មន្ទីរសុខាភិបាលនៃរដ្ឋបាលខេត្តបាត់ដំបង Battambang APHD

16/09/2026

📊 ចូលរួមការវាយតម្លៃបញ្ចប់គម្រោងចំនួន ២ របស់មូលនិធិ KOFIH🇰🇷🇰🇭

📅 ថ្ងៃទី១៦ ខែកញ្ញា ឆ្នាំ២០២៦
📍 បន្ទប់ប្រជុំ EOC មន្ទីរសុខាភិបាលនៃរដ្ឋបាលខេត្តបាត់ដំបង

មន្ទីរសុខាភិបាលនៃរដ្ឋបាលខេត្តបាត់ដំបង បានចូលរួម ឆ្លើយកម្រងសំណួរ និងផ្តល់មតិយោបល់ក្នុងការវាយតម្លៃបញ្ចប់គម្រោង (Endline Evaluation) ចំនួន ២ របស់មូលនិធិ KOFIH រួមមាន គម្រោងពង្រឹងសមត្ថភាពការបង្ការ និងឆ្លើយតបជំងឺឆ្លង (SCDC) និង គម្រោងបង្ការ និងគ្រប់គ្រងជំងឺមិនឆ្លង (NCD)។

ការវាយតម្លៃនេះមានសារៈសំខាន់ក្នុងការពិនិត្យ ភាពពាក់ព័ន្ធ ប្រសិទ្ធភាព ប្រសិទ្ធផល ផលប៉ះពាល់ និងនិរន្តរភាព នៃការអនុវត្តគម្រោង ព្រមទាំងប្រមូលបទពិសោធ បញ្ហាប្រឈម និងមតិយោបល់ពីមន្ត្រីសុខាភិបាល ដើម្បីជាមូលដ្ឋានសម្រាប់ ការកែលម្អ ការធានានិរន្តរភាពនៃសមិទ្ធផល និងការរៀបចំទិសដៅកិច្ចសហប្រតិបត្តិការនាពេលអនាគត។

🙏 មន្ទីរសុខាភិបាលនៃរដ្ឋបាលខេត្តបាត់ដំបង សូមថ្លែងអំណរគុណដល់ មូលនិធិ KOFIH និងដៃគូពាក់ព័ន្ធ ដែលបានរួមចំណែកពង្រឹងសមត្ថភាពប្រព័ន្ធសុខាភិបាល និងលើកកម្ពស់គុណភាពសេវាសុខាភិបាលជូនប្រជាពលរដ្ឋក្នុងខេត្តបាត់ដំបង។

🏥 អ្នកជំងឺជាស្នូល សេវាជាបេះដូង គុណភាពជាកិត្តិយ

16/09/2026

🤝🏥 កិច្ចប្រជុំក្រុមការងារបច្ចេកទេសសុខាភិបាលខេត្តបាត់ដំបង (Pro-TWGH) ប្រចាំខែកញ្ញា ឆ្នាំ២០២៦🌹🇰🇭🎯
—— ១៦ កញ្ញា ២០២៦ ——

✍️ នៅរសៀលថ្ងៃទី១៦ ខែកញ្ញា ឆ្នាំ២០២៦ វេលាម៉ោង ១៤:០០ នៅបន្ទប់ប្រជុំ «ក» មន្ទីរសុខាភិបាលនៃរដ្ឋបាលខេត្តបាត់ដំបង លោកឱសថបណ្ឌិត វឿង ប៊ុនរេត ប្រធានមន្ទីរសុខាភិបាលនៃរដ្ឋបាលខេត្តបាត់ដំបង និងជាប្រធានក្រុមការងារ Pro-TWGH បានដឹកនាំកិច្ចប្រជុំប្រចាំខែកញ្ញា ដោយមានការចូលរួមពីថ្នាក់ដឹកនាំមន្ទីរ ការិយាល័យអមមន្ទីរ មន្ទីរពេទ្យបង្អែកខេត្ត ស្រុកប្រតិបត្តិ ប្រធានផ្នែក មន្ត្រីសុខាភិបាលពាក់ព័ន្ធ និងតំណាងអង្គការដៃគូអភិវឌ្ឍន៍ សរុបចំនួន ៣៩រូប។

📊 កិច្ចប្រជុំបានបង្ហាញ ពិភាក្សា និងចែករំលែកលើខ្លឹមសារសំខាន់ៗ រួមមាន៖

1. លទ្ធផលការងារផ្តល់សេវាសុខាភិបាលឆ្នាំ២០២៥ របស់ការិយាល័យសុខាភិបាលស្រុកប្រតិបត្តិសង្កែ ដោយលោក ទន់ សំណាង ប្រធាន HIS-OD។
2. លទ្ធផលអនុវត្តកម្មវិធីរយៈពេល ៨ខែ ឆ្នាំ២០២៦ របស់អង្គការ Good Neighbors Cambodia (GNC) ដោយលោក សេង សារិន មន្ត្រីគម្រោង។
3. ការចែករំលែកចំណេះដឹង និងការអនុវត្ត SWOT Analysis ក្នុងការវិភាគស្ថានភាព កំណត់បញ្ហាប្រឈម និងរៀបចំទិសដៅកែលម្អការងារ ដោយលោកប្រធានមន្ទីរ។
4. ការចែករំលែកព័ត៌មានខ្លីៗពីអង្គការដៃគូ រួមមាន HelpAge Cambodia (HAC) និង CHC។

🎯 ក្នុងឱកាសនោះ លោកប្រធានមន្ទីរ បានជំរុញឱ្យគ្រប់អង្គភាពបន្តប្រើប្រាស់ ការណ៍ពិត និងទិន្នន័យ ក្នុងការវិភាគបញ្ហា និងសម្រេចចិត្ត ពង្រឹងគុណភាព និងសុវត្ថិភាពសេវា ព្រមទាំងបង្កើនការសម្របសម្រួលរវាងមន្ទីរ ស្រុកប្រតិបត្តិ មន្ទីរពេទ្យ មណ្ឌលសុខភាព សហគមន៍ និងអង្គការដៃគូ ដោយផ្តោតលើ លទ្ធផលជាក់ស្តែងដែលប្រជាពលរដ្ឋទទួលបាន។

🤝 លោកប្រធានមន្ទីរ ក៏បានលើកទឹកចិត្តឱ្យ Pro-TWGH បន្តជាវេទិកា ចែករំលែកព័ត៌មាន ប្រើប្រាស់ទិន្នន័យ ស្វែងរកបញ្ហា សម្របសម្រួលធនធាន និងរួមគ្នាដោះស្រាយបញ្ហា ដើម្បីពង្រឹងប្រព័ន្ធសុខាភិបាលខេត្តឱ្យកាន់តែមានប្រសិទ្ធភាព និងចីរភាព។

❤️ មន្ទីរសុខាភិបាលនៃរដ្ឋបាលខេត្តបាត់ដំបង សូមថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ មន្ត្រីសុខាភិបាល និងអង្គការដៃគូទាំងអស់ ដែលបានចូលរួមយ៉ាងសកម្ម និងបន្តរួមដំណើរក្នុងបេសកកម្មតែមួយ គឺ លើកកម្ពស់សុខភាព និងសុខុមាលភាពប្រជាពលរដ្ឋខេត្តបាត់ដំបង។

🕟 កិច្ចប្រជុំបានបញ្ចប់នៅវេលាម៉ោង ១៦:៣០ ក្នុងបរិយាកាសសាមគ្គីភាព និងកិច្ចសហប្រតិបត្តិការល្អ។ កិច្ចប្រជុំ Pro-TWGH លើកបន្ទាប់ គ្រោងប្រព្រឹត្តទៅនៅថ្ងៃទី ១៤ ខែតុលា ឆ្នាំ២០២៦។

🏥 «អ្នកជំងឺជាស្នូល សេវាជាបេះដូង គុណភាពជាកិត្តិយស»

16/09/2026

🏥📋 កិច្ចប្រជុំប្រចាំខែកញ្ញា ឆ្នាំ២០២៦ | ពិនិត្យវឌ្ឍនភាព • ដោះស្រាយបញ្ហា • កំណត់ទិសដៅបន្ត🇰🇭❤️️🎯
—— ១៦ កញ្ញា ២០២៦ | ម៉ោង ៨:០០ ព្រឹក ——

✍️ មន្ទីរសុខាភិបាលនៃរដ្ឋបាលខេត្តបាត់ដំបង បានរៀបចំ កិច្ចប្រជុំប្រចាំខែកញ្ញា ឆ្នាំ២០២៦ នៅសាលប្រជុំ «ក» ដោយមានការចូលរួមពីថ្នាក់ដឹកនាំមន្ទីរ ការិយាល័យអមមន្ទីរ មន្ទីរពេទ្យបង្អែកខេត្ត ការិយាល័យសុខាភិបាលស្រុកប្រតិបត្តិទាំង៥ ប្រធានផ្នែក ប្រធានកម្មវិធី និងមន្ត្រីពាក់ព័ន្ធ។

📊 កិច្ចប្រជុំផ្តោតលើការពិនិត្យ វឌ្ឍនភាព និងលទ្ធផលការងារ ការអនុវត្តអនុសាសន៍កន្លងមក គុណភាពនិងសុវត្ថិភាពសេវា កម្មវិធីសុខភាពអាទិភាព ការងារ PHC និងសហគមន៍ ធនធានមនុស្ស ហេដ្ឋារចនាសម្ព័ន្ធ និងកិច្ចសហប្រតិបត្តិការជាមួយដៃគូ ព្រមទាំងពិភាក្សាបញ្ហាប្រឈម និងកំណត់វិធានការអនុវត្តបន្ត។

💡 ជាមួយគ្នានេះ អង្គប្រជុំបានចែករំលែកការយល់ដឹងក្រោមប្រធានបទ៖
«ពីសកម្មភាព ទៅលទ្ធផល៖ ការកសាងវប្បធម៌គុណភាពក្នុងប្រព័ន្ធសុខាភិបាល» ដោយជំរុញឱ្យគ្រប់អង្គភាពផ្លាស់ពីការរាយការណ៍ថា «បានធ្វើ» ទៅ «បានលទ្ធផល» និងបន្តកែលម្អគុណភាពជាប្រចាំ។

🤝 រួមគិត • រួមធ្វើ • រួមទទួលខុសត្រូវ ដើម្បីលទ្ធផល និងគុណភាពសេវាកាន់តែប្រសើរ។

🏥 «អ្នកជំងឺជាស្នូល • សេវាជាបេះដូង • គុណភាពជាកិត្តិយស»

16/09/2026

🏥 សកម្មភាពស្រាវជ្រាវរកករណីជំងឺរបេងសកម្មតាមសហគមន៍ (Mobile Active Case Finding)

✍️ មន្ទីរសុខាភិបាលនៃរដ្ឋបាលខេត្តបាត់ដំបង បន្តជំរុញការស្រាវជ្រាវរកករណីជំងឺរបេងសកម្មតាមសហគមន៍ ក្រោមកិច្ចសហការរវាង កម្មវិធីរបេង និងហង់សិនខេត្ត ស្រុកប្រតិបត្តិបាត់ដំបង និងស្រុកប្រតិបត្តិមោងឫស្សី ជាមួយអង្គការ CATA ព្រមទាំងក្រុមការងារកម្មវិធីរបេង មណ្ឌលសុខភាព និងអ្នកអនុវត្តការងាររបេងតាមសហគមន៍។

🫁 សកម្មភាពនេះផ្តោតលើការចុះស្រាវជ្រាវរកអ្នកសង្ស័យជំងឺរបេងឱ្យបានឆាប់ បង្កើនការទទួលបានសេវាពិនិត្យ និងធ្វើរោគវិនិច្ឆ័យ ជំរុញការព្យាបាលទាន់ពេលវេលា និងកាត់បន្ថយការចម្លងជំងឺរបេងនៅក្នុងសហគមន៍។

🙏 មន្ទីរសុខាភិបាល សូមថ្លែងអំណរគុណដល់អង្គការ CATA និងដៃគូពាក់ព័ន្ធទាំងអស់ ដែលបានសហការ និងគាំទ្រការអនុវត្តសកម្មភាពនេះ ដើម្បីរួមចំណែកឈានទៅរកគោលដៅ បញ្ចប់ជំងឺរបេង (End TB) និងលើកកម្ពស់សុខុមាលភាពប្រជាពលរដ្ឋខេត្តបាត់ដំបង។

🏥 អ្នកជំងឺជាស្នូល សេវាជាបេះដូង គុណភាពជាកិត្តិយស

16/09/2026

🏥 ទទួលម៉ាស៊ីនបាញ់ថ្នាំកម្ចាត់មូសពីអង្គការ CRS❤️️🇰🇭
—— ១៥ កញ្ញា ២០២៦ ——

✍️ មន្ទីរសុខាភិបាលនៃរដ្ឋបាលខេត្តបាត់ដំបង បានទទួល ម៉ាស៊ីនបាញ់ថ្នាំកម្ចាត់មូស ពីអង្គការ CRS ដើម្បីពង្រឹងសមត្ថភាពឆ្លើយតប និងគាំទ្រសកម្មភាពបង្ការ និងគ្រប់គ្រងជំងឺឆ្លងតាមមូស ជាពិសេសជំងឺគ្រុនឈាម នៅតាមតំបន់ដែលមានហានិភ័យ។

🙏 មន្ទីរសុខាភិបាល សូមថ្លែងអំណរគុណយ៉ាងជ្រាលជ្រៅដល់អង្គការ CRS ដែលបានបន្តសហការ និងគាំទ្រវិស័យសុខាភិបាលខេត្តបាត់ដំបង។ សម្ភារៈនេះនឹងត្រូវប្រើប្រាស់ឱ្យបានត្រឹមត្រូវ មានប្រសិទ្ធភាព និងចំគោលដៅ ដើម្បីរួមចំណែកការពារសុខភាព និងសុខុមាលភាពប្រជាពលរដ្ឋ។

🤝 ភាពជាដៃគូរឹងមាំ—ដើម្បីសហគមន៍មានសុខភាពល្អ។

🏥 «អ្នកជំងឺជាស្នូល សេវាជាបេះដូង គុណភាពជាកិត្តិយស»

16/09/2026

🦟🤝 អប់រំសុខភាពដល់សហគមន៍ ដើម្បីរួមគ្នាបង្ការ និងទប់ស្កាត់ជំងឺគ្រុនឈាម❤️️🇰🇭
—— ១៤ កញ្ញា ២០២៦ | ភូមិក្បាលថ្នល់ ——

✍️ មន្ទីរសុខាភិបាលនៃរដ្ឋបាលខេត្តបាត់ដំបង សហការជាមួយ ការិយាល័យសុខាភិបាលស្រុកប្រតិបត្តិសង្កែ មណ្ឌលសុខភាពកំពង់ព្រៀង អាជ្ញាធរ និងសមាជិកភូមិក្បាលថ្នល់ ព្រមទាំងក្រុមទ្រទ្រង់សុខភាពភូមិ បានរៀបចំសកម្មភាពអប់រំសុខភាពជូនប្រជាពលរដ្ឋ នៅ ភូមិក្បាលថ្នល់ ឃុំកំពង់ព្រៀង ខេត្តបាត់ដំបង។

👥 ប្រជាពលរដ្ឋចូលរួមសរុប ៣០នាក់ ក្នុងនោះស្រី២៣នាក់ ដោយផ្តោតលើការបង្កើនការយល់ដឹងអំពី ការបង្ការ និងទប់ស្កាត់ជំងឺគ្រុនឈាម ការសម្គាល់សញ្ញាគ្រោះថ្នាក់ និងការទៅទទួលសេវាសុខាភិបាលឱ្យបានទាន់ពេលវេលា។

🦟 ជាពិសេស ក្រុមការងារបានជំរុញឱ្យគ្រប់គ្រួសារចូលរួមអនុវត្តវិធានការ «៣កុំ ៣បំបាត់» សម្អាតបរិស្ថាន និងលុបបំបាត់វត្ថុដក់ទឹកដែលជាជម្រកបង្កាត់ពូជមូសខ្លា។

❤️ ការអប់រំសុខភាពមួយលើក អាចបង្កើតការយល់ដឹងមួយគ្រួសារ ហើយការចូលរួមរបស់គ្រប់គ្រួសារ អាចការពារសុខភាពសហគមន៍ទាំងមូល។

📣 «បំបាត់ជម្រកមូសខ្លាថ្ងៃនេះ ការពារកូនៗ និងក្រុមគ្រួសារយើងពីជំងឺគ្រុនឈាមនៅថ្ងៃស្អែក»

🏥 «អ្នកជំងឺជាស្នូល សេវាជាបេះដូង គុណភាពជាកិត្តិយស»

#មន្ទីរសុខាភិបាលនៃរដ្ឋបាលខេត្តបាត់ដំបង #ស្រុកប្រតិបត្តិសង្កែ #គ្រុនឈាម #៣កុំ៣បំបាត់ #សុខភាពសហគមន៍

16/09/2026

🏥🎗️ ពង្រឹងសមត្ថភាពក្រុមទ្រទ្រង់សុខភាពភូមិ ដើម្បីជំរុញការពិនិត្យស្រាវជ្រាវរកមេរោគ HPV និងការពារជំងឺមហារីកមាត់ស្បូនក្នុងសហគមន៍
—— ១៥ កញ្ញា ២០២៦ ——

📚 មណ្ឌលសុខភាព ព្រៃតូច នៃស្រុកប្រតិបត្តិ មោងឫស្សី បានរៀបចំវគ្គបណ្ដុះបណ្ដាល និងអប់រំបន្តជូនដល់ ក្រុមទ្រទ្រង់សុខភាពភូមិ (VHSG) ស្តីពីការពិនិត្យស្រាវជ្រាវរកមេរោគ HPV ការណែនាំអំពី HPV Self-Sampling និងការបង្ការជំងឺមហារីកមាត់ស្បូន។

🎯 វគ្គនេះមានគោលបំណងពង្រឹងចំណេះដឹង និងសមត្ថភាពរបស់ VHSG ក្នុងការអប់រំ ផ្សព្វផ្សាយ កំណត់ស្ត្រីគោលដៅ និងជំរុញឱ្យស្ត្រីក្នុងសហគមន៍មកទទួលសេវាពិនិត្យស្រាវជ្រាវបានទាន់ពេលវេលា។

🌿 ក្រុមទ្រទ្រង់សុខភាពភូមិ គឺជាស្ពានភ្ជាប់ដ៏សំខាន់រវាងមណ្ឌលសុខភាព និងប្រជាពលរដ្ឋ។ ការផ្តល់ចំណេះដឹងត្រឹមត្រូវដល់ពួកគាត់ គឺជាកម្លាំងសំខាន់ក្នុងការនាំសារសុខភាពទៅដល់ស្ត្រីគ្រប់រូបក្នុងសហគមន៍។

🌸 ចំណេះដឹងថ្ងៃនេះ គឺជាកម្លាំងសម្រាប់ការការពារសុខភាពស្ត្រីនៅថ្ងៃស្អែក។

🤝 រួមគ្នាលើកកម្ពស់ការយល់ដឹងអំពីមេរោគ HPV ជំរុញការពិនិត្យឱ្យបានឆាប់ និងការពារជំងឺមហារីកមាត់ស្បូន ដើម្បីសុខភាពស្ត្រី គ្រួសារ និងសហគមន៍ទាំងមូល។

🏥 អ្នកជំងឺជាស្នូល សេវាជាបេះដូង គុណភាពជាកិត្តិយស

16/09/2026

15/09/2026

🏥🤱👨‍👩‍👧‍👦 វគ្គម្តាយ/មាតាបិតា — ពង្រឹងចំណេះដឹង ថែទាំផ្លូវកាយ និងផ្លូវចិត្ត ដើម្បីសុខភាពមាតា ទារក និងកុមារ
—— ១៤ កញ្ញា ២០២៦ | មណ្ឌលសុខភាពត្រាវជូរ (ភូមិអូរថ្ម) ——

✍️ មន្ទីរសុខាភិបាលនៃរដ្ឋបាលខេត្តបាត់ដំបង សហការជាមួយ RACHA បានគាំទ្រការរៀបចំ «វគ្គម្តាយ/មាតាបិតា ដើម្បីលើកកម្ពស់សុខភាពមាតា ទារក និងកុមារនៅសហគមន៍» នៅមណ្ឌលសុខភាពត្រាវជូរ ដោយមានការចូលរួមពីម្តាយមានផ្ទៃពោះ ម្តាយក្រោយសម្រាល ឪពុក/អ្នកថែទាំ ក្រុមទ្រទ្រង់សុខភាពភូមិ (VHSG) និងមន្ត្រីសុខាភិបាល។ ក្រុមគោលដៅម្តាយ/មាតាបិតាចូលរួមសរុប ២២នាក់ ក្នុងនោះស្ត្រី ២១នាក់។

🌿 វគ្គនេះមិនត្រឹមតែផ្តល់ចំណេះដឹងសុខភាពប៉ុណ្ណោះទេ ប៉ុន្តែបង្កើត កន្លែងសុវត្ថិភាពសម្រាប់ការស្តាប់ ការចែករំលែក និងការគាំទ្រគ្នា ដើម្បីជួយម្តាយ និងគ្រួសារយល់ពីអារម្មណ៍របស់ខ្លួន កាត់បន្ថយភាពតានតឹង ស្គាល់ផលប៉ះពាល់នៃស្ត្រេសលើសុខភាព និងមានទំនុកចិត្តក្នុងការស្វែងរកជំនួយនៅពេលចាំបាច់។

🤱 ការរៀនសូត្របានភ្ជាប់ទាំង សុខភាពផ្លូវចិត្ត ការបំបៅកូនដោយទឹកដោះម្តាយ ការប៉ះស្បែកមាតា-ទារក (Skin-to-Skin Contact) និងការបង្ការជំងឺគ្រុនឈាម ដែលជាប្រធានបទជាក់ស្តែងសម្រាប់ជីវិតប្រចាំថ្ងៃរបស់មាតា ទារក កុមារ និងគ្រួសារ។

👨‍👩‍👧‍👦 ជាពិសេស សុខភាពមាតា និងកុមារ មិនមែនជាការទទួលខុសត្រូវរបស់ម្តាយតែម្នាក់ឯងទេ។ ការចូលរួមរបស់ឪពុក អ្នកថែទាំ គ្រួសារ VHSG និងមន្ត្រីសុខាភិបាល ជួយបង្កើតបរិយាកាសដែលមាតាទទួលបានការយល់ចិត្ត ការគាំទ្រ និងអាចអនុវត្តការថែទាំទារក និងកុមារបានកាន់តែប្រសើរ។

💡 ការលើកកម្ពស់សុខភាពនៅសហគមន៍មានប្រសិទ្ធភាព នៅពេលប្រជាពលរដ្ឋមិនត្រឹមតែ «ទទួលព័ត៌មាន» ប៉ុណ្ណោះទេ ប៉ុន្តែបាន សួរ ចែករំលែក យល់ និងយកចំណេះដឹងទៅអនុវត្តក្នុងគ្រួសារ។ នេះជាការប្រែក្លាយការអប់រំសុខភាពទៅជាឥរិយាបថសុខភាពល្អ និងការថែទាំដែលមានចីរភាព។

🤝 មន្ទីរសុខាភិបាលនៃរដ្ឋបាលខេត្តបាត់ដំបង សូមថ្លែងអំណរគុណដល់ RACHA មណ្ឌលសុខភាពត្រាវជូរ ក្រុមទ្រទ្រង់សុខភាពភូមិ មន្ត្រីសុខាភិបាល និងមាតាបិតា/អ្នកថែទាំទាំងអស់ ដែលបានចូលរួម និងរួមគ្នាកសាងសហគមន៍ដែលយល់ដឹង គាំទ្រគ្នា និងយកចិត្តទុកដាក់ចំពោះសុខភាពមាតា ទារក និងកុមារ។

🌱 «មាតាមានសុខភាពល្អ ទារកទទួលបានការថែទាំល្អ គ្រួសារមានការគាំទ្រល្អ — គឺជាមូលដ្ឋាននៃកុមារដែលមានសុខភាពល្អ និងសហគមន៍ដែលរឹងមាំ។»

🏥 អ្នកជំងឺជាស្នូល សេវាជាបេះដូង គុណភាពជាកិត្តិយស

15/09/2026

🏥🤝🌿 នាំសេវាសុខភាពទៅកាន់សហគមន៍ — មិនទុកឱ្យម្តាយ ទារក និងកុមារណាម្នាក់នៅក្រៅការថែទាំ
—— ០៨–១២ កញ្ញា ២០២៦ ——

✍️ ក្រោមកិច្ចសហការរវាង មន្ទីរសុខាភិបាលនៃរដ្ឋបាលខេត្តបាត់ដំបង ការិយាល័យសុខាភិបាលស្រុកប្រតិបត្តិសង្កែ និងគម្រោង UNICEF–RACHA ស្តីពីការសង្គ្រោះជីវិត សុខភាព និងអាហារូបត្ថម្ភសម្រាប់មាតា ទារក និងកុមារ (MNCH-N Project) ក្រុមការងារបានចុះផ្តល់សេវាសុខភាពសមាហរណកម្មដល់សហគមន៍នៅតំបន់ពិបាកទៅដល់ និងប្រជាពលរដ្ឋដែលមានការលំបាកក្នុងការមកទទួលសេវា (Integrated Community Health Outreach to Hard-to-Reach Villages and Underserved Communities) នៅ ភូមិព្រៃចាស់ និងភូមិបាក់ព្រា នៃមណ្ឌលសុខភាពព្រៃចាស់ ចាប់ពីថ្ងៃទី០៨ ដល់ថ្ងៃទី១២ ខែកញ្ញា ឆ្នាំ២០២៦។

👩‍👧‍👦 សកម្មភាពសំខាន់ៗរួមមាន ការស្រាវជ្រាវរកកុមារដែលមានកង្វះអាហារូបត្ថម្ភ ការផ្តល់ថ្នាំបង្ការ ការផ្តល់ថ្នាំទម្លាក់ព្រូន ការពិនិត្យផ្ទៃពោះជូនស្ត្រីមានផ្ទៃពោះ និងការអប់រំសុខភាព ដើម្បីរកឃើញបញ្ហាឱ្យបានឆាប់ ផ្តល់អន្តរាគមន៍ទាន់ពេល និងភ្ជាប់អ្នកដែលត្រូវការការថែទាំបន្ថែមទៅកាន់មូលដ្ឋានសុខាភិបាល។

🌱 ការចុះផ្តល់សេវាដល់សហគមន៍ មិនមែនគ្រាន់តែជាការយកសេវាចេញពីមណ្ឌលសុខភាពទៅភូមិនោះទេ ប៉ុន្តែជាការអនុវត្តគោលការណ៍ សមធម៌សុខភាព និងការថែទាំសុខភាពបឋម (Primary Health Care) ឱ្យក្លាយជាការណ៍ពិត៖ ប្រជាពលរដ្ឋដែលរស់នៅឆ្ងាយ ពិបាកធ្វើដំណើរ ឬមានឧបសគ្គក្នុងការមករកសេវា ក៏ត្រូវមានឱកាសទទួលបានសេវាសុខភាពចាំបាច់ដូចគ្នា។

🎯 ជាពិសេស ការស្រាវជ្រាវរកកុមារកង្វះអាហារូបត្ថម្ភនៅសហគមន៍ មានសារៈសំខាន់ក្នុងការរកឃើញកុមារដែលមានហានិភ័យឱ្យបានមុនពេលស្ថានភាពធ្ងន់ធ្ងរ ដើម្បីអាចផ្តល់ការប្រឹក្សា អន្តរាគមន៍ តាមដាន និងបញ្ជូនបានសមស្រប។ ទន្ទឹមនឹងនេះ ការផ្តល់សេវាជាច្រើនក្នុងពេលតែមួយ ជួយបង្កើនឱកាសឱ្យគ្រួសារទទួលបានការថែទាំកាន់តែគ្រប់ជ្រុងជ្រោយ។

🤝 សកម្មភាពនេះក៏បង្ហាញពីសារៈសំខាន់នៃការភ្ជាប់ សហគមន៍ → មណ្ឌលសុខភាព → ស្រុកប្រតិបត្តិ → មន្ទីរសុខាភិបាល និងដៃគូអភិវឌ្ឍន៍ ដើម្បីធានាថា ការរកឃើញបញ្ហានៅសហគមន៍ ត្រូវបន្តដោយការតាមដាន និងការថែទាំ មិនមែនបញ្ចប់នៅថ្ងៃចុះ Outreach នោះទេ។

💚 សេវាសុខភាពដែលមានសមធម៌ មិនមែនរង់ចាំឱ្យប្រជាពលរដ្ឋគ្រប់រូបអាចមករកយើងបានទេ។ នៅពេលមានឧបសគ្គ យើងត្រូវខិតខំនាំសេវាទៅរកពួកគាត់ ដើម្បីឱ្យមាតា ទារក និងកុមារគ្រប់រូប មានឱកាសទទួលបានការថែទាំដែលពួកគាត់ត្រូវការ។

🙏 មន្ទីរសុខាភិបាលនៃរដ្ឋបាលខេត្តបាត់ដំបង សូមថ្លែងអំណរគុណដល់ UNICEF–RACHA ការិយាល័យសុខាភិបាលស្រុកប្រតិបត្តិសង្កែ មណ្ឌលសុខភាពព្រៃចាស់ ក្រុមការងារសុខាភិបាល និងសហគមន៍ ដែលបានចូលរួមសហការ និងគាំទ្រសកម្មភាពនេះ ដើម្បីលើកកម្ពស់សុខភាព និងអាហារូបត្ថម្ភមាតា ទារក និងកុមារ។

🏥 អ្នកជំងឺជាស្នូល សេវាជាបេះដូង គុណភាពជាកិត្តិយស