Општина Кисела Вода

29/05/2026

Утре, од пладне до полноќ: Кисела Вода со DJ сетови, детска зона, и голем екран за финалето на Лигата на шампионите

Утре, сабота, 30 мај, Општина Кисела Вода и Здружението за унапредување на културно-забавниот живот, екологија и чиста околина „ПОСВЕТЕН ВИКЕНД“ го организираат првиот „Family Day - Football Edition“. Подгответе се за 12 часа забава, спорт и музика во паркот „Шопен“!

Програмата започнува точно напладне, во 12:00 часот, со музичка програма и DJ сетови. Додека трае дневното дружење, најмладите ќе можат да се забавуваат во специјално подготвената детска зона со низа активности, а низ паркот ќе бидат поставени промотивни штандови за пијалоци и освежување.

Од 18:00 часот, се собираме пред големиот ТВ екран поставен во паркот каде заеднички ќе го следиме финалето од Лигата на шампионите. Ве покануваме сите да навиваме заедно, во одлична атмосфера од пладне до полноќ.
Еден ден. Многу емоции.
Ве очекуваме утре во паркот „Шопен"!

28/05/2026

Градоначалничката Стаменкоска Трајкоска ги пречека шампионите: Со „We Are the Champions“ и славеничка торта прославени успесите на младите таленти од Кисела Вода

Денеска, во големата сала на Општина Кисела Вода, се одржа свечен прием на учениците од општинските основни училишта кои во изминатиот период освоија високи награди на државни и меѓународни натпреварувања.
Средбата помина во опуштено и пријателско дружење. Градоначалничката Бети Стаменкоска Трајкоска ги пречека младите таленти со голема торта, по што учениците во славеничка атмосфера ја запеаја легендарната „We Are the Champions“.
Низ неформален разговор, додека се честеа за постигнатите успеси, учениците ги споделија своите искуства од натпреварите, предизвиците кои ги совладале и амбициите за во иднина. Градоначалничката им упати искрени честитки, нагласувајќи дека локалната самоуправа останува нивен силен партнер и поддржувач во секој следен чекор.

- Денеска ми претставува особена чест да ги примам овие млади и талентирани ученици кои со своите знаења и вештини ја афирмираат нашата општина. Нивните успеси на државните и меѓународните натпреварувања се доказ за високиот квалитет на нашите ученици, но и за нивниот личен труд и посветеноста на нивните ментори и родители. Како локална самоуправа, имаме обврска да го препознаеме и вреднуваме ваквиот потенцијал. Општина Кисела Вода ќе продолжи да инвестира во овие ученици, но и во сите останати деца и млади таленти, со цел да им дадеме дополнителен мотив за нивниот понатамошен развој. Инвестирањето во образованието и поддршката на младите останува наш врвен приоритет- изјави градоначалничката Бети Стаменкоска Трајкоска.

На денешниот свечен прием присуствуваа следните наградени ученици и тимови:
Сара Донева (9-то одд., ООУ „Кирил Пејчиновиќ“) – Под менторство на Марина Николовска Ристова, го освои првото место во категоријата „Хипо 3“ на континенталниот меѓународен натпревар по англиски јазик во Лидо ди Јесоло, Италија, со што обезбеди пласман на светското првенство во Рим овој септември.
Веда Златкова (ООУ „Кузман Јосифовски – Питу“) – Под менторство на Лилјана Данилов, го освои второто место на континенталниот натпревар по англиски јазик во категоријата „Хипо 1“, одржан во Лидо ди Јесоло.
Антонија Скендеровски (5-то одд., ООУ „Кирил Пејчиновиќ“) – Под менторство на Ирена Наумовска, освои трето место на континентално ниво во Лидо ди Јесоло (категорија „Хипо 1“). Антонија, инаку, е минатогодишна шампионка на светско ниво на истиот натпревар.

Хорот на ООУ „Кузман Јосифовски – Питу“ – Под диригентската палка на маестро Вера Ангеловска, хорот забележа импресивен успех освојувајќи вкупно 13 награди на меѓународниот хорски фестивал „Светски куп на фолклор – Језоло 2026“ во Италија. Хорот го освои првото место, додека солистите се закитија со четири први, четири втори и четири трети места.

Дел од победничкиот хор беа учениците: Ива Митровска, Нина Саздовска, Софија Паскалова, Стефан Филовски, Дарин Мишковски, Јана Стојановска, Миа Крстевска, Елена Стојаноска, Дора Табаковска, Милица Андоновска, Михаела Сотироска, Дона Костов, Филип Трајковски, Ивана Димитровска, Михаела Ничевска, Марта Толовска, Каја Панделеска, Јордан Панев, Лука Настовски, Софија Наневска, Јована Пејчиќ, Дариа Петровска, Ангела Илковска, Билјана Мировска, Хана Мисајловска, Марта Темелковска, Бисера Темелковска, Бисера Стојановска, Лина Лозналиева, Тео Димчевски, Андреа Крмзова, Деа Трајковска, Нина Цветковска, Саша Ивановиќ, Вероника Гроздановска и Ева Блажовска.

Наградени солисти (1-во место): Јован Мицкоски, Каја Димитрова, Мила Митревска и Марија Атанасовска.
Наградени солисти (2-ро место): Андреа Штерјова, Златјан Јанков, Љупка Станковска, Јана Колеќеска и Бисера Мојанова (вокални солисти), како и Мина Костов (солист на гитара).
Наградени солисти (3-то место): Јана Ѓорѓиева и Калина Смилевска.

Фудбалскиот тим на ООУ „Кузман Шапкарев“ – Учениците од ова училиште, под менторство на наставникот по физичко воспитување Благоја Кечовски, се закитија со титулата Шампиони на Државното првенство во фудбал за основни училишта во машка конкуренција.
Златниот состав кој ја донесе титулата го сочинуваат: Леон Несторовски, Леон Трпковски, Јоан Ѓоргиевски, Матео Ристов, Иван Трајковски, Матеј Јанковиќ, Никола Филиповски, Матеј Миневски, Кирил Николовски, Дамјан Трајков, Иван Диралов, Калин Муратидис, Марио Ефремов, Кристијан Ангелевски, Лука Стевковски, Марко Петрушовски, Дамјан Китановски, Павел Јанковски и Вук Бркиќ.

28/05/2026

Ѓорѓиевски и Стаменкоска-Трајкоска: Граѓаните се нашиот најголем сојузник во креирањето на подобра иднина.

Општина Кисела Вода беше првата дестинација од каде официјално започна големата теренска посета на општините од страна на градоначалникот на Град Скопје, Орце Ѓорѓиевски. Во преполната сала на Домот на култура „Билјана Беличанец“, градоначалникот Ѓорѓиевски, заедно со директорите на градските јавни претпријатија и раководството на Општина Кисела Вода предводено од градоначалничката Бети Стаменкоска-Трајкоска, вчеравечер одржаа директна средба со граѓаните.

Присутните граѓани имаа можност во прво лице да ги информираат надлежните институции за своите реални потреби. Преку искрената и директна комуникација за прашањата кои се во надлежност на градските служби, се отвори простор за многу побрзо и поефикасно решавање на проблемите на граѓаните. На средбата се разговараше конструктивно, отворено беа лоцирани сите клучни предизвици со кои се соочуваат жителите, а веднаш на терен беа понудени конкретни решенија и прецизни чекори за нивно брзо надминување.

Градоначалничката на Општина Кисела Вода, Бети Стаменкоска-Трајкоска, изрази огромна благодарност до градоначалникот Ѓорѓиевски што оваа теренска иницијатива започна токму од оваа општина, потенцирајќи ја важноста на заедничкото дејствување помеѓу локалната и градската власт.

„За мене е од огромна важност што граѓаните добија можност директно да ги изнесат своите барања. Граѓаните се нашиот најголем сојузник во креирањето на подобра иднина. Кисела Вода е мојот дом, моето семејство и мојата најголема гордост. Со оваа силна доверба што ни ја даваат граѓаните, продолжуваме уште посилно - за модерна општина, за функционално Скопје и за поубав живот на нашите дечиња- истакна Стаменкоска-Трајкоска.

Оваа теренска акција продолжува да се реализира низ сите скопски општини под мотото „Блиску до народот - доследни на зборот“.

27/05/2026

Во духот на солидарноста и заедништвото: Градоначалничката Стаменкоска Трајкоска го честиташе Курбан Бајрам



По повод големиот муслимански празник Курбан Бајрам, градоначалничката Бети Стаменкоска Трајкоска денеска беше гостин во семејството Јетиш. Во топла, пријателска и празнична атмосфера, таа им го честиташе празникот и им посака здравје и бериќет, негувајќи ги традициите на меѓусебно почитување и соживот меѓу сограѓаните.

Бидејќи вистинската суштина на овој празник лежи во солидарноста и грижата за луѓето околу нас, денот беше искористен да им се подаде рака и на оние на кои поддршката им е најпотребна. Со искрена желба празничната радост да стигне до секој дом и ниту еден сограѓанин да не ја почувствува тежината на немаштијата во овие празнични денови, градоначалничката посети повеќе социјално загрозени семејства кои го одбележуваат празникот и им подели хуманитарни пакети со намирници.

-Курбан Бајрам е празник кој нè учи на хуманост, почит и меѓусебно помагање. Радоста на празникот е вистинска само кога е споделена. Мојата искрена желба и заложба е никој да не се почувствува осамен или заборавен. Затоа денеска сме тука, да подадеме рака и да придонесеме за една достоинствена празнична трпеза за нашите сограѓани на кои им е најпотребно. Како локална самоуправа остануваме посветени на градењето заедница во која владее заедништвото и во која секој ја има нашата поддршка- истакна градоначалничката Стаменкоска Трајкоска.

Нека е честит празникот Курбан Бајрам! Ви посакуваме добро здравје, среќа, благосостојба и хармонија во секој дом!

27/05/2026

Започна комплетната реконструкција на клучната улица „Речиште“ со сите нејзини краци

Градоначалничката Бети Стаменкоска Трајкоска денеска присуствуваше на почеток на градежните активности за комплетна реконструкција на улицата „Речиште“ во Драчево, заедно со нејзините споредни краци.

Со овој капитален проект, кој опфаќа вкупна должина од 3,4 километри, Општина Кисела Вода обезбедува долгорочно решение и сигурна и современа патна инфраструктура за жителите од овој дел на општина Кисела Вода.
Градежните работи на терен ќе се одвиваат фазно, при што најпрво ќе се започне со уредување и асфалтирање на споредните краци, по што веднаш ќе се премине на финална реконструкција на главната улица. Средствата за овој проект се обезбедени преку договорот со Министерството за транспорт, во рамки на втората фаза од проектите поддржани од Владата на Република Македонија.

-Денеска започнуваме со темелна промена и модернизација на ликот на улицата “Речиште” во Драчево. Со овој голем чекор, сите краци и главната улица целосно се обновуваат и модернизираат, со што конечно создаваме инфраструктура каква што доликува за квалитетно секојдневие на сите наши сограѓани.

Како локална самоуправа продолжуваме посветено и со силно темпо на терен, бидејќи секое дадено ветување пред граѓаните за модерна, поврзана и безбедна инфраструктура за нас е врвен приоритет кој го исполнуваме во целост- изјави градоначалничката Бети Стаменкоска Трајкоска.

26/05/2026

Институционална поддршка за поздрава Кисела Вода: Потпишан Меморандум за соработка со Институтот за јавно здравје

​Градоначалничката на Општина Кисела Вода денес оствари средба со В.Д. Директорката на ЈЗУ Институт за јавно здравје на РСМ - Скопје, д-р Марија Андоновска, на која официјално беше потпишан Меморандум за соработка. Овој значаен документ овозможува воспоставување на цврста институционална мрежа која директно ќе придонесе кон заштита и унапредување на јавното здравје, како и подобрување на целокупните услови за живот на локалното население.
Формата на соработката предвидува заедничко делување и координација во креирањето на локалните политики за здравствена заштита и заштита на животната средина, за што општината ќе добие континуирана експертска, стручна и техничка поддршка. Покрај ова, партнерството овозможува реализација на заеднички програми, организирање на превентивни и едукативни активности за подигање на јавната свест, како и високо ниво на подготвеност за заедничко постапување во услови на кризни и вонредни состојби. Со овој чекор, Општина Кисела Вода продолжува посветено да работи на иницијативи кои обезбедуваат директни придобивки за заедницата преку стратешки партнерства со клучните државни институции.

24/05/2026

🇲🇰📚 Честит 24 Мај – Денот на сесловенските просветители Свети Кирил и Методиј!

📌 Денес се потсетуваме на светото дело на браќата Свети Кирил и Методиј - темелоположници на словенската писменост, просвета и духовност.

☑️ Нивната мисија остави неизбришлива трага во историјата и претставува вечен симбол на знаењето, образованието и културниот напредок на словенските народи.

🇲🇰 Да го чуваме и негуваме богатството на мајчиниот јазик, да ја почитуваме книгата и да продолжиме да ги пренесуваме вистинските вредности на идните генерации, следејќи го примерот на овие големи просветители.

🏫 Овој празник е најсилен сведок дека образованието е најсилната основа за личен и општествен развој, а знаењето најголемата сила што ја поседуваме.

Честит 24 Мај - Денот на сесловенските просветители Свети Кирил и Методиј!

22/05/2026

22/05/2026

11 пленарна седница на Советот на Општина Кисела Вода