បញ្ជាការដ្ឋានវិស្វកម្ម អគ្គបញ្ជាការ - Engineering Force Command, HC of RCAF

ក្រោយថ្ងៃជ័យជំនះ ៧ មករា ១៩៧៩ កងទ័ពប្រជាជនកម្ពុជាបានចាប់កំណើតឡើង រហូតមកដល់ឆ្នាំ ១៩៩៣ បន្ទាប់ពីកម្ពុជាទទួលបានជោគជ័យទាំងស្រុង លើការអនុវត្តន៍ “មាគ៌ានយោបាយឈ្នះ!ឈ្នះ! បង្រួបង្រួមជាតិ ផ្សះផ្សាជាតិ” ដែលផ្តួចផ្តើម និងក្រោយការដឹកនាំយ៉ាងត្រឹមត្រូវ ឈ្លាសវៃ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រសិទ្ធនាមឲ្យកងទ័ពយើងថា “កងយោធពលខេមរភូមិន្ទ” សារជាថ្មី។ ក្នុងអំឡុងពេលនោះដ

ែរ “កងកម្លាំងវិស្វកម្ម” ក៏បានប្រសូត្រឡើងជាលើកដំបូងបង្អស់ នៅថ្ងៃទី១៨ ខែកញ្ញា ឆ្នាំ១៩៨១ ក្រោមរូបភាព កងវរសេនាតូចលេខ ៧៣ សំណង់ និងលេខ ៧៤ ស្ពានសាឡាង ដែលបានចាប់ផ្តើមចេញមុខ បោះជំហានយ៉ាងសកម្មក្នុងការអនុវត្តន៍តួនាទីភារកិច្ចការពារ កសាង ស្តារ និងអភិវឌ្ឍនជាតិមាតុភូមិ។
ទន្ទឹមនឹងការរីកចម្រើនរបស់កងទ័ពប្រជាជនកម្ពុជា កងវរសេនាតូចលេខ ៧៣ សំណង់ និងលេខ ៧៤ ស្ពានសាឡាង ត្រូវបានអគ្គលេខាធិការចេញសេចក្តីសំរេចបង្កើតជា “មន្ទីរទ័ពជាង” ចំណុះអគ្គសេនាធិការផ្ទាល់ នៅថ្ងៃទី១៨ ខែកញ្ញា ឆ្នាំ១៩៨១ ដើម្បីបង្កឲ្យមានលក្ខណៈងាយស្រួលក្នុងការគ្រប់គ្រង ដឹកនាំបញ្ជា។ ហើយក្រោយមកក៏ត្រូវបានបំពេញបន្ថែមទៀតនូវកងវរសេនាធំលេខ ៧៥ ស្ពានថ្នល់ និងលេខ ៧៧ ហ្វឹកហ្វឺនទ័ពជាង។
ដើម្បីឲ្យកងទ័ពជាងមានលទ្ធភាពគ្រប់គ្រាន់ក្នុងការបំពេញភារកិច្ចជំនាញឲ្យកាន់តែមានគុណភាពនោះ អគសេនាធិការបានបំពេញបន្ថែមនូវពីរកងវរសេនាធំពីរទៀត ក្នុងអំឡុងឆ្នាំ ១៩៨៦ ហើយក៏បានបង្កើតទៅជា “ស្នងការទ័ពជាង” ដែលមានទីតាំងឈរជើងនៅតំបន់ក្រសួងការពារប្រទេស នៅថ្ងៃទី២៤ ខែ... ឆ្នាំ១៩៨៧។ ផ្អែកតាមស្ថានការណ៍របស់ប្រទេសជាតិដែលកំពុងរីកចម្រើនឥតឈប់ឈរ ហើយតបទៅនឹងសំណូមពរនៃភារកិច្ចជំនាញ បម្រើឲ្យកាតព្វកិច្ចការពារ កសាង និងស្តារសេដ្ឋកិច្ចជាតិ អគ្គសេនាធិការបានសំរេចបំពេញបន្ថែមមួយកងវរសេនាធំលេខ ៦២ ស្ពាន-ថ្នល់ ទៀតក្នុងឆ្នាំ១៩៨៨។
ចាប់ពីខែឧសភា ឆ្នាំ១៩៩៣ បន្ទាប់សន្ធិសញ្ញាទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ដែលមានការរៀបចំការបោះឆ្នោតសេរី បង្កើតរដ្ឋធម្មនុញ្ញ ស្ថាប័នរដ្ឋសភា និងរាជរដ្ឋាភិបាលអាណត្តិទីមួយមក កងកម្លាំងវិស្វកម្មក៏បានរៀបចំរចនាសម្ព័ន្ធចាត់តាំងរបស់ខ្លួន តាមលំនាំអន្តរជាតិទាំងស្រុង ហើយស្របនឹងលក្ខណៈជាក់ស្តែងនៃប្រទេសកម្ពុជា។ នៅថ្ងៃទី១៤ ខែកក្កដា ឆ្នាំ១៩៩៣ អគ្គសេនាធិការនៃកងយោធពលខេមរភូមិន្ទ បានសម្រេចយកបណ្តាទ័ពជំនាញទាំងអស់ រួមទាំងស្នងការជំរុំទ័ព និងកងទ័ពមួយចំនួនផ្សេងទៀត រួមបញ្ចូលគ្នាជាមួយកងឯកភាពបង្កើតបានជា “បញ្ជាការដ្ឋានវិស្វកម្ម” ចំណុះអគ្គលេខាធិការផ្ទាល់។
ដោយមានការដឹកនាំដ៏ត្រឹមត្រូវ ឈ្លាសវៃ និងយកចិត្តទុកដាក់ខ្ពស់បំផុតរបស់ ឯកឧត្តម ខ្វាន់ ស៊ាម ជាមេបញ្ជាការនោះ កងកម្លាំងវិស្វកម្ម ទទួលបាននូវស្នាដៃយ៉ាងល្អប្រសើរ ត្រចះត្រចង់ពីមួយជំនាន់ទៅមួយជំនាន់ទៀត បង្កើតបានជាសមិទ្ធផលយ៉ាងធំធេង និងច្រើនឥតគណនាជូនសង្គមជាតិទាំងមូល ស្តែងឡើងជាសត្យានុម័តគ្រប់ទិសទីក្នុងព្រះរាជាណាចក្រកម្ពុជា ពិសេសសមិទ្ធផលស្ពាន ថ្នល់ថ្មីៗស្រឡាងនៅតំបន់ជនបទដាច់ស្រយាលចុងកាត់មាត់ញក។ មិនត្រឹមតែប៉ុណ្ណោះទេ កងកម្លាំងវិស្វកម្ម ក៏កំពុងកសាងប្រវត្តិសាស្ត្រ កសាងផ្លូវតាមខ្សែបន្ទាត់ព្រំដែនមានថៃ ឡាវ និងវៀតណាមផងដែរនាពេលបច្ចុប្បន្ននេះ។
ស្នាដៃនានាក្នុងរយៈពេលកន្លងមក ក៏ពុំអាចកាត់ផ្តាច់បានដែរពីការដឹកនាំយ៉ាងឈ្លាសវៃ ត្រឹមត្រូវពីសំណាក់ថ្នាក់ដឹកនាំរាជរដ្ឋាភិបាល ក្រសួងការពារជាតិ និងអគ្គបញ្ជាការនៃកងយោធពលខេមរភូមិន្ទ ហើយថែមទាំងមានចូលរួមសហការណ៍យ៉ាងស្អិតរមួតរបស់បណ្តាក្រសួង ស្ថាប័នរដ្ឋ ទាំងស៊ីវិល និងផ្ទៃក្នុងកងយោធពលខេមរភូមិន្ទ បណ្តាក្រុមហ៊ុននិងសប្បុរសជនទូទៅ រួមទាំងអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធ ព្រះសង្ឃនិងប្រជាពលរដ្ឋ ព្រមទាំងជំនួយជាបន្តបន្ទាប់របស់បណ្តាប្រទេសជាមិត្ត។