02/06/2026
ගාල්ල මහ නගර සභාවේ මහජන සෞඛ්ය පරීක්ෂකවරුන්ගේ ප්රශංසනීය මෙහෙවර
2026 වෙසක් මංගල්යය නිමිති කරගනිමින් ගාල්ල මහ නගර සභා සීමාව තුළ වෙසෙන ජනතාවට සහ දුර බැහැර සිට ගාල්ල නගරයට පැමිණි දසදහස් සංඛ්යාත මහජනතාව වෙනුවෙන් දන්සල් විශාල ප්රමාණයක් ගාල්ල නගරයේ පරිත්යාග ශීලි ජනතාව සංවිධානය කර තිබුණි. වෙසක් උත්සවයේ ආමිස හා ප්රතිපත්ති පූජාවන්ට සමගාමීව, අතිමහත් සත්භාවයෙන් යුතුව මහජනතාව වෙත පිරිනැමුණු මෙම දන්සල් ඉතාමත් පිරිසිදු, ගුණාත්මක මෙන්ම සෞඛ්ය ආරක්ෂිත වටපිටාවක් තුළ පවත්වාගෙන යාම සහතික කිරීම වෙනුවෙන් ගාල්ල මහ නගර සභාවේ මහජන සෞඛ්ය පරීක්ෂකවරුන් (PHI) ඉටුකළේ අනුපමේය මෙහෙවරකි.
නගර සභා සීමාව තුළ විවිධ ආහාර පාන වර්ග රාශියකින් සමන්විතව සමස්ත දන්සල් 124 ක් ලියාපදිංචි කර පවත්වනු ලැබීය. එම දන්සල් වර්ගීකරණය පහත පරිදි වේ:
• බත් දන්සල් – 10
• නූඩ්ල්ස් දන්සල් – 02
• අයිස්ක්රීම් දන්සල් – 35
• රොටි දන්සල් – 02
• කඩල දන්සල් – 22
• පාන් දන්සල් – 20
• ඔසුපැන් දන්සල් – 04
• සුප් දන්සල් – 02
• බීම දන්සල් – 11
• අයිස් කෝපි දන්සල් – 02
• කප් කේක් / කුකීස් දන්සල් – 02
• කොස් දන්සල් – 01
• සව් දන්සල් – 06
• මඤ්ඤොක්කා (මයිඤ්ඤා) දන්සල් – 01
• කප් කේක් / බිස්කට් දන්සල් – 03
• ෆෘට් සැලඩ් දන්සල් – 01
එකතුව: දන්සල් 124
මෙතරම් විශාල දන්සල් ප්රමාණයක් නගරය පුරා විසිරී පැවතුණ ද, මහජන සෞඛ්යය පිළිබඳ පූර්ණ වගකීම කරට ගත් මහජන සෞඛ්ය පරීක්ෂකවරුන් මෙම සියලුම දන්සල් අවස්ථා කිහිපයකදීම ක්ෂේත්ර පරීක්ෂාවට ලක් කිරීමට කටයුතු කළහ. ආහාර පිසීමේ පිරිසිදුකම, ජලයේ ගුණාත්මකභාවය, ආහාර ගබඩා කර ඇති ආකාරය සහ මහජනතාවට බෙදාහරින පරිසරයේ සනීපාරක්ෂිතභාවය පිළිබඳව ඔවුන් ඉතා දැඩි ලෙස විපරම් කළහ.
එහිදී හුදෙක් අඩුපාඩු සෙවීමෙන් ඔබ්බට ගොස්, සංවිධායක මණ්ඩල වෙත ඉතා සුහදශීලීව අවශ්ය මඟ පෙන්වීම් සහ නිවැරදි කිරීම් සිදු කිරීමට ඔවුහු වගබලා ගත්හ. සෞඛ්ය නීති රීතිවලට අනුකූලව ආහාර පාන පිළියෙල කරන ආකාරය පිළිබඳව සහ සහභාගී වන ජනතාව වසංගත හෝ වෙනත් සෞඛ්ය අවදානම්වලින් ආරක්ෂා කරගන්නා ආකාරය පිළිබඳව වටිනා උපදෙස් ලබා දෙන ලදි.
රාත්රී නිදි වර්ජිතව සහ දැඩි කැපවීමෙන් යුතුව ගාල්ල මහ නගර සභාවේ මහජන සෞඛ්ය පරීක්ෂක නිලධාරීන් ඉටුකළ මෙම උදාර රාජකාරිය නොවන්නට, වෙසක් සමයේ මහජන සෞඛ්යය සුරක්ෂිත කිරීම අතිශය අභියෝගාත්මක වීමට ඉඩ තිබුණි. නිල රාජකාරියෙන් එහා ගිය මානුෂීය බැඳීමකින් සහ අතිමහත් සත්භාවයෙන් යුතුව දන්සල් සංවිධායකයින් මෙන්ම මහජනතාව ද දිරිගන්වමින් සිදුකළ මෙම අමිල මෙහෙවර සැබවින්ම ඉහළම ඇගයීමට හා ප්රණාමයට ලක්විය යුතුය.
