22/09/2026
📌Кыргызстан суу үнөмдөөчү технологияларды киргизүү боюнча эл аралык кызматташтыкты бекемдеди
📍«Кыргызсуу долбоор» ачык акционердик коому заманбап сугат системаларын өнүктүрүү боюнча Казакстан жана Өзбекстан компаниялары менен меморандумдарга кол койду.
📌Кыргыз Республикасынын Суу ресурстары, айыл чарба жана кайра иштетүү өнөр жайы министрлигине караштуу Суу ресурстары кызматынын алдындагы «Кыргызсуу долбоор» ачык акционердик коомунун башкармалыгынын төрагасы Эрмек Дурусалиев баштаган делегация иш сапары менен Казакстан Республикасына жана Өзбекстан Республикасына барды. Иш сапар 2026-жылдын 15–18-сентябрь күндөрү болуп өттү.
Алматы шаарында кыргыз делегациясы «ADAMANT Inc.» жоопкерчилиги чектелген коомунун жетекчилиги менен сүйлөшүүлөрдү жүргүздү. Жолугушуунун жүрүшүндө тамчылатып жана жамгырлатып сугаруу системаларын киргизүүгө, ошондой эле Кыргызстандын климаттык жана гидрологиялык шарттарын эске алуу менен долбоордук чечимдерди иштеп чыгууга өзгөчө көңүл бурулду. Жолугушуунун жыйынтыгында тараптар өз ара түшүнүшүү жана кызматташтык жөнүндө меморандумга кол коюшту.
📍Ташкент шаарында «Кыргызсуу долбоор» ААКсынын өкүлдөрү DEBYUT, «AgroTomçi suğoriş tizimlari» жана «Аква консалт» компанияларынын өкүлдөрү менен жолугушту. Делегация ишканалардын өндүрүштүк мүмкүнчүлүктөрү жана заманбап сугат системалары үчүн жабдууларды даярдоо технологиялары менен таанышты.
Өзбекстандык өнөктөштөр менен өткөрүлгөн жолугушуулардын жыйынтыгында да кызматташуу жөнүндө меморандумга кол коюлду.
Жетишилген макулдашуулар Кыргызстанда заманбап суу үнөмдөөчү технологияларды иш жүзүндө киргизүүгө кеңири мүмкүнчүлүктөрдү түзөт.
Мындан ары тараптар тажрыйба алмашууну, долбоорлоо жаатындагы кызматташтыкты өнүктүрүүнү жана заманбап чечимдерди Кыргыз Республикасынын шарттарына ылайыкташтырууну пландашууда.
📌Тамчылатып жана жамгырлатып сугаруу системаларын киргизүү суу ресурстарын кыйла натыйжалуу пайдаланууга жана айыл чарба жерлерин сугаруунун натыйжалуулугун жогорулатууга мүмкүндүк берет.
