បណ្ឌិត្យសភានគរបាលកម្ពុជា

04/09/2026

ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អញ្ជើញជួបសំណេះសំណាលនិងណែនាំតម្រង់ទិសដល់និស្សិតនគរបាលចំនួន៣រូប ដែលត្រូវទៅចូលរួមវគ្គបណ្តុះ បណ្តាល នៅសាធារណរដ្ឋប្រជាមានិតចិន.........................

នៅរសៀលថ្ងៃសុក្រ ទី៤ ខែកញ្ញា ឆ្នាំ២០២៦ ដដែលនេះ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញជួបសំណេះសំណាលនិងណែនាំតម្រង់ទិសដល់និស្សិតនគរបាលចំនួន៣រូប ដែលត្រូវទៅចូលរួមវគ្គបណ្តុះបណ្តាលស្តីពីការពង្រឹងសមត្ថភាពមន្ត្រីអនុវត្តច្បាប់ ដែលគ្រោងនឹងប្រព្រឹត្តទៅចាប់ពីថ្ងៃទី១២ ខែកញ្ញា រហូតដល់ថ្ងៃទី៣១ ខែធ្នូ ឆ្នាំ២០២៦ នៅសាកលវិទ្យាល័យសន្តិសុខសាធារណៈនៃសាធារណរដ្ឋប្រជាមានិតចិន នាបន្ទប់ប្រជុំ-ព្រះវិស្ណុ (អគារប្រពៃណី ក-A)នៃបណ្ឌិត្យសភានគរបាលកម្ពុជា។

ក្នុងឱកាសនោះ ឯកឧត្តមនាយឧត្តមសេនីយ៍ ប្រធានបណ្ឌិត្យសភា បានណែនាំនិងលើក ទឹកចិត្តឱ្យនិស្សិតនគរបាលទាំង៣រូប ត្រូវខិតខំយកចិត្តទុកដាក់ក្នុងការសិក្សាឱ្យបានខ្ជាប់ខ្ជួន និងបានឧបត្ថម្ភថវិកា(ប្រាក់ហោប៉ៅ) ចំនួន៦០០ដុល្លារអាមេរិក ផងដែរ។.............................
#បណ្ឌិត្យសភានគរបាលកម្ពុជា
#ឯកមនោសែន

04/09/2026

04/09/2026

ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អញ្ជើញសំណេះសំណាលនិងណែនាំតម្រង់ទិសដល់និស្សិតថ្នាក់សញ្ញាបត្រមធ្យមឯកទេសនគរបាល ជំនាន់ទី១.........................

នៅរសៀលថ្ងៃសុក្រ ទី៤ ខែកញ្ញា ឆ្នាំ២០២៦ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា បានអញ្ជើញសំណេះសំណាលនិងណែនាំតម្រង់ទិសដល់និស្សិតថ្នាក់សញ្ញាបត្រមធ្យមឯកទេសនគរបាល ជំនាន់ទី១ នៃបណ្ឌិត្យសភានគរបាលកម្ពុជា នាសាលសន្និសីទ-ព្រះរាម (អគារប្រពៃណី ក - A)នៃបណ្ឌិត្យសភានគរបាលកម្ពុជា។

គោលបំណង ដើម្បីសំណេះសំណាលនិងរំឭកដាស់តឿនឱ្យនិស្សិតទាំងអស់បន្តខិតខំសិក្សា-ហ្វឹកហាត់ ស្រាវជ្រាវ និងអភិវឌ្ឍសមត្ថភាពជាប្រចាំ។

ក្នុងឱកាសនោះ ឯកឧត្តមនាយឧត្តមសេនីយ៍ ប្រធានបណ្ឌិត្យសភា បានលើកឡើងនូវមតិយោបល់ណែនាំមួយចំនួនដល់និស្សិត៖
- មិនរៀនត្រឹមតែ ដើម្បីប្រឡងជាប់នោះទេ ប៉ុន្តែ ត្រូវរៀន ដើម្បីចំណេះដឹងនិងសមត្ថភាពប្រើប្រាស់ក្នុងការងារ ព្រមទាំងត្រូវប្រកាន់ខ្ជាប់នូវវិន័យសាលានិងគោរពបទបញ្ជាផ្ទៃក្នុងដែលសាលាបានកំណត់។
- ត្រូវជៀសវាងអំពើដែលប៉ះពាល់ដល់កិត្តិយសខ្លួនឯង គ្រួសារ និងសាលា។.............................
#បណ្ឌិត្យសភានគរបាលកម្ពុជា
#ឯកមនោសែន

04/09/2026

ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អញ្ជើញជាវាគ្មិនចែករំលែកចំណេះដឹងនិងបទពិសោធស្តីពីជំនាញទំនាក់ទំនងអន្តរបុគ្គល ដល់មន្ត្រីនិងអ្នកសិក្សានៅបណ្ឌិត្យសភានគរបាលកម្ពុជា.........................

នៅព្រឹកថ្ងៃសុក្រ ទី៤ ខែកញ្ញា ឆ្នាំ២០២៦ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន បានអញ្ជើញជាវាគ្មិនចែករំលែកចំណេះដឹងនិងបទពិសោធស្តីពីជំនាញទំនាក់ទំនងអន្តរបុគ្គល ដល់មន្ត្រីនិងអ្នកសិក្សានៅបណ្ឌិត្យសភានគរបាលកម្ពុជា ចំនួន១ ៣៣១នាក់ នាសាល សម្តេចអគ្គមហាធម្មពោធិសាល ជា ស៊ីម (អគារ ខ-B)នៃបណ្ឌិត្យសភានគរបាលកម្ពុជា។

ជំនាញទំនាក់ទំនងអន្តរបុគ្គល គឺជាជំនាញមូលដ្ឋានសម្រាប់ការរស់នៅ ការសិក្សា ការងារ និងភាពជាអ្នកដឹកនាំ ព្រោះវាជួយឱ្យមនុស្ស ចេះស្តាប់ ចេះនិយាយ ចេះយល់ និងចេះសហការ ជាមួយអ្នកដទៃ ប្រកបដោយប្រសិទ្ធភាព។.............................
#បណ្ឌិត្យសភានគរបាលកម្ពុជា
#ឯកមនោសែន

04/09/2026

ឯកឧត្ដមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា និងថ្នាក់ដឹកនាំ សាស្ដ្រាចារ្យ គ្រូនគរបាលជាតិ មន្ត្រីនគរបាលជាតិ ព្រមទាំងនិស្សិត សិក្ខាកាម និងសិស្សនគរបាល-ពន្ធនាគារទាំងអស់ បានផ្ញើសារលិខិតរំលែកមរណទុក្ខ ជូនចំពោះ វរសេនីយ៍ត្រី ព្រឹក ព្រលឹម នាយផ្នែកសិក្សាធិការនិងបណ្ណាល័យនៃសាលានគរបាលជាតិភូមិភាគ៤ នៃបណ្ឌិត្យសភានគរបាលកម្ពុជា ចំពោះមរណភាព ឧបាសិកា ណិប ញ៉យ ដែលត្រូវជាម្តាយបង្កើត បានទទួលមរណភាពនៅវេលាម៉ោង១និង៣០នាទីរសៀល ថ្ងៃព្រហស្បតិ៍ ទី៣ ខែកញ្ញា ឆ្នាំ២០២៦ ក្នុងជន្មាយុ៧៥ឆ្នាំ ដោយជរាពាធ។

04/09/2026

អ្នកនាំពាក្យបណ្ឌិត្យសភានគរបាលកម្ពុជា សូមជម្រាបជូនសាធារណជន មេត្តាជ្រាបថា កញ្ញា សួគ៌ នីដា និងលោកស្រី ពេជ្រ មិនា មិនមែនជាមន្ត្រីនៃបណ្ឌិត្យសភានគរបាលកម្ពុជាឡើយ។

03/09/2026

ឯកឧត្ដមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា និងថ្នាក់ដឹកនាំ សាស្ដ្រាចារ្យ គ្រូនគរបាលជាតិ មន្ត្រីនគរបាលជាតិ ព្រមទាំងនិស្សិត សិក្ខាកាម និងសិស្សនគរបាល-ពន្ធនាគារទាំងអស់ បានផ្ញើសារលិខិតរំលែកមរណទុក្ខ ជូនចំពោះ ឧត្តមសេនីយ៍ឯកសាស្ត្រាចារ្យរង នួន វិទ្យាស័ក គ្រូនគរបាលជាតិនៃបណ្ឌិត្យសភានគរបាលកម្ពុជានិងភរិយា ចំពោះមរណភាព លោកស្រី ធន់ គីមអេង ដែលត្រូវជាបងថ្លៃ ដែលបានទទួលមរណភាពនៅវេលាម៉ោង៤និង៥០នាទីរសៀលថ្ងៃព្រហស្បតិ៍ ទី៣ ខែកញ្ញា ឆ្នាំ២០២៦ ក្នុងជន្មាយុ៨៥ឆ្នាំ ដោយរោគាពាធ។

03/09/2026

‎ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អនុប្រធានទី១ ក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ តំណាង ឯកឧត្តមនាយឧត្តមសេនីយ៍សាស្រ្តាចារ្យ សេង ផល្លី ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ អញ្ជើញជាអធិបតីក្នុងកម្មវិធីវេទិការសាធារណៈ នៅបរិវេណវត្តពោធិដ្ឋាន ហៅវត្តថ្លា ឃុំស្វាយអន្ទរ ស្រុកស្វាយអន្ទរ............................
‎
នៅព្រឹកថ្ងៃព្រហស្បតិ៍ ទី៣ ខែកញ្ញា ឆ្នាំ២០២៦ ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន អនុប្រធានទី១ ក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ តំណាង ឯកឧត្តមនាយឧត្តមសេនីយ៍ សាស្រ្តាចារ្យ សេង ផល្លី ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ ខេត្តព្រៃវែង បានអញ្ជើញជាអធិបតីក្នុងកម្មវិធីវេទិការសាធារណៈ នៅឃុំស្វាយអន្ទរ ស្រុកស្វាយអន្ទរ ខេត្តព្រៃវែង (ស្ថិតនៅក្នុងបរិវេណវត្តពោធិដ្ឋាន ហៅវត្តថ្លា) ដែលមានការចូលរួមពីក្រុមការងាររាជរដ្ឋាភិបាលចុះមូលដ្ឋានស្រុកស្វាយអន្ទរ អភិបាលនៃគណៈអភិបាលស្រុក អាជ្ញាធរពាក់ព័ន្ធ និងប្រធាន អនុប្រធានក្រុមការងារឃុំភូមិទាំង៧ ព្រមទាំងប្រជាពលរដ្ឋចូលរួមដែលមានចំនួនសរុប១៦៨ នាក់ ក្នុងនោះវត្តមានប្រជាពលរដ្ឋមកពី៦ភូមិ មានចំនួន១០០នាក់ ដើម្បីស្វែងយល់អំពីសុខទុក្ខ ក្តីកង្វល់ ការលំបាក និងស្តាប់សំណូមពរ របស់ប្រជាពលរដ្ឋដើម្បីស្វែងរកដោះស្រាយ​ដោយស្មារតីបងប្អូនខ្មែរតែមួយ ។
‎
‎ក្នុងឱកាសនោះ ឯកឧត្តមនាយឧត្តមសេនីយ៍ បានជួបបងប្អូនប្រជាពលរដ្ឋដោយបានពាំនាំនូវការផ្តាំផ្ញើរសួរសុខទុក្ខបងប្អូនពីសំណាក់សម្តេចក្រឡាហោមនិងឯកឧត្តមអភិសន្តិបណ្ឌិតព្រមទាំងឯកឧត្តមសាស្ត្រាចារ្យ អគ្គនាយក​សេង ផល្លី ប្រធានក្រុមការងារចុះជួយស្រុកស្វាយអន្ទរ ដែលតែងតែបានយកចិត្តដាក់ខ្ពស់អំពីសុខទុក្ខរបស់បងប្អូនប្រជាពលរដ្ឋយើងនៅមូលដ្ឋាន និងរង់ចាំស្តាប់នូវកង្វល់និងសំណូមពរផ្សេងៗរបស់បងប្អូនទាក់ទងនឹងជីវភាពរស់នៅប្រចាំថ្ងៃ។
‌
ក្រោយពីបានផ្តល់កម្មវិធីជូនប្រជាពលរដ្ឋលើកឡើងអំពីបញ្ហានិងសំណូមពរ​ផ្សេងៗ នាឱកាសនោះ មានប្រជាពលរដ្ឋ៤រូប បានលើកឡើងនូវបញ្ហាមួយចំនួនដូចខាងក្រោម​៖
១- បងប្រុស​ អ៊ុន វណ្ណា នៅភូមិពោធិចិនដាំ បានស្នើរសុំផ្លូវលំចម្ងាយ៥០ម៉ែត្រដែលបានសុំយូរហើយ តែមិនទាន់បាននៅឡើយ។
‎២- លោកអ៊ំ ចាន់ យឺន នៅភូមិថ្លាវ បានលើកឡើងអំពីបញ្ហាហុយផេះអង្កាមបណ្តាលមកពីរោងម៉ាស៊ីនកិនស្រូវ សំណូមពរឱ្យជួយដោះស្រាយ។​
៣- លោកតាអាចារ្យវត្ត បានលើកសំណើរសុំជួយបង្ហើយផ្លូវតភ្ជាប់ប្រមាណ២០០ម៉ែត្រដែលនៅសល់មិនទាន់បានធ្វើ ជាផលវិបាកសម្រាប់ការធ្វើដំណើររបស់សិស្សានុសិស្សនិងប្រជាពលរដ្ឋ។​
៤​-​ អ៊ំស្រី ឱ អូន បានលើកសំណូមពរសុំថ្នាក់ដឹកនាំមេត្តាជួយផ្តល់បណ្ណ (ប.ស.ស.) សម្រាប់មនុស្សចាស់អាយុលើស៦០ឆ្នាំបានព្យាបាលជំងឺនៅមន្ទីពេទ្យផង។​

‎បន្ទាប់ពីបានជ្រាបនូវការលើកជាកង្វល់និងសំណូមពរខាងលើ ឯកឧត្តមនាយឧត្តមសេនីយ៍ បានអនុញ្ញាតឱ្យលោកមេឃុំឆ្លើយបំភ្លឺលើបញ្ហាប្រឡាយដែលនឹងសម្រេចបានសមិទ្ធផលនៅឆ្នាំ២០២៧ខាងមុខ និងអ្នកជំនាញពាក់ព័ន្ធនឹងសុរិយោដី ក៏បានឡើងឆ្លើយបំភ្លឺអំពីតម្លៃនៃការ បង់ព​ន្ធផ្ទេរដីកម្មសិទ្ធិនិងនីតិវិធីនៃដំណើរការច្រកចេញចូលតែមួយ ប្រកបដោយតម្លាភាពជូនប្រជាពលរដ្ឋ បានជ្រាបពីហេតុផលច្បាស់លាស់និងរង់ចាំដំណោះស្រាយពីអជ្ញាធរនិងសមត្ថកិច្ចពាក់ព័ន្ធតាមការសន្យា។​
‎
‎នៅទីបញ្ចប់ ឯកឧត្តមនាយឧត្តមសេនីយ៍ បានធ្វើការបូកសរុបដោយបានឆ្លៀតឱកាសស្រាយបំភ្លឺបន្ថែមអំពីយន្តការច្រកចេញចូលតែមួយនិងនីតិវិធីនៃការដោះស្រាយបញ្ហាផ្ទេរកម្មសិទ្ធិដីធ្លីជូនបងប្អូនប្រជាពលរដ្ឋបានជ្រាបកាន់តែច្បាស់ ព្រមទាំងបានបញ្ជាក់ជូនអំពីគោលបំណងនៃអង្គវេទិការសាធារណៈនូវការប្តេជ្ញាចិត្តខ្ពស់របស់ក្រុមការងាររបស់រាជរដ្ឋាភិបាល។

ជាចុងក្រោយ ឯកឧត្តមនាយឧត្តមសេនីយ៍ បានអំពាវនាវឱ្យបងប្អូនប្រជាពលរដ្ឋទាំងអស់ ត្រូវប្រុងប្រយ័ត្នខ្ពស់ ចំពោះបញ្ហាការឆបោកតាមប្រព័ន្ធអនឡាញ ដែលកើតមាននៅមូលដ្ឋាននិងនាំគ្នាចូលរួមប្រកបដោយស្មារតីសាមគ្គីភាពជាមួយរាជរដ្ឋាភិបាល ដើម្បីកសាងនិងអភិវឌ្ឍសង្គមជាតិក្នុងស្មារតីជាតិខ្មែរតែមួយ។​
‎
‎បន្ថែមពីនេះ ជាកិច្ចបន្ទាប់ ឯកឧត្តមនាយឧត្តមសេនីយ៍ បានឱ្យក្រុមការងាររៀបចំចែកជូនវ៉ែនតាសម្រាប់មនុស្សចាស់ចំនួន៥០០វ៉ែនតាផងដែរ។ ដោយឡែក ចំពោះអង្គវេទិកាសាធារណៈ ឯកឧត្តមនាយឧត្តមសេនីយ៍ បានផ្តល់អាហារសម្រន់និងទឹកបរិសុទ្ធជូនបងប្អូនដែលបានចូលរួមផងដែរ៕.............................
#បណ្ឌិត្យសភានគរបាលកម្ពុជា
#ឯកមនោសែន

02/09/2026

បាឋកថាស្តីពី«ការងាររដ្ឋបាលនិងគោលការណ៍រដ្ឋបាល» ជូនដល់ថ្នាក់ដឹកនាំ គ្រូនគរបាលជាតិ មន្ត្រី និងសិក្ខាកាមនៃបណ្ឌិត្យសភានគរបាលកម្ពុជា ..................................................

ដីឥដ្ឋ : នាព្រឹក ថ្ងៃទី២ ខែកញ្ញា ឆ្នាំ២០២៦ ឯកឧត្តម ឧត្តមសេនីយ៍ឯក សួន ផល្លា អនុប្រធានបណ្ឌិត្យសភានគរបាលកម្ពុជា បានអញ្ជើញទទួលស្វាគមន៍ ឯកឧត្តម ឧត្តមសេនីយ៍ឯក សាស្ត្រាចារ្យ ស៊ូ សុផាន ប្រធានសេនាធិការ នៃអគ្គស្នងការដ្ឋាននគរបាលជាតិ ព្រមទាំងប្រតិភូអមដំណើរ ក្នុងឱកាសអញ្ជើញមកធ្វើបាឋកថាចែករំលែកចំណេះដឹងថ្មីៗនិងបទពិសោធល្អៗលើប្រធានបទស្តីពី«ការងាររដ្ឋបាលនិងគោលការណ៍រដ្ឋបាល» ដល់ថ្នាក់ដឹកនាំ គ្រូនគរបាលជាតិ មន្ត្រី និងសិក្ខាកាមចំនួន៤វគ្គ គឺវគ្គសេនាធិការ វគ្គបណ្តុះបណ្តាលតាមឋានានុក្រមដឹកនាំ កម្រិត២ជំនាន់ទី៤ វគ្គបំប៉នជំនាញស៊ើបការណ៍ខាងក្រៅ និងវគ្គបំប៉នជំនាញគ្រប់គ្រងសណ្តាប់ធ្នាប់សុវត្ថិភាពចរាចរណ៍ ដែលកំពុងសិក្សានៅបណ្ឌិត្យសភានគរបាលកម្ពុជា។

បាឋកថានេះ រៀបចំឡើងក្នុងគោលបំណងលើកកម្ពស់គុណភាព សមត្ថភាព និងពង្រីកចំណេះដឹងបន្ថែម លើកិច្ចការរដ្ឋបាលទូទៅ ដល់ថ្នាក់ដឹកនាំ គ្រូនគរបាលជាតិ មន្ត្រី និងសិក្ខាកាមដែលបានចូលរួម ចំនួន៣០១នាក់ នៅសាលមហោស្រពនៃបណ្ឌិត្យសភានគរបាលកម្ពុជា៕
...............................................
អត្ថបទនិងរូបថត : សាលាមធ្យមវិជ្ជាជីវៈនគរបាល

02/09/2026

បាឋកថាស្តីពី «ការកសាងសំណុំរឿងគ្រោះថ្នាក់ចរាចរណ៍» នៅសាលាមធ្យមវិជ្ជាជីវៈនគរបាល..................................................

ដីឥដ្ឋ : នារសៀល ថ្ងៃទី១ ខែកញ្ញា ឆ្នាំ២០២៦ ឧត្តមសេនីយ៍ត្រី ប្រាក់ ប៊ុនថា នាយករង តំណាង នាយកសាលាមធ្យមវិជ្ជាជីវៈនគរបាល បានទទួលស្វាគមន៍ ឧត្តមសេនីយ៍ទោ ឡៃ ហួត អនុប្រធាននាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈ ព្រមទាំងប្រតិភូអមដំណើរក្នុងឱកាសមកធ្វើបាឋកថាចែករំលែកចំណេះដឹងថ្មីៗនិងបទពិសោធល្អៗលើប្រធានបទស្តីពី«ការកសាងសំណុំរឿងគ្រោះថ្នាក់ចរាចរណ៍» ដល់សិក្ខាកាមវគ្គបំប៉នជំនាញគ្រប់គ្រងសណ្តាប់ធ្នាប់សុវត្ថិភាពចរាចរណ៍ ដែលកំពុងសិក្សានៅសាលាមធ្យមវិជ្ជាជីវៈនគរបាល។

បាឋកថានេះ រៀបចំឡើងក្នុងគោលបំណងលើកកម្ពស់គុណភាព សមត្ថភាពនិងពង្រីកចំណេះដឹងបន្ថែម ពាក់ព័ន្ធជំនាញគ្រប់គ្រងសណ្តាប់ធ្នាប់សុវត្ថិភាពចរាចរណ៍ ដល់សិក្ខាកាមដែលបានចូលរួម ចំនួន៤៤នាក់ នារីចំនួន២នាក់ នៅបន្ទប់បាយ័ន៕
...............................................
អត្ថបទនិងរូបថត : សាលាមធ្យមវិជ្ជាជីវៈនគរបាល