03/09/2026
រសៀលថ្ងៃទី០២ ខែកញ្ញា ឆ្នាំ២០២៦ ឧកញ៉ាបណ្ឌិតប្រធាន ហ៊ុយ ភៀវ បានអញ្ជើញចូលរួមសិក្ខាសាលាស្ដីពី " ការផ្សព្វផ្សាយការអភិវឌ្ឍសេដ្ឋកិច្ចកៅប្រព័ន្ធ ការអភិវឌ្ឍជំនាញវិជ្ជាជីវៈ និងការពង្រឹងគុណភាពសេវាកម្មក្នុងវិស័យទេសចរណ៍" ក្រោមអធិបតីភាព ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ នៅភោជនីយដ្ឋាន ពន្លឺឋានសួគ៌ថ្មី ខេត្តសៀមរាប។ ក្នុងសិក្ខាសាលានេះ ឯកឧត្តមរដ្ឋមន្រ្ដី បានជំរុញឱ្យម្ចាស់អាជីវកម្ម, អាជីវករ, អ្នកលក់ដូរ, បុគ្គលស្វ័យនិយោជន៍, បុគ្គលិកបម្រើការសេដ្ឋកិច្ចក្រៅប្រព័ន្ធ, អ្នកផ្តល់សេវាកម្មទេសចរណ៍គ្រប់ប្រភេទ និងអ្នកសេដ្ឋកិច្ចក្រៅប្រព័ន្ធក្នុងវិស័យទេសចរណ៍ ធ្វើការចុះឈ្មោះក្នុងថ្នាលឌីជីថលរបស់រាជរដ្ឋាភិបាល និងស្នើសុំទទួលយកបណ្ណជំនាញ (Skill voucher) ដើម្បីទទួលបានអត្ថប្រយោជន៍ជាច្រើនពីរាជរដ្ឋាភិបាលកម្ពុជា។
សិក្ខាសាលាដ៏មានសារៈសំខាន់នេះ មានការអញ្ជើញចូលរួមពីឯកឧត្តម ឌី រ៉ាដូ អភិបាលរង តំណាងដ៏ខ្ពង់ខ្ពស់ឯកឧត្ដម ប្រាក់ សោភ័ណ អភិបាលនៃគណៈអភិបាលខេត្តសៀមរាប, ឯកឧត្ដមឧកញ៉ាសមូហៈកៈបណ្ឌិត ឡី សុភាពប្រធានសមាគមសហព័ន្ធយុវជនសេដ្ឋកិច្ចកម្ពុជា, ឯកឧត្តម គី សុខគីម នាយកប្រតិបត្តិនៃមូលនិធិអភិវឌ្ឍន៍ជំនាញ, ឯកឧត្តម លោកជំទាវ ជាថ្នាក់ដឹកនាំក្រសួងទេសចរណ៍, តំណាងលេខាធិការដ្ឋាននៃគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ, ក្រុមប្រឹក្សាខេត្ត, រដ្ឋបាលខេត្ត, មន្ទីរពាក់ព័ន្ធជុំវិញខេត្ត និងអាជ្ញាធរដែនដីគ្រប់លំដាប់ថ្នាក់ ព្រមទាំងលោកឧកញ៉ ឧកញ៉ា លោក លោកស្រីវិស័យឯកជន, ជាពិសេស លោកអ៊ំ ពូ មីង បងប្អូនអ្នកសេដ្ឋកិច្ចក្រៅប្រព័ន្ធ ប្រមាណជាង ៣,៥០០នាក់ នៅខេត្តសៀមរាប។
