20/07/2025
'Nce steva nu tiempo ca' chesta festa jera na grande festa. Pecchè 'nce stevino I viecchij' 'e prima ca' 'nce tenevino assaje pe' Santu Stefeno, cumme rice a nonna mia. Quann'jera o' mese 'e luglio, 'o paese s' annirizzava a festa sulo pe' isso. Accumminciava cu' 'a aizata dd'o quadro, i'e ffemmene s' accocchiavino tutte attuorn'o patrono pe' prejà e pe' cantà. E che v'o dico a fa. Voci antiche, abbasce o' puzzo co'ngegno addo se metteva l'arco dd'a festa, ca' nun se sentono cchiù. Quanta vote nuje ggiuvani ammo provato a'dde imità, ma nun c'è stato mai verso.
'Nce steva nu tiempo, ca' i' mast'e festa 'e settimane primma, se mettevino n'accordo e stanchi e strutti dd'a fatica jevino casa pe' casa addummannanno l'offerta pe' Santu Stefeno. Chi cchiù ppoco chi cchiù assaje, a seconda dd'a disponibilità 'e ciascuno, ma tutti uniti comm'a n'a grande famiglia. E nunn'è chisto, in fondo, o' senso vero dd'a festa?
'Nce steva nu tiempo ca a' ggente jera umile e umana. 'E ffemmene cchiù anziane s'arrecordino e quanno 'na vota se truarino c'a prucessione dind'o Nucellito, quanno ancora ce steva sulo 'na masseria cu' ddoje famiglie, prima dd'e palazzi. A'ndrasatta puozze venì 'no temporale e chella ggente tanto dd'o buon cuore, 'nce dettero riparo sott'a 'na stalla co'e vvacche. Scene ca manco ddind'e film, ma che ggente semplice, chille dd'e Curticelle.
'Nce steva nu tiempo ca l' l'uommene s'accirevino ancora chiù assaje e mò pe' mette a Santu Stefeno esposto, talmente ca jera avaveto o' nicchio e pesante o' santo. Ma a devozione e chilli cristiani 'nce reva 'a forza ca 'nce serveva.
'Nce steva nu tiempo ca tenemmero ch'ella Maronna dd'a 'Mmaculata... quant'jera doce e bella. 'O sabbato dd'a festa, 'e ffemmene anziane s'accocchiavino e se purtavino appriesso 'e guagliotte cchiù giovani pe l'e'mparà a cagnà a Maronna co' a veste dd'a festa, chella chiù bella. "Sciò, sciò, sulo e' femmene ponno varè a Maronna senza vestito, l'uommene anna jescì!"- si pe'ccasione se n'avesse truvato uno pe' ddind'a chiesa ind'a chillu momento accussì privato. E tira dd'a ccà e votta dd'a là, si s'aveva rispettata 'a tradizione 'a veste careva bbona nguoll'a Maronna. Ma si s'evino miso n'accordo dd'o cagnà' o viernaddì... e che vuò vuttà. 'Na vota accussì facettero -s'arricorda Carmela- ma acconza e acconza, a nu cierto punto 'a bbonanema e Gelardina dd'o Nucellito se guardava cu Giuannina e a signora Lena, e dicettero a'vvicino 'e gguagliotte " 'nce ne putimmo ij chistu servizio l'amma fà ddimane assera.".
'E gguagliotte s'anno 'mparato, mò so grosse e 'o putessero fa loro. Ma chella Maronna nosta, nun ce sta cchiù.
'Nce steva nu tiempo ca prima dd'a prucessione, Giusuppina 'a Presidente arrivava dind'a chiesa cu 'na mappatella rossa sott'o brazzo. Cumme s'a teneva astrenta e accorta. E ccerto, steva portanno a fascia r'oro 'e Santu Stefeno. Subbito piglia, a stenne bbona bbona e c'a lega mmano a Santu Stefeno. Chello ca veco ij' ind'a chill'oro è poca quantità ma assaje devozione da chilli cristiani ca 'nce l'enno dato levannose nu piezzo importante.
'Nce steva nu tiempo ca chella prucessione durava quase cinque ore. V'arricurdate? Pe vasci'o Faravelo, dind'a tutt'e massarije. Abbasce 'a fabbrica' e Rinaldi, se torna arreto. Trase dind'e tterre pe ascì ind'o Nucellito. Da llà saglieva pe' coppe 'o Puzzillo, dind'o Macchione, pe' coppe 'e Bbrutte. Ij ancora nunn'ero nato ma dice a' nonna mia ca n'anno addirittura puozzeno arrivà sott'o ponte ra Via Nova prima dd'e curve 'e Catavato. E po' ancora ngopp'e Laviano e pe' 'mmiezzo 'e Curticelle. Quanta ggente 'nce steva dind'a prucessione, quanti devoti appriesso a chillu Santu Stefeno nuosto: da Sanzeverino, Lancuse, Penta, Barunisse.
'Nce steva' nu tiempo ca 'o paese cu quatto sordi s'apparava' a festa. Frasche 'e luminarie dd'a copp'e Laviano e abbasce a' chiesa. Pe' mmiezz'o paese, na galleria 'e archi. E quant'era bello quanne Santu Stefeno passava pe' 'lloco sotto, 'nce steva n'aria 'e festa o'vera. 'E portaturi, povere aneme, pure si stanchi e strutti pe' 'o peso e chillu bello patrono nuosto, resistevano e tenevino ancora 'a forza pe' 'o fa abballà, cu ch'ella fascia mmano ca jeva dda ccà e dda llà.
'Nce steva nu tiempo, ca quanne Santu Stefeno traseva dind'a chiesa e 'a festa ferneva, 'o stommaco s'astregneva pecchè 'a staggione jera quase fernuta e tanta facce tornate pe' 'a festa, dind'a cocche juorno se n'avessero juto dd'a o' paesiello loro, tra lacrime e abbrazze.
'Nce steva nu tiempo ca Santu Stefeno s' aspettava n'anno sano, e chella gente tanto luntana se organizzava pe' 'ttiempo e s'addummannava sempe "nè, ma a'uanno 'a festa che juorno cade?".
Chistu tiempo 'nc'è stato ma ce sta ancora oggi pe dimostrà quanto 'nce tenimmo pe' 'o patrono nuosto. Ve r'accummanno, si chesti parole t'enno tuccato 'o core... Nun mancà a'uanno. Domenica 3 agosto, Santu Stefeno c'aspetta tutti quanti attuorn'a isso.
'Nce verimm' ambresso,
Matteo.
