Журналистика жана коммуникация институту

21/10/2026

22-октябрда саат 12:00до Жусуп Баласагын атындагы КУУнун Журналистика жана коммуникация институтунда Илим күнүнө карата журналист, публицист Аскер Сакыбаева менен студенттердин жолугушуусу өтөт. Жолугушууда автордун «Жолбүгүн» китебинин бет ачары болот. Эмгек Кыргыз Республикасынын маданиятына эмгек сиңирген ишмер, белгилүү публицист, акын жана котормочу Алым Токтомушевдин өмүр, чыгармачылыгына арналган.
Китепке А.Токтомушевдин «Кыргызстан маданияты», «Асаба», «Агым» жана «Алас» гезиттеринде ар кайсы мезгилде жарыяланган маектери, публицистикалык макалалары топтолгон. Китеп журналистикага, өлкөнүн эгемендүүлүк доорундагы саясий-экономикалык тарыхына, илимий изилдөө максатында колдонууга кызыккандар үчүн зор табылга.
Иш-чаранын жүрүшүндө кызыктырган суроолорго жооп алып, кыргыз журналистикасынын тарыхы жөнүндө кызыктуу маалыматтарды алууга болот. Андыктан барыңыздарды күтөбүз!
Өтө турган жери: Ж.Баласагын атындагы КУУ, Башкы корпус, кичи жыйындар залы
“Журналистика” билим берүү программасы

21/10/2026

Чыңгыз Айтматовдун үй-музейине саякат
_______________________
Жусуп Баласагын атындагы Кыргыз улуттук университетинин Журналистика жана коммуникация институтунун «Жарнама жана коомчулук менен байланыш» билим берүү программасынын 1-курсунун студенттери кыргыз элинин залкар жазуучусу Чыңгыз Айтматовдун үй-музейине барышты.
Куратордук иш-чаралардын алкагында уюштурулган саякат студенттерге жазуучунун өмүр жолу, дүйнөлүк адабиятка кошкон салымы жана дипломатиялык ишмердүүлүгү менен жакындан таанышууга мүмкүнчүлүк түздү.
Экскурсия учурунда студенттер Чыңгыз Айтматовдун өмүрүнүн акыркы жылдарында жашап, эмгектенген бөлмөсүн, жеке буюмдарын, кол жазмаларын, сүрөт архивин жана сейрек кездешүүчү китептерин көрүштү. Музейдин кызматкерлери залкар жазуучунун өмүр таржымалы, чыгармаларынын жаралуу тарыхы жана дүйнөлүк маданияттагы орду тууралуу кызыктуу маалыматтар менен бөлүшүштү.
Мындай маданий-агартуу иш-чаралары болочок адистердин дүйнө таанымын кеңейтүүгө, улуттук адабий мурастарга болгон кызыгуусун арттырууга жана руханий баалуулуктарды тереңирээк түшүнүүгө өбөлгө түзөт.
Саякаттын соңунда студенттер эстеликке сүрөткө түшүп, үй-музейинен алган таасирлери менен бөлүшүп, экскурсияны уюштуруучуларга ыраазычылык билдиришти.

11/10/2026

Жусуп Баласагын атындагы Кыргыз улуттук университетинин Журналистика жана коммуникация институтунун студенттери Чүй облусунун 100 жылдыгына арналган майрамдык салтанатка катышышты.

Майрамдык иш-чара Бишкек шаарындагы Ала-Тоо аянтында өтүп, өзүнө улуттук баалуулуктарды, маданиятты жана тарыхты даңазалаган өзгөчө маанай тартуулады.

07/10/2026

Абдыганы Халиловдун 70 жылдык мааракесине арналган эл аралык илимий-практикалык конференция өттү
________________________
Жусуп Баласагын атындагы Кыргыз улуттук университетинде Кыргыз Республикасынын билим берүүсүнө эмгек сиңирген кызматкер, PhD, ардактуу профессор Абдыганы Дарманбекович Халиловдун 70 жылдык мааракесине арналган «Уңгу жол жана учурдагы массмедиа» аттуу эл аралык илимий-практикалык конференция өттү.
Иш-чара журналистика жана коммуникация институту тарабынан уюштурулуп, анда Кыргызстандагы массмедианын бүгүнкү өнүгүү тенденциялары, анын руханий баалуулуктарды калыптандыруудагы орду, мультимедиа менен эл аралык медиамейкиндиктин өз ара байланышы жана өнүгүүнүн келечектүү багыттары талкууланды. Ошондой эле «Уңгу жол» концепциясын коомчулукка жайылтууда жалпыга маалымдоо каражаттарынын ролуна өзгөчө көңүл бурулду.
Алгач Кыргыз улуттук университетинин мамлекеттик тил жана социалдык иштер боюнча проректору Н.Ишекеев ректордун куттутоосун окуп, маараке ээсине каалоо-тилектерин айтты. Конференциянын алкагында профессор А.Халиловдун “Кыргызстандагы журналистика: журнал периодикасы жана ММКнын айрым проблемалары.” аттуу китебинин бет ачары болду. Аталган эмгекке автордун Кыргызстандын мезгилдүү басма сөзүнө арналган монографиялары жана илимий макалалары киргизилген.
Эл аралык жолугушууну журналистика жана коммуникация институтунун директору Ш. Костюк алып барды. Программага ылайык, иш-чаранын жүрүшүндө А.Халиловдун кесиптик жана илимий-педагогикалык ишмердигине арналган баяндамалар жасалды.
Конференцияда сөз сүйлөгөндөр маараке ээсинин журналистика тармагына жана адистерди даярдоо ишине кошкон салымын белгилешип, анын көп жылдык педагогикалык жана чыгармачылык ишмердигине жогору баа беришти.
Филология илимдеринин доктору, профессор С.Тиллебаев «Абдыганы Халилов – журналист кадрларды даярдоонун жаңы мектебин жаратуучу» аттуу баяндамасында анын журналистика боюнча адистерди даярдоодогу өзгөчө ролуна токтолду. Ал Абдыганы агайдын мугалимдик кесипти жөн гана аркалап тим болбостон, аны ардактуу кесип катары кабыл алып, бүткүл өмүрүн жаш адистерге билим жана тарбия берүүгө арнаган инсан экенин белгиледи.
Кыргыз эл жазуучусу, КУУнун ардактуу профессору А.Матисаков өз сөзүндө А. Халиловдун студенттик жылдарына кайрылып, анын билимге болгон умтулуусун, китепти көп окуганын, изденүүгө болгон кызыгуусун өзгөчө белгиледи. Анын пикиринде, көп окуу, өз алдынча изденүү жана ар дайым жаңы нерсеге умтулуу — Абдыганы агайдын кийинчерээк мыкты педагог жана кесипкөй адис болуп калыптанышына өбөлгө болгон сапаттардын бири.
Конференцияда Казакстан Республикасынын Улуттук илимдер академиясынын академиги, «Казак адабияты» гезитинин башкы редактору, профессор Бауржан Жакып, Бишкек мамлекеттик университетинин профессору А.Асанова, журналистика жана маалыматтык системалар факультетинин деканы Ч.Капарова, Кыргыз-Түрк «Манас» университетинин доценти Б.Орунбеков, Евразия улуттук университетинин журналистика институтунун директору Кайрат Сак, ошондой эле журналист-жазуучулар жана медианын белгилүү өкүлдөрү баяндама жасашты.
Айрыкча «Журналисттердин мугалими жөнүндө» деген темада баяндама жасаган Кыргыз Республикасынын маданиятына эмгек сиңирген ишмер, журналист-жазуучу А.Пазылов профессордун журналисттердин бир нече муунун даярдоодогу эмгегине токтолду.
Абдыганы Дарманбекович Халиловдун 70 жылдык мааракесине арналган бул илимий-практикалык конференция — анын эмгек жолун эскерүү менен гана чектелбестен, журналистика билиминин бүгүнкү абалын, медиа тармагынын өзгөрүү багыттарын жана келечектеги милдеттерин талкуулаган маанилүү кесиптик аянтча болду.

06/10/2026

Дүйнөлүк жаңылыктарды кантип туура жана кызыктуу чагылдыруу керек?
__________________________
6-октябрда, Ж.Баласагын атындагы КУУнун журналистика жана коммуникация институтунда студенттер үчүн «Медиада эл аралык жаңылыктарды чагылдыруу» аттуу практикалык-семинар болуп өттү. 🎤📚
Семинардын коногу жана лектору — Акаева Элвира, эркин журналист, «Азаттык» радиосунун Борбор Азия боюнча мурдагы чет элдик кабарчысы.
💬 Жолугушууда студенттер эл аралык жаңылыктарды тандоо, маалыматты текшерүү, окуяны контекст менен берүү жана дүйнөдөгү маанилүү окуяларды аудиторияга түшүнүктүү жеткирүү боюнча практикалык тажрыйба алышты.
Чыныгы журналисттин тажрыйбасын угуп, суроолорду берип, кесиптин маанилүү сырлары менен бөлүшүү — студенттер үчүн баалуу мүмкүнчүлүк болду.

#КНУ #ЖурналистикаЖанаКоммуникация #Журналистика #Медиа

30/08/2026

ШКУ медиафоруму: негизги суроолор жана маанилүү жыйынтыктар
_________________________________
Учурда Бишкек шаарында Шанхай Кызматташтык Уюмуна (ШКУ) мүчө мамлекеттердин саммитинин алкагында "ШКУ мейкиндигиндеги маалыматтык өнөктөштүк: жалпы медиамейкиндикти өнүктүрүү жана так маалыматты камсыздоо". "Жасалма интеллект, инновация жана келечектин медиасы" аталышындагы эл аралык медиафорум өтүүдө. Санариптик доордогу маалыматтык коопсуздукка арналган панелдик сессиянын модератору Ж. Баласагын атындагы КУУнун Журналистика жана коммуникация институтунун директору, социология илимдеринин кандидаты Ширин Аалиевна Костюк.
------------------------------
Аталган ири иш-чарага Ж.Баласагын атындагы Кыргыз улуттук университетинин (КУУ) мамлекеттик тил жана тил саясаты боюнча проректору Назаркул Ишекеев да катышты.
Сессияда төмөнкү башкы суроолор талкууланды:
* Эл аралык маалымат алмашуунун жаңы механизмдерин түзүү;
* Фейк жаңылыктарга жана дезинформацияга каршы биргелешип күрөшү;.
* Санариптик платформалар заманында журналистиканын ролу жана коомдук ЖМКлардын жоопкерчилиги;
* ШКУга мүчө мамлекеттердин бирдиктүү маалыматтык коопсуздугун камсыздоо.
Жыйындын алкагында Ширин Костюк жасалма интеллект жана социалдык тармактар өнүккөн заманда маалыматтарды верификациялоо (текшерүү) эң башкы орунга чыкканын белгиледи. Анын айтымында, ШКУ мейкиндигиндеги журналисттер жөн гана байкоочу эмес, коопсуз медиа чөйрөнү кура турган, өз ара ишенимге негизделген «Шанхай рухунун» башкы жол көрсөткүчтөрү болууга тийиш.
Пикир алышууда эл аралык спикерлер ар кандай чечимдерди сунушташты.
1. Технологиялык калкан: Атул Агарвал жана Хамад Обейд Аль Кааби жасалма интеллект доорунда алгоритмдерди фейктерге каршы курал катары колдонууну жана жаңылыктар хабдарын координациялоону сунушташты.
2. Объективдүүлүк пайдубалы: Ольга Шпилевская эл аралык ири маалымат каражаттары жалпы медиа мейкиндикте так маалыматтын кепилдиги болуп кала берерин айтты.
3. Жергиликтүү аудитория жана мамлекеттик саясат: Наталья Кролевич, Ришам Ракиб жана Абдул Маджид Али Хаджи глобалдык жаңылыктарды жергиликтүү элдин тилине ылайыктап жеткирүү жана фейктерди расмий деңгээлде ыкчам төгүндөө зарылдыгын белгилешти.

29/08/2026

https://www.youtube.com/watch?v=PEq90pObcMw

УТРК МЕНЕН КЫТАЙДЫН МЕДИАКОРПОРАЦИЯСЫ: СТУДЕНТТЕР ҮЧҮН ЖАҢЫ МҮМКҮНЧҮЛҮКТӨР
Кыргызстан менен Кытайдын медиа тармагындагы кызматташтыгы күн санап күчөп жатат. Улуттук телерадиоберүү корпорациясы (УТРК) жана Кытайдын медиакорпорациясы контент алмашып, маданий байланыштарды бекемдөөдө. Бул чоң өнөктөштүк Жусуп Баласагын атындагы Кыргыз улуттук университетинин (КНУ) Журналистика жана коммуникация институтунун студенттери, өзгөчө эл аралык журналистика багытында окуган жаштар үчүн чоң кесиптик жол ачат.
Практикалык тажрыйба кайдан келет?
Эки тараптуу кызматташтык жөн гана кагазда калбай, реалдуу ишке ашууда.
«Өткөн жылы үч даректүү тасма тартылып, алар кытай тилине которулуп, Кытайдын үч телеканалынан жана аба каттамдарындагы мониторлордон көрсөтүлдү», — дейт УТРКнын башкы директору Уланбек Сатиев.
Бул — КНУнун студенттери үчүн мыкты үлгү. Келечектеги эл аралык журналисттер глобалдык долбоорлорго катышып, котормо жасап жана телеконтент жаратуу тажрыйбасын УТРК аркылуу оңой эле ала алышат.
Кытай тарап да жаш кадрлар менен иштөөгө даяр:
«Медиаконтент алмашуу көрүүчүлөрүбүзгө бири-биринин маданиятын жакындан таанып-билүүгө чоң жол ачат», — деди Кытай медиакорпорациясынын Евразия бюросунун директору Ван Бинь.
Музыка менен бий баарын айтып турат
Эки өлкөнүн жаштары чогулганда эч кандай тил тоскоол болбосун иш-чаранын салтанаттуу бөлүгү далилдеди. Бишкектен келген кыздар менен кытайлык бийчилер биргелешип укмуштуудай номер тартуулашты.
«Биз бул номерге бир эле апта даярдандык, бирок бий аркылуу бири-бирибизди тез эле түшүндүк», — дешет бийчилер Дин Жуюэ, Ян Цяньсюнь жана Янь Шуяo.
Бул жараян студенттерге эмне берет?
Кыргыз улуттук университетинин эл аралык журналистика багытындагы студенттери тышкы өлкөлөргө маданий алмашуу менен баруу жана чоң медиакомпаниялар менен иштөө үчүн УТРК платформасын эркин колдоно алышат. Дүйнөнү таанып, элдерди бириктирген көпүрө болууга азыртадан кадам таштаңыз!

Enjoy the videos and music you love, upload original content, and share it all with friends, family, and the world on YouTube.

12/08/2026