31/08/2026
ឯកឧត្តមបណ្ឌិត ហ៊ឺ វីរៈ អញ្ជើញចុះសួរសុខទុក្ខអនុប្រធាន អតីតប្រធាន និងអតីតអនុប្រធានភូមិ នៅឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង
នាថ្ងៃសៅរ៍ ១រោច ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៩ ខែសីហា ឆ្នាំ២០២៦ ឯកឧត្តមបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង និងក្រុមការងារ អមដំណើរដោយរដ្ឋបាលឃុំអំពិលទឹក បានអញ្ជើញសួរសុខទុក្ខ លោក អ៊ុក ជឿន អាយុ ៧៧ឆ្នាំ អតីតប្រធានភូមិក្អែកពង លោក ប៉ុល ជន អាយុ ៨៤ឆ្នាំ អតីតអនុប្រធានភូមិក្អែកពង លោក អ៊ុក រស់ អាយុ ៧០ឆ្នាំ អតីតប្រធានភូមិបែកចាន និងលោក ទិត សាវី អាយុ ៧០ឆ្នាំ ប្រធានភូមិវាលស្បូវ ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង។
ឯកឧត្តមបណ្ឌិត បានពាំនាំនូវប្រសាសន៍ និងសេចក្ដីនឹករលឹកពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ដែលជានិច្ចកាល សម្តេច និងថ្នាក់ដឹកនាំ តែងតែយកចិត្តទុកដាក់ និងគិតគូរពីសុខទុក្ខ របស់អតីតមន្ត្រីរាជការ និងអាជ្ញាធរមូលដ្ឋានគ្រប់ជាន់ថ្នាក់ ដោយមិនឱ្យមានការទុកចោលអ្នកណាម្នាក់ឡើយ។
ជាមួយគ្នានោះ ឯកឧត្តមបណ្ឌិត បានថ្លែងអំណរគុណយ៉ាងជ្រាលជ្រៅចំពោះអតីតថ្នាក់ដឹកនាំភូមិទាំង ៣រូប និងប្រធានភូមិបច្ចុប្បន្ន ១រូប ដែលកន្លងមកបានខិតខំប្រឹងប្រែង លះបង់ពេលវេលា និងកម្លាំងកាយចិត្តយ៉ាងធំធេង ក្នុងការបម្រើបងប្អូនប្រជាពលរដ្ឋដោយស្មោះត្រង់ ព្រមទាំងបានដោះស្រាយបញ្ហាតូចធំជាច្រើនជូនមូលដ្ឋាន។ ស្នាដៃ និងអំពើល្អទាំងអស់នេះ នឹងចងចាំយ៉ាងជ្រាលជ្រៅនៅក្នុងបេះដូងរបស់ប្រជាពលរដ្ឋ និងជាគំរូល្អប្រពៃសម្រាប់អ្នកបន្តវេន៕
--------------
https://group.coolapp.chat/ -WGxNO70x9b4eqvi-ni0tnsxh4H4keqbu5i3hfE8RwEhBTURFZsfOv5VR0N4jCmHTL
http://t.me/KTL168
