28/05/2026
ថៃប្រកាសលែងទទួលស្គាល់ផែនទីដែលមានប្រភពពីបារាំង
បាងកក៖ នាយករដ្ឋមន្ត្រីថៃ Anutin Charnvirakul បានប្រកាសជាថ្មីថា រដ្ឋាភិបាលថៃលែងទទួលស្គាល់ និងប្រើប្រាស់ផែនទីខ្នាត១/២០០០០០ ដែលមានប្រភពពីសម័យអាណានិគមបារាំងសម្រាប់ការកំណត់ព្រំដែនជាមួយកម្ពុជាទៀតហើយ។ ការប្រកាសនេះធ្វើឡើងក្រោយដំណើរទស្សនកិច្ចរបស់លោកនៅប្រទេស France ជាទីដែលលោកបានជួបពិភាក្សាជាមួយប្រធានាធិបតី Emmanuel Macron ផងដែរ។
លោក Anutin បានអះអាងថា បច្ចុប្បន្នថៃប្រើប្រាស់ផែនទីខ្នាត១/៥០០០០ ដែលត្រូវបានរៀបចំឡើងដោយភាគីថៃខ្លួនឯង ហើយចាត់ទុកថាមានភាពត្រឹមត្រូវខ្ពស់ជាងផែនទីសម័យអាណានិគម។ លោកបានបញ្ជាក់ថា មាត្រដ្ឋាន១/២០០០០០ ដែលកម្ពុជាយោងប្រើប្រាស់សម្រាប់កំណត់ព្រំដែននោះ “លែងមានទៀតហើយ” សម្រាប់ភាគីថៃ ហើយការអនុវត្តផែនទីបែបនេះមិនស្ថិតក្នុងគោលនយោបាយរបស់រដ្ឋាភិបាលថៃបច្ចុប្បន្នឡើយ។
គួរបញ្ជាក់ថា កម្ពុជានៅតែប្រើផែនទីខ្នាត១/២០០០០០ ដែលមានមូលដ្ឋានចេញពីសន្ធិសញ្ញាបារាំង-សៀម ឆ្នាំ១៩០៤ និងអនុសញ្ញាបារាំង-សៀម ឆ្នាំ១៩០៧ ក្នុងការកំណត់ខ្សែព្រំដែនរវាងប្រទេសទាំងពីរ។ ផែនទីនេះត្រូវបានចាត់ទុកថា ជាឯកសារផ្លូវច្បាប់អន្តរជាតិដែលមានសុពលភាព និងត្រូវបានកម្ពុជាយោងជាបន្តបន្ទាប់ក្នុងការដោះស្រាយបញ្ហាព្រំដែនជាមួយថៃ។
បើតាមសេចក្តីរាយការណ៍របស់ The Nation លោកនាយករដ្ឋមន្ត្រីថៃបានបដិសេធយ៉ាងម៉ឺងម៉ាត់ចំពោះការប្រើប្រាស់ផែនទីសម័យអាណានិគម និងសង្កត់ធ្ងន់ថា ថៃប្រកាន់ខ្ជាប់លើប្រព័ន្ធបច្ចេកទេស និងការវាស់វែងដែលរៀបចំដោយភាគីថៃផ្ទាល់។ ទោះជាយ៉ាងណា លោកក៏បានបញ្ជាក់ថា ថៃនៅតែបើកចំហចំពោះការផ្ទៀងផ្ទាត់បច្ចេកទេសប្រកបដោយតម្លាភាព ប្រសិនបើមានការសង្ស័យ ឬការខ្វែងគំនិតគ្នាលើបញ្ហាព្រំដែន។
អ្នកតាមដានកិច្ចការព្រំដែនមើលឃើញថា ការប្រើប្រាស់ផែនទីផ្សេងគ្នារវាងកម្ពុជា និងថៃ គឺជាមូលហេតុសំខាន់មួយដែលបង្កឱ្យមានជម្លោះព្រំដែនអូសបន្លាយរហូតមកដល់បច្ចុប្បន្ន។ ការបដិសេធរបស់ថៃចំពោះផែនទីដែលមានមូលដ្ឋានលើសន្ធិសញ្ញាប្រវត្តិសាស្ត្រ ត្រូវបានគេមើលឃើញថា អាចបន្តធ្វើឱ្យការចរចាព្រំដែនរវាងប្រទេសទាំងពីរប្រឈមនឹងភាពស្មុគស្មាញបន្ថែមទៀត។
ប្រភព៖ The Nation Thai
