03/09/2026
រាជធានីភ្នំពេញ៖ នៅព្រឹកថ្ងៃព្រហស្បតិ៍ ៦រោច ខែស្រាពណ៍ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៣ ខែកញ្ញា ឆ្នាំ២០២៦ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍គជបជ បានអញ្ជើញជាអធិបតីភាពក្នុងពិធីសិក្ខាសាលាពិគ្រោះយោបល់ ស្ដីពីការពិនិត្យឡើងវិញនូវច្បាប់ ស្ដីពី «ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ» ក្រោមការផ្ដូចផ្ដើមរបស់ក្រសួងយុត្តិធម៌ អគ្គលេខាធិការដ្ឋាន នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ដោយមានកិច្ចសហការជាមួយអង្គការអាស៊ានអាក់ (ASEAN-ACT) ។
សិក្ខាសាលានេរះធ្វើឡើងក្នុងគោលបំណង ពិគ្រោះយោបល់ និងសិក្សាផ្លាស់ប្តូរបទពិសោធន៍ ក្នុងការអនុវត្តន៍ច្បាប់ស្តីពី “ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ” កន្លងមកបន្ទាប់ពីច្បាប់នេះបានអនុម័តដាក់ឱ្យប្រើប្រាស់តាំងពីឆ្នាំ ២០០៨ ក្នុងបរិបទដែលបទល្មើស នៃការជួញដូរមនុស្ស មានការវិវត្តន៍ជាទម្រង់ថ្មីៗ តាមការរីកចម្រើន នៃសេដ្ឋកិច្ច វិទ្យាសាស្រ្ត និងបច្ចេកវិទ្យា ដែលបង្កភាពស្មុគស្មាញដល់មន្រ្តីអនុវត្តការងារពាក់ព័ន្ទនឹងអំពើជួញដូរមនុស្ស។ ធាតុចូលដែលនឹងប្រមូលបានពីគ្រប់ភាគីពាក់ព័ន្ធ ក្នុងសិក្ខាសាលាពិគ្រោះយោបល់នេះ នឹងត្រូវយក់ទៅប្រើប្រាស់ជាមូលដ្ឋាន ក្នុងការកែលម្អច្បាប់ស្តីពី “ការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ” ឱ្យស្របតាមស្ថានភាពបច្ចុប្បន្ន និងនៅពេលអនាគត ដើម្បីជាប្រយោជន៍ដល់ប្រជាជនកម្ពុជា។
ក្នុងពិធីនេះ ក៏មានការអញ្ជើញចូលរួមពីសំណាក់ឯកឧត្តម ម៉ក់ ជីតូ រដ្ឋលេខាធិការក្រសួងមហាផ្ទៃ ឯកឧត្តម ងួន រតនៈ រដ្ឋលេខាធិការក្រសួងមហាផ្ទៃ លោកជំទាវ ឧ.ឯក វេជ្ជ. ប៉ុណ្ណ សំខាន់ អគ្គលេខាធិការ គ.ជ.ប.ជ លោកជំទាវ ជា ណាលីន អនុរដ្ឋលេខាធិការក្រសួងកិច្ចការនារី លោកជំទាវ សុន សុខាលីដា អគ្គនាយក នៃអគ្គនាយកដ្ឋានកិច្ចការអយ្យការ និងព្រហ្មទណ្ឌ នៃក្រសួងយុត្តិធម៌ ឯកឧត្តម ឧ.ឯក ជីវ ផល្លី អគ្គស្នងការរង លោកជំទាវ សែម សន្តិកូឡា ចៅក្រម តំណាងតុលាការកំពូល លោកស្រី Setphanie Chow លេខាទី១ប្រចាំទូតអូស្ត្រាលី និងលោកជំទាវ សម្បតិ្ត សុគន្ធា អគ្គលេខាធិការរង (ក.ជ.ក) ឯកឧត្តម លោកជំទាវ អគ្គនាយករង លោក លោកស្រីប្រធាន អនុប្រធាននាយកដ្ឋាន និងតំណាងក្រសួងមហាផ្ទៃ ក្រសួងកិច្ចការនារី ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងយុត្តិធម៌ ក្រសួងការបរទេស និងសហប្រតិបត្តិការអន្តរជាតិ ទីចាត់ការការងារព្រំដែន នៃក្រសួងការពារជាតិ អគ្គនាយកដ្ឋានអត្តសញ្ញាណកម្ម នាយកដ្ឋានកណ្តាលសន្តិសុខ និងនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការដ្ឋាននគរបាលជាតិ ស្នងការដ្ឋានស្រាវជ្រាវបទល្មើស និងប្រឆាំងការជួញដូរមនុស្ស នៃកងរាជអាវុធហត្ថលើផ្ទៃប្រទេស និងអគ្គលេខាធិការដ្ឋាន គ.ជ.ប.ជ លោក/លោកស្រី តំណាងអង្គការដៃគូរអភិវឌ្ឍ ផងដែរ៕
#គជបជ
#ក្រសួងយុត្តិធម៍
#ក្រសួងមហាផ្ទៃ
#លោកជំទាវជូប៊ុនអេង
#លោកជំទាវ ប៉ុណ្ណ សំខាន់ Ponn Samkhan
#ច្បាប់ស្តីពីការបង្ក្រាបអំពើជួញដូរមនុស្ស
