22/01/2026
អំណោយសប្បុរសជនមានសម្ភារៈបរិក្ខា និងគ្រឿងឧបភោគបរិភោគជូនបញ្ជាការដ្ឋានការពារអាកាសកងទ័ពជើងគោក ................
រាជធានីភ្នំពេញ÷ថ្ងៃព្រហស្បតិ៍ទី២២ ខែមករា ឆ្នាំ២០២៦ នៅទីបញ្ជាការដ្ឋានការពារអាកាសកងទ័ពជើងគោក ឯកឧត្តម ឧត្តមសេនីយ៍ទោ សុខ បា៉ង មេបញ្ជាការ បញ្ជាការដ្ឋានការពារអាកាសកងទ័ពជើងគោក និងសហការី បានទទួលអំណោយពីសប្បុរសជនតាមរយៈលោក វរសេនីយ៍ត្រី សួស សុីដេត រួមមាន÷
សំបកបេចំនួន៥,០០០ បេ,កាហ្វេ ចំនួន១ កេសធំ នឹងមីចំនួន៥ កេស អំណោយទាំងនេះបានមកពី មូលនិធិបេះដូងខ្មែរ ,លោក ផុន សុផាត ,លោក ស៊ូ ម៉ុល ,លោក ទូច សុធារី និងលោក ទូច សុផល
សម្រាប់ធ្វើ និងជួសជុលលាណដ្ឋានជួរមុខ ព្រមទាំងសម្រួលជីវភាពដល់វីរ:កងទ័ពជួរមុខ។
ឯកឧត្តម ឧត្តមសេនីយ៍ទោ សុខ បា៉ង មេបញ្ជាការ បញ្ជាការដ្ឋានការពារអាកាសកងទ័ពជើងគោក បានថ្លែងអំណរគុណយ៉ាងជ្រាលជ្រៅបំផុតចំពោះអស់លោក លោកស្រី ដែលបានបរិច្ចាគឧបត្ថម្ភជាថវិកា សម្ភារៈបរិក្ខា និងគ្រឿងឧបភោគបរិភោគតាមរយ:អង្គភាពនាពេលនេះ ថាពិតជាបានដល់ដៃសមរភូមិមុខ ជួយទ្រទ្រង់ដល់ខឿនការពារជាតិពិតប្រាកដមែន ទាំងនេះបង្ហាញអំពីការសាមគ្គីឯកភាពជាតិជាធ្លុងមួយ ដើម្បីបុព្វហេតុការពារបូរណភាពទឹកដី រួមចំណែកជាមួយរាជរដ្ឋាភិបាល ដោះស្រាយរាល់ទុក្ខលំបាកវីរ:កងទ័ពជួរមុខ ដែលបច្ចុប្បន្នកងកម្លាំងយើងបាននឹងកំពុងបំពេញបេសកកម្មការពារជាតិយ៉ាងអង់អាចក្លាហាន។
ឯកឧត្តម ឧត្តមសេនីយ៍ទោ សុខ បា៉ង មេបញ្ជាការ បញ្ជាការដ្ឋានការពារអាកាសកងទ័ពជើងគោក បានប្រគល់លិខិតថ្លែងអំណរគុណជូនអស់លោក លោកស្រី ដែលជាសប្បុរសជនទុកជាការដឹងគុណក្នុងការរួមចំណែកជួយទ្រទ្រង់ខឿនការពារជាតិមាតុភូមិជាមួយរាជរដ្ឋាភិបាលយើង ឯកឧត្តមបានបួងសួងដល់គុណតេជះបារមីវត្ថុសាកសិទ្ធក្នុងលោក តាមជួយឃុំគ្រងថែរក្សាការពារវីរៈកងទ័ពយើងនៅគ្រប់សមរភូមិការពារប្រយុទ្ធ និងអស់លោក លោកស្រី ដែលជាម្ចាស់ទានក្នុងពេលនេះ សូមឲ្យមានសុខភាពល្អបរិបូរណ៍ប្រាជ្ញាឈ្លាសវៃឈ្នះអស់មារសត្រូវគ្រប់ទិសទី និងប្រកបរបរទទួលទានមានបាន ជោគជ័យគ្រប់ភារកិច្ច៕
