05/09/2026
អគារសិក្សាជាច្រើនខ្នងទូទាំងប្រទេស ជាសមិទ្ធផលដែលកើតចេញពីការយកចិត្តទុកដាក់ដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លើវិស័យអប់រំសិក្សាធិការ ពីដំណាក់កាលមួយ ទៅដំណាក់កាលមួយ រហូតមកដល់បច្ចុប្បន្ន ដើម្បីបន្តទុកអោយប្រើប្រាស់ជាប្រយោជន៍ក្នុងការបណ្ដុះបណ្ដាលចៅៗ ជាសិស្សានុសិស្ស បន្តវេនរបស់សម្ដេចទាំងទ្វេ។
ដើម្បីលើកកម្ពស់លើវិស័យអប់រំសិក្សាធិការនេះ អោយកាន់តែមានប្រសិទ្ធភាព គុណភាព និងមាននិរន្តរភាព សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមក្រុមប្រឹក្សាផ្ទាល់ព្រះមហាក្សត្រ បានចេញសេចក្តីសម្រេចបង្កើតក្រុមការងារទទួលបន្ទុកជួសជុល និងសាងសង់ឡើងវិញ អគារសិក្សាដែលជាអំណោយរបស់សម្តេចតេជោ និងសម្ដេចកិត្តិព្រឹទ្ធបណ្ឌិត ដែលមាន ឯកឧត្តមអ្នកឧកញ៉ា ម៉ម វណ្ណឌី ទីប្រឹក្សាប្រធានព្រឹទ្ធសភា និងជាអនុប្រធានសមាគមអតីតយុទ្ធជន និងនិវត្តជនកម្ពុជា ជាប្រធានក្រុមការងារ និងមាន លោក ជិន ប៊ុនធឿន អភិបាលខណ្ឌឫស្សីកែវ ជាអនុប្រធាន។
ទើបនាថ្ងៃសៅរ៍ ៨រោច ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៥ ខែកញ្ញា ឆ្នាំ២០២៦នេះ លោក ជិន ប៊ុនធឿន អនុប្រធានទទួលបន្ទុក ការងារស្រាវជ្រាវ ប្រមូលទិន្នន័យ និងវាយតម្លៃ បានដឹកនាំក្រុមការងារចុះពិនិត្យ និងវាយតម្លៃ អាគារសិក្សានៅក្នុង ស្រុកស្អាង,ស្រុកកណ្តាលស្ទឹង ខេត្តកណ្តាល មានចំនួន៣ខ្នង និងស្រុកសំរោង ខេត្តតាកែវ មានចំនួន ១ខ្នង។
សូមជម្រាបថា អាគារសិក្សា ដែលត្រូវបានចុះពិនិត្យ សិក្សា និងវាយតម្លៃទាំង៤នោះ រួមមាន៖
១. សាលាបឋមសិក្សា ភ្នំធនមន្ត ឋិតក្នុងស្រុកស្អាង ខេត្តកណ្តាល។
២. សាលាបឋមសិក្សា សាលាអណ្តែត ឋិតក្នុងស្រុកស្អាង ខេត្តកណ្តាល។
៣. សាលាបឋមសិក្សា ហ៊ុន សែន មង្គលវ័ន
ឋិតស្រុកស្អាង ខេត្តកណ្តាល។
៤ សាលាបឋមសិក្សា ប្រាសាទ ឋិតក្នុងស្រុកសំរោង ខេត្តតាកែវ៕
លោកប្រធានក្រុមការងារ បាននាំនូវការផ្ដាំសួរសុខទុក្ខ និងការនឹករឭករបស់ សម្ដេចតេជោ ប្រធានព្រឹទ្ធសភា ជូនចំពោះថ្នាក់ដឹកនាំ អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្ស នៅក្នុងភូមិសាស្ត្រស្រុកសំរោង ខេត្តតាកែវ ព្រមទាំងបានបញ្ជាក់អំពីគោលបំណងរបស់ក្រុមការងារ ក្នុងការចុះសិក្សា ពិនិត្យ និងវាយតម្លៃស្ថានភាពជាក់ស្តែង នៃអគារសិក្សា ដើម្បីកំណត់អាទិភាពសម្រាប់ការជួសជុល និងសាងសង់ឡើងវិញ ឱ្យស្របតាមតម្រូវការ និងស្ថានភាពជាក់ស្តែងរបស់សាលារៀននីមួយៗនៅទូទាំងប្រទេស។
ជាមួយគ្នានោះ លោកប្រធានក្រុមការងារ បានសម្ដែងនូវការគោរពដឹងគុណ និងថ្លែងអំណរគុណយ៉ាងជ្រាលជ្រៅ ជូនចំពោះ សម្ដេចតេជោ ប្រធានព្រឹទ្ធសភា ដែលជានិច្ចកាលតែងតែយកចិត្តទុកដាក់ខ្ពស់ ចំពោះសុខទុក្ខ និងសុខុមាលភាពរបស់ប្រជាពលរដ្ឋ ជាពិសេសការលើកកម្ពស់វិស័យអប់រំ តាមរយៈការគាំទ្រ និងកែលម្អហេដ្ឋារចនាសម្ព័ន្ធសិក្សា ឱ្យកាន់តែមានសុវត្ថិភាព គុណភាព និងផាសុកភាព ស្របតាមតម្រូវការរបស់សិស្សានុសិស្ស ដែលជាការរួមចំណែកដ៏សំខាន់ក្នុងការលើកកម្ពស់គុណភាពអប់រំ និងការអភិវឌ្ឍធនធានមនុស្សសម្រាប់សង្គមជាតិ។
