උදවු අල්මාරිය

28/11/2022

14/08/2022

ප්‍රජාමුලුතැන්ගෙය 37 වැනි දවස
(2022 අගෝස්තු මස 08 වැනි සඳුදා)

අද ගැබිනි මව්වරු වෙනුවෙන් අපි විශේෂ වැඩසටහනක් කළ දවස. ඒ ගැන නම් ගොඩක් දේ කියන්න තියෙනවා. අපි දන්නවා අපේ ජීවිත දුෂ්කරයි කියලා. ඒත් ඒ හැමදේටම ශක්තිමත්ව මුහුණ දෙන්න අපිට පුළුවන්. අපි මුලුතැන්ගේ පටන් ගත්ත දවස්වල ඉදලම අපේ ගමේ කිරිදෙන අම්මලට වගේම ගැබිනි අම්මලටත් කෑම දුන්නා. එයාලා ඇවිල්ල පුළුවන් දවස්වලට කෑම කාලා ගියා. ඉතිං ඒ කාලේ ඉදලම එයාලගේ තත්ත්වේ ගැන කස්තුරි ටීචර් ගොඩක් හොයලා බැලුවා. මෙහේ පවුල් සෞඛ්‍ය සේවිකාවත් (මිඩ්වයිෆ්) මේ වැඩේට උදව් කළා.
ඉතිං කස්තුරි ටීචර් එයලා ගැන හොයලා බැලුවම දැන ගත්ත දේ තමයි. ගොඩක්ම සංකූලතා තියෙන අම්මලා මේ අතර ඉන්නවා කියන එක. මේ ගැන ⁣බලද්දී එහෙම අම්මලා පස් දෙනෙක් හිටියා. ඒ අම්මලා පස්දෙනා අතරින් තුන්දෙනෙක් කස්තුරි ටීචර් මැදිහත්වෙලා රෝහල්ගත කළා.
ඒ අය අතරිනුත් එක අම්මා කෙනෙක්ගේ දරුවාගේ හාර්ට් එක වර්ධනය වෙලා නෑ කියලා මළ දරු උපතක් තමයි සිදු වුණේ. තව අම්මා⁣ කෙනෙක් ටිකක් අමාරු තත්ත්වයක් නිසා කොළඹ කාසල් රෝහලට මාරු කරලා දැන් එයා එහේ ප්‍රතිකාර ලබනවා.
අනිත් අම්මගෙත් දරුවගේ ප්‍රශ්න තිබුණා.
ඉතිං මේ ප්‍රශ්නත් එක්ක හොයලා බලද්දී අපේ වතු ගම්මානයේ ඉන්න අම්මලට මේ තත්ත්වය ගොඩක් තියෙන බව දැන ගත්තා.

ඉතිං එයාලාට නිකම්ම කෑම දිලා වැඩක් නෑ කියන එක අපිට තේරුණා. එයාලට මේ ගැන දැනුවත් කරන්න ඕනි තරමට ප්‍රශ්න ඇවිල්ලා තිබුණා.

මේ වැඩේ අම්මලා 17 සහ තාත්තලා 4 දෙනෙක් විතර ආවා. ඉතිං මේ පිරිස ඇතුලේ අපි දැක්කා අඩු වයස් විවාහ, තාත්තලා මත්ද්‍රව්‍යවලට ඇබ්බැමිවීම් වගේම ආර්ථික අපහසුතා එයාලට තියෙනවා.

ඊයේ මේ ගැන දැනුවත් කරන්න කස්තුරි ටීචර් ෆීල්ඩ් විසිට් එකකුත් ගියානේ. කස්තුරි ටීචර් කිව්වා එයාලගේ ජීවිත ගොඩක් දුක්බරයි කියලා. අපිත් දවස ගානේ ඒවා දකිනවා. ඒවාට දැන් අපි හුරුවෙලා නිසා ටීචර්ට තරම් ඒක අපිට නොතේරෙනවා ඇති කියලත් හිතෙනවා. අපි දන්නවා ඒ ජීවිත පහසු නෑ කියලා. අපේ අම්මා අපිව උස්මහත් කරන්න විදපු වේදනාවන් ගැනත් අපි දන්නවා.

අද වැඩේට අපේ උයන නැන්දා පාන්දර 3 විතර ඉදලා තමයි නැගිටලා ඉව්වේ. අද අපේ කෑම වේල වුණේ , කංකුන් පලායි, හාල් මැස්සොයි තෙල් දලා,අලු කෙසෙල් කිරට උයලා, ඇබ⁣රැල්ලා කලුවට උයලා,මාලු මිරිසට උයලා පපඩම් බැලදා අච්චාරු එක්ක කැකුලු බත්.
ආහ්! අද ඩෙසර්ට් එකකුත් තිබුණා. කිරි යෝගට් සහ කෙසෙල්ගෙඩි තමයි දුන්නේ.

අද දෙමව්පියෝ 25ක් උදේ ඉස්කෝලේ යන්නේ නැති අය හිටියා 12ක්.එයාලා තමයි උදේම ඇවිල් සෙන්ටර් එක පිරිසිදු කරලා අද වැඩසටහනට අවශ්‍ය දේවල් ලෑස්ති කළේ. එතකොට යෝගට් ටික, සර්වියට් ටික වගේ අවශ්‍යය දේවල් එයලා ගෙන්න මූලිකත්වය ගත්තා. ඉතිං මේ වැඩේ සම්පුර්ණයෙන්ම සංවිධාන කටයුතු කළේ මේ පාසල් යන්නේ නැති අපේ කණ්ඩායම තමයි. එයාලා කඩිරැලක් වගේ එක පිම්මට වැඩ කළා.

අම්මලට ඕනි වතුර, උනුවතර වගේ ඒවි ගෙනල්ලා දීම, මේස පිරිසිදු කිරීම ඔක්කොම කළේ මේ කණ්ඩායම. අද ආපු මිඩ්වයිෆ් මිසුත් පුදුම වුණා අපේ කණ්ඩායම වැඩ කරන හැටි දැකලා. ඉතිං එයා ඒ ගැන සතුටට විස්තර MOH එකේ ඩෙක්ටර්ටත් කියලා ඩොක්ටරත් කස්තුරි ටීචර්ට කතා කරලා තිබුණා. ඉතිං අපේ සහායෝගීබව අපි දවසින් දවස වැඩි කර ගන්නවා. අද අපි දැඟලුවේවත් නෑ. මොකද වැඩක් යනවානේ. අපි ඒකට උපරිමම උදව් කළා. එළියේ වැඩ ටික ඔක්කොම පිළිවෙලට කරලා දුන්නා. අම්මලාට කරදර නොවෙන්න හැසිරෙන්නත් අපි බලාගත්තා.

අපි අම්මලා කෑම කලා ඉවර වෙනකම්ම ඉවසීමෙන් හිටියා. බඩගිනියි කියලා වෙනදා වගේ දඟ වැඩ කලෙත් නෑ. ඉතිං අපි දැක්කා සමහර අම්මලා යෝගට් කන්නේ නැතුව බෑග් එකේ දාගෙන යනවා. එතකොට අපිට හිතුනා ඒ ගෙදර ඉන්න ඒ අම්මගේ පොඩි ළමයිට වෙන්න ඇති කියලා. ඉතිං අපි කස්තුරි ටීචර්ට කිව්වා.

" ටීචර් අපිට නැති වුණාට කමක් නෑ ඒ අම්මලට කන්න තව එකක් දෙන්න කියලා..."

ටීචර් අපි දිහා පුදුම වෙලා බලන් ඉන්නවත් අපි දැක්කා. හැමෝම අතඇරියත් ටීචර් අපි එක්ක ඉන්න නිසා අපි අපේ උපරිමෙනන් ටීචර්ට වගේම මේ අම්මලටත් උදව් කරන්න ඕනි කියලා අපි දන්නවා. අපි දැක්කා කස්තුරි ටීචර්ගේ සතුට ඇස්වලින්.... ⁣ටීචර්ගේ.ඇස්වලට, මුහුණට සතුටක් ගෙන්න අපි ලොකු දේවල් කළේ නෑ. අපි අපි ඇතලේ ඉන්න අපේම හොඳ හිත් ඒකට යොදා ගත්තා විතරයි.

අද කෑම වේල ගොඩක් රසවත්. අපේ හැමෝටම එක්ක තමයි උයන නැන්දා ඉව්වේ. අද හවස ඉස්කෝලේ ඇරලා එන අයටත් කන්න කෑම තිබුණා.ඉතිං අද ඔක්කොම බලද්දී සෙන්ටර් එකේ 70වකට විතර අපි කෑම දුන්නා.

අද වැඩසටහනට අපේ වසමේ මිඩ්වයිෆ් තව කිට්ටුව වසමක මිඩ්වයිෆ් කෙනෙකුයි දෙන්නෙක් සහභාඟී වුණා. අපේ වසමේ මනෝරි සමරසිංහ මිස් (පවුල් සෞඛ්‍ය සේවිකාව) කිරිවානාගම වත්තේ ළමා සංවර්ධන නිලධාරී ඉන්දිකා සුජීවනී මිසුත් මේ වැඩේට සම්බන්ධ වුණා.

උයන නැන්දයි අපේ කණ්ඩායමයි තමයි වැඩටික කරේ, ගමේ අයියාකෙනෙක්ගේ ත්‍රීවිලර් එකකින් තමයි උයන නැන්දලයි ගෙදරින් කෑම ටික ගෙනාවේ ඒ අයියත් සල්ලී ගන්නේ නැතුව ත්‍රීවිලර් එකෙන් ස්වේච්ඡාවෙන් කෑම ටික අපිට ගෙනල්ලා දුන්නා.

ආපු නිලධාරීන් ගොඩක්ම කියපු දේ තමයි මේ කාලේ කවුරුත්ම මේ වගේ වැඩ කරන්නේ නෑ කියලා. මේ අම්මලටත් මෙහෙම කෑම හම්බ වුණේ නෑ කියලා. කොහෙන්වත්ම දීලා නෑලු ආර්ථික ප්‍රශ්නත් එක්ක කොවිඩ්වලින් පස්සේම කොහෙන්වත් කෑම හම්වෙලා නෑ.

ආපු අයත් බෙදා ගත්තා එක බත් ඇටයක්වත් අපතේ දැම්මේ නෑ. අපි ඩස්ට්බින් ලෑස්ති කරලා තිබුණා. ඒත් හැමෝම බෙදා ගත්තා ප්‍රමාණේ කෑවා. කවුරුවත් අමතරව ආහාර අපතේ යන විදියට බෙදා ගත්තේ නෑ. කන්න පුළුවන් ප්‍රමාණේ බෙදාගෙන උපරිමෙන්ම කෑවා. එහෙම අපේ වැඩේට උපරිමෙන්ම සහයෝගය දීලා තමයි අද එයාලා ගියේ.

නැත්තම් ගොඩක්ම අ පි දන්නවානේ මේවගේ වැඩක් කළාම කෑම අපතේ යනවනේ. ඒත් අපේ වැඩේදී ගමේන් ආපූ හැමෝම කෑම ටිකෙන් උපරිම ප්‍රයෝජන අර ගත්තා. එයාලා දන්නවා අපි කොච්චර වෙහෙසකින්ද මේ වැඩේ කරන්නනේ කියන එක සහ කෑම වල වටිනාකම.

ඉතිං පැමිණි නිලධාරීන් දැනුවත් කිරීම් කළා. හැ⁣මෝම සතුටින් කෑම කෑවා. පාසල්වලිනුත් ගොඩක් තැන්වලිනුත් මඟ ඇරුණු අපි අපේම ගම වෙනුවෙන් වැඩක් සංවිධානය කරලා ඒ වැඩේ ලස්සනට ඉවර කරන්න වැඩ කළා. අපිට ඒ ගැන තියෙන්නේ හදවත් උතුරා යන සතුටු හැඟීමක්. ඒවා අපි හැමෝගෙම හිත් ඇතුලේ එදා තිබුණා. තව ගොඩක් දේවල් ගම වෙනුවෙන් කරන්න පුළුනන් කියලා දැන් අපිට විශ්වාසයි.

අපි
කිරිලිපන ප්‍රජාමුලුතැන්ගෙය සංවිධානය කරන තරුණ තරුණියන්

11/08/2022

ප්‍රජාමුලුතැන්ගෙය - 36 වැනි දවස
(2022 අගෝස්තු මස 7 වැනි ඉරිදා)

හෙට විශේෂ වැඩසටහනක් වෙනුවෙන් සුදානම් වෙන්න තිබුණ නිසා අද අපිට ටිකක් වැඩ වැඩි දවසක් වුණා. කස්තුරි ටීචර්ට නම් ගොඩක් වැඩ තිබුණා. හෙට අපි මධ්‍යස්ථානේ ගැබිනි අම්මලා වෙනුවෙන් වැඩසටහන් පවත්වනවා. ඒකට අවශ්‍යය කෑමමවලට බඩු හොයන්නත් ඒ අම්මලට පණිවිඩේ දෙන්නත් කස්තුරි ටීචර්ට යන්න වුණා.
නිරෝෂා අක්කා තමයි පංතිය බැලුවේ. මේ වැඩ බලලා කරලා කස්තුරි ටීචර් සෙන්ටර් එකට එද්දී හවස 2 විතර වුණා. ඉතිං අත්තාම්මා එක්ක අනිත් අය කෑම සුදානම් කළා. අද පරිප්පු කොහිල දලුයි එකට දලා උයලා ගත්ත රස මාලුවක් උයන නැන්දා අපිට හදලා එවලා තිබුණා.හල් මැස්සොයි ලූණු එකට දලා බැදුමකුයි පපඩම් බැදලා බත් එක්ක තමයි අපි කෑවේ.

අපි අද සිංදුත් කිවුවා. කෑම කාලා විනෝදත් වුණා. වැඩ ඔක්කොම එකතුවෙලා කරලා හෙට වැඩසටහනට ඕනි දේවල් කරලා තමයි අපි අද ගෙවල්වලට ගියේ. හෙට වැඩේ ගැන කතා ගොඩක් තියේවි. අපේ ගම්මානේ ගැබිනි අම්මලා වෙනුවෙන් තමයි ඒ වැඩේ සංවිධානය කරන්නේ.

අපි
කිරිලිපන ප්‍රජාමුලුතැන්ගෙය සංවිධානය කරන තරුණ තරුණියන්


#උදව්අල්මාරිය

11/08/2022

ප්‍රජාමුලුතැන්ගෙය - 35 වැනි දවස
(2022 අගෝස්තු මස 06 වැනි සෙනසුරාදා )

අදත් වෙනදාවගේම කණ්ඩායම් වශයෙන් මධ්‍යස්ථානය වෙත අපේ අය ආවා. අදත් ආත්තම්මා ආවා. එයා ඉඟුරුයි කරපිංචයි අරගෙන ඇවිල්ලා තිබුණා. අද තිබුණේ නිරෝෂා අක්කාගේ ගණිතය පංතිය.

අද අපේ මුලුතැන්ගේ කෑම වේල වුණේ බිත්තර ප්‍රයිඩ් රයිස් එක.

අද ඉතිං පොඩි අයට චිත්‍ර අදින්නත් දීලා, කස්තුරි ටීචර්චයි, අත්තම්මයි, අපේ අනිත් තරුණ කණ්ඩායමයි එකතු වෙලා කෑම වේල ලෑස්ති කළා. කෑම එක සුදානම් වෙනකම් අනිත් අය කණ්ඩායම් වශයෙන් චිත්‍ර ඇන්දා.

අද කණ්ඩායමේ 45ක් හිටියා. අපේ අත්තම්මා ගැන කියන්නම ඕනි එයා වෙනදා වගේම අදත් අපිට මේ වැඩ ටික කර ගන්න ගොඩක් උදව් කළා.

එයා අපි ගැන ගොඩක් හිතනවා කියලා දැන් අපිට දැනෙනවා. පොඩි පොඩි දේවල් එයා අරගෙන එනවා. අපි එක්ක වැඩ කරනවා. අපිව මෙහෙයවනවා. කස්තුරි ටීචර්ට ගොඩක් උදව් කරනවා. සමහර දවසට අපිටත් කලින්ම එයා එනවා. ඉතිං එයාට අපි ආදරෙයි.

අපි
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්


#ලඞකාතරුණ
#උදව්අල්මාරිය

11/08/2022

ප්‍රජාමුලුතැන්ගෙය - 34 වැනි දවස
(2022- අගෝස්තු මස 5 වැනි සිකුරාදා )

අදත් හොඳටම වැස්ස. ඒත් අපි මධ්‍යස්ථානයට ආවා. උදේ ඉදලම වෙනදා වගේම වැඩටික කළා. අද කෑම වුණේ බිත්තර තම්බලා පෙති කපලා සලාදයක් එක්ක පාන්.

අදත් වැස්ස එක්ක පැමිණීම නම් දුර්වල වුණා. අද කණ්ඩායමේ අපි 25ක් වගේ තමයි හිටියේ.

අදත් පංතිය තිබුණා. අපි වැඩත් කළා. ඒත් මේ දවස්වල වැස්ස නිසා අපේ කට්ටිය ටිකක් අඩුයි. හැබැයි වැඩවලට නායකත්වය දෙන අපේ අය නම් මොන බාදක ආවත් වැඩත් එක්ක ඉන්න එක ගැන නම් තියෙන්නේ ලොකු සතුටක්. මොකද අපි දන්නවා මේ තැන තියෙන්නේ අපි වෙනුවෙන් කියලා. අපි ඒක රැක ගන්න ඕනි.

කාලයක් තිස්සෙම අපෙන් ඈත්වෙලා තිබුණු මධ්‍යස්ථාන භූමියට දැන් ටික ටික පණ ඇවිල්ලා වගේ. මේතනට එක එක විදියේ අය එනවා. අපිට කාලයක් පුරාම දේවල් මඟහැරිලා කියලා දැන් දැනෙනවා. ඒ වෙනුවෙන් මේ තැන හදා ගන්න ඕනි කියලා දැන් අපි දන්නවා. දවස ගානේ වෙන මැදිහත්වීම් වගේම, එකතුවෙන පිරිස් අපිට හරිම වැදගත්. ඒ වෙනුවෙන් දවස ගාණේ මහන්සිවෙලා කරන්න වැඩ ගොඩක් තියෙනවා කියලා අපි දන්නවා.

අපි
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්


#ලඞකාතරුණ
#උදව්අල්මාරිය

11/08/2022

ප්‍රජාමුලුතැන්ගෙය - 33 වැනි දවස
(2022 අගෝස්තු මස 04 වැනි බ්‍රහස්පතින්දා )

අද ප්‍රජාමුලුතැන්ගේ ආහාර වේල වුණේ, සුදු කැකුළු බත්,පරිප්පු වෑංජනයක් එක්ක සෝසේජර්ස් බැදුම්. අද කෑම එක නම් අපි ගොඩක් කැමති එකක්. අපි හැමෝම එකතු වෙලා ආසාවෙන් කෑවා.

කස්තුරි ටීචර් නම් අපි සොසේජර්ස් කනවට කැමති නෑ. මේ සතියේ වැඩ වැඩි නිසා ටීචර්ට පොළේ යන්නත් බැරිවුණා. බිත්තර හොයා ගන්නත් බැරි වුණා. කිට්ටුවපාත මාලු තිබ්බෙත් නෑ. ඒ නිසා තමයි මේ අවස්ථාව ලැබුණේ. කොහොම වුණත් මේක අපිට වෙනස් කෑමක් වූණා.
අද ළමයි 21ක් වගේ තමයි හිටියේ.

ආහ්! අද විශේෂ දෙයක් වූණා. ආර්ථික සංවර්ධන නිලධාරීකෙනෙක් බෙදන්න දීලා තිබුණු එළවලු ඇට පැකට් දෙකක් අපිට හම්බවුණා. ඉතිං අපිට පුළුවන් ඒවා ගෙවතුවගා වැඩවලට පාවිච්චි කරන්න. දවසින් දවස අපිට දේවල් ලැබෙනවා. අපි වගාව පටන් ගත්ත නිසා ඒකට උදව් කරන්න නිලධාරීනුත් එකතු වෙමින් ඉන්නවා. ඒ ගැන අපිට සතුටුයි.

අපි ,
කිරිලිපන ප්‍රජාමුලුතැන්ගෙය සංවිධානය කරන තරුණ තරුණියන්


#ලඞකාතරුණ
#උදව්අල්මාරිය

10/08/2022

ප්‍රජාමුලුතැන්ගෙය -32 වැනි දවස
(2022 අගෝස්තු මස 03 වැනි බදදා)

වෙනදා වගේම අදත් අපි වැඩ පටන් ගත්තා. දවසක විරාමයකින් පස්සේ තමයි අද අපි මධ්‍යස්ථානයට ආවේ. ඊයේ කාලගුණය අයහපත් නිසාම අපිට දවසක නිවාඩුවක් ලැබුණා. අපි උදේම මධ්‍යස්ථානය පිරිසිදු කිරීම් වැඩ කළා. අවුව ටිකක් වැටුණු ඒ නිසාම පිරිසිදු කිරීම්වලට පහසු වුණා. ඒ වැඩ ඉවර කරලා ආගමික වතාවත් කරලා වැඩ පටන් ගත්තා. අද උදේ වරුවේ කස්තුරි ටීචර් හිටියේ නෑ. පූර්ණිමා ටීචර් තමයි අද උදේ වරුවේ අපිත් එක්ක හිටියේ.

කස්තුරි ටීචර් අපිට අද සැන්විචර්ස් හදන්න බඩු ගෙනත් දීලයි ගියේ. සොසේජර්ස් ලූණු තක්කාලි, බටර් පාන් තමයි තිබුණේ. අද අපිට කෑම වේල වෙනස්ම එකක් වුණා.

සැන්විචර්ස් මේ විදියට අපිට කන්න ලැබෙන්නේ නැති තරම්. අද ළමයි 25 ක් විතර හිටියා. අපි අද හරි ආසාවෙන් කෑවා. මොකද මේක අපිට අලුත් කෑමක් වුණා.

අදත් හොඳටම වැස්ස. එළියේ වැඩක් කරන්නත් බැරි තරම්. ඉතිං කෑම කාලා ඉවර වෙලා අපි අද වෙලාසනින් ගෙවල්වලට ගියා.

අපි
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්


#ලඞකාතරුණ
#උදව්_අල්මාරිය

10/08/2022

ප්‍රජාමුලුතැන්ගෙය 31 වැනි දවස
(2022 අගෝස්තු මස 1 වැනි දින)

එන්න එන්න කාලගුණේ නම් අපිට මධ්‍යස්ථානය වෙත උදේම යන්න බාදා කරනවා. අදත් එහෙම දවසක්. උදේම වැස්ස. හරි තදට හුළං එක්ක එක දිගට වැස්ස. ඒත් අපේ කණ්ඩායමේ සම්පුර්ණ කණ්ඩායමම නවත්තන්න ඒ වැස්සට බැරි වුණා. අදත් ළමයි 20කට ආසන්න ප්‍රමාණයක් වැස්සත් අතින් අරන් මධ්‍යස්ථානයට ආවා.

වෙනදා වගේම පංතියේ වැඩ ටික කළා. වැස්ස නම් නතර වුණේ නෑ. මධ්‍යස්ථාන ඇතුලටත් හුලං පොද එන්න ගත්තා. හුළඟ එච්චරට සැරවුණා.

කස්තුරි ටීචර් අද අපිට චිත්‍ර අඳින්න දුන්නා. මාතෘව දුන්නේ අහස. ඉතිං අපි එක එක විඳියට අහස ගැන චිත්‍ර ඇන්දා. අපිට තිබුණේ ඒ චිත්‍ර පාට කරන්න එක පාට පෙට්ටියයි. ඒත් අපි ඔක්කොම ඒක බෙදා ගෙන පාට කළා. අසාලිවීමත් කළා.

එදා අපි වෙලාසනින් කෑමත් කෑවා. වැව්මාලු කිරට හදලා උයන නැන්දා එයලා තිබුණා. අපි හැමෝම එකතු වෙලා පොල්සම්බල් හැඳුවා.කැකුලු බතුත් හැඳුවා.

අපි හැමෝම කෑම කෑවා. මෙහෙම වැස්සේ කුස්සියටයි, මධ්‍යස්ථානය ඇතුලටයි යන්න ගත්තාම ඇතුල මඬවෙන්න ගත්තා. පොඩි අයව ඇතුලට යවලා. කස්තුරි ටීචර් එක්ක අපි වැහි වතුරත් තියෙන නිසා මධ්‍යස්ථානේ පිරිසිදු කළා. ඉතිං වතුර ප්‍රශ්නේ අපිට තියෙන නිසා මේ වැහි වතුර යොදා ගෙන මධ්‍යස්ථානේ අපි හොඳටම පිරිසිදු කර ගත්තා.

ඒ අතර සත්‍යයි තව යාලුවෙකුයි එකතුවෙලා කුස්සියේ උයපු භාජන විතරක් නෙමෙයි. තිබුණ හැම භාජනයක්ම එළියට අරන් ඔක්කොම හොඳට පිරිසිදු කරලා හේදුවා.

කුස්සියයි, මධ්‍යස්ථානය ඇතුලයි, පේමන්ට් එකයි ඇතුලු ඔක්කොම තැන් අපි හොඳින් හොඳලා පිරිසිදු කර ගත්තා.

ආහ්..! ඉතිං අපි ලද අවසරෙන වතුරේ හොඳට දැඟලුවා.නැටුවා. සෙල්ලමුත් කළා.මධ්‍යස්ථානේ වතුර බැහැලා යන කානුවේ අපි කඩදාසි බෝට්ටු හදලා පා කලා. ඒක නම් හරිම සතුටු හිතෙන දෙයක් වුණා. ඒක ඉතිං අපි කැමතිම දෙයක්නේ... අද ඉතිං දවස ගෙව්නේ, වැස්ස එක්කම තමයි.....

අද වැහිවතුරත් එකතු කරලා අනිත් දවස්වලට භාවිතා කරන්න අරන් තියලා තමයි අපි ගෙවල්වලට ගියේ....

අපි,

කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්

04/08/2022

ප්‍රජාමුලුතැන්ගෙය 30 වැනි දවස
(2022- ජූලි මස 31 වැනි දින)

අද අපේ මුලුතැන්ගේ කෑම එක වුණේ, මාලුයි, මඤ්ඤොක්කා කොළ මැල්ලුමයි, පරිප්පුයි, කැකුලු බත් එකයි......

අපි එක්ක මේ වැඩේට උදව්වට මුල් කාලේ ඉලම අත්තම්මාලා කීප ⁣දෙනෙක්ම හිටියා. එයලා අපි එක්කම මධ්‍යස්ථානයට ඇවිල්ලා අපි ගැන හොයලා බලලා, අපිට උදව්කරන එක දිගටම කලා. මුලින් අපි හිතුවා...,දවසක් දෙකක් ඇවිල්ලා නතරවෙයි කියලා. නෑ එයාලා එහෙම නතර වුණේ නෑ. මේ වතු යායේම වැඩ එක්ක ජීවිතේ ගෙවපු ඒ අත්තම්මා අපි වෙනුවෙන් එයාලගේ සහයෝගය දිගටම ලබා දෙනවා.

අද උදේම ඒ අතර හිටපු තව අත්තම්මා කෙනෙක්, ගෙදරින් මඤ්ඤොක්කා කොළ කොටලා, පොල් ගාගෙන අරගෙන ඇවිත් තිබුණා. උයන වැඩවලට උදව් කරන නැන්දා මාලු හදලා එවලා තිබුණා. අපි අද ඉව්වේ ඒ මඤ්ඤොක්කා කොළ මැල්ලුමයි, පරිප්පුයි, බත් එකයි විතරයි.

තව ළහිරු අයියා අපිට ඇමබුන් කෙසෙල් ගෙනල්ලා දුන්නා. අතුරුපසට ගන්න. එයාලා හැමෝම අපි දිහා බලන් ඉන්නවා. දවස ගාණේ අපිට දේවල් කරන්න වගේම කර ගන්නත් උදව් කරනවා.

අපි ගෙවතු වගා වැඩත් අද කළා. පංතියේ වැඩ ටික පූර්ණිමා මිස් බැලුවා.

උදේ වරුවේ පාසල් නොයන අය තමයි සහභාගී වුණේ. ඒ කණ්ඩායමට අසාලිවීම සහ සරළ වාක්‍යය ලියන හැටි කියලා දුන්නා. ලිවුමක් කියවන්නත් දුන්නා.අකුරු බැරිම අයට අකුරු හඳුන්වා දීමත් කළා.

ආහ්! තව අත්කම් වැඩත් කළා. තව පෑන, පැන්සල කොහොමත් හුරු නැති අයට ඇඟිලි හසුරවන්න පුරුදු කරවන ක්‍රියාකාරකමුත් කස්තුරි ටීචර් කියලා දුන්නා.

ඉතිං පස්සේ පංති වැඩ ඉවර කරලා, කෑමත් කාලා, ගෙවතුවඟා වැඩ කරලා අද වැඩසටහන ටිකක් කලින් ඉවර කළා.

අද අපිට ⁣ගොඩක්ම අත්තම්මාගේ ආදරේ දැනුන දවසක්. එයාලා හැමදාමත් ආවා. අදත් වෙනදා වගේම ආවා. එයාලට පුළුවන් දේ උපරිමෙන්ම අපි වෙනුවෙන් කරනවා. ඒ ගැන අපිට තියෙන්නේ ලොකු සතුටක්.....

අපි කිරිලිපන ප්‍රජාමුලුතැන්ගෙය සංවිධානය කරන තරුණ තරුණියන්

03/08/2022

ප්‍රජාමුලුතැන්ගෙය - 29 වැනි දවස
(2022 ජූලි මස 30 වැනි දවස)

අද ප්‍රජාමුලුතැන්ගෙය අපිට විශේෂ දවසක් වුණා. ඒ විශේෂ සැමරුමක් නිසා බව කලින් දවසේ ඉදලම අපි දැ⁣නගෙන හිටියා. දවසින් දවස අලුත් අය අපි එක්ක එකතු වුණානේ. තරුණ කණ්ඩායම ඒ අතර විශේෂයි. ඉතිං ඒ අලුත් අය නොකඩවා වැඩවලට සහභාගී වුණා. ගොඩක් වැඩවලට මූලිකත්වයත් ගත්තා කියලා අපි කලින් දවසකුත් කිව්වානේ. ඉතිං අද අපේ මුලුතැන්ගේ කෑම වේල වුණේ බිරියානි. මේ වැඩේට අදාළ සියලුම බඩු ගෙනාවේ මේ අලුත් අපේ තරුණ කණ්ඩායම.
අපිට වගේම එයලටත් දැන් මේ තැන තමන්ගේ කියන හැඟීම ඇවිල්ලා තියෙනවා. දැන් අපි හැමෝම එකම කණ්ඩායමක්...!

ගෙවල්වලින් කවදාවත් කඩේ ⁣නොයවපු, කිව්වත් නොගියපු, ඒ ගැන කිසිම අදහසක්වත් නොතිබුණු අපේ අය මේ වගකීම අරගෙන වැඩේට අවශ්‍යය සියලුම දේ සංවිධාය කළා.ඒක ඒ අයට අලුත් අත්දැකීමක් වුණා. මේ අලුත් තරුණ කණ්ඩායම හරිම උනන්දුවෙන් වැඩවලට එනවා.

අද පංතියේ වැඩ ටිකක් පරක්කු වුණා. නිරෝෂි අක්කා පොඩ්ඩක් අසනීප වෙලා බෙහෙත් ගෙන්න ගියපු නිසා. ගණිත පංතිය ප්‍රමාද වෙලා තමයි ඒ නිසා පටන් ගත්තේ. අනිත් අය ඔක්කොම මේ වැඩ වෙනදා වගේම කළා. මිරිස් පැල මෑකරල් ඇට එහෙමත් ගෙනල්ලා තිබුණා.

ඉතිං අද සැමරුම වුණේ අපි වෙනුවෙන් උදව් කරපු සිංගප්පූරුවේ, දැනට රැකියවක් කරන සේකා අක්කාගේ ආදරණීය පියාණන්ව සිහිපත් කරලා කෑම වෙල සැකසීමයි.

සේකා අක්කාගේ තාත්තා වියෝ වෙලා අදට අවුරුදු 21ක්. හදිස්සි අනතුරකින් වියෝවුණු ඒ පියාණන්ව අපි හැමෝම අද දවසේ ආදරයෙන් සිහිපත් කරනවා.

හැමෝම බිරියානි ආසාවෙන් කෑවා. අපිට එහෙම කෑම ලැබෙන්නේ හරි කලාතුරකින් වුණත් අපි හැමෝම මේ ආහාර වෙල බෙදාහදාගෙන කෑවා. අද කණ්ඩායමේ 54 දෙනෙක් හිටියා. ගොඩක් අය කඩින් කඩ ආවේ පංති තිබුණේ මාරුවෙන් මාරුවට නිසා.

අද මේ වැඩේ කරන්න අපිට වතුර හොයා ගන්නත් ලොකු මහන්සියක් වෙන්න වුණා. අද වතුර තිබ්බේ නෑ. හරි අමාරුවෙන් තමයි අපි වතුර ගත්තේ. අපිට වතුර සම්බන්ධ ගැටලුවක් නම් ලොකුවටම තියෙනවා. කස්තුරි ටීචර් මේ වතුර ප්‍රශ්නේ විසඳගන්න ගොඩක් උත්සාහ කරනවා. ඒත් තාම හරියට ඒ වැඩේ කර ගන්න බැරිවුණා. අදත් හරි අමාරුවෙන් තමයි අපි වතුර බාස්කට් හතරක් ⁣හොයාගත්තේ. සමහර දවසට මේක තදටම තියෙනවා. ලයින් එකෙන් වතුර නැතුව ගියාම, අපිට වතුර ගන්න ලැබෙන්නේ නෑ.ඉතිං මේ දවස්වල වතුර ප්‍රශ්නේ අපිට හොඳටම තියෙනවා. වගාවට නම් දැනට බැරල් එකකට පුරවා ගත්ත වතුර තියෙනවා.

ඉතිං ඒ ගැන අපිට උදව් කරන අය අඩුයි. මේ ගැන කරන්න පුළුවන් දේ ගැනත් අපි ඉස්සරහට හිතනවා.

කොහොම වුණත්, අපි එකතුවෙලා හදා ගත්තා කෑමවේල හරි අසාවෙන් අද එකට එකතුවෙලා කෑවා. ඒ ගැන අපි හැමෝටම සතුටුයි.

අපි,
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන් .

අද දින ආහාර සඳහා උදව් කළේ....,

එච්. ඒ සේකා සොයුරියයි.

කිරිලිපන තරුණ තරුණියන් ,අද දින ඇයගේ ආදරණීය පියාණන් වූ දැනට අවුරුදු 21පෙර අප අතරින් වියෝ වූ හපුආරච්චිගේ චන්ද්‍රරත්න මහාතා සිහිපත් කරමින් අද වැඩසටහන් පවත්වනු ලැබුවා.

#ලඞකා තරුණ ව්‍යාපාරය
# උදව් අල්මාරිය

03/08/2022

ප්‍රජාමුලුතැන්ගෙය - 28 වැනි දවස

(2022- ජූලි මස 29 වැනි දින)

අදත් අපි වෙනදා වගේම මධ්‍යස්ථානය වෙත ගියා. පිරිසිදු කිරීම් වැඩ කළා. දවසින් දවස අපේ වැඩ එක්ක එකතුවෙන පිරිස් අතරේ අපිට ආදරේ කරන ආත්තම්මලා කීප දෙනෙක්ම ඉන්නවා. අදත් ඒ අය අතරින් එක ආත්තම්මා කෙනෙක් ආවා. එයා ඇවිල්ලා අපි එක්ක මධ්‍යස්ථාන පිරිසිදු කරන වැඩ වගේම අපිව වැඩවලට හසුරවන වැඩෙත් හොඳට කළා. එයා අපි හැමෝටම ලොකු සහයෝගයක් දෙනවා වැඩවලට.

ආහ්...! අද අපි උදේම ඉගුරු කොත්තමල්ලි හැඳුවා. මොකද මේ දවස්වල මෙහෙට හරි වැස්ස. වැස්සට තෙමිලා ලෙඩ හැදෙනවා. ඒවට ඉගුරු කොත්තමල්ලි බොන එක හොඳයි කියලයි, කස්තුරි චීචර් කියන්නේ. අපි ඉතිං ඒවා හදලා, උදේ දහයට විතර ඔක්කොම එක්ක ඒවා බිව්වා.

ඊට පස්සේ කුස්සියේ වැඩටික පටන්ගන්නත් ලේස්ති වුණා. අපි අද ඉව්වේ, වම්බටු, පරිප්පු එක්ක මාලු මිරිසට හදලා කැකුළු බත්.

අද උදේවරුවේ ඉස්කෝලේ යන්නේ නැති ළමයි සහභාගී වුණා. තව තරුණ කීපදෙනෙක් එකතු වෙලා, ගෙවතුවගා වැඩත් කරා. දවල් එකහමාරෙන් පස්සේ විෂයන් අනුව පංතිවලටත් අපේ අය සහභාගී වුණා. අද ළමයි 45ක් වගේ තමයි හිටියේ.

විශේෂ දෙයක් විදියට අද අපේ කණ්ඩායම එක එක ජාතියේ දේවල් ගෙනත් තිබුණා. සමහර අය බටකෑලි ගෙනාව ටැප් හදන්න. කස්තුරි ටීචර් එක ටැප් එකක කඩෙන් ගෙනල්ලත් තිබුණා. බාත්රූම්වල ටැප් වගේම එළියේ පාවිච්චි වතුර ගන්න ටැප් එකක් එහෙමත් අපි අද හදා ගත්තා.

ඒ ගොඩක් දේවල් අලුත් වැඩියා කරන්න අපේ කට්ටිය ගෙවල්වලින් අයින් කරන භාවිතා කරන්න පුළුවන් පොඩි පොඩි දේවල් එකතු කරන් ගෙනල්ලා තිබුණා. පොඩි පොඩි තාක්ෂණික දැනුමකුත් නැතුවම නෙමෙයි. ඇන එහෙම රත්කරලා පට අවශ්‍ය විදියට කපලා වැඩේ පිළිවෙලක් එහෙමත් කරා.

එතකොට ⁣මේ වෙනකම්ම අපි කුස්සියේ වැඩවලට වතුර ගත්තේ බාත්රූම් එකෙන්. අද අපිට පුළුවන් වුණා එළියට ටැප් එකක් දාගන්න. ඉතිං අද ඉදන් එතන අපේ වැඩවලට ටැප් එකක් තියෙනවා. තව ටැප් දෙකක් හදන්න පුළුවන් වුණා. මේකෙදී, අපි මතක් කරන්නම ඕනි සුමුදු.... එයා තමයි අපේ ප්‍රධාන කාර්මික ශිල්පියා වුණේ. සුමුදු ඉස්කෝලේ යන්නේ නෑ. එයා මේවගේ වැඩවලට හරිම දක්ෂයි. එයාම තනියම හිතලා ඔක්කොම වැඩටික කරන්න අපිටත් කියලා දීලා වැඩේ පිළිවෙලට ලස්සනට ඉවර කළා.

ඉතිං අද දවස අපි ගෙව්වේ මේවගේ අපේම වැඩ වලින් ..... අපි අතර දවසින් දවස හැකියාවන් තියෙන අය ඉන්නවා කියලා මේ පුංචි පුංචි වැඩවලින් අපිට තේරෙන්න අරන් තියෙනවා. ඉතිං ඒ හැකියාවන් දවසින් දවස වැඩි කර ගන්නත් අපි කැමතියි.

අපි,
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්

#ලඞකා තරුණ ව්‍යාපාරය
# උදව් අල්මාරිය

31/07/2022

ප්‍රජාමුලුතැන්ගෙය 27 වැනි දවස
(2022- ජූලි මස 28 වැනි බ්‍රහස්පතින්දා )

අද උදේ පංතිය ආරම්භ කළා. අද උදේම කස්තුරි ටීචර් අපිට රස කෑමක් ගෙනල්ලා තිබුණි. ඒ තමයි රටකජු ඉරිදා පොළෙන් ගෙනාපු රටකජු තම්බලා උදේ 10.00ට විතර අපිට කන්න ලැබුණා රටකජු ...
අපි හැමෝම සතුටින් කෑවා.

ඊටපස්සේ ගෙවතු වගා වැඩ ටික වගේම පිරිසිදු කිරීමේ වැඩත් අපි කඩි රැලක් වගේ කඩිසරව කළා. ඔක්කොම පිරිසිදු කරලා ලහි ලහියේ අපි උයන වැඩේත් කණ්ඩායම් බෙදිලා පටන් ගත්තා.

අද කෑම එක ටිකක් වෙනස් විදියට හැදුවේ. අපි පරිප්පු එළවලු ඔක්කෝම දලා එක බතක් හැඳුවා. මාලු හොද්දකුත් හදලා අපිට උයන නැන්දා ගෙනල්ලා දුන්නා. ඒක හරි රසයි.

අද වැස්ස තදටම තිබුණා. මේහෙට වහිද්දී වෙනදා වගේම අපේ අයගේ පැමිණීම අඩු වෙනවා. ඉතිං අද කණ්ඩායමේ හිටියේ 32ක් වගේ පිරිසක්.

අද හවස් වරුවේ දෙමළ පංතිය කළා. දෙමළ පංතියට ළමයි 12 දෙනෙක් විතර සහභාගී වුණා.

ආහ්....! ඔයාලට අලුත් දෙයක් විශේෂයෙන් කියන්න ඕනි. මතක ඇතිනේ අපි කිව්වා, 26 අපේ උපන්දින සැමරීම ගැන. එදා මධ්‍යස්ථානට කවදාවත් එන්නේ නැතුව හරි ලැජ්ජාවෙන් හිටපු කොල්ලෝ කෙල්ලෝ කණ්ඩායමක් ආවා. එයායා එදා ඉදලම දවසින් දවස අපේ කණ්ඩායම එක්ක එකතු වෙනවා.

එයාලා අපි එක්ක කතා කර කර ඉන්නවා. එයාලාගේ අදහස් කියනවා. පුස්තකාලය හදන්න හට් එක ගහන්න ප්ලෑන් කරන වැඩ, ⁣මධ්‍යස්ථානයේ ඇතුලේ විනය සම්බන්ධ බෝඩ් සවිකිරීම ගැන වගේ ගොඩක් දේවල් ගැන කස්තුරි ටීචර් එක්ක කතා කරනවා.

එතකොට තව එයාලා පංති ගැනත් කතා කරනවා. ඔන්ලයින් අලුත් ක්ලාස් එකක් දැනට තියෙන ඒවට බාදා වෙන්නේ නැතුව දාන්න වගේ ඉල්ලීමුත් එයාලා කළා. ඒවගේම අපේ නිරෝෂා අක්කා එක්ක කැම්පස් යන විදිය, ඒවට ගැලපෙන විෂයන් ගැනත් එයාලා කතා කළා. එයාලගේ උනන්දුව අපිට අලුත් ජවයක් වැඩවෙනුවෙන් ඇති කරනවා.

සමහර වෙලාවට එයලා එන්නේ නෑ කියලා අපි හිතලා ඉවුවත් එයලා ආවා. එතකොට කෑම මදිත් වුණා. එහෙම වුණාම එයාලම උයාගෙන එයාලම කන තරමට එයාලාට අපේ මධ්‍යස්ථානය දැන් සමීප වෙලා. ඉතිං ඒ සහයෝගය අපිට හයියක්. අපිට ඕනි ඒ අපේම කියන හැගීම ගමේ හැම කොල්ලෝ කෙල්ලන් අතරටම අරගෙන යන්න......
ඒක හිමින් හිමින් වෙමින් තියෙනවා.

අපි,
කිරිලිපන ප්‍රජාමුලුතැන්ගේ සංවිධානය කරන තරුණ තරුණියන්