ສານປະຊາຊົນສູງສຸດແຫ່ງ ສປປລາວ The People's Supreme Court of The Lao PDR

12/06/2026

ໃນຕອນເຊົ້າ ວັນທີ 12 ມິຖຸນາ 2026 ທີ່ສານປະຊາຊົນສູງສຸດ ໄດ້ເປີດພິທີ ເປີດຂະບວນການຂໍ້ແຂ່ງຂັນ 3 ດີ ຂອງສະຫະພັນແມ່ຍິງ ສານປະຊາຊົນສູງສຸດປະຈໍາປີ 2026, ພາຍໃຕ້ການເປັນປະທານຂອງ ທ່ານ ຂຸນສຸວັນ ສຸທຳມະວົງ ຮອງປະທານສານປະຊາຊົນສູງສຸດ ຜູ້ຊີ້ນຳວຽກງານ 3 ອົງການຈັດຕັ້ງມະຫາຊົນ ແລະ ມີທ່ານ ນາງ ທັນສະໄໝ ຊາມຸນຕີ ປະທານສະຫະພັນແມ່ຍິງ ສານປະຊາຊົນສຸງສຸດ ພ້ອມດ້ວຍສະມາຊິກແມ່ຍິງສານປະຊາຊົນສູງສຸດ ເຂົ້າຮ່ວມຢ່າງພ້ອມພຽງ.
ກອງປະຊຸຸມໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດວຽກຂໍ້ເເຂ່ງຂັນ 3 ດີປະຈຳປີ 2025 ແລະ ແຜນສືບຕໍ່ແຂ່ງຂັນປະຈຳປີ 2026 ຂອງສະຫະພັນແມ່ຍິງສານປະຊາຊົນສູງສຸດ, ໂອກາດດຽວກັນນີ້ທັງ 14 ໜ່ວຍແມ່ຍິງສານປະຊາຊົນສູງສຸດ ກໍ່ຍັງໄດ້ສືບຕໍ່ຈັບມືແຂ່ງຂັນກັນ ໃນການຈັດຕັ້ງປະຕິບັດຂະບວນການແຂ່ງຂັນ 3 ດີໃຫ້ສາມາດຮັບຮອງໄດ້ອີກໃນປີຕໍ່ໆໄປ.

11/06/2026

ວັນທີ 11 ມິຖຸນາ 2026 ຜ່ານມານີ້, ສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ ໄດ້ຈັດພິທີປະກາດການຈັດຕັ້ງ ພາຍໃຕ້ການເຂົ້າຮ່ວມເປັນປະທານຂອງທ່ານ ໄຊສົມພອນ ເພັດຊົມພູ ຄະນະບໍລິຫານງານພັກ, ເລຂາໜ່ວຍພັກ, ຫົວໜ້າສະຖາບັນຄົ້ນຄວ້າ ແລະ ຝຶກອົບຮົມ, ມີຜູ້ຕາງໜ້າກົມຈັດຕັ້ງ-ພະນັກງານ ສານປະຊາຊົນສູງສຸດ ພ້ອມດ້ວຍພະນັກງານຂອງສະຖາບັນ ເຂົ້າຮ່ວມຢ່າງພ້ອມພຽງ.
ໃນພິທີ ຕາງໜ້າກົມຈັດຕັ້ງ-ພະນັກງານ ໄດ້ຂື້ນຜ່ານ ຂໍ້ຕົກລົງ ຂອງປະທານສານປະຊາຊົນສູງສຸດ ວ່າດ້ວຍການແຕ່ງຕັ້ງພະນັກງານ ໃຫ້ດຳລົງຕໍາແໜ່ງບໍລິຫານ ປະເພດ 5 ດັ່ງນີ້:
1. ທ່ານ ລໍາພອນ ວິພົງໄຊ ຜູ້ຊ່ວຍຜູ້ພິພາກສາ ເປັນຮອງຫົວໜ້າພະແນກພັດທະນາຫຼັກສູດ;
2. ⁠ທ່ານ ບິນ ຢາງ ວິຊາການ ເປັນຮອງຫົວໜ້າພະແນກສັງລວມ ແລະ ຂໍ້ມູນຂ່າວສານ.
ໃນໂອກາດອັນສະຫງ່າລາສີນີ້ ທ່ານໄຊສົມພອນ ເພັດຊົມພູ ໄດ້ມີຄໍາເຫັນໂອລົມ ຊຶ່ງເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ສືບຕໍ່ສູ້ຊົນໃນການປະຕິບັດວຽກງານວິຊາສະເພາະ ໃຫ້ມີຄວາມເຂັ້ມແຂງ ສໍາເລັດຕາມຄາດໝາຍທີ່ວາງໄວ້ ແລະ ເອົາໃຈໃສ່ຝຶກຝົນຫຼໍ່ຫຼອມຕົນເອງຢ່າງຕໍ່ເນື່ອງ.

06/06/2026

31/05/2026

ໃນຕອນເຊົ້າ ວັນທີ 29 ພຶດສະພາ 2026 ທີ່ຜ່ານມາ, ທີ່ສານປະຊາຊົນພາກກາງ, ສານປະຊາຊົນສູງສຸດໄດ້ສ້າງຂະບວນການປູກຕົ້ນໄມ້ ເນື່ອງໃນໂອກາດວັນເດັກນ້ອຍສາກົນ ຄົບຮອບ 102 ປີ ແລະ ວັນປູກຕົ້ນໄມ້ແຫ່ງຊາດ ຄົບຮອບ 46 ປີ, ນຳພາໂດຍ ທ່ານ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ, ມີຄະນະພັກ-ຄະນະນຳ ຕະຫຼອດຮອດພະນັກງານຫຼັກແຫຼ່ງ ເຂົ້າຮ່ວມຢ່າງພ້ອມພຽງ.
ທ່ານ ຂຸນສຸວັນ ສຸທຳມະວົງ ຮອງປະທານສານປະຊາ ຊົນສູງສຸດ ຜູ້ຊີ້ນຳອົງການຈັດຕັ້ງມະຫາຊົນ ແລະ ວຽກງານຂະບວນການ ໄດ້ກ່າວວ່າ: ການປູກຕົ້ນໄມ້ຄັ້ງນີ້, ກໍເພື່ອເປັນການສ້າງຂະບວນການຂ່ຳນັບຮັບຕ້ອນວັນເດັກນ້ອຍສາກົນ ຄົບຮອບ 102 ປີ ແລະ ວັນປູກຕົ້ນໄມ້ແຫ່ງຊາດ ຄົບຮອບ 46 ປີ, ສ້າງສະພາບແວດລ້ອມທຳມະຊາດໃຫ້ມີຄວາມຊຸ່ມຊື່ນ ທັງເປັນການປົກປັກຮັກສາຊັບພະຍາກອນປ່າໄມ້ໃຫ້ມີຄວາມຍືນຍົງ, ອຸດົມສົມບູນ,ຂຽວສົດງົດງາມ, ຊ່ວຍຕ້ານ ແລະ ຫຼຸດຜ່ອນຜົນກະທົບຈາກໄພພິບັດທາງທຳມະຊາດ. ພ້ອມກັນນັ້ນ, ກໍເປັນການປູກຈິດສໍານຶກໃຫ້ເຫັນໄດ້ຄວາມສໍາຄັນຂອງການຮັກສາສິ່ງແວດລ້ອມ ໂດຍເນັ້ນໃສ່ການຢູ່ຮ່ວມກັນກັບທຳມະຊາດຢ່າງກົມກຽວ ແລະ ຍືນຍົງ; ຕົ້ນໄມ້ທີ່ນຳມາປູກໃນຄັ້ງນີ້ມີຕົ້ນໄມ້ອຸດສາຫະກຳ, ຕົ້ນໄມ້ກິນໝາກຫຼາຍປະເພດ ເປັນຕົ້ນ: ໄມດູ່, ຕົ້ນໝາກມ່ວງ, ຕົ້ນໝາກມີ້, ຕົ້ນໝາກຈຽງ ແລະ ອື່ນໆ.
ໃນບັນຍາກາດອັນຟົດຟື້ນນີ້ ຕອນທ້າຍ ຍັງໄດ້ມີການມອບຂອງຂວັນໃຫ້ເດັກນ້ອຍລູກຫຼານພະນັກງານຫຼັງແຫຼ່ງ ແລະ ປະຊາຊົນອ້ອມຂ້າງຕື່ມອີກ.

29/05/2026

29/05/2026

ໃນຕອນບ່າຍ ວັນທີ 27 ພຶດສະພາ 2026 ທີ່ຜ່ານມາ, ສານປະຊາຊົນພາກກາງ ໄດ້ຈັດພິທີປະກາດການຈັດຕັ້ງຄັ້ງສໍາຄັນຢ່າງເປັນທາງການ ເພື່ອດໍາເນີນການຍົກຍ້າຍ ແລະ ແຕ່ງຕັ້ງບຸກຄະລາກອນ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ໂດຍການເປັນປະທານ ຂອງ ທ່ານ ໄພວີ ສີບົວລິພາ ກຳມະການສູນກາງພັກ, ເລຂາຄະນະບໍລິຫານງານພັກ, ປະທານສານ ປະຊາຊົນສູງສຸດ. ມີບັນດາ ຄະນະນຳ ສານປະຊາຊົນສູງສຸດ, ສານປະຊາຊົນພາກກາງ, ສານປະຊາຊົນແຂວງ, ສານປະຊາຊົນເຂດ, ອົງການໄອຍະການ, ຜູ້ພິພາກສາ ແລະ ພະນັກງານສານປະຊາຊົນພາກ ເຂົ້າຮ່ວມຢ່າງພ້ອມພຽງ. ທ່ານ ພັນສີ ທັນນະວົງ ຜູ້ຮັກສາການປະທານສານປະຊາຊົນພາກກາງ ໄດ້ຂຶ້ນລາຍງານສະພາບການເຄື່ອນໄຫວວຽກງານຂອງສານ ປະຊາຊົນພາກກາງໂດຍຫຍໍ້ ເພື່ອສະແດງໃຫ້ເຫັນເຖິງຜົນງານ, ຂໍ້ສະດວກ ແລະ ຂໍ້ຄົງຄ້າງໃນໄລຍະຜ່ານມາ.
ໃນພິທີ ທ່ານ ສາກົນ ໄຊຍະລາດ ຄະນະບໍລິຫານງານພັກ, ຫົວໜ້າກົມຈັດຕັ້ງ-ພະນັກງານ ໄດ້ຂຶ້ນຜ່ານມະຕິຕົກລົງຂອງທ່ານປະທານສານປະຊາຊົນສູງສຸດ ວ່າດ້ວຍການຍົກຍ້າຍ ແລະ ແຕ່ງຕັ້ງບຸກຄະລາກອນຂອງສານປະຊາຊົນພາກ ເຊິ່ງມີລາຍລະອຽດດັ່ງນີ້:
1. ຍົກຍ້າຍ ທ່ານ ພັນສີ ທັນນະວົງ ຜູ້ພິພາກສາ ຊັ້ນສາມ, ຈາກຕຳແໜ່ງ ຮັກສາການປະທານສານປະຊາຊົນພາກ ກາງ ໄປຮັບໜ້າທີ່ໃໝ່ຢູ່ສານປະຊາຊົນສູງສຸດ.
2. ແຕ່ງຕັ້ງ ທ່ານ ທະນົງສັກ ຣາຊະພົນ ຜູ້ພິພາກສາຊັ້ນສີ່, ຈາກຕຳແໜ່ງ ຮອງຫົວໜ້າຄະນະສານປົກຄອງ ສານ ປະຊາຊົນສູງສຸດ ໄປເປັນຮັກສາການປະທານສານປະຊາຊົນພາກກາງ.
3. ຍົກຍ້າຍ ທ່ານ ສຸດດາວັນ ພັນພົນດີ ຜູ້ພິພາກສາ ຊັ້ນສື່ ຈາກສານປະຊາຊົນພາກກາງ ໄປຮັບໜ້າທີ່ໃໝ່ຢູ່ສານ ປະຊາຊົນແຂວງວຽງຈັນ.
ໃນໂອກາດດຽວກັນ ກໍໄດ້ມີພິທີມອບ-ຮັບໜ້າທີ່ ລະຫວ່າງ ຜູ້ຮັກສາການ ປະທານສານປະຊາຊົນພາກກາງຜູ້ເກົ່າ ແລະ ຜູ້ໃໝ່ ຢ່າງສົມກຽດ.
ໃນໂອກາດອັນສະຫງ່າລາສີນີ້, ທ່ານ ໄພວີ ສີບົວລິພາ ປະທານສານປະຊາຊົນສູງສຸດ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງ ແລະ ຍົກຍ້າຍໃນຄັ້ງນີ້ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ , ເພີ່ມທະວີຄວາມສາມັກຄີພາຍໃນ ແລະ ສືບຕໍ່ພັດທະນາວຽກງານສານປະຊາຊົນໃຫ້ມີຄວາມຍຸຕິທຳ, ໂປ່ງໃສ ແລະ ເປັນທີ່ເພິ່ງຂອງປະຊາຊົນຢ່າງແທ້ຈິງ. ຈາກນັ້ນ, ຕົວແທນຜູ້ທີ່ໄດ້ຮັບການແຕ່ງຕັ້ງໃໝ່ ກໍໄດ້ຂຶ້ນກ່າວຮັບຄໍາໂອວາດ ແລະ ສະແດງຄວາມມຸ່ງໝັ້ນທີ່ຈະປະຕິບັດໜ້າທີ່ໃຫ້ດີທີ່ສຸດ.

26/05/2026

ໃນວັນທີ 21 ພຶດສະພາ 2026 ທີ່ໂຮງແຮມ ລາວພຣາຊ່າ ນະຄອນຫລວງວຽງຈັນ. ສານປະຊາຊົນສູງສຸດ ໄດ້ເປີດກອງປະຊຸມທາງອອນລາຍ ທົບທວນຫຼັກສູດ ຜູ້ຊ່ວຍຜູ້ພິພາກສາ ພາຍໃຕ້ການເປັນປະທານ ໂດຍ ທ່ານ ປອ. ອານົງ ຍອຍສາຍຄໍາ ຮອງປະທານສານປະຊາຊົນສູງສຸດ ມີບັນດາຫົວໜ້າກົມ, ຫົວໜ້າສະຖາບັນ, ຜູ້ພິພາກສາ ສານປະຊາຊົນສູງສຸດ, ຜູ້ພິພາກສາ ສານປະຊາຊົນພາກກາງ, ຜູ້ພິພາກສາ ສານປະຊາຊົນນະຄອນຫຼວງວຽງຈັນ ແລະ ຄະນະຮັບຜິດຊອບ ເຂົ້າຮ່ວມ ທັງໝົດ 25 ທ່ານ, ຍິງ 8 ທ່ານ. ກອງປະຊຸມຄັ້ງນີ້ ມີຈຸດປະສົງຫຼັກ :
1. ເພື່ອໃຫ້ຫຼັກສູດສອດຄ່ອງກັບໄລຍະ ແລະ ຄວາມກ້າວໜ້າທາງວິຊາການ;
2. ⁠ເພື່ອພັດທະນາຄຸນນະພາບ ແລະ ປະສິດທີ່ພາບການຮຽນ-ການສອນ;
3. ⁠ເພື່ອແກ້ໄຂບັນຫາທີ່ເກີດຂື້ນຈາກການນໍາໃຊ້ຫຼັກສູດທີ່ນໍາໃຊ້ຜ່ານມາ.
ໃນໂອກາດດັ່ງກ່າວ ທ່ານ ປອ. ອານົງ ຍອຍສາຍຄໍາ ຮອງປະທານສານປະຊາຊົນສູງສຸດ ໄດ້ເນັ້ນໜັກໃຫ້ແກ່ຜູ້ເຂົ້າຮ່ວມ ຈົ່ງເອົາໃຈໃສ່ແລກປ່ຽນ ປະກອບຂໍ້ຄິດເຫັນ, ຂໍ້ສະເໜີ ກັບຊ່ຽວຊານ ໃຫ້ຫຼາກຫຼາຍ ທັງຈຸດດີ ແລະ ຈຸດອ່ອນ ເພື່ອນໍາມາປັບປຸງຫຼັກສູດໃຫ້ມີຄວາມສົມບູນ ກ່ອນທີ່ຈະນໍາໄປໃຊ້ຈິງ.

26/05/2026

ໃນວັນທີ 26 ພຶດສະພາ 2026, ທ່ານ ໄພວີ ສີບົວລິພາ, ກຳມະການສູນກາງພັກ, ເລຂາຄະນະບໍລິຫານງານພັກ, ປະທານສານປະຊາຊົນສູງສຸດ ແຫ່ງ ສປປ ລາວ ພ້ອມດ້ວຍຄະນະ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ຄຮອງຂະນິດ ຮັກຈະເລີນ, ເອກອັກຄະລາຊະທູດ ແຫ່ງ ລາຊະອານາຈັກໄທ ປະຈຳ ສປປ ລາວ. ໃນການພົບປະຄັ້ງນີ້, ທ່ານ ນາງ ຄຮອງຂະນິດ ຮັກຈະເລີນ ໄດ້ສະແດງຄວາມຍ້ອງຍໍຊົມເຊີຍຢ່າງຈິງໃຈຕໍ່ ທ່ານ ໄພວີ ສີບົວລິພາ ທີ່ໄດ້ຮັບຄວາມໄວ້ວາງໃຈໃຫ້ດຳລົງຕຳແໜ່ງເປັນ ປະທານສານປະຊາຊົນສູງສຸດ, ພ້ອມທັງສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ທີ່ສະທ້ອນໃຫ້ເຫັນເຖິງໄມຕີຈິດມິດຕະພາບ ແລະ ສາຍພົວພັນອັນສະໜິດແໜ້ນທີ່ມີມາແຕ່ດົນນານ ລະຫວ່າງ ລາວ-ໄທ. ເອກອັກຄະລາຊະທູດໄທ ພ້ອມທີ່ຈະໃຫ້ການສະໜັບສະໜູນດ້ານທຶນການຝຶກອົບຮົມໃນທຸກສາຂາວິຊາ, ໂດຍສະເພາະແມ່ນການຍົກລະດັບຄວາມຮູ້ ທາງດ້ານວິຊາສະເພາະ ເພື່ອເພີ່ມທະວີຂີດຄວາມສາມາດໃຫ້ແກ່ບຸກຄະລາກອນໃນລະບົບຕຸລາການ.
ໂອກາດດຽວກັນ, ທ່ານ ໄພວີ ສີບົວລິພາ ໄດ້ສະແດງຄວາມຂອບໃຈຢ່າງສູງຕໍ່ການມາຢ້ຽມຢາມໃນຄັ້ງນີ້ ແລະ ໄດ້ຕີລາຄາສູງຕໍ່ການສະໜັບສະໜູນທຶນການສຶກສາ ແລະ ຝຶກອົບຮົມໃນລະດັບສາກົນຈາກ ເອກອັກຄະລາຊະທູດໄທ, ຊຶ່ງຖືເປັນນິມິດໝາຍອັນສຳຄັນ ແລະ ເປັນຂັ້ນໄດແຫ່ງການຮ່ວມມືອັນດີງາມ ລະຫວ່າງ ສານປົກຄອງ ລາວ-ໄທ. ການຮ່ວມມືໃນຄັ້ງນີ້ ຈະເປັນແຮງຂັບເຄື່ອນສຳຄັນໃນການສືບຕໍ່ປັບປຸງ ແລະ ພັດທະນາລະບົບ ສານປົກຄອງ ຂອງ ສປປ ລາວ ໃຫ້ມີຄວາມເຂັ້ມແຂງ, ສັກສິດ, ແລະ ກ້າວໄປສູ່ຄວາມເປັນສາກົນຢ່າງບໍ່ຢຸດຢັ້ງ.

18/05/2026

ໃນວັນທີ 18 ພຶດສະພາ 2026, ທີ່ສຳນັກງານສານປະຊາຊົນສູງສຸດ, ທ່ານ ຈອງ ຢອງ ຊູ (JUNG Yung Soo), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ເກົາຫຼີ ປະຈຳ ສປປ ລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ທ່ານ ໄພວີ ສີບົວລິພາ ປະທານສານປະຊາຊົນສູງສຸດ ແຫ່ງ ສປປ ລາວ, ໃນໂອກາດທີ່ ທ່ານ ໄພວີ ສີບົວລິພາ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ປະທານສານປະຊາຊົນສູງສຸດ ຄົນໃໝ່.
ໃນພິທີເຂົ້າຢ້ຽມຂໍ່ານັບຄັ້ງນີ້, ທ່ານ ຈອງ ຢອງ ຊູ ໄດ້ສະແດງຄວາມຍິນດີຊົມເຊີຍຢ່າງຈິງໃຈຕໍ່ ທ່ານ ໄພວີ ສີບົວລິພາ ທີ່ໄດ້ຮັບຄວາມໄວ້ເນື້ອເຊື່ອໃຈໃຫ້ດຳລົງຕຳແໜ່ງອັນສູງສົ່ງ ແລະມີກຽດຄັ້ງນີ້. ພ້ອມກັນນັ້ນ, ທັງສອງຝ່າຍໄດ້ມີການປຶກສາຫາລື, ແລກປ່ຽນຄຳຄິດຄຳເຫັນ ແລະ ທົບທວນຄືນການພົວພັນຮ່ວມມື ລະຫວ່າງ ສປປ ລາວ ແລະ ສ. ເກົາຫຼີ ໂດຍສະເພາະແມ່ນການຮ່ວມມືໃນຂົງເຂດວຽກງານຕຸລາການຂອງ ສານປະຊາຊົນ ໃຫ້ມີຄວາມແໜ້ນແຟ້ນ ແລະ ຂະຫຍາຍຕົວເຂົ້າສູ່ລວງເລິກໃນຕໍ່ໜ້າ.
ໃນໂອກາດດຽວກັນນີ້ ທ່ານໄພວີ ສີບົວລິພາ ປະທານສານປະຊາຊົນສູງສຸດ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານເອກອັກຄະລັດຖະທູດ ສ.ເກົາຫຼີ ພ້ອມດ້ວຍຄະນະ ທີ່ໄດ້ສະຫຼະເວລາອັນມີຄຸນຄ່າມາຮ່ວມສະແດງຄວາມຍິນດີ ແລະ ຢືນຢັນທີ່ຈະສືບຕໍ່ຮັດແໜ້ນສາຍພົວພັນມິດຕະພາບ ເພື່ອສົ່ງເສີມການພັດທະນາວຽກງານຕຸລາການຂອງທັງສອງປະເທດໃຫ້ມີປະສິດທິພາບຍິ່ງໆຂຶ້ນ.
ໃນຕອນທ້າຍຂອງພິທີ, ຝ່າຍສານປະຊາຊົນສູງສຸດ ແລະ ຄະນະຜູ້ຕາງໜ້າຈາກສະຖານທູດ ສ. ເກົາຫຼີ ຍັງໄດ້ມີການມອບຂອງທີ່ລະນຶກໃຫ້ແກ່ກັນ ແລະ ຖ່າຍຮູບຮ່ວມກັນເພື່ອເປັນທີ່ລະນຶກ ແຫ່ງສາຍພົວພັນອັນດີງາມໃນຄັ້ງນີ້.
ເຂົ້າຮ່ວມໃນພິທີດັ່ງກ່າວ ຝ່າຍສານປະຊາຊົນສູງສຸດ ມີ ຫົວໜ້າຫ້ອງການ, ຫົວໜ້າກົມຮ່ວມມືສາກົນ, ເລຂາປະທານສານປະຊາຊົນສູງສຸດ ແລະ ຫົວໜ້າພະແນກຮ່ວມມືຕຸລາການອາຊຽນ; ຝ່າຍສະຖານທູດ ສ. ເກົາຫຼີ ມີ ທ່ານ ລີ ດົງກິວ (Lee D**g Gyu) ອັກຄະລັດຖະທູດທີ່ປຶກສາ, ທ່ານ ປາກ ຊອງມິນ (Park Seong min) ຫົວໜ້າກົງສຸນ ແລະ ທ່ານ ນາງ ເມັດຄຳ ອັກຄະລັດ ຜູ້ຊ່ວຍທູດ/ພາສາແປ ເຂົ້າຮ່ວມດ້ວຍບັນຍາກາດອັນສະໜິດສະໜົມ.

13/05/2026

ສານປະຊາຊົນສູງສຸດ ໄດ້ຈັດພິທີປາຖະກະຖາມູນເຊື້ອວັນຜ່າວົງປິດລ້ອມຂອງກອງ ພັນທີ 2 ວິລະຊົນ ທີ່ທົ່ງໄຫຫີນ ຊຽງຂວາງ ຄົບຮອບ 67 ປີ ຂຶ້ນໃນວັນທີ 13 ພຶດສະພາ ນີ້ ທີ່ສານປະຊາຊົນສູງສຸດ (ສປສສ), ໃຫ້ກຽດປາຖະກະຖາ ໂດຍທ່ານ ພົນໂທ ແສງນວນ ໄຊຍະລາດ ປະທານສະຫະພັນນັກຮັບເກົ່າແຫ່ງຊາດລາວ ຊຶ່ງມີ ທ່ານ ໄພວີ ສີບົວລິພາ ປະທານສານປະຊາຊົນສູງສຸດ ພ້ອມດ້ວຍພະນັກງານອ້ອມຂ້າງສານເຂົ້າຮ່ວມຮັບຟັງ.
ທ່ານ ພົນໂທ ແສງນວນ ໄຊຍະລາດ ໄດ້ຍົກໃຫ້ເຫັນມູນເຊື້ອວິລະກໍາ ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນ ແຂວງຊຽງຂວາງ ວ່າ: ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດພາຍໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດໃຫ້ແກ່ຂະບວນຕໍ່ສູ້ຂອງກອງທັບ ແລະ ປະຊາຊົນຍາດເອົາໄຊຊະນະໃນໄລຍະຕໍ່ມາ ທັງສະແດງໃຫ້ເຫັນເຖິງຄວາມບໍລິສຸດຜຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດໜຶ່ງໃຈດຽວ, ຄວາມອົດທົນໝັ້ນໜຽວບໍ່ຄອນແຄນຕໍ່ການນາບຂູ່, ຫຼອກລວງຂອງສັດຕູ, ນໍ້າໃຈສູ້ຮົບພິລະອາດຫານ ແລະ ມີໄຫວພິບຂອງກອງພັນທີ 2 ໄດ້ເປັນແວ່ນແຍງ, ເປັນການປຸກລະດົມອັນແຮງກ້າໃຫ້ແກ່ຂະບວນການປະຕິວັດ ເພື່ອຕີເອົາຊະນະກັບຈັກກະພັດແບບເກົ່າ ແລະ ລູກແຫຼ້ງຕີນມື. ພ້ອມກັນນັ້ນ, ກໍເຮັດໃຫ້ກໍາລັງປະຕິວັດ ໂດຍສະເພາະແມ່ນກໍາລັງປະກອບອາວຸດປະຊາຊົນນັບມື້ເຕີບໃຫຍ່ຂະຫຍາຍຕົວ ແລະ ເຂັ້ມແຂງ. ພ້ອມນັ້ນ, ຍັງຍົກໃຫ້ເຫັນປັດໄຈພື້ນຖານທີ່ເຮັດໃຫ້ກອງພັນທີ 2 ສາມາດຜ່າວົງປິດລ້ອມຢ່າງມີໄຊ.
ພິທີປາຖະກະຖາໃນຄັ້ງນີ້ ຈັດຂຶ້ນເພື່ອເຮັດໃຫ້ຜູ້ເຂົ້າຮ່ວມໄດ້ຮັບຮູ້, ເຊື່ອມຊຶມບັນດາເຫດການ, ການເຄື່ອນໃນແຕ່ລະໄລຍະບົນເສັ້ນທາງປະຕິວັດອັນລະອິດລະອ້ຽວ, ນໍ້າໃຈເສຍສະຫຼະເພື່ອການປະຕິວັດ ພ້ອມກັນສືບຕໍ່ຮັກສາທາດແທ້ມູນເຊື້ອອັນສະຫງ່າງາມ ເຂົ້າໃນການປະຕິບັດໜ້າທີ່ວຽກງານຂອງຕົນໃຫ້ມີຜົນສໍາເລັດໃຫຍ່ຫຼວງກວ່າເກົ່າ.