Divisional Secretariat Laggala Pallegama

27/03/2026

ලග්ගල ප්‍රාදේශීය සම්බන්ධීකරණ කමිටු රැස්වීම අද (2026.03.27) දින ලග්ගල ප්‍රාදේශීය ලේකම් කාර්යාලයේ ශ්‍රවණාගාරයේදී පැවැත්විණි.
ගරු කමිටු සභාපති, පාර්ලිමේන්තු මන්ත්‍රී දිනේෂ් හේමන්ත පෙරේරා මැතිතුමාගේ ප්‍රධානත්වයෙන් පැවැත්වුණු මෙම රැස්වීමේදී, ලග්ගල නගර සංවර්ධනය, ග්‍රාමීය මාර්ග පද්ධතිය නවීකරණය කිරීම, වාරිමාර්ග පද්ධති ප්‍රතිසංස්කරණය ඇතුළු යටිතල පහසුකම් සංවර්ධනය පිළිබඳව අවධානය යොමු කරන ලදී.
එමෙන්ම, ප්‍රදේශවාසීන් මුහුණ දෙන ගැටළු හඳුනාගෙන ඒවාට අදාල අංශ සම්බන්ධීකරණය කරමින් විසදුම් ලබා දීමද, ප්‍රජාශක්ති වැඩසටහන, ග්‍රාමීය මාර්ග සංවර්ධන වැඩසටහන, සංචාරක සංවර්ධන ව්‍යාපෘති ඇතුළු යෝජනා සඳහා ප්‍රාදේශීය සම්බන්ධීකරණ අනුමැතිය ලබා දීමද සිදු කරන ලදී.
මෙම අවස්ථාව සඳහා ලග්ගල ප්‍රාදේශීය සභාවේ සභාපතිතුමා ඇතුළු මහජන නියෝජිතයින් ද, ලග්ගල ප්‍රාදේශීය ලේකම්තුමා, සහකාර ප්‍රාදේශීය ලේකම්තුමිය, සහකාර අධ්‍යක්ෂ (සැලසුම්) ඇතුළු ප්‍රදේශයේ රාජ්‍ය ආයතන නිලධාරීන් රැසක් සහභාගී විය.

27/03/2026

2026 ජාත්‍යන්තර කාන්තා දිනට සමගාමී වැඩසටහන

" පොහොසත් රටක අභිමන - ඇය වේ දැයක පෙරමග "

ලග්ගල ප්‍රාදේශීය ලේකම්තුමාගේ සහ සහකාර ප්‍රාදේශීය ලේකම්තුමියගේ අධීක්ෂණය හා මග පෙන්වීම මත ,ලග්ගල ලංකා බැංකුවේ හා ප්‍රාදේශීය සංවර්ධන බැංකුවේ මූල්‍ය අනුග්‍රහයෙන් ,වත්තල ආයුර්වේද ප්‍රජා සෞඛ්‍ය වෛද්‍ය නිලධාරී ,ජී.එල් පාණ්ඩියප්පෙරුම මහතාගේ සම්පත් දායකත්වයෙන්, 2026 මාර්තු මස 25 වන දින ප්‍රාදේශීය ලේකම් කාර්යාලයේදී ඉතා සාර්ථකව පැවැත්වීමට හැකි විය.

10/02/2026

NVQ level 3 හෝ ඊට ඉහළ වෘත්තීය සහතික පත්‍ර පාඨමාලාවක් හැදෑරීමට අපේක්ෂා කරන ලග්ගල කොට්ඨාසයේ පදිංචි සමෘද්ධි සහ අස්වැසුම ප්‍රතිලාභී පවුල්වල අනාගතය ජය ගැනීමට වෙහෙසෙන තරුණ ඔබ වෙනුවෙන් "සමෘද්ධි අලෙවි සංවර්ධන වැඩසටහන – 2026" යටතේ තෘතික හා වෘත්තීය අධ්‍යාපන කොමිෂන් සභාවේ ලියාපදිංචි ආයතනයකින් වෘත්තීය සහතික පත්‍ර පාඨමාලාවක් හැදෑරීමට අවස්ථාව සලසා ඇත. *රුපියල් 100 000ක් දක්වා පාඨමාලා ගාස්තු රජය විසින් දරනු ලැබේ.

👥 සහභාගී විය හැකි අය
✔️ අස්වැසුම ප්‍රතිලාභී පවුල්වල තරුණ තරුණියන්
✔️ 2023 ජුනි මස දක්වා සමෘද්ධි සහනාධාරය ලැබූ පවුල්වල තරුණ තරුණියන්
✔️ වෘත්තීය පළපුරුද්ද තිබුණද සහතිකයක් නොමැති වයස අවුරුදු 60 දක්වා වන පුද්ගලයින්

ඔබේ වෘත්තීය අනාගතයට නිවැරදි පියවරක් තැබීමට 2026.02.13 දින පෙ.ව. 10.00 ලග්ගල ප්‍රාදේශීය ලේකම් කාර්යාලයේ ශ්‍රවණාගාරයේදී පැවැත්වෙන ඉහත වැඩසටහන පිලිබඳ විශේෂ දැනුවත් කිරීම සඳහා සහභාගී වන ලෙස ආරාධනා කර සිටිමු.

📞 විමසීම් සඳහා
📌 ලග්ගල ප්‍රාදේශීය ලේකම් කාර්යාලයේ – සමෘද්ධි අංශය / සමෘද්ධි සංවර්ධන නිලධාරීන්
📞 075 591 2926 – ව්‍යාපෘති කළමනාකරු
📞 078 126 8441 – ව්‍යාපෘති සහකාර
📞 077 401 3329 – මුලස්ථාන කළමනාකරු

10/02/2026

"නිදහසයි - පරිසරයයි - 2026"

ප්‍රාදේශීය ලේකම්තුමා හා සහකාර ප්‍රාදේශීය ලේකම්තුමියගේ පූර්ණ මඟපෙන්විම යටතේ ළමා හා කාන්තා ඒකකය, ග්‍රාම සංවර්ධන නිලධාරි එකමුතුවෙන් සංවිධානය කරන ලද "නිදහසයි - පරිසරයයි" 2026 නිදහස් දින සැමරුම් වැඩසටහන පෙර පාසල් හා පල්ලේගම මධ්‍ය මහා විද්‍යාලයේ 1 ශ්‍රේණිය දරුවන් සම්බන්ධ කර ගනිමින් 2026.02.06 දින පල්ලේගම විද්‍යාලයේ දී සාර්ථකව පවත්වන ලදි.

05/02/2026

දිට්වා සුළි කුණාටුවෙන් පසු යළි නැගීසිටින අපේම ජනතාවට ආශීර්වාද කිරීමේ අරමුණින්, මාතලේ දිස්ත්‍රික් සාසනාරක්ෂක බලමණ්ඩලය, ලග්ගල ප්‍රාදේශීය සාසනාරක්ෂක බලමණ්ඩලය, ප්‍රාදේශීය ලේකම් කාර්යාලය, ලග්ගල ප්‍රාදේශීය සභාව, ශ්‍රී ලංකා යුධ හමුදා 641 වන බලසේනා මුලස්ථානය ඇතුළු කොට්ඨාසයේ රාජ්‍ය ආයතන හා සිවිල් සංවිධාන එක්ව සංවිධානය කළ “ලග්ගල ධර්ම යාත්‍රාව” 2026.02.03 වන දින දවස පුරා සෙත් පිරිත් සජ්ඣායනය කරමින් ලග්ගල කොට්ඨාසයේ විදී සංචාරය කරන ලදී.

05/02/2026

ලග්ගල ප්‍රාදේශීය ලේකම් කාර්යාලයේ පරිපාලන නිලධාරි තනතුරේ සේවය කර, තුම්පනේ ප්‍රාදේශීය ලේකම් කාර්යාලයේ පරිපාලන නිලධාරිනිය වශයෙන් ස්ථාන මාරුවක් ලබා ගිය N.S. බාලසුරිය මහත්මියට
තුම්පනේ ප්‍රාදේශීය ලේකම් කාර්යාලයේ සේවා කටයුතු සාර්ථකව ඉටු කිරීමටත්, එතුමියගේ සියලු කටයුතු සාර්ථක කර ගැනීම සඳහා ලග්ගල ප්‍රාදේශීය ලේකම් තුමා ඇතුළු සමස්ත කාර්ය මණ්ඩලය හෘදයාංගම සුභපැතුම් පිරිනමයි.

02/02/2026

29/01/2026

ලග්ගල ප්‍රාදේශීය සම්බන්ධිකරණ කමිටු රැස්වීම ගරු කමිටු සභාපති, පාර්ලිමේන්තු මන්ත්‍රී දිනේෂ් හේමන්ත පෙරේරා මැතිතුමාගේ ප්‍රධානත්වයෙන්, ලග්ගල ප්‍රාදේශීය ලේකම්තුමා ඇතුළු රාජ්‍ය නිලධාරීන් හා ජනතා නියෝජිතයන්ගේ සහභාගිත්වයෙන් 2026.01.27 දින ලග්ගල ප්‍රාදේශීය ලේකම් කාර්යාලයේදී පැවැත්විය. එහිදී ප්‍රජශක්තිවැඩසටහනට අදාල නිලධාරී නාමලේඛනය අනුමත කිරීම, 2026 වර්ෂයට අදාල ග්‍රාමීය සංවර්ධන වැඩසටහන් අනුමත කිරීම, දිට්වා සුළි කුණාටුවෙන් පසු ප්‍රදේශයේ තත්ත්වය සමාලෝචනය කිරීම, මාර්ග සංවර්ධනය, ලග්ගල ශ්‍රී ලං.ග.ම. උප නැවතුම්පළ සක්‍රීය කිරීම, පාසල් දරුවන්ට ප්‍රවාහන පහසුකම් සැලසීම සහ වටුවාතැන්න වැව ආසන්නයේ Clean Sri Lanka වැඩසටහන යටතේ මහවැලි අධිකාරිය සමඟ එක්ව විධිමත් වෙළඳකුටි හා වැසිකිළි පද්ධතියක් ඉදිකරමින් දෙස් විදෙස් සංචාරකයන් සඳහා පහසුකම් සංවර්ධනය කිරීම ඇතුළු වැදගත් කරුණු රැසක් පිළිබඳව සාකච්ඡා කර කමිටු තීරණ ගනු ලැබීය.

22/01/2026

ලග්ගල කෘෂිකර්ම කමිටු රැස්වීම, පරිසර හා ඩෙංගු මර්ධන කමිටු රැස්වීම සහ කොට්ඨාශ දින රැස්වීම 2026-06-21 දින ලග්ගල ප්‍රාදේශීය ලේකම්තුමාගේ ප්‍රධානත්වයෙන් ප්‍රාදේශීය ලේකම් කාර්යාලයේදී පැවැත්වුණි. මෙම රැස්වීමට මෙම කමිටු හා සම්බන්ධිත රාජ්‍ය ආයතන නියෝජිත නිලධාරීන් හා ගොවි සංවිධාන නියෝජිතයින් සහභාගී විය.

☘️☘️☘️කෘෂිකර්ම කමිටු රැස්වීමේදී දිට්වා සුළි කුණාටුව හේතුවෙන් හානියට පත් කුඹුරු, වැව් සහ වාරිමාර්ග යත තත්ත්වයට පත් කිරීම, වගා හානි සිදු වූ ගොවීන් සඳහා වන්දි ප්‍රදානය කිරීමේ වර්තමාන ප්‍රගතිය සමාලෝචනයට ලක් කෙරුණු අතර, ගොවිජන සේවා මධ්‍යස්ථානය සහ පොල් සංවර්ධන අධිකාරිය ඇතුළු රාජ්‍ය ආයතන මගින් ක්‍රියාත්මක කරන සහන වැඩසටහන් හා කෘෂිකාර්මික සංවර්ධන ව්‍යාපෘති පිළිබඳවද සහභාගී වූ නිලධාරීන් දැනුවත් කරන ලදී. තවද, ප්‍රදේශයේ ගොවිජනතාව මුහුණ දෙන වන අලි තර්ජනය පාලනය කිරීම සඳහා වනජීවී දෙපාර්තමේන්තුව මගින් ක්‍රියාත්මක කරනු ලබන විදුලි වැටවල් දීර්ඝ කිරීමේ ව්‍යාපෘති සහ එල්ලෙන අලි වැටවල් ස්ථාපිත කිරීමේ නව සැලසුම් පිළිබඳවද මෙහිදී විශේෂ අවධානයක් යොමු කරමින් අදාළ ක්‍රියාමාර්ග කඩිනම් කිරීමට තීරණය විය.

🦟🦟🦟ඩෙංගු මර්ධන හා පරිසර කමිටු රැස්වීමේදී අදහස් දැක්වූ මහජන සෞඛ්‍ය පරීක්ෂකවරයා ලග්ගල කොට්ඨාසය තුළ මේ වන විට ඩෙංගු ව්‍යාප්තිය සාර්ථකව පාලනය කර ඇති බව ප්‍රකාශ කළ අතර, එම තත්ත්වය තිරසාරව පවත්වාගෙන යාම සඳහා ග්‍රාමීය ඩෙංගු මර්ධන කමිටු සක්‍රියව ක්‍රියාත්මක කිරීමේ අත්‍යවශ්‍යතාව අවධාරණය කළේය. තවද, මී උණ රෝගයෙන් ආරක්ෂා වීම සඳහා ලබා දෙන ඩොක්සිසයික්ලින් ඖෂධය සෞඛ්‍ය වෛද්‍ය නිලධාරී කාර්යාලයෙන් ප්‍රමාණවත් පරිදි ලබාගත හැකි බවට ජනතාව දැනුවත් කළ අතර, නගරයේ කැළිකසළ කළමනාකරණය විධිමත් කිරීම වෙනුවෙන් ලග්ගල ප්‍රාදේශීය සභාව මගින් ක්‍රියාත්මක කර ඇති නව වැඩපිළිවෙල පිළිබඳව ප්‍රාදේශීය සභා ලේකම්වරයා විසින් මෙහිදී කමිටුව දැනුවත් කරන ලදී.

01/01/2026

ලග්ගල ප්‍රාදේශීය ලේකම්තුමා ඇතුළු ප්‍රාදේශීය ලේකම් කාර්යාලයේ කාර්ය මණ්ඩලය 2026 නව වසරේ රාජකාරි ආරම්භය ආගමික වතාවත් සිදු කිරීමෙන් අනතුරුව ආරම්භ කරන ලදී.