Aleanca për Shqiptarët - Gostivar

08/01/2026

27/11/2025

AKI: Poverenikët e jashtëligjshëm nuk ju kryejnë punë, përgjigjen do ta merrni nga populli më 11 janar

Aleanca Kombëtare për Integrim reagon ndaj vendimit të Qeverisë për të emëruar të ashtuquajturit “poverenikë” në krye të komunave – një akt i jashtëligjshëm, i paautorizuar dhe i papranueshëm, që synon të uzurpojë vullnetin e qytetarëve të Gostivarit dhe Vrapçishtit.

Qeveria po tenton të zëvendësojë udhëheqësit e zgjedhur nga populli me “poverenikët” e saj. Kjo përbën ndërhyrje të hapur në autonominë lokale dhe shkelje flagrante të rendit juridik. Theksojmë me përgjegjësi të plotë se baza ligjore e këtij vendimi nuk ekziston.

Ligji për Vetëqeverisje Lokale – si lex specialis me përparësi ndaj çdo akti tjetër – lejon emërimin e të besuarit të Qeverisë vetëm kur dështojnë dy raunde zgjedhore. Në Gostivar dhe Vrapçisht ka dështuar vetëm raundi i parë. Raundi i dytë ende nuk është mbajtur. Çdo justifikim tjetër është fabrikim politik dhe abuzim me ligjin.

Në Gostivar, shkelja është edhe më e rëndë: Valbon Limani është ushtrues detyre i zgjedhur nga Këshilli Komunal, dhe neni 54, paragrafi 5 i Ligjit për Vetëqeverisje Lokale e përcakton qartë:

“Anëtari i këshillit i zgjedhur për ushtrues detyre të kryetarit të komunës e ushtron funksionin deri në zgjedhjen e kryetarit të ri.”

Edhe ndryshimet e fundit në ligj e konfirmojnë të njëjtën dispozitë:

“Ushtruesi i detyrës vazhdon funksionin deri në zgjedhjen e kryetarit të ri nga populli.”

Prandaj, vendosja e “poverenikëve” nuk është vetëm e paligjshme – është tentativë për kapje të pushtetit lokal dhe shkelje e drejtpërdrejtë e vullnetit qytetar. Dhe vullneti qytetar është i qartë: Koalicioni Aleanca Kombëtare për Integrim doli fitues me mbi 23 mijë vota në këto zgjedhje.

Në Gostivar, Valbon Limani fitoi rreth 17 mijë vota – plot 13 mijë më shumë se kandidati i koalicionit qeveritar. Në Vrapçisht, Isen Shabani mori 6.050 vota – mbi 5.500 më shumë se kandidati i pushtetit qendror.

Këto mandate ishin të pastra, demokratike dhe të padiskutueshme. Asnjë firmë politike nuk mund ta fshijë votën e popullit.

Aleanca Kombëtare për Integrim nuk do të lejojë uzurpim institucional. Ne do të kërkojmë mbrojtje të ligjit në çdo instancë dhe ua bëjmë të qartë të gjithëve: më 11 janar, drejtësinë do ta vendosë populli – me fitore edhe më të thellë.

22/07/2025

REAGIM:

“Ministri digjital” Aliu vazhdon të mashtrojë punonjësit shëndetësorë në Tetovë

Edhe sot, Ministri i Shëndetësisë, Azir Aliu, erdhi me premtime boshe dhe i MASHTROI 155 motrat medicinale, duke u dhënë shpresë për kontrata të përhershme – një premtim që e di shumë mirë se nuk mund ta përmbushë!

Nuk ka kontrata të përhershme pa konkurs publik!
Nuk ka buxhet të ndarë në rebalansin aktual për punësime të reja!
Fondi i Sigurimit Shëndetësor ka konfirmuar me shkrim se nuk ka mjete për këto punësime!

E pyesim publikisht ministrin:
• A është hartuar ndonjë plan për punësim nga spitali për këto 155 punësime?
• A ka pëlqim nga Ministria e Administratës për këtë proces dhe a është aprovuar ndonjë plan për punësim?
• A ka miratim nga Ministria e Financave për fondet?
• A ka aprovim nga Fondi i Sigurimeve Shëndetësore për punësime të reja?

Për më tepër, ekziston dokument zyrtar i pranuar nga Ministria e Shëndetësisë me numër 106807/4, më datë 15.07.2025, ku konfirmohet se kërkesa për punësim është refuzuar.

Në sektorin publik, për çdo punësim apo transformim të vendit të punës, duhen ndjekur procedura të qarta ligjore, sipas Ligjit për të punësuarit në sektorin publik, neni 34 (grupi 3, nëngrupi 1), si dhe nenet 41 dhe 44 të të njëjtit ligj. Po ashtu, është i domosdoshëm rebalansi i buxhetit – gjë që aktualisht NUK EKZISTON!

Këto janë vetëm tentativa të dështuara për të hedhur pluhur syve të qytetarëve dhe për të mbuluar paaftësinë e qeverisë në menaxhimin e sistemit shëndetësor. Qytetarët dhe punonjësit shëndetësorë e kanë kuptuar qartë:
Azir Aliu mashtron në çdo fjalë që thotë.

Aleanca për Shqiptarët

21/07/2025

ASH: Ministri Azir Aliu mashtroi 155 punonjës shëndetësorë në Tetovë – Pafuqi politike dhe heshtje e turpshme nga VLEN

Më 17 qershor 2025, Ministri i Shëndetësisë, Azir Aliu, në një vizitë publike në Spitalin Klinik të Tetovës, u premtoi 155 infermiereve dhe punonjësve shëndetësorë se problemi me vendimet e punës do të zgjidhet “shumë shpejt”. Ai deklaroi se ata janë pjesë vitale e sistemit shëndetësor dhe se zgjidhja “duhet të ndodhë para afateve ligjore”.

Por sot, më 20 korrik, ajo që mbetet nga ato deklarata janë vetëm fjalë boshe.

Ministria e Shëndetësisë, e udhëhequr nga Azir Aliu, ka dështuar rëndë. Fondi për Sigurim Shëndetësor, me dokument zyrtar të datës 14.07.2025, të nënshkruar nga dy drejtorë të saj, ka dhënë “mendim negativ” për kërkesën për punësimin e 155 punonjësve në Spitalin e Tetovës.

Kjo është jo vetëm një goditje e rëndë për stafin shëndetësor që punon në kushte të vështira dhe pa status të siguruar, por edhe një turp i madh politik për ministrin Aliu dhe subjektin që e propozoi – VLEN.

Ky është mashtrim publik me kamera. Premtim i dhënë, por i tradhtuar. Garanci e dhënë, por e braktisur.

Kjo tregon qartë pafuqinë totale të Ministrit të Shëndetësisë për të ndikuar në vendimmarrjen institucionale edhe kur bëhet fjalë për çështje jetike për komunitetin shqiptar,por e qasjen përjashtuese dhe diskriminuese të shtetit ndaj institucioneve ku shumica janë shqiptarë, duke përdorur burokracinë si instrument për të shtypur të drejtat themelore – siç është e drejta për punë të qëndrueshme.

Ne i kujtojmë Ministrit Azir Aliu se qytetarët nuk kanë harruar premtimet e tij të zëshme në fillim të mandatit, dhe as nuk do ta harrojnë heshtjen e tij të sotme – në ditën kur vendimi zyrtar për refuzim ka dalë.

Nëse Ministri i Shëndetësisë nuk është në gjendje as të bindë Fondin për të përkrahur një vendim që vetë e ka iniciuar, atëherë është e qart, Aliu nuk është Ministër, por një spektator i paaftë në një sistem që i përjashton shqiptarët.

E njëjta gjë vlen edhe për VLEN, nëse nuk mund të sigurojë të drejtat më elementare të profesionistëve shqiptarë në institucionet publike, atëherë e ka humbur të drejtën morale për të përfaqësuar këtë popull.

Aleanca për Shqiptarët

25/06/2025

Mblidhemi në Gostivar!
26 Qershor 2025, E Enjte - Ora: 20:00
Qendra për Kulturë - Gostivar

Gostivari n'💜