29/12/2025
ភាគ.១៣ ...តាមពិតទៅនៅមុននេះនាងក្រមុំហាក់ភ័យបុកពោះមិនណយទេ នៅពេលដែលបងប្រុសចុងចេញអាការ:ព្រាននារីឲ្យឃើញនៅនឹងមុខយ៉ាងដូច្នេះ ប៉ុន្តែលុះក្រោយពេលគេចាកចេញទៅផុតទើបក្រមុំហាក់ធូរស្បើយមកវិញ។
សុរិយាចូលមកក្នុងបន្ទប់រុញទ្វាបិទចាក់គន្លឹះនិងរៀបចំរើសម្លៀកបំពាក់ចេញពីថង់ខ្មៅដើម្បីផ្លាស់ប្ដូរ។ នាងយកសម្លៀកបំពាក់ត្រឹមមួយកំប្លេសម្រាប់ស្លៀកគេងតែប៉ុណ្ណោះដ្បិតឆាយហៅនាងតន់ហន់ពេក ដូច្នេះសម្លៀកបំពាក់ដែលនាងបានរៀបចំញាត់ចូលសាក់កាដូកាលពីព្រឹកម្សិលមិញគឺនាងភ្លេចយកមកបាត់ទៅហើយ តែក៏មិនថ្វីព្រោះអីយ៉ាងណាមីងយ៉ានច្បាស់ជាយកមកឲ្យនាងនៅថ្ងៃស្អែមមិនខានឡើយ។
ខណៈពេលកំពុងតែរើសយកអាវនិងខោសម្រាប់ស្លៀកគេយប់ដោយការមិនស្រណុកចិត្តដ្បិតមានអារម្មណ៍ថាហាក់ដូចជាភ្លេចយកសារ៉ុងផ្លាសងូតទឹកមកតាមខ្លួន ភ្លាមនោះស្រាប់តែសំឡេងសត្វជីងចក់ក៏យំបន្លឺនៅឯងជញ្ជាំងជាប់ទ្វារបន្ទប់បានធ្វើក្រមុំភ្ញាក់ភ័យស្ទើរលួសព្រលឹង។ សុរិយាយកដៃរឹតទ្រូងរួចវាចាតិចៗថា " យី! ស្មានតែស្អីខំតែភ័យ អាចង្រៃយ៎នេះ " ។ បន្ទាប់ងាកមកវិញនាងក៏បានដឹងថានាងគឺបានភ្លេចយកសារ៉ុងមកតាមមែន ក៏ប៉ុន្តែលុះងាកមើលមកលើគ្រែគេងបន្តិច តរុណីក៏ប្រទះឃើញសារ៉ុងមួយយ៉ាងស្អាតរៀបដាក់លើគ្រែរួចជាស្រេច។
សូមរង់ចាំអានភាគបន្ត
