មន្ទីរមុខងារសាធារណៈ ខេត្តពោធិ៍សាត់ departments of Civil Service, Pursat

05/09/2026

03/09/2026

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានប្រចាំការនៃ គ.វ.រ. នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសជាផ្លូវការ «បណ្តាញអគ្គលេខាធិការនៃក្រសួង ស្ថាប័នចំណុះអង្គការនីតិប្រតិបត្តិ» នៅថ្ងៃទី០៤ ខែកញ្ញា ឆ្នាំ២០២៦ ស្អែកនេះ។

ពិធីនេះនឹងត្រូវប្រារព្ធឡើងនៅសណ្ឋាគារសាំងគ្រីឡា រាជធានីភ្នំពេញ ដោយមានការអញ្ជើញចូលរួមពីសំណាក់ ឯកឧត្តមរដ្ឋលេខាធិការប្រចាំការ និងជាប្រធានអនុគណៈកម្មាធិការប្រតិបត្តិនៃ គ.វ.រ. ថ្នាក់ដឹកនាំក្រសួងមុខងារសាធារណៈ ព្រមទាំងឯកឧត្តម លោកជំទាវ ជាអគ្គលេខាធិការ អគ្គលេខាធិការរង និងមន្ត្រីជាន់ខ្ពស់តំណាងក្រសួង-ស្ថាប័នចំណុះអង្គការនីតិប្រតិបត្តិទាំងអស់។

«បណ្តាញអគ្គលេខាធិការ» គឺជាយន្តការដ៏មានសារៈសំខាន់ក្នុងការភ្ជាប់ទំនាក់ទំនង កិច្ចសហការ និងសម្របសម្រួលការងាររវាងអគ្គលេខាធិការនៃអគ្គលេខាធិការដ្ឋាន និងអគ្គនាយកនៃអគ្គនាយកដ្ឋានរដ្ឋបាលនិងហិរញ្ញវត្ថុ របស់ក្រសួង ស្ថាប័ន។ យន្តការនេះត្រូវបានបង្កើតឡើងដើម្បីកាត់បន្ថយបញ្ហាប្រឈមដែលមានភាពប្រទាក់ក្រឡា និងស្មុគស្មាញ សំដៅជួយគាំទ្រគ្នាទៅវិញទៅមកក្នុងការលើកកម្ពស់ និងពង្រឹងប្រសិទ្ធភាពការងារ ព្រមទាំងជំរុញល្បឿននៃការអនុវត្តកំណែទម្រង់រដ្ឋបាលសាធារណៈរបស់រាជរដ្ឋាភិបាលឱ្យកាន់តែមានភាពរលូន និងស៊ីជម្រៅ។

សូមរង់ចាំតាមដានព័ត៌មានលម្អិតនៃកម្មវិធីនៅលើទំព័រផ្លូវការរបស់ក្រសួងមុខងារសាធារណៈ។

01/09/2026

អបអរសាទរ និងជូនពរប្អូនៗ ក្មួយៗ ដែលបានឆ្លងកាត់ការប្រឡងសញ្ញាបត្រមធ្យមសិក្សាទុតិយភូមិ!

ការខិតខំប្រឹងប្រែងកន្លងមក គឺជាគ្រឹះដ៏រឹងមាំ សម្រាប់ស្ពានចម្លងប្អូនៗ ក្មួយៗ ទៅកាន់ដំណាក់កាលថ្មីនៃជីវិត។ លទ្ធផលនៃការប្រឡង គឺជាដំណើរមួយទៀតនៃទំព័រជីវិត តែអ្វីដែលសំខាន់បំផុតបន្ទាប់ពីនេះ គឺការស្វែងរកនូវចំណេះដឹង និងជំនាញពិតប្រាកដ។

សូមកុំរុញរាក្នុងការចាប់យកជំនាញដែលខ្លួនប្រាថ្នា ព្រោះការរៀនសូត្រលើអ្វីដែលយើងពេញចិត្ត នឹងបង្កើតបានជាសមត្ថភាពដ៏អស្ចារ្យ គ្មានដែនកំណត់។ ប្រទេសជាតិយើងត្រូវការយុវជន ដែលមានទាំងចំណេះដឹង បច្ចេកទេស និងគុណធម៌ ដើម្បីរួមគ្នាស្ដារ និងអភិវឌ្ឍមាតុភូមិ ឱ្យកាន់តែរីកចម្រើន។ សូមបន្តដើរទៅមុខដោយភាពជឿជាក់ ភាពស្វាហាប់ និងសេចក្ដីថ្លៃថ្នូរ។ ទោះបីជាលទ្ធផលយ៉ាងណាក៏ដោយ ក៏ផលទាំងនោះសុទ្ធតែកើតចេញពីការខិតខំប្រឹងប្រែងទាំងអស់។​

សម្រាប់ប្អូនៗ ក្មួយៗ​ ដែលមានបំណងក្លាយជាមន្ត្រីដើម្បីបម្រើប្រទេសជាតិ និងប្រជាជនយើង
សូមតាមដានជាបន្តបន្ទាប់​ នូវការប្រកាសផ្សព្វផ្សាយ ការប្រឡងប្រជែងជ្រើសរើសមន្ត្រីប្រកបដោយគុណាធិបតេយ្យ តម្លាភាព យុត្តិធម៌​ បរិយាបន្ន និងប្រសិទ្ធភាព។

01/09/2026

«កែទម្រង់រដ្ឋបាលសាធារណៈ៖ ផ្លាស់ប្តូរដើម្បីពលរដ្ឋ និងអនាគតកម្ពុជា»

ការកែទម្រង់រដ្ឋបាលសាធារណៈ គឺជាបេះដូងនៃការកសាងរដ្ឋបាលមួយដែលមានសមត្ថភាពខ្ពស់ ខ្លាំង វៃឆ្លាត និងស្អាតស្អំ។ ក្នុងនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សន្ទុះនៃការកែទម្រង់តាមរយៈការដាក់ចេញ និងការអនុវត្តយ៉ាងម៉ឺងម៉ាត់នូវវិធានការគន្លឹះចំនួន៣ ដើម្បីធានាបាននូវគុណប្រយោជន៍ពិតប្រាកដជូនប្រជាពលរដ្ឋ។

ទោះជាត្រូវឆ្លងកាត់រាល់ភាពស្មុគស្មាញ និងបញ្ហាប្រឈមទាំងឡាយក្តី ក៏ស្មារតីនៃការកែទម្រង់នៅតែបន្តពង្រឹងជានិច្ច ក្រោមអភិក្រម «ជវភាពនៃប្រព័ន្ធតួអង្គតែមួយ» ដោយសមត្ថភាព ឆន្ទៈមុតស្រួច និងការទទួលខុសត្រូវខ្ពស់ ក្នុងបរិបទរបស់កម្ពុជា។ វិធានការគន្លឹះទាំង៣ នេះ គឺជាត្រីវិស័យ ជាយុទ្ធសាស្ត្រ ឆ្ពោះទៅការសម្រេចឱ្យបាន នូវប្រព័ន្ធរដ្ឋបាលសាធារណៈទំនើប សំដៅបម្រើ និងថែរក្សាស្នាមញញឹមរបស់ប្រជាពលរដ្ឋ ទាំងក្នុងពេលបច្ចុប្បន្ន និងទៅអនាគត។

សូមអញ្ជើញទស្សនាវីដេអូ ស្តីពីវឌ្ឍនភាពនៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ។

01/09/2026

តើអ្នកដឹងទេ?
នៅសល់តែ ៣ថ្ងៃទៀតប៉ុណ្ណោះ!

របត់ការងារថ្មីនៃការកែទម្រង់រដ្ឋបាលសាធារណៈ ជិតឈានមកដល់ហើយ! គឺនៅថ្ងៃទី៤ ខែកញ្ញា ឆ្នាំ២០២៦ ខាងមុខនេះ «បណ្តាញអគ្គលេខាធិការ» នៃក្រសួង ស្ថាប័នចំណុះអង្គការនីតិប្រតិបត្តិ នឹងត្រូវប្រកាសជាផ្លូវការ។

💡 តើអ្វីទៅជា «បណ្តាញអគ្គលេខាធិការ»?

បណ្តាញអគ្គលេខាធិការ គឺជាយន្តការភ្ជាប់ទំនាក់ទំនង កិច្ចសហការ និងសម្របសម្រួលការងាររវាងអគ្គលេខាធិការនៃអគ្គលេខាធិការដ្ឋាន និងអគ្គនាយកនៃអគ្គនាយកដ្ឋានរដ្ឋបាលនិងហិរញ្ញវត្ថុ របស់ក្រសួង ស្ថាប័ន ដើម្បីកាត់បន្ថយបញ្ហាប្រឈម ដែលមានភាពប្រទាក់ក្រឡា និងស្មុគស្មាញជួយសំដៅជួយគាំទ្រគ្នាទៅវិញទៅមកក្នុងការលើកកម្ពស់ និងពង្រឹងប្រសិទ្ធភាពការងារ។

🎯 នេះជាផ្នែកមួយនៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ។

សូមតាមដាននូវការផ្សព្វផ្សាយខ្លឹមសារពិស្តារជាបន្តបន្ទាប់។