Ministère de l'Education Nationale de Madagascar

16/09/2026

MANAKARA: FOTODRAFITRASA VAOVAO, HO FANATSARANA NY FANABEAZANA ENY IFOTONY

📍Fokontany Tsarasaotra, ZAP Tataho, CISCO Manakara, DREN Fitovinany | 16 septambra 2026

✳️ Notokanana tamin’ny fomba ofisialy ny Al Mahdi School II, fotodrafitrasa vaovao ahitana efitrano fianarana miisa 12 sy trano fonenana miisa 100, izay vokatry ny fiaraha-miasa amin’ny FCRA.

✅️Ireo efitrano fianarana vaovao ireo dia hanampy amin’ny fanatsarana ny fandraisana ireo mpianatra sy ny tontolo ianarany, mba hahafahan’ny ankizy misitraka fanabeazana ao anaty toerana mendrika.

✅️Nanome voninahitra ny lanonana ny Mpanolotsaina Avon’ny Fanavaozana ny Repoblikan’i Madagasikara, kolonely ANDRIAMIHARITSOA Gervais sy ny Minisitry ny Mponina sy ny Firaisankina RAKOTONIAINA Voahanginirina Cathia, notronin’ireo olomanankaja, manam-pahefana ary tomponandraikitra isan-tsokajiny teo an-toerana.

✅️Nisolo tena ny Minisiteran’ny Fanabeazam-pirenena ireo Mpanolotsaina Teknika, TOVONDRAINY Ramananandro sy TOVONDRAZANE Camille, ho fanehoana ny fiaraha-mientana amin’ny fampandrosoana sy fanatsarana hatrany ny fanabeazana eny ifotony.

UCOM MEN/ Septambra 2026

14/09/2026

FANANGANAN-TSAINAN’NY MINISITERAN’NY FANABEAZAM-PIRENENA

✳️✳️Kolikoly ara-nofo na "corruption se****le" no lohahevitra nitondrana fanentanana, izay nosahanin’ny Tale misahana ny fanabeazana maha olompirenena (DEMC), Ramatoa RAVOLAFENO Sylvie nandritra ny fananganan-tsaina ny alatsinainy 14 septambra 2026.

▶️Nentanina araka izany ny mpiasa eo anivon'ny Minisiteran'ny Fanabeazam-pirenena ho sahy mitoroka na sahy hanao tsia raha mahita trangana kolikoly amin’ny fomba rehetra.

▶️Nitarika izany ny Sekretera Jeneraly RASOLOFONIAINA Ricardo ary nanentana ihany koa amin’ny fifanajana sy ny fifampitondrana eo amin'ny sehatry ny asa.

UCOM MEN/Septambra 2026

13/09/2026

FOIRE PEDAGOGIQUE: ANDIANY VOALOHANY
📍Toliara | 10,11 septambra 2026

✳️✳️ Nisolotena an-dRamatoa Minisitry ny Fanabeazam-pirenena, RAJAONARISON Sendra Nirina nandritra ny andiany voalohany tamin’ny "Foire pédagogique", ny Tale misahana ny Fampianarana ambaratonga faharoa, Andriamatoa RANDRIANAIVO Aimé Nicolas Emilson.

✅️ Navoitra nandritra ny hetsika ny maha-zava-dehibe ny fanomezan-danja ny famoronana sy ny fahaiza-mamorona ananan’ny mpampianatra, hoenti-manavao sy manatsara ny fomba fampianarana ary hampifanaraka izany amin’ny zava-misy ankehitriny.

✅️ Ankoatra ny fampirantiana, dia nisy ihany koa ny fifanakalozan-kevitra sy fifampizarana, mikasika ny zava-misy iainan’ny sehatry ny Fanabeazana, namantarana ireo olana sedraina ary nandrosoana vahaolana iaraha-manana, tamin’ny fandraisan’anjaran’ireo mpisehatra sy mpiara-miombon’antoka samihafa.

✅️Ny hetsika dia natao indrindra ho sehatra iray hampiroboroboana ny fifampizarana traikefa, ny fanavaozana ara-pedagojika ary ny fiaraha-mientan’ny rehetra ho amin’ny fanatsarana ny Fanabeazana eto Madagasikara.

✅️Izany dia vokatry ny fiaraha-miasan’ny DREN Atsimo Andrefana, ny CRFRP Toliara, ny Luxe Agency, ary ny UNICEF.

UCOM MEN/Septambra 2026

12/09/2026

12/09/2026

FIHAONANA TEO AMIN'NY MINISITERAN'NY FANABEAZAM-PIRENENA, NY MINISITERAN'NY FAMPIANARANA AMBONY SY NY FIKAROHANA ARA-TSIANSA ARY IREO TOMPON'ANDRAIKITRA AVY AMIN'NY SEKOLY MIANKINA AMIN'NY FANJAKANA SY MIAHY TENA

✳️✳️Nihaona mivantana tamin'ireo tomponandraikitra misehatra amin'ny fanabeazana avy amin'ny sekoly miankina amin'ny Fanjakana sy sekoly miahy tena teto amin'ny trano fivoriana Anosy ireo Tale Jeneraly sy Tale isan-tsokajiny eto anivon'ny Minisiteran'ny Fanabeazam-pirenena sy ny Minisiteran'ny Fampianarana Ambony sy ny fikarohana ara-tsiansa, ny zoma 11 septambra 2026.

▶️Miompana amin'ny fampiharana ny sokajy L, S ary OSE amin'ny fanadinam-panjakana Bakalorea 2027 ny dinika.

▶️Fantatra nandritra izany ihany koa fa hisy ny paikady manokana amin'ny famolavolana ny laza adina izay handraisan'ireo avy amin'ny sekoly miahy tena anjara; ka tsinjovana manoloana izany ireo mpianatra nandalo kilasy T11 tao anatin'ireo sokajy A-C-D ka hiatrika ny fanadinam-panjakana Bakalorea sokajy L, S, OSE amin'ny taona 2027.

▶️Ankoatra izay, hisy ny fampiofanana ho fanamafisana ny fahaiza-manaon'ireo mpampiofana ka tanjona ny hampitoviana ny fomba fiasa, ny fomba fampianarana ary ny fampiroboroboana ny fiaraha-miasa eo amin'ireo mpisehatra amin'ny fanabeazana (Mpampianatra, Ivon-toeram-piofanana...) araka ny filàn'ny fandaharam-pibeazana (PE).

▶️Misokatra amin'ny fifanakalozan-kevitra sy ny fihainoana ary ny fiaraha-miasa hatrany ny Minisiteran'ny Fanabeazam-pirenena ho tombontsoan'ny zaza Malagasy tsy an-kanavaka.

UCOM MEN/Septambra 2026

11/09/2026

FANATSARANA SY FANAVAOZANA NY RAFI-PANABEAZANA FOTOTRA

✳️✳️Nisy ny atrikasa niarahan'ny Minisiteran'ny Fanabeazam-pirenena niaraka tamin'ireo mpamatsy volan'ny PITAF (Programme Integré pour la Transformation des Apprentissages Fondamentaux) ny zoma 11 septambra 2026.

▶️Nandritra izany no namaliana ny fanontaniana sy nanomezana fanazavana mikasika ny fandrosoan'ny tetikasa.

▶️Tsiahivina fa nanomboka ny taona 2025 no nisian'ny PITAF, izay miompana amin'ny tari-dalana 4 lehibe:
🔳Ny fampiakarana ny kalitaon'ny asa sy ny fahaiza-manaon'ny mpampianatra amin'ny alalan'ny fandraisana mpampianatra ho mpiasam-panjakana sy ny fampiofanana ara-pedagojika.
🔳Ny fanatsarana ny ora fianarana amin'ny fahavitrihan'ny mpampianatra miasa, ny fametrahana paikady pedagojika mifanaraka tsara amin'ny ora fianarana ary ny fanaovana ora fanarenana.
🔳Ny fanatsarana ny paikady fampianarana amin'ny fametrahana ny kilasy famohazan-tsaina mampiaty sy ara-kalitao. Ny fanatsarana sy fanomezana fitaovana sy fotodrafitrasa, ny famerenana an-tsekoly ireo mpianatra niala an-daharana ary ny fanohanana ireo mpianatra sahirana ara-pivelomana.
🔳Ny fanavaozana ny rafi-pampianarana amin'ny alalan'ny fanatsarana ny fitantanana ara-bola sy ny fitantanan-draharaha. Ny fanavaozana ny fitantanana ny sekoly sy fampandraisana anjara ny vondron'olona ifotony. Fametrahana ny miralenta sy ny fanabeazana mampiaty, ary ny fiatrehana ny fotoana mialoha sy mandritra ary aorian'ny loza ara-boajanahary izay mety mitranga.

▶️Ny Vondrona maneran-tany ho an'ny fanabeazana (GPE) no manohana ny PITAF, ary ny Sekretera Jeneralin’ny Minisiteran’ny Fanabeazam-pirenena Andriamatoa RASOLOFONIAINA Ricardo no nitarika ny atrikasa.

UCOM MEN/Septambra 2026

11/09/2026

✳️✳️Nisokatra tamin'ny fomba ôfisialy tao amin'ny EPP Ambohidranomanga Ambatomirahavavy ny alarobia 09 septambra 2026 ny tetikasa fampisakafoana an-tsekoly mifototra amin’ny fividianana ny vokatra eny ifotony ao anatin'ny faritra Itasy.

▶️Sekoly 28 isa ahitana mpianatra manodidina ny 11 000 ao anatin'io Faritra io no misitraka izany.

▶️Ity tetikasa ity dia vokatry ny fiaraha-miasa eo amin'ny Minisiteran’ny Fanabeazam-pirenena sy ny Fandaharan'asa Iraisam-pirenena misahana ny sakafo ( PAM) ary ny "Lions Club International Fondation" (LCIF).

▶️Izany no natao dia mba hampitomboana ny fahombiazan'ny mpianatra sy hiantohana ny fahasalamany ara-tsakafo amin’ny alalan’ny fizarana sakafo mafana sy voalanjalanja ho azy ireo, isanandro.

▶️Ankoatra ny vokatsoa eo amin’ny lafiny fanabeazana sy ny fahasalamana, ity tetikasa ity dia mifototra indrindra amin’ny fampiasana ireo akora vokarin'ireo tantsaha mpamboly mpamokatra any an-toerana.

UCOM MEN/Septambra 2026

11/09/2026