15/08/2025
ពលរដ្ឋម្នាក់ និយាយថា ព្រះរាជអាជ្ញាខេត្តបាត់ដំបង កែវ សុជាតិ ធ្វើឱ្យខ្ញុំយល់ច្បាស់ពីរសជាតិនៃទំព័រថ្មីក្នុងវិស័យយុត្តិធម៌
គណនីហ្វេសប៊ុកមួយឈ្មោះថា លេង ស៊ីណាត បានធ្វើការបង្ហោះខ្លឹមសារនៅរសៀលថ្ងៃទី១៥ខែសីហា នេះ ថា ព្រះរាជអាជ្ញាខេត្តបាត់ដំបង កែវ សុជាតិ ធ្វើឱ្យខ្ញុំយល់ច្បាស់ពីរសជាតិនៃទំព័រថ្មីក្នុងវិស័យយុត្តិធម៌ ។
គណនីហ្វេសប៊ុកមួយនេះ រៀបរាប់យ៉ាងលម្អិតអំពីដំណើររឿង ថា ៖
ព្រះរាជអាជ្ញាខេត្តបាត់ដំបង កែវ សុជាតិ ធ្វើឱ្យខ្ញុំយល់ច្បាស់ពីរសជាតិនៃទំព័រថ្មីក្នុងវិស័យយុត្តិធម៌កាលមុនធ្លាប់ភ័យ ។ ធ្លាប់ខ្លាច ធ្លាប់ស្អប់ ទាំងដែលមិនធ្លាប់មានរឿងក្តីនៅតុលាការព្រោះតែពាក្យថា «ទៅតុលាការបើគ្មានលុយកុំសង្ឃឹមឈ្នះឱ្យសោះ»។ ដោយសារពាក្យនេះ ធ្វើឱ្យខ្ញុំរួញរាមិនហ៊ានប្តឹងអាបោកលុយខ្ញុំអស់៨០លានរៀល និងខ្ចីលុយធនាគារឱ្យជាង៦ម៉ឺនដុល្លារ ហើយទុកអោយវាដើររំភើយចាយលុយឯងលេង។
ដល់និយាយរឿងនេះជាមួយពួកម៉ាក វាថាអាហ្នឹងបោកវាអស់ជាង១០០លានរៀលដែរ។ ក្តៅចិត្តពេកក៏សរសេរក្នុងហ្វេសប៊ុក ស្រាប់តែជំនួយការព្រះរាជអាជ្ញា ខលមកសួរនាំ ទើបខ្ញុំសម្រេចចិត្តសាកល្បងដាក់ពាក្យប្តឹងអាបោកនោះ ។ មានអី ខាងព្រះរាជអាជ្ញា បានកោះហៅខ្ញុំនិងអាបោកខ្ញុំមកទល់មុខគ្នាដើម្បីបញ្ជាក់ការពិត ។
ក្រោយពីបានស្តាប់ដោយយកចិត្តទុកដាក់រួចមក ឯកឧត្តម កែវ សុជាតិ បាននិយាយថា គាត់បានយល់ច្បាស់លាស់អស់ហើយ ហើយក៏មានភស្តុតាងគ្រប់គ្រាន់ដែរ ។ ដូច្នេះគាត់ស្នើអោយអាបោកពួកខ្ញុំសងលុយមកខ្ញុំវិញ តែវាថា វាអត់មានលុយទេ។ ចប់បាត់វាអាងអីវា ឬមួយវាអាងវាមានលុយច្រើនចង់ធ្វើតាមចិត្តវាទេដឹង ។ ចុងបញ្ចប់ ឯកឧត្តម កែវ សុជាតិ បញ្ជាឱ្យឃាត់ខ្លួនអាបោកលុយបញ្ជូនទៅពន្ធនាគារ ។ ខ្ញុំពិតជាមានការភ្ញាក់ផ្អើល និងភ្លឺភ្នែកយ៉ាងខ្លាំង ចំពោះភាពម៉ឺងម៉ាត់ក្នុងការសម្រេចសេចក្តីរបស់ឯកឧត្តម កែវ សុជាតិ។
ជាប្រជាជនមួយរូបដែលរស់នៅក្នុងខេត្តបាត់ដំបង ខ្ញុំពិតជាមានមោទនភាពបំផុតដែលមានថ្នាក់ដឹកនាំជាព្រះរាជអាជ្ញា ដែលមានឆន្ទៈមោះមុត ប្រកាន់ខ្ជាប់នូវយុត្តិធម៌ និងសច្ចៈធម៌ ដូចជាឯកឧត្តម កែវ សុជាតិ ។ ពួកខ្ញុំកក់ក្តៅណាស់ ព្រោះថាពីមុនធ្លាប់តែលឺល្បីឈ្មោះគាត់ តែពេលមានរឿងខ្លួនឯង ជួបគាត់ផ្ទាល់ទើបភ្លឺភ្នែក ។ នៅចំពោះមុខគាត់ អ្នកណាត្រូវ គឺត្រូវ អ្នកណាខុស គឺខុស ហើយគាត់មិនបានគិតពីផលប្រយោជន៍អ្វីទាំងអស់ ។
ខ្ញុំសូមជម្រាបជូនបងប្អូនថា រឿងក្តីខ្ញុំនេះ ខ្ញុំមិនបានអស់លុយសូម្បីតែ១០០រៀល។ បើនិយាយទៅប្រហែលបងប្អូនមិនជឿទេ តែនេះជាការពិត១០០% ហើយក៏គ្មានប្រយោជន៍អ្វីសម្រាប់ខ្ញុំក្នុងការនិយាយបែបនេះដែរ តែវាជាការពិត ។ ខ្ញុំសូមអរគុណ ឯកឧត្តម កែវ សុជាតិ ដែលបានរកយុត្តិធម៌ពិតប្រាកដដល់ពួកខ្ញុំ ។ សូមឯកឧត្តមមានសុខភាពល្អជារៀងរហូត ៕
