတစ်လျှောက် စုပုံနေသော အမှိုက်သရိုက်များကို စနစ်တကျ ရှင်းလင်းဖယ်ရှားခြင်း၊ မိုးရာသီကာလ ရေကြီးရေလျှံမှုနှင့် ရေဝပ်ခြင်းများ မဖြစ်ပေါ်စေရန် ဈေးအတွင်း/အပြင်ရှိ ရေထုတ်မြောင်းများအား တူးဖော်ခြင်း၊ ပိတ်ဆို့နေသော နုန်းမြေများနှင့် အမှိုက်များ ဆယ်ယူရှင်းလင်းခြင်း လုပ်ငန်းများကို နေ့စဉ်ရက်ဆက် ဆောင်ရွက်လျက်ရှိသည်။

​ယခုကဲ့သို့ ဌာနဆိုင်ရာများနှင့် တာဝန်ရှိသူများက ပြည်သူ့အကျိုးပြု ပတ်ဝန်းကျင်သန့်ရှင်းရေးနှင့် ရေစီးရေလာ ကောင်းမွန်ရေးလုပ်ငန်းများကို အရှိန်အဟုန်မပြတ် ဆက်လက်ကြိုးပမ်း ဆောင်ရွက်နေမှုများကြောင့် ဘိုကလေးမြို့မဈေးကြီး၏ အင်္ဂါရပ်သည် ပိုမိုသန့်ရှင်းသာယာလှပလာပြီဖြစ်ကြောင်း သတင်းရရှိသည်။

​

07/06/2026

ဘိုကလေးမြို့နယ်၌ ရှေးဦးပြုစုခြင်း အခြေခံသင်တန်းနှင့် အခြေခံကွန်ပျူတာ သင်တန်းဆင်းပွဲ ကျင်းပ
ဘိုကလေး၊ ဇွန် ၇
ဘိုကလေးမြို့နယ် ကြက်ခြေနီအသင်းခွဲနှင့် နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်းတို့ ပူးပေါင်းဖွင့်လှစ်သည့် ရှေးဦးပြုစုခြင်း အခြေခံသင်တန်းနှင့် ကြက်ခြေနီ စေတနာ့လုပ်အားရှင်များ အခြေခံကွန်ပျူတာ သင်တန်းဆင်းပွဲ အခမ်းအနားကို ယမန်နေ့ (ဇွန် ၆ ရက်) မွန်းလွဲ ၂ နာရီအချိန်က နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်း၌ ကျင်းပပြုလုပ်ခဲ့သည်။
အဆိုပါ အခမ်းအနားသို့ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးဇော်ဝင်းလှိုင်နှင့် အဖွဲ့ဝင်များ၊ မြို့နယ်ကြက်ခြေနီအသင်းခွဲ ဥက္ကဋ္ဌ ဦးလှသန်းဦးနှင့် အလုပ်အမှုဆောင်များ၊ ဌာနဆိုင်ရာ အကြီးအကဲများ၊ နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်း ကျောင်းအုပ်ကြီး ဦးနိုင်းလိန်းဟုန်းနှင့် ကျောင်းသား ကျောင်းသူများ၊ သင်တန်းနည်းပြများနှင့် ကြက်ခြေနီ စေတနာ့လုပ်အားရှင်များ တက်ရောက်ခဲ့ကြသည်။
ရှေးဦးစွာ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးဇော်ဝင်းလှိုင်က သင်တန်းဆင်း အမှာစကား ပြောကြားခဲ့ပြီး ဖျာပုံခရိုင် ကြက်ခြေနီသူနာပြုတပ်ဖွဲ့ အုပ်ချုပ်ရေးအဖွဲ့ ဒုတိယခရိုင်တပ်ဖွဲ့မှူး ဦးသက်နိုင်က သင်တန်းတွင် သင်ကြားပို့ချခဲ့သည့် အကြောင်းအရာများအား ရှင်းလင်းတင်ပြခဲ့သည်။
ထို့နောက် သင်တန်းသား သင်တန်းသူများက ပတ်တီးစည်းနည်းစနစ်များ၊ ဒဏ်ရာပြုစုနည်းများနှင့် လူနာသယ်ဆောင်နည်းများကို လက်တွေ့ သရုပ်ပြသခဲ့ကြသည်။
ယင်းနောက် သင်တန်းဆင်း အောင်လက်မှတ်များ ပေးအပ်ချီးမြှင့်ရာ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးဇော်ဝင်းလှိုင်၊ အဖွဲ့ဝင် ဒေါ်မာမာဆွေနှင့် မြို့နယ်ကြက်ခြေနီအသင်းခွဲ ဥက္ကဋ္ဌ ဦးလှသန်းဦး တို့က ရှေးဦးပြုစုခြင်း အခြေခံသင်တန်းနှင့် အခြေခံကွန်ပျူတာ သင်တန်းဆင်း အောင်လက်မှတ်များကို သင်တန်းသား သင်တန်းသူများထံ အသီးသီး ပေးအပ်ချီးမြှင့်ခဲ့ကြသည်။
ဆက်လက်၍ ဖျာပုံခရိုင် ကြက်ခြေနီသူနာပြုတပ်ဖွဲ့ အုပ်ချုပ်ရေးအဖွဲ့ ဒုတိယခရိုင်တပ်ဖွဲ့မှူး ဦးသက်နိုင်က ကွန်ပျူတာသင်တန်းတွင် သင်ကြားပို့ချပေးခဲ့သော သင်တန်းနည်းပြ တပ်စုမှူး ဒေါ်ဆုမွန်ရည်အောင်အား ဂုဏ်ပြုလက်ဆောင် ပေးအပ်ချီးမြှင့်ခဲ့ပြီး၊ နယ်စပ်ဒေသ တိုင်းရင်းသားလူငယ်များ ဖွံ့ဖြိုးရေးသင်တန်းကျောင်း ကျောင်းအုပ်ကြီး ဦးနိုင်းလိန်းဟုန်းက ကျေးဇူးတင်စကား ပြန်လည်ပြောကြားကာ အခမ်းအနားကို မွန်းလွဲ (၃:၃၀) အချိန်တွင် အောင်မြင်စွာ ရုပ်သိမ်းခဲ့ကြောင်း သတင်းရရှိသည်။

07/06/2026

ဘိုကလေးမြို့မဈေးကြီး သန့်ရှင်းသာယာလှပရေးအတွက် ဈေးနောက်ဘက် မြစ်ကမ်းဘေးရှိ အမှိုက်များရှင်းလင်းခြင်းနှင့် ဈေးအတွင်း ရေမြောင်းများ တူးဖော်ရှင်းလင်း

​ဘိုကလေး၊ ဇွန် ၇

​ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်အတွင်းရှိ မိဘပြည်သူများ ကျန်းမာရေးနှင့် ညီညွတ်စွာ သန့်ရှင်းလတ်ဆတ်သော သားငါးနှင့် ဟင်းသီးဟင်းရွက်များကို ဝယ်ယူစားသောက်နိုင်ရေးနှင့် ဈေးပတ်ဝန်းကျင် သန့်ရှင်းသာယာလှပရေးအတွက် စုပေါင်းသန့်ရှင်းရေးလုပ်ငန်းများကို ပြီးခဲ့သည့် ယမန်နေ့ (ဇွန်လ ၆ ရက်) တွင် အရှိန်အဟုန်မြှင့် ဆောင်ရွက်ခဲ့ကြကြောင်း သိရသည်။

​ထိုသို့ ဆောင်ရွက်ရာတွင် မြို့နယ်စည်ပင်သာယာရေးအဖွဲ့၊ ဈေးကော်မတီဝင်များနှင့် တာဝန်ရှိသူများ ပူးပေါင်း၍ ဈေးနောက်ဘက် မြစ်ကမ်းဘေး တစ်လျှောက်တွင် စုပုံနေသော အမှိုက်သရိုက်များကို စနစ်တကျ ရှင်းလင်းဖယ်ရှားခြင်း လုပ်ငန်းများ ဆောင်ရွက်ခဲ့ကြသည်။

​ထို့အပြင် ယခုကဲ့သို့ မိုးရာသီကာလအတွင်း ရေစီးရေလာ ကောင်းမွန်စေရန်၊ ဈေးအတွင်း ရေဝပ်ခြင်းနှင့် ရေကြီးရေလျှံမှုများ မဖြစ်ပေါ်စေရန်နှင့် ခြင် အစရှိသော အင်းဆက်ပိုးမွှားများ အန္တရာယ်မှ ကင်းဝေးစေရန်အတွက် ဈေးအတွင်း/အပြင်ရှိ ရေထုတ်မြောင်းများကို တူးဖော်ခြင်း၊ ပိတ်ဆို့နေသော အမှိုက်များနှင့် နုန်းမြေများကို ဆယ်ယူရှင်းလင်းခြင်း လုပ်ငန်းများကိုလည်း တစ်ပါတည်း ဆောင်ရွက်ခဲ့ကြသည်။

​ယခုကဲ့သို့ သန့်ရှင်းရေးလုပ်ငန်းများ ဆောင်ရွက်ခြင်းဖြင့် ဈေးသူ/ဈေးသားများနှင့် ဈေးဝယ်လာပြည်သူများအတွက် ပိုမိုကျန်းမာရေးနှင့် ညီညွတ်သည့် ပတ်ဝန်းကျင်ကောင်းကို ဖန်တီးပေးနိုင်မည်ဖြစ်ပြီး၊ အဆိုပါ ပတ်ဝန်းကျင်သန့်ရှင်းရေးနှင့် ရေစီးရေလာ ကောင်းမွန်ရေးလုပ်ငန်းများကို စဉ်ဆက်မပြတ် ဆက်လက်ကြပ်မတ် ဆောင်ရွက်သွားမည်ဖြစ်ကြောင်း သတင်းရရှိသည်။

​