Progetu Sa Lìngua Oi - Ufìtziu Lìngua Sarda Sìnnia

12/06/2026

Gràtzias a Radio Televisione Sarda 😍

11/06/2026

Sighint is atòbius po afestai su centenàriu de su Nobel de Gràtzia Deledda.
Seis ligendi?
Martis su 16 de su mesi de làmpadas si bieus in sa bibrioteca de Sìnnia a is 6 de merì po chistionai totus impari de s'arromanzu "Elias Portolu", totu in lìngua sarda!
Ita seis abetendi?
Benei, sa crica de is lìbrus de s'Ufìtziu Lìngua Sarda est prena de bella genti!

Unu libru po dònnia mesi, unu libru po un'annu de Gràtzia 🖋

09/06/2026

Saludi a totus!
Custus ant a essi is oràrius nous po s'istadi! ☀️

Benei a s'agatai in bibrioteca fintzas in su mesi de Làmpadas, in su mesi de Argiolas e in Austu!
Labai ca innoi nc'est friscu ❄️

Si bieus 💛

09/06/2026

In su mesi de Maju eus biu sa pallinedda. Imoi depeus connosci su pallini! ❤️
Custu est unu strexu cun su diàmetru “mèdiu” (40 - 60 cm). Custu de sa fotografia est unu pallini bonu, imperau po ponni is durcis e po bellesa sceti. Est bellu diaderus, cun su coru de Gesùs. Su strexu non fiat imperau po bellesa sceti, ddu scieus. E comenti imperànt su pallini de manixu? Fiat imperau candu si depiat fai su pani: nci poniant aintrus sa sìmbula e su pòddini. Calencuna borta fiat imperau fintzas candu depiant fai pesai is durcis: po nai, nci poniant aintrus su pani de saba.

05/06/2026

Fueddu donau, fueddu aguantau!
Si faeus biri calincuna fotografia chi eus tirau po sa dì de su sardu.
Is pipius funt stètius is protagonistas de custa dì:
ant baddau, cantau, ant fatu is atoris; si funt spassiaus amostendi is traballus chi ant fatu me is scolas cun is maistas; ant giogau cun Mommoteddu e is amigus suus, cun s'Universu, cun sa lìngua e sa stòria sarda.

Ddu eus giai nau, diis comenti a custa nci podint essi sceti gràtzias a dònnia arrogheddu chi traballat po is pipius, po Sìnnia e po su sardu.

Nosu de s'Ufìtziu Lìngua Sarda podeus sceti torrai gràtzias a totus:
a is pipius
a is maistas e a is maistus e a sa dirigidora
a s’amministratzioni comunali
a is chi traballant in Bibrioteca
a is chi traballant in su MuA
a s'oratòriu de Santa Bràbara
a Claudia Aru
a Nicola Ledda
a Matteo Tuveri
a Fabio Usala
a Ignazio Concas
a Jeff Biggers, Carla Paciotto e Nurnet
a su coru Serpeddì
a is volontàrius de sa Misericòrdia e de su VAB

Is pipius imoi ddu sciint "candu sa vida est grai tocat sceti a cantai". E nosu sigheus a cantai po su sardu, in dònnia logu e dònnia dì.

Atrus annus❣️

28/05/2026

GRÀTZIAS!
Atru no podeus nai!

Oi po nos est festa, po su sardu est festa.
Prus de duxentus pipius e pipias oi funt essius de is murus de is scolas insoru po afestai su sardu: ant arrecitau, ant fatu su casu, letzionis de scièntzia, ant lìgiu, ant baddau, ant cantau e si funt spassiaus.
Totu in sardu.

Diis comenti a custa nci podint essi sceti gràtzias a dònnia arrogheddu chi traballat e donat una manu de agiudu po chi custa festa siat cumpria: s'amministratzioni comunali, sa bibrioteca, s'arretòriu de Santa Bràbara, su MUA, is volontàrius de sa Misericordia e de su VAB e totus is chi ant fatu atividadi cun is pipius.
Gràtzias a sa scola cun sa dirigidora e is maistas chi funt su coru chi movit totu su chi s'est fatu oi.

Torraus gràtzias medas a Claudia Aru, gràtzias a issa eus pòtziu acabai sa festa in una manera chi mellus no podemus sperai!
Gràtzias a totu sa comunidadi chi si agiudat essendinci e creendinci.
Ma is gràtzias prus mannas andant a is pipius chi prus bellus de issus no nci nd'at!
In custas diis s'eus a amostai ita totu funt arrenèscius a fai in sa dì de oi, bosatrus chi boleis cumentai cun is fotografias chi eis fatu!

Atrus annus 🥰

22/05/2026

Giai de candu eus incarrerau s'atividadi nosta cun s'ufìtziu de sa lìngua sarda in Sìnnia in su 2023 eus luegus traballau impari a is scolas, de classi in classi seus intraus po imparai a is pipius sa lìngua nosta donendi-ddi a is pipius unu imparu fitianu.
Custu traballu impari a sa bolontadi de is maistas e su de nci ai crètiu at donau vida a unu esperimentu mannu: su de apariciai una di' po is pipius chi siat totu in sardu (a su mancu po una di'!)
E duncas ocannu seus lòmpius a sa de cuàtruru editzionis de "Sa di' de su sardu".
Si atobiaus in pratza de Crèsia giòbia su 28 de martzu de a mengianu meda ant a essi is momentus po is pipius e po is mannus puru. Serraus a is 11 e mesu afestendi e cantendi impari a Claudia Aru.

Tocat a torrai gràtzias a totus is chi funt agiurendi po chi custa di' bengat a sa mellus manera!

19/05/2026

Cras 🤍

Po afestai su Maju de is lìburus e po celebrai su centenàriu de su Nobel de Gràtzia Deledda si boleus presentai una idea noa de s'Ufìtziu de sa lìngua sarda de Sìnnia:
unu book-club, eus a nai in sardu una crica de is librus, de custa scritora de importu mannu po sa terra nosta.
Dònnia mesi eus a ligi unu libru de Gràtzia Deledda, po ndi chistionai pustis totus impari in sardu!
Mèrcuris de sa cida chi benit, su 20 de su mesi de Maju, s'atobiaus in sa bibrioteca a is 6 de merì po fai una presentada de custa grandu fèmina sarda e po scoberri cali at a essi su primu libru de ligi...
Boleis cumentzai a fai custu tretu cun nosu?
Scriei a s'email
[email protected]

S'abetaus! 😊

15/05/2026

Custu merì me is aposentus de sa cresiedda bècia de Santu Sidori 35 fèminas ant partetzipau a unu laboratòriu de panificatzioni, gràtzias a s'agiudu de su comitau de sa festa e a is maistas de Sestu
Ignazia Ledda, Margherita Angioni e Silvana Tola.

Est bellu candu sa genti s'atòbiat po imparai, no a fai su pani sceti ma fintzas a bivi totus impari: is fèminas de Sìnnia ddu sciint fai.
Su fragu de su pani est bonu ma su fragu de sa collaboratzioni e de sa stima po is atras fèminas, po su Santu e po sa memòria de Eleonora est prus bonu ancora.

Gràtzias diaderus a totus po custa dì. 🌾💛
........................

Ufìtziu lìngua sarda
Comunu de Sìnnia
Sa lìngua oi
Progetu finantziau cun su dinai de sa Regioni Autònoma de Sardìnnia conforma a sa L. 482/99 e a sa L.R. 22/2018