Antenimierampirenena

01/06/2026

Tonga nanatrika ny lanonana fanokafana amin’ny fomba ofisialy ny fankalazana ny faha-66 taona niverenan’ny Fahaleovantenan’i Madagasikara sy ny nijoroan’ny Foloalindahy Malagasy ary ny fanamarihana ny Volan’ny Teny Malagasy, ny Filoha lefitry ny Antenimierampirenena misahana ny Faritanin’i Fianarantsoa, Andriamatoa ANDRIANJANAHARY Fanomezantsoa, nitarika ny solontenan’ny solombavambahoaka sy ny mpiara-miasa eto amin’ny Antenimierampirenena, androany 01 jona 2026, teny amin’ny Parvis Analakely.

Anisan’ireo nisongadina nandritra izany ny fandalovan’ny sainam-pirenena malagasy sy ny mari-pamantarana manokana ho an’ny fankalazana ny faha-66 taona, narahin’ny lahateny ofisialy sy ireo seho ara-kolontsaina ary fanentanana samihafa. Nandritra izany no nanamafisana fa ny lohahevitra hoe “Fanavaozana ho an’ny Fandrosoan’i Madagasikara” no hitari-dalana ireo hetsika rehetra mandritra ity volan’ny fankalazana ity.

Nambara ihany koa fa ny Foloalindahy Malagasy dia hery sy andry iankinan’ny Firenena amin’ny fiarovana ny filaminana sy ny fiandrianam-pirenena, ka mitaky hatrany ny firaisankina sy ny fiaraha-mientan’ny rehetra amin’ny fampandrosoana an’i Madagasikara.

Teo ihany koa ny seho ara-javakanto sy ara-kolontsaina ary ny fanolorana loka ho an’ireo nahavita be teo amin’ny sehatry ny literatiora Malagasy, ho fanomezam-boninahitra ny teny sy ny kolontsaina malagasy.

31/05/2026

29/05/2026

Notanterahina androany 29 mey 2026 teto amin’ny Lapan’ny Tsimbazaza ny fivoriambe nihaonan’ ireo solombavambahoaka sy ireo mpikambana sasany ao amin'ny Governemanta izay ahitana ny Minisitry ny Atitany sy ny Fitsinjaram-pahefana, Andriamatoa RAKOTONANDRASANA Hanitra Velonjara Tiaray sy ny Minisitra delege misahana ny Zandarimaria Jeneraly BAMA Marima, ary ireo tompon'andraikitra ao amin'ny ministeran'ny Foloalindahy sy ny ministeran'ny Filaminam-bahoaka.

Ity fihaonana ity dia natao taorian’ny fiantsoana nataon’ireo Solombavambahoaka mba hametrahana fanontaniana mivantana amin’ireo minisitra momba ireo olana sedrain’ny vahoaka eny ifotony mahakasika ny fitsinjaram-pahefana sy ny filaminam-bahoaka.

Anisan’ireo lohahevitra nivoitra ny fangatahana fananganana kaominina vaovao sy ny fanovana ireo kaominina sasany ho kaominina ambonivohitra araka ny fepetra ara-jeografia sy ara-panjakana. Toy izany koa ny fangatahana fananganana faritra vaovao ho an’ireo faritra ahitana distrika maro. Nisy ihany koa ny fanontaniana momba ny olana mianjady amin’ireo sefo fokontany, indrindra ny tsy fahazoana ara-potoana ny tambi-karama sy ny olan’ny fanoloana ary ny fomba tokony hanatanterahana ny fifidianana azy ireo. Ny mahakasika ny fandriam-pahalemana dia nanodidina ny fananganana poste avancé sy ny fampitaovana ny mpitandro filaminana no anisan’ny niverimberina.

Ho setrin’ireo fanontaniana napetraka dia nitondra fanazavana sy valiny ho an’ny solombavambahoaka tsirairay ny minisitra tonga nanatrika ny fihaonana.

29/05/2026

29 mey 2026: Fihaonan’ ireo solombavambahoaka sy ireo mpikambana sasany ao amin'ny governemanta.

28/05/2026

Nolanian'ny solombavambahoaka nandritra ny fivoriambe androany 28 mey 2026 fa ahemotra amin'ny fotoana manaraka ny fifidianana ireo solontena roa avy amin'ny Antenimierampirenena eo anivon'ny Fitsarana Avo momba ny Lalampanorenana.

Nofidiana taorian'izay kosa ireo Filohan'ny vaomiera maharitra. Ireto avy izy ireo:
1. Vaomieran’ny Fiarovam-pirenena : JAOZANDRY René
2. Vaomieran’ny Raharaham-bahiny : MANASOA Donat Tang
3. Vaomieran’ny Lalàna : MAHARANTE Jean de Dieu
4. Vaomieran’ny Fitsinjaram-pahefana sy ny Fanajariana ny Tany : RAJOELINA Seth
5. Vaomieran’ny Toe-karena sy ny Fitantanam-bola : RAFIDIMANANA Narison
6. Vaomieran’ny Atitany : RAZAFIMAHEFA Tianarivelo
7. Vaomieran’ny Filaminam-bahoaka : NAKANY Charly Zafimagnely
8. Vaomieran’ny Indostria : NOURDINE Chabani
9. Vaomieran’ny Fambolena sy Fiompiana : RAZAFINDRABARY Narson Seth
10. Vaomieran’ny Fampianarana Ambony sy ny Fikarohana Siantifika : RAMILISON Andriamampionona Nomenjanahary
11. Vaomieran’ny Fanabeazam-pirenena : HANOGNONA Hervé
12. Vaomieran’ny Fampianarana Teknika sy Fanofanana arak’asa : RANDRIANANTENAINA Olivier Anthony José
13. Vaomieran’ny Fahasalamam-bahoaka sy Fandrindram-piterahana : Dokotera RAJAOBELINA Lova Herizo
14. Vaomieran’ny Mponina sy Firaisankina : SYLVIE Liva Gervais
15. Vaomieran’ny Fizahantany sy Taozavatra : RANARIVELO Lucien
16. Vaomieran’ny Fampandrosoana Nomerika, Paositra ary Fifandraisan-davitra : RAMANANJARASOA Clarisse Eugénie
17. Vaomieran’ny Angovo sy Akoranafo ary ny Fanapariahana herinaratra eny ambanivohitra sy ho an’ny tokantrano : ANDRIANAMBENANA Velomihaotra Painchard
18. Vaomieran’ny Asa vaventy : RAMANANARIVO Orlando
19. Vaomieran’ny Fitaterana sy ny Famantarana ny Toetry ny andro : RAZAFITSIALA Velomanana Solomampionona
20. Vaomieran’ny Asa, ny Fampananan’asa ary ny Asam-panjakana : ANDRIANIRINA Narcis
21. Vaomieran’ny Rano, ny Fanadiovana ary ny Fidiovana : SAORY Christian
22. Vaomieran’ny Jono sy ny Toe-karena Manga : RAKOTOMALALA Biri Golbert
23. Vaomieran’ny Harena ankibon’ny tany : RATSIMANDRIONA Aida Hardy
24. Vaomieran’ny Fifandraisana sy ny Kolontsaina : RATSIRAKA Sophie
25. Vaomieran’ny Tanora sy ny Fanatanjahantena : RAZAFINIMARO Désiré
26. Vaomieran’ny Tontolo Iainana sy ny Fampandrosoana Lovain-jafy : RAZAFINDRAMASY Faralahy Célestin Benenitra
27. Vaomieran’ny Zandarimariam-pirenena : MARINDRY Andry Rasolohery
28. Vaomieran’ny Tanàna Vaovao sy ny Fonena ary ny Fanajariana ny Tany : RASOANIRINA Marcelline
29. Vaomieran’ny Fitantanana mahomby sy fangaharahana, ny Tamberin’andraikitra ary ny Ady amin’ny Kolikoly : VELONJARA Théophiline
30. Vaomieran’ny Varotra : RANDRIAMALALA Thony
31. Vaomieran’ny Fanombanana ny Politikam-panjakana : RAZAFINDRIATSARA Jonhson Anatol
32. Vaomieran’ny Tontolon’ny Fandraharahana, ny Fampiroboroboana ny Fandraharahana ary ny Fampiasam-bola : RATOLOJANAHARY Arsène
Mpampakatenin’ny Vaomieran’ny Fitantanam-bola : RADAFINDRANARO Rijaniaina Thierry.

Ankoatra izay dia nisy filohan’ny vaomiera telo hafa notendrena, na dia tsy voafaritra ao anatin’ny Fitsipika Anatiny aza izany. FRANÇOIS Jean Michel ho an’ny vaomieran’ny fanavaozana ifotony, RAKOTOMALALA Miarintsoa ho an’ny vaomieran’ny fanavaozana ifotony ho an’ny tanora, MENAVOLO Alban ho an'ny vaomieran'ny fifandraisana amin'ny andrim-panjakana ary RAYMOND ho an’ny vaomieran’ny fiompiana.

28/05/2026

Fifidianana ny filohan'ny vaomiera maharitra eto amin'ny Antenimierampirenena.

25/05/2026

Notanterahina teto Antananarivo ny 20 ka hatramin’ny 22 mey 2026 ny fivoriamben’ny Fikambanan’ireo Antenimieran’ny Firenena mpikambana ao anatin’ny Vaomieran’ny Ranomasimbe Indianina (AP-COI). Nokarakaraina tao anatin’ny tetikasa « Gouvernance, Paix et Stabilité » (GPS) izay tanterahin’ny COI ity fihaonana isam-paritra ity, ka nampivondrona ireo solontenan’ny Antenimiera mpikambana ao amin’ny AP-COI hifanakalo hevitra. Araka izany dia momba ireo lohahevitra stratejika mifandraika amin’ny hoavin’ny fiaraha-miasa parlemantera eo anivon’ny Ranomasimbe Indianina no nodinihina. Anisan’izany ny fampaharetana ny AP-COI, ny fanamafisana ny fiaraha-miasa eo amin’ny AP-COI sy ny COI, ary ny vina hanamafisana ny Parlemantan’ny Tanora eto amin’ny Indianocéanie (PRJIO).

Ny delegasiona malagasy eo anivon’ny AP-COI dia ahitana ny solombavambahoaka RAFIDIMANANA Narson, RAHOLIARIJAONA Harson ary Nadine ANDRIANASOLO.

Nandritra ity fivoriambe ity ihany koa no nanatanterahana seminera natokana ho an’ny fanamby ateraky ny ilon-tsaina artifisialy (IA) eo amin’ny fitantanana, izay nampivondrona ireo solontena parlemantera sy manam-pahaizana avy amin’ny faritra.

Nandray anjara tamin’ity seminera ity ny Antenimierampirenena malagasy tamin’ny alalan’ny fandraisan’anjaran’ny Solombavambahoaka RAMANANJARASOA Clarisse Eugénie, Filohan’ny Vaomieran’ny Fampandrosoana Nomerika, ny Paositra ary ny Fifandraisan-davitra, sy Andriamatoa RAZAFIARIJAONA Samoela, Tale misahana ny Rafitra Informatika eto amin’ny Antenimierampirenena.

Nifantoka tamin’ireo lafiny ara-panjakana, ara-dalàna ary ara-teknika mifandraika amin’ny ilon-tsaina artifisialy ny fifanakalozan-kevitra, ary koa ireo fanamby ateraky ny fiovàna nomerika ho an’ireo andrim-panjakana sy antenimiera eto amin’ny faritra.

Nandray anjara mavitrika tamin’ireo dinika ireo ny Antenimierampirenena malagasy, ka nanamafy indray ny fahavononany hampiroborobo ny fifampiresahana eo amin’ny faritra sy hanamafy ny fiaraha-miasa eo amin’ireo andrim-panjakana eto amin’ny Indianocéanie.

25/05/2026

FAMINTINANA NY « REUNIONS STATUTAIRES » NATAO TANY JOHANNESBURG, AFRIKA ATSIMO NY 19 HATRAMIN’NY 22 MEY 2026

Nanatanteraka ny fivoriana voafaritry ny sata na “réunions statutaires” tany Johannesburg ny 19 mey ka hatramin'ny 22 mey 2026 ireo solombavambahoaka miisa dimy mianadahy, mpikambana ao anatin'ny Vaomiera Maharitra eo anivon'ny FP-SADC, fivoriana izay fanao mialoha ny fivoriambe ka ny andiany faha-59 dia hatao any Seychelles ny 4 hatramin'ny 11 jolay ho avy izao.

Anisan'ny nodinihina nandritra ireo fivoriana ireo ny lohahevitra mikasika ny fanamafisana ny fandraisan’andraikitry ny parlemantera amin’ny fampidirana anaty rafitra nasionaly sy ny fampiharana mahomby ireo protokolan’ny SADC ho fampiroboroboana ny fitantanana demokratika, teo ihany koa ny momba ny Lalàna lasitra ho an’ny SADC mikasika ny fanaraha-maso ny fonja.

Samy nanome ny antony tsy nankatoavana ny protokolan’ny SADC sasany ny isam-pirenena, indrindra ny ny Lalàna lasitra ho an’ny SADC mikasika ny fanaraha-maso ny fonja ka nilaza ny zava-misy sy ny olana atrehin'ny fonja any @ fireneny tsirairay avy. Nanome sosokevitra ny hanitsiana io Lalàna modely io ny maro avy eo.

Namaranana ny fotoam-pivorian’ny isam-baomiera ny fifidianana ny filoha sy ny filoha lefitra isaky ny vaomiera maharitra miisa dimy, ankoatry ny Caucus Régional des Femmes Parlementaires izay efa nahavita ny fifidianana nandritry ny fivoriana nampitain-davitra natao ny 12 mey 2026 lasa teo.