07/08/2026
មេបញ្ជាការកងរាជអាវុធហត្ថខេត្តត្បូងឃ្មុំ ដាក់បទបញ្ជាឱ្យពង្រឹងសន្តិសុខ និងសណ្តាប់ធ្នាប់ ក្នុងដំណើរការប្រឡងបាក់ឌុប ឆ្នាំ២០២៦
(ខេត្តត្បូងឃ្មុំ)៖ លោកឧត្តមសេនីយ៍ត្រី រ័ត្ន ចាន់ណា មេបញ្ជាការកងរាជអាវុធហត្ថខេត្តត្បូងឃ្មុំ បានដឹកនាំកិច្ចប្រជុំត្រួតពិនិត្យការងារ និងដាក់ចេញនូវផែនការការពារសន្តិសុខ សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដែលនឹងប្រព្រឹត្តទៅនាថ្ងៃទី១០-១១ ខែសីហា ឆ្នាំ២០២៦ ខាងមុខនេះ។
កិច្ចប្រជុំនេះ បានធ្វើឡើងនៅព្រឹកថ្ងៃសុក្រ ៩រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៧ ខែសីហា ឆ្នាំ២០២៦ ដោយមានការចូលរួមពីសំណាក់ លោកមេបញ្ជាការរង ប្រធាន-អនុប្រធានមន្ទីរ មេបញ្ជាការមូលដ្ឋានក្រុង-ស្រុក និងនាយទាហាន នាយទាហានរង ព្រមទាំងពលទាហាន សរុបប្រមាណជិត ២០០នាក់។
ក្រៅពីការបូកសរុបរបាយការណ៍លទ្ធផលការងារប្រចាំខែកក្កដា និងលើកទិសដៅសម្រាប់ខែសីហា អង្គប្រជុំបានផ្ដោតសំខាន់លើការផ្សព្វផ្សាយផែនការការពារសន្តិសុខ រក្សាសណ្ដាប់ធ្នាប់ និងការត្រៀមលក្ខណៈសង្គ្រោះបន្ទាន់ ដើម្បីធានាឱ្យដំណើរការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦ ប្រព្រឹត្តទៅដោយរលូន និងមានសុវត្ថិភាពបំផុត។
ក្នុងឱកាសនោះ លោកឧត្តមសេនីយ៍ត្រី រ័ត្ន ចាន់ណា បានដាក់បទបញ្ជាយ៉ាងម៉ឺងម៉ាត់ដល់កម្លាំងអាវុធហត្ថ ដែលត្រូវប្រចាំការតាមមណ្ឌលប្រឡងនីមួយៗ ត្រូវយកចិត្តទុកដាក់ខ្ពស់បំផុតក្នុងការការពារសន្តិសុខ និងរក្សាសណ្តាប់ធ្នាប់ ជូនគណៈមេប្រយោគ លោកគ្រូ អ្នកគ្រូ និងសិស្សានុសិស្ស ចាប់តាំងពីពេលចូលរហូតដល់បញ្ចប់ការប្រឡង។
ទន្ទឹមនឹងនេះ លោកមេបញ្ជាការបានដាក់ចេញនូវការងារសំខាន់ៗមួយចំនួនរួមមាន៖
១. ត្រូវចុះផ្សព្វផ្សាយដល់បងប្អូនប្រជាពលរដ្ឋនៅជុំវិញបរិវេណមណ្ឌលប្រឡងទាំង ១០ សូមកុំប្រើប្រាស់ឧបករណ៍បំពងសម្លេងគ្រប់ប្រភេទ ដែលអាចបង្កការរំខានដល់ការប្រមូលអារម្មណ៍របស់បេក្ខជនក្នុងពេលប្រឡង។
២. ត្រូវបង្កើនការប្រុងប្រយ័ត្ន និងទប់ស្កាត់រាល់សកម្មភាពរបស់ជនឆ្លៀតឱកាស ដែលអាចបង្កបទល្មើសផ្សេងៗ ដូចជាការឆក់ប្លន់ទ្រព្យសម្បត្តិ ឬការបន្លំលួចយកមធ្យោបាយធ្វើដំណើរ (ម៉ូតូ) របស់សិស្សានុសិស្ស និងអ្នកពាក់ព័ន្ធជាដើម។
សូមបញ្ជាក់ថា តាមរយៈការរៀបចំផែនការយ៉ាងហ្មត់ចត់នេះ កងរាជអាវុធហត្ថខេត្តត្បូងឃ្មុំ បានត្រៀមខ្លួនរួចជាស្រេចដើម្បីធានាថា បេក្ខជនប្រឡងទាំងអស់ នឹងអាចបញ្ចប់ការប្រឡងរបស់ខ្លួន ក្នុងបរិយាកាសប្រកបដោយសុវត្ថិភាព របៀបរៀបរយ និងភាពជឿជាក់បំផុត៕
សម្រួលអត្ថបទព័ត៌មាន ដោយ ៖ អារុណ្ណាទី
ប្រភពព័ត៌មានពី ៖ បញ្ជាការដ្ឋានអាវុធហត្ថខេត្តត្បូងឃ្មុំ
