27/05/2026
Nee zum Projet, deen d’Haaptstrooss nach méi komplizéiert mécht!
D’Gemeng Walfer plangt de Reamenagement vun der N7 deen glaich soll starten. Op Pabeier kléngt dat no „Liewensqualitéit“, „Begréngung“ a „mobilité douce“. An der Realitéit bedeit et awer virun allem: manner Parkplazen, méi Aschränkungen an nach méi Drock op eis lokal Geschäfter an hir Clienten.
Eis Commerçanten op der Haaptstrooss si schonn haut op gutt zougänglech Parkplazen ugewisen. Wien séier bei de Bäcker, an d’Apdikt, bei de Coiffer oder an aner Geschäfter wëll, brauch praktesch Parkméiglechkeeten. Wann dës Plazen elo ewechfalen oder duerch Beem, Vëlospisten an Ideologie ersat ginn, da bezuelen um Enn d’Geschäfter an d’Bierger de Präis.
Mir stellen eis och d’Fro: Brauche mir wierklech nach méi Vëlospisten op enger Haaptverkéiersachs, wou et ronderëm scho méi roueg Niewestroossen a Velosweeër gëtt? Muss ausgerechent d’Haaptstrooss nach méi verengt, ëmgebaut a mat grénge Symbolprojeten iwwerluede ginn?
Fir eis ass kloer: Eng Gemeng muss fir hir Bierger, hir Geschäfter an hir alldeeglech Realitéit plangen a net géint si. Liewensqualitéit heescht net, datt ee Parkplazen zerstéiert an de lokale Commerce schwächt.
Mir als ADR Sektioun Walfer si kategoresch géint dëse Projet an fuerderen, datt d’Gemeng d’Interesse vun de Bierger an de Commerçanten endlech eescht hëlt.
Kee Projet géint d’Leit. Kee Projet géint de lokale Commerce. Kee weidere grénge Symbolismus op Käschte vu Walfer.
