24/09/2026
Милициянын капитаны Азамат Беккулиевич Шералиевдин жаркын элесине
Жаркын элеси жүрөктөрдө түбөлүккө сакталат
2026-жылдын 9-июлу — Кыргыз Республикасынын ички иштер органдарынын өздүк курамы, өзгөчө милициянын капитаны Шералиев Азамат Беккулиевичтин үй-бүлөсү, туугандары жана жакындары үчүн орду толгус жоготуу менен коштолгон оор күн болду.
Бул күнү кызматтык милдеттерин аткарып жүргөн учурда жол-транспорт кырсыгынын кесепетинен Ысык-Көл облусунун Түп райондук ички иштер бөлүмүнүн Тергөө кызматынын улук тергөөчүсү, милициянын капитаны Шералиев Азамат Беккулиевич мезгилсиз дүйнөдөн кайтты.
Азамат Беккулиевич 1982-жылдын 2-майында Ысык-Көл облусунун Түп районундагы Кош-Дөбө айылында туулган.
Ал өмүрүн элге жана Мекенге кызмат кылууга арнап, ички иштер органдарындагы эмгек жолун 2006-жылы милиционер болуп баштаган. Кызмат өтөгөн жылдары кесиптик жактан өсүп, ички иштер органдарындагы ар кыл кызматтарды аркалаган.
2011-жылы Кыргыз Республикасынын Ички иштер министрлигинин Академиясын аяктап, алган билимин жана тажрыйбасын мыйзамдуулукту камсыз кылууга, коомдук тартипти сактоого жана жарандардын коопсуздугун коргоого арнаган.
Кызматтык ишмердүүлүгүнүн жүрүшүндө Бишкек шаарындагы ички иштер органдарынын бөлүктөрүндө, Ысык-Көл облусунун Жети-Өгүз жана Түп райондук ички иштер бөлүмдөрүндө, Каракол шаардык ички иштер бөлүмүндө жооптуу кызматтарды аркалаган. Өмүрүнүн акыркы жылдарын тергөө тармагына арнап, Түп райондук ички иштер бөлүмүнүн Тергөө кызматында улук тергөөчү болуп эмгектенип келген.
Азамат Беккулиевич кызматтык милдетине жоопкерчилик менен мамиле кылып, берген антына өмүрүнүн акырына чейин бекем турган. Кесипкөйлүгү, тактыгы, сабырдуулугу жана адамгерчилиги менен айырмаланып, кесиптештеринин арасында кадыр-баркка ээ болгон.
Ал кызматты жөн гана кесип катары эмес, эл алдындагы жоопкерчилик катары кабыл алып, ар бир тапшырманы ак ниет жана так аткарууга умтулган. Кандай гана татаал жагдай болбосун, мыйзамдуулукту, чындыкты жана адилеттүүлүктү туу тутуп, өз милдетин абийир менен аткарып келген.
Аны менен бирге кызмат өтөгөн кесиптештери Азамат Беккулиевичти жөнөкөйлүгү, токтоолугу, сөзүнө бекемдиги, кесипкөйлүгү жана адамга жылуу мамилеси менен айырмаланган мыкты кызматкер катары эскеришет. Анын кесиптештерине көрсөткөн колдоосу, ак көңүлдүгү жана адамгерчилиги аны билгендердин эсинде түбөлүккө сакталат.
Азамат Беккулиевичтин мезгилсиз дүйнөдөн кайтканы, биринчи кезекте, анын үй-бүлөсү үчүн орду толгус жоготуу болду. Артында жубайы жана төрт баласы калды.
Ал үй-бүлөсү үчүн мээримдүү жолдош, балдары үчүн камкор ата, жакындары үчүн ишенимдүү адам эле. Үй-бүлөсүнө болгон камкордугу, балдарына берген тарбиясы жана аталык мээрими анын жакындарынын жүрөгүндө түбөлүккө сакталат.
Кырк төрт жашында өмүрү кыйылган Азамат Беккулиевичтин артында элине кылган ак эмгеги, кесиптештерине жасаган жакшылыгы, үй-бүлөсүнө болгон камкордугу жана жакшы аты калды.
Ал өз өмүрүн Мекенге кызмат кылууга арнап, кызматтык милдетин аткарып жүрүп дүйнөдөн кайтты. Бул анын кесибине, берген антына жана кызматтык милдетине болгон берилгендигинин айкын далили болуп калды.
Кыргыз Республикасынын Ички иштер министрлигинин жетекчилиги, өздүк курамы жана ИИМдин Ардагерлер кеңеши милициянын капитаны Шералиев Азамат Беккулиевичтин мезгилсиз дүйнөдөн кайткандыгына байланыштуу анын жубайына, төрт баласына, ата-энесине, туугандарына жана жакындарына терең кайгыруу менен көңүл айтып, оор жоготуунун аза кайгысын тең бөлүшөт.
Жаткан жери жайлуу, топурагы торко болсун.
Арбагыңыз ыраазы болсун, Азамат Беккулиевич.
Жаркын элесиңиз түбөлүккө жүрөктөрдө жашайт.
