ធនាគារជាតិ នៃកម្ពុជា - National Bank of Cambodia, #88 Street 102 Corner Street 19 Sangkat Wat Phnom, Khan Daun Penh, Phnom Penh (2026)

01/06/2026

លោកស្រី ម៉ក់ រស្ម៊ី អគ្គនាយករងបទប្បញ្ញត្តិនិងបរិយាបន្នហិរញ្ញវត្ថុ ធនាគារជាតិនៃកម្ពុជា បានអញ្ជើញចូលរួមជាវាគ្មិនក្នុងកម្មវិធីកិច្ចពិភាក្សារវាងអ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុ ដែលរៀបចំដោយក្រុមហ៊ុន ក្រេឌីត ប្យួរ៉ូ ខេមបូឌា និងក្លឹបអ្នកកាសែតកម្ពុជា ក្រោមប្រធានបទ “ការលើកកម្ពស់ការប្រើប្រាស់ឥណទានដោយការទទួលខុសត្រូវ និងប្រកបដោយសុវត្ថិភាព” នាថ្ងៃទី២៩ ខែឧសភា ឆ្នាំ២០២៦ នៅរាជធានីភ្នំពេញ។

នៅក្នុងកិច្ចពិភាក្សា លោកស្រីបានលើកឡើងពីយន្តការដែលធនាគារជាតិនៃកម្ពុជាបានដាក់ចេញដើម្បីជំរុញការផ្តល់ និងការប្រើប្រាស់ឥណទានផ្លូវការប្រកបដោយការទទួលខុសត្រូវ ដែលមានដូចជា ការដាក់ចេញបទប្បញ្ញត្តិពាក់ព័ន្ធ ការត្រួតពិនិត្យជាប្រចាំ ការការពារអតិថិជន ការលើកកម្ពស់ចំណេះដឹងផ្នែកហិរញ្ញវត្ថុ និងការរៀបចំក្របខ័ណ្ឌក្រមប្រតិបត្តិទីផ្សារជាដើម។

បន្ថែមលើនេះ លោកស្រីបានរំលេចពីភាពចាំបាច់សម្រាប់គ្រឹះស្ថានធនាគារនិងហិរញ្ញវត្ថុ ក្នុងការផ្តល់ឥណទានប្រកបដោយការទទួលខុសត្រូវ ដូចជាការវាយតម្លៃគោលបំណងឥណទាននិងលទ្ធភាពសងរបស់អតិថិជន និងការប្រតិបត្តិក្រមសីលធម៌វិជ្ជាជីវៈជាដើម។ ទន្ទឹមនេះ លោកស្រីក៏បានបញ្ជាក់ពីសារៈសំខាន់នៃការចូលរួមពីភាគីពាក់ព័ន្ធផ្សេងទៀត ជាពិសេសអ្នកសារព័ត៌មាន ក្នុងសកម្មភាពផ្សព្វផ្សាយឱ្យបានទូលំទូលាយអំពីគុណសម្បត្តិនៃសេវាហិរញ្ញវត្ថុផ្លូវការ និងគុណវិបត្តិរបស់សេវាក្រៅផ្លូវការផងដែរ។

01/06/2026

អបអរសាទរ ទិវាកុមារអន្តរជាតិ ១ មិថុនា ២០២៦

31/05/2026

សន្និសីទថ្នាក់ទេសាភិបាលធនាគារកណ្តាលនៃបណ្តាប្រទេសនិយាយភាសាបារាំង (ហ្វ្រង់កូហ្វូន) លើកទី២៨ ក្រោមមូលបទ "ស្វ័យភាពធនាគារកណ្តាល ចំពោះមុខការរំពឹងទុករបស់រដ្ឋ និងសាធារណជន” ដែលធនាគារជាតិនៃកម្ពុជាធ្វើជាម្ចាស់ផ្ទះ បានបញ្ចប់ទៅដោយជោគជ័យ នាថ្ងៃទី២៩ ខែឧសភា ឆ្នាំ២០២៦ ក្នុងបរិយាកាសស្និទ្ធស្នាល និងលទ្ធផលប្រកបដោយផ្លែផ្កា។

ធនាគារជាតិនៃកម្ពុជាបានរៀបចំព្រឹត្តិការណ៍អន្តរជាតិនេះដោយមានការអញ្ជើញចូលរួមពី ថ្នាក់ទេសាភិបាល ធនាគារកណ្តាលនៃបណ្តាប្រទេសនិយាយភាសាបារាំងសរុបចំនួន ២៦ ក្នុងនោះក៏មានវត្តមានលោកជំទាវ Christine Lagarde ប្រធាន ធនាគារកណ្តាលអឺរ៉ុប (ECB) និងឯកឧត្តម François VILLEROY DE GALHAU ទេសាភិបាល ធនាគារកណ្តាលបារាំង ផងដែរ។

👉សម្រាប់ព័ត៌មានលម្អិត សូមស្វែងរកសេចក្តីប្រកាសព័ត៌មាន និងរូបថតសកម្មភាពដូចខាងក្រោម

29/05/2026

(English Below)

ធនាគារជាតិនៃកម្ពុជា និងធនាគារកណ្តាលរវ៉ាន់ដា បានប្រកាសពី “កិច្ចសហប្រតិបត្តិការលើប្រព័ន្ធទូទាត់ឆ្លងដែនរវាងប្រទេសកម្ពុជា និងប្រទេសរវ៉ាន់ដា” នៅក្នុងព្រឹត្តិការណ៍សន្និសីទ ថ្នាក់ទេសាភិបាលធនាគារកណ្តាលនៃប្រទេសនិយាយភាសាបារំាងលើកទី២៨ ក្រោមមូលបទ «ស្វយ័តភាពធនាគារកណ្តាលចំពោះមុខការរំពឹងទុករបស់រដ្ឋ និងសាធារណជន» នាថ្ងៃទី២៩ ខែឧសភា ឆ្នាំ២០២៦។

The National Bank of Cambodia and the National Bank of Rwanda jointly announced a "Cross-Border Payment Cooperation" between Cambodia and Rwanda on Friday, May 29, 2026, during the 28th Conference of Central Bank Governors of French-Speaking Countries, held from May 28–31, 2026, in Phnom Penh, Cambodia, under the theme: “Central bank autonomy in the face of State and public expectations.”

28/05/2026

ធនាគារជាតិនៃកម្ពុជា សហការជាមួយ ធនាគារកណ្តាលបារាំង បានធ្វើជាម្ចាស់ផ្ទះរៀបចំសន្និសីទថ្នាក់ទេសាភិបាលធនាគារកណ្តាលនៃប្រទេសនិយាយភាសាបារាំង (ហ្វ្រង់កូហ្វូន) លើកទី២៨ ក្រោមមូលបទ “ស្វ័យភាពធនាគារកណ្តាលចំពោះមុខការរំពឹងទុករបស់រដ្ឋ និងសាធារណជន” ចាប់ពីថ្ងៃទី២៨-៣១ ខែឧសភា ឆ្នាំ២០២៦ នៅរាជធានីភ្នំពេញ ក្រោមអធិបតីភាពលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា។

សន្និសីទនេះក៏មានការអញ្ជើញជាអធិបតី និងថ្លែងសុន្ទរកថាគន្លឹះពី ឯកឧត្តម François Villeroy de Galhau ទេសាភិបាល ធនាគារកណ្តាលបារាំង (Banque de France) និងលោកជំទាវ Christine Lagarde ប្រធានធនាគារកណ្តាលអឺរ៉ុប (European Central Bank) និងវត្តមានថ្នាក់ទេសាភិបាលធនាគារកណ្តាលសរុបចំនួន ២៦ នៃប្រទេសហ្រ្វង់កូហ្វូន នៅទ្វីបអឺរ៉ុប អាមេរិក អាហ្រ្វិក អាស៊ី មជ្ឈិមបូព៌ា និងប៉ាស៊ីហ្វិក។

នេះជាលើកទី៣ ដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំលំដាប់អន្តរជាតិនេះ បន្ទាប់ពីលើកទី១ ត្រូវបានរៀបចំឡើងក្នុងឆ្នាំ១៩៩៦ និងលើកទី២ ក្នុងឆ្នាំ២០១១។
នៅក្នុងព្រឹត្តិការណ៍អន្តរជាតិជាប្រវត្តិសាស្ត្រនេះ អង្គសន្និសីទបានពិភាក្សា និងផ្លាស់ប្តូរទស្សនាទានគន្លឹះទាក់ទងនឹងវិសាលភាពនៃស្វ័យភាពរបស់ធនាគារកណ្តាល ក្នុងស្ថានភាពដែលពិភពលោកកំពុងប្រឈមនឹងដំណើរវិវត្តន៍ថ្មីនៃតថភាពសេដ្ឋកិច្ច និងសង្គម ដែលបាននិងកំពុងដាក់ធនាគារកណ្តាលឱ្យស្ថិតនៅចំពោះមុខការរំពឹងទុកកាន់តែខ្ពស់ពីសំណាក់រដ្ឋ និងសាធារណជន។

សន្និសីទថ្នាក់ទេសាភិបាលធនាគារកណ្តាលនៃប្រទេសនិយាយភាសាបារាំង ត្រូវបានបង្កើតឡើងនៅឆ្នាំ១៩៩៤ តាមគំនិតផ្តួចផ្តើមរបស់ធនាគារកណ្តាលបារាំង ដើម្បីផ្តល់វេទិកាប្រចាំឆ្នាំសម្រាប់ការសន្ទនា ការផ្លាស់ប្តូរបទពិសោធទាក់ទងនឹងប្រធានបទសេដ្ឋកិច្ច រូបិយវត្ថុ និងហិរញ្ញវត្ថុ។ សន្និសីទនេះក៏បានរួមចំណែកយ៉ាងសំខាន់ដល់ការលើកកម្ពស់កិច្ចសហប្រតិបត្តិការរវាងធនាគារកណ្តាល ជាពិសេសធនាគារកណ្តាលដែលប្រើភាសាបារាំង។

20/05/2026

លោកបណ្ឌិត ឡាយ សុខហេង ឧបការីទេសាភិបាល និងជាអគ្គនាយកបទប្បញ្ញត្តិនិងបរិយាបន្នហិរញ្ញវត្ថុ ធនាគារជាតិនៃកម្ពុជា បានទទួលជួបពិភាក្សាការងារជាមួយ លោក Feisal Hussain ប្រធានដឹកនាំកម្មវិធីសមាហរណកម្មសេដ្ឋកិច្ចអាស៊ាន-ចក្រភពអង់គ្លេស (ASEAN-UK Economic Integration Program) នាថ្ងៃទី១៨ ខែឧសភា ឆ្នាំ២០២៦ នៅធនាគារជាតិនៃកម្ពុជា អគារសែនសុខ។

កិច្ចប្រជុំនេះក៏មានការចូលរួមពីតំណាងសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងក្រុមហ៊ុន ក្រេឌីត ប្យូរ៉ូ (ខេមបូឌា) ខូអិលធីឌី ផងដែរ ដោយបានពិនិត្យ និងពិភាក្សាលើការងារពាក់ព័ន្ធដែលរួមមាន៖ i/-ជម្រើសទិន្នន័យសម្រាប់ការផ្តល់ប្រាក់កម្ចីដល់សហគ្រាសធុនមីក្រូ តូច និងមធ្យម (MSMEs) ii/-ការផ្តល់ប្រាក់កម្ចីមិនមែនជាប្រពៃណី និងតាមប្រព័ន្ធឌីជីថល និង iii/-ការគាំទ្រការសម្រេចចិត្តរបស់អ្នកប្រើប្រាស់សេវាហិរញ្ញវត្ថុឌីជីថល។ អង្គប្រជុំបានបញ្ជាក់ពីការប្តេជ្ញាចិត្តក្នុងការពង្រឹងកិច្ចសហការឱ្យកាន់តែរឹងមាំថែមទៀត។

20/05/2026

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញចូលរួមជាវាគ្មិនក្នុងកិច្ចពិភាក្សាលើប្រធានបទ “បរិយាបន្នហិរញ្ញវត្ថុ និងការអភិវឌ្ឍហិរញ្ញប្បទានសម្រាប់សហគ្រាសធុនតូច និងមធ្យម” នៅវេទិកាហិរញ្ញវត្ថុសកល PBCSF ដែលសហការរៀបចំដោយ សហព័ន្ធបរិយាបន្នហិរញ្ញវត្ថុ (AFI) និងសាកលវិទ្យាល័យ Tsinghua នាថ្ងៃទី១៩ ខែឧសភា ឆ្នាំ២០២៦ នៅទីក្រុងឆឹងទូ សាធារណរដ្ឋប្រជាមានិតចិន។

ក្នុងកិច្ចពិភាក្សានេះក៏មានវត្តមានចូលរួមពីវាគ្មិនជំនាញៗដទៃទៀត ដែលរួមមាន លោក Alfred Hanning នាយកប្រតិបត្តិ AFI លោក Bei Duoguang នាយកវិទ្យាស្ថានចិនសម្រាប់ការសិក្សាហិរញ្ញវត្ថុប្រកបដោយបរិយាបន្ន នៃសាកលវិទ្យាល័យ Renmin និងលោក MA Honglin ប្រធានគ្រប់គ្រងទូទៅ ក្រុមហ៊ុន Chengdu Jiaozi Financial Holding Group Co., Ltd។

លោកជំទាវ ទេសាភិបាល បានលើកឡើងពីសារៈសំខាន់នៃតួនាទីរបស់សហគ្រាសធុនមីក្រូ តូច និងមធ្យម (MSMEs) ក្នុងការជំរុញកំណើនសេដ្ឋកិច្ច និងបានចែករំលែកបទពិសោធរបស់កម្ពុជាក្នុងការលើកកម្ពស់បរិយាបន្នហិរញ្ញវត្ថុ ក៏ដូចជាការគាំទ្រផ្នែកហិរញ្ញប្បទានក្នុងការអភិវឌ្ឍ MSMEs។ បន្ថែមលើនេះ លោកជំទាវក៏បានលើកឡើងពីកិច្ចខិតខំប្រឹងប្រែងរបស់ធនាគារជាតិនៃកម្ពុជា ក្នុងការអភិវឌ្ឍនវានុវត្តន៍ហិរញ្ញវត្ថុឌីជីថល ការអភិវឌ្ឍហេដ្ឋារចនាសម្ព័ន្ធហិរញ្ញវត្ថុ និងការអនុវត្តវិធានការគោលនយោបាយនានា សំដៅពង្រឹងលទ្ធភាពក្នុងការផ្តល់សេវាហិរញ្ញវត្ថុដល់ MSMEs ឱ្យបានកាន់តែទូលំទូលាយថែមទៀត។ លើសពីនេះ លោកជំទាវក៏បានគូសបញ្ជាក់អំពីតួនាទីសំខាន់របស់ប្រព័ន្ធទូទាត់បាគង ក្នុងការលើកកម្ពស់បរិយាបន្នហិរញ្ញវត្ថុ បង្កើនប្រសិទ្ធភាពប្រតិបត្តិការ និងបង្កើតឱកាសថ្មីៗសម្រាប់ MSMEs ក្នុងការចូលរួមកាន់តែសកម្មដល់ការអភិវឌ្ឍសេដ្ឋកិច្ច។

វាគ្មិនក៏បានពិភាក្សាពីបញ្ហាប្រឈមចម្បងៗ ដែលប្រទេសកំពុងអភិវឌ្ឍជួបប្រទះក្នុងការជំរុញបរិយាបន្នហិរញ្ញវត្ថុ និងបានផ្លាស់ប្តូរទស្សនាទានដើម្បីជាដំណោះស្រាយឆ្លើយតប ព្រមទាំងជំរុញឱ្យមានកិច្ចសហប្រតិបត្តិការកាន់តែជិតស្និទ្ធថែមទៀតរវាងស្ថាប័នហិរញ្ញវត្ថុ អ្នករៀបចំគោលនយោបាយ និងដៃគូអភិវឌ្ឍន៍ផងដែរ។

19/05/2026

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញចូលរួមក្នុងកិច្ចប្រជុំក្រុមប្រឹក្សាពិគ្រោះយោបល់យុទ្ធសាស្ត្រអន្តរជាតិ (International Strategic Advisory Council) ស្តីពី “ការកំណត់និយមន័យ និងការកសាងគ្រឹះស្ថានសិក្សាជំនាញហិរញ្ញវត្ថុលំដាប់ពិភពលោកនៅតំបន់អាស៊ី” ដែលត្រូវបានរៀបចំដោយគ្រឹះស្ថានឧត្តមសិក្សា Tsinghua School of Finance នាថ្ងៃទី១៨ ខែឧសភា ឆ្នាំ២០២៦ ក្នុងព្រឹត្តិការណ៍វេទិកាហិរញ្ញវត្ថុសកល Tsinghua PBCSF នៅទីក្រុងឆឹងទូ សាធារណរដ្ឋប្រជាមានិតចិន។

តបតាមការអញ្ជើញពីសាកលវិទ្យាល័យ Tsinghua ដែលជាសាកលវិទ្យាល័យដ៏ល្បីល្បាញនៃទីក្រុងប៉េកាំង សាធារណរដ្ឋប្រជាមានិតចិន លោកជំទាវ ទេសាភិបាល បានចូលរួមក្នុងកិច្ចប្រជុំជាមួយមន្ត្រីជាន់ខ្ពស់ស្ថាប័នសាធារណៈ ដែលរួមមានអតីតនាយករដ្ឋមន្ត្រី ទេសាភិបាលនៃធនាគារកណ្តាលនៅប្រទេសអភិវឌ្ឍ និងកំពុងអភិវឌ្ឍ ព្រមទាំងសាស្ត្រាចារ្យមកពីសាកលវិទ្យាល័យល្បីៗ ដើម្បីផ្លាស់ប្តូរយោបល់ដែលឆ្លុះបញ្ចាំងពីបេសកកម្មយុទ្ធសាស្ត្ររបស់សាកលវិទ្យាល័យ Tsinghua ក្នុងបរិបទនៃប្រព័ន្ធហិរញ្ញវត្ថុពិភពលោកដែលកំពុងប្រែប្រួល។

19/05/2026

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានជួបពិភាក្សាការងារជាមួយលោក Oliver Jenkyn អគ្គនាយកក្រុមហ៊ុន Visa Inc. នាថ្ងៃទី១៨ ខែឧសភា ឆ្នាំ២០២៦ ក្នុងឱកាសដែលលោកជំទាវអញ្ជើញចូលរួមក្នុងព្រឹត្តិការណ៍ហិរញ្ញវត្ថុសកល Tsinghua PBCSF នៅទីក្រុងឆឹងទូ សាធារណរដ្ឋប្រជាមានិតចិន។

ជំនួបនេះមានគោលបំណងពិភាក្សាពីវឌ្ឍនភាពនៃកិច្ចសហការរវាងស្ថាប័នទាំងពីរលើគំនិតផ្តួចផ្តើមនានាទាក់ទងនឹងប្រព័ន្ធទូទាត់សងប្រាក់ ដូចជា កម្មវិធីបាគងទេសចរ ជាដើម។ ភាគីទាំងពីរក៏បានលើកឡើងពីកិច្ចសហការលើផ្នែកផ្សេងៗទៀតដែលរួមមាន ប្រតិបត្តិការស្វែងរកករណីឆបោក និងការលើកកម្ពស់ប្រតិបត្តិការឆ្លងគ្រឹះស្ថាន (Interoperability) តាមរយៈការតភ្ជាប់ប្រព័ន្ធបាគងជាមួយប្រព័ន្ធទូទាត់ដទៃទៀតផងដែរ។

19/05/2026

លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអញ្ជើញចូលរួមក្នុងកម្មវិធីបើកវេទិកាហិរញ្ញវត្ថុសកល Tsinghua PBCSF ដែលរៀបចំឡើងដោយសាកលវិទ្យាល័យ Tsinghua ដែលជាគ្រឹះស្ថានឧត្តមសិក្សាដ៏ល្បីមួយលំដាប់ពិភពលោក នាថ្ងៃទី១៨ ខែឧសភា ឆ្នាំ២០២៦ នៅទីក្រុងឆឹងទូ នៃសាធារណរដ្ឋប្រជាមានិតចិន។

វេទិកានេះត្រូវបានរៀបចំជាប្រចាំឆ្នាំក្នុងគោលបំណងប្រមូលផ្តុំថ្នាក់ដឹកនាំជាន់ខ្ពស់ផ្នែកហិរញ្ញវត្ថុ អ្នករៀបចំគោលនយោបាយហិរញ្ញវត្ថុសកល និងអ្នកស្រាវជ្រាវដើម្បីពិភាក្សាពីវឌ្ឍនភាពនៃស្ថានភាពសេដ្ឋកិច្ច និងហិរញ្ញវត្ថុសំខាន់ៗដែលកំពុងកើតមាន។ វេទិកានៅឆ្នាំនេះមានការអញ្ជើញចូលរួមពីឥស្សរជនជាថ្នាក់ដឹកនាំជាច្រើនដូចជា នាយករដ្ឋមន្ត្រី ឧបនាយករដ្ឋមន្ត្រី ទេសាភិបាល រដ្ឋមន្ត្រី ម្ចាស់ពានរង្វាន់ណូបែល ព្រឹទ្ធបុរស និងសាស្ត្រាចារ្យមកពីសាកលវិទ្យាល័យល្បីៗជាច្រើន។

ក្នុងឱកាសនោះដែរ លោកជំទាវទេសាភិបាលក៏បានចូលរួមកិច្ចប្រជុំស្តីពី “រូបិយប័ណ្ណឌីជីថល និងការទូទាត់ឆ្លងដែន” ដែលបានពិភាក្សាអំពីកាលានុវត្តភាព និងបញ្ហាប្រឈមនានា។ បន្ថែមលើនេះ លោកជំទាវក៏បានចែករំលែកបទពិសោធន៍របស់កម្ពុជាក្នុងការអភិវឌ្ឍប្រព័ន្ធទូទាត់ឌីជីថល និងទិសដៅអនាគតសម្រាប់ការតភ្ជាប់ការទូទាត់ឆ្លងដែនផងដែរ។

ធនាគារជាតិ នៃកម្ពុជា - National Bank of Cambodia

01/06/2026

01/06/2026

31/05/2026

29/05/2026

28/05/2026

20/05/2026

20/05/2026

19/05/2026

19/05/2026

19/05/2026

Address

Telephone

Website

Alerts

Contact The Organization

Shortcuts

Share

Category