Kvennasögusafn Íslands

04/09/2026

Nú er skólastarf komið aftur í gang og kærkomin rútína að taka á sig mynd. Eitt af uppáhalds gögnunum okkar eru skólaspjöld húsmæðraskóla. Minningar af slíku skólastarfi og gögn sem tengjast því eru kærkomnar til varðveislu á Kvennasögusafni.

Skólaspjald úr fórum Arnheiðar Sigurðardóttur (1921–2001), þýðanda. Tilvísun: KSS 2022/15.

28/08/2026

Svona var kosningaherferðin þegar konur buðu sig fram í bæjarstjórnarkosningum í fyrsta sinn. Það var árið 1908.

Á kjörskrá voru 2.838 en bæjarbúar voru alls 11.016. Konur á kjörskrá voru 1.209 og karlar 1.629. Atkvæðisréttar neyttu 593 konur (49%) og 1.027 karlar (63%) eða 57% kjósenda og hafði þátttakan aldrei verið meiri.

Af 18 listum í framboði var það listi kvenfélaganna sem fékk langflest atkvæðin, eða 345 að tölu og voru það 21,8% greiddra atkvæða.

30/06/2026

Kvennasögusafn er lokað vegna sumarfrís frá miðvikudeginum 1. júlí og fram yfir verslunarmannahelgi. Hafið það gott í sumar!

Á heimasíðu okkar má sjá yfirlit yfir stafrænan safnkost okkar sem er auðvitað ávallt aðgengilegur (hlekkur í athugasemd).

//

Kvennasogusafn will be closed from 1 July until Agust 4th. Happy summer!

---
Ljósmynd úr safni Halldóru Valgerðar Steinsdóttur (f. 1939), dagmóður. Tilvísun: KSS 2021/12, ljósmynd 15.

29/06/2026

Við þökkum Bændablaðinu fyrir heimsóknina og höfum þegar heyrt af dagbókum kvenbónda sem afkomendur vilja koma fyrir á safni til varanlegrar varðveislu!

„Rakel hvetur fólk til að koma með þessi gögn á Kvennasögusafnið eða fara með þau á héraðsskjalasöfnin frekar en að henda gersemum í ruslið. „Það er misskilningur að fólk þurfi að vera frægt til að það sé þess virði að varðveita bréf og dagbækur þeirra. Það er alls ekki þannig, það er mikilvægt að fá sem fjölbreyttasta flóru af fólki til að endurspegla samfélagið.“ Ef lesendur telja sig eiga gögn sem gætu átt heima á Kvennasögusafninu er hægt að hafa samband á kvennasogusafn[hjá]landsbokasafn.is.“

Kvennasögusafn Íslands kallar eftir skjalasöfnum bóndakvenna.

Hlekkur hér að neðan.

19/06/2026

Til hamingju með kvenréttindadaginn!

Þann 19. júní 1915 fengu konur kosningarétt og kjörgengi til Alþingis með séraldursákvæði og hafði Bríet Bjarnhéðinsdóttir þetta að segja um það:
„En það allra furðulegasta í þessu máli er það, að allir flokkarnir hafa tekið upp hinn nafnfræga íslenzka, stjórnvizkulega búhnykk, að veita ekki konum fullan kosningarrétt, heldur smá skamta þeim hann úr hnefa i 15 ár.“

Árið 1920 unnu konur loks fullnaðarsig­ur þegar ný stjórn­ar­skrá vegna sam­bands­lag­anna frá 1918 gekk í gildi og veitti kon­um fullt og skil­yrðis­laust jafn­rétti á við karla um kosn­inga­rétt og kjörgengi til Alþing­is.

Það var svo tveimr árum síðar, 1922, að konur buðum fram sérlista í Alþingiskosningum og skipuðu hann forstöðukona kvennaskóla, riststjóri kvennablaðs, kennslukona og skáld. Náði efsta konan á listanum, Ingibjörg H. Bjarnason, kjöri og varð því fyrst kvenna til að taka sæti á Alþingi í febrúar 1923.

17/06/2026

Til hamingju með daginn!

Ljósmynd úr safni Sigríðar Árnadóttur kennara (1907–1998). Tilvísun: KSS 2025/18, ljósmynd 52.

12/06/2026

Nú viðrar vel til lautarferða. Góða helgi!

Þorbjörg Árnadóttir hjúkrunarkona og rithöfundur (í forgrunni lengst til hægri) í lautarferð ásamt fjölskyldu sinni árið 1947. Tilvísun ljósmyndar: KSS 74, ljósmynd 126.

10/05/2026

Til hamingju Hólmfríður og Una með sýninguna ykkar á Hönnunarmars um grafíska hönnun Rauðsokka í tímaritinu Forvitin rauð.

Það er alltaf jafn gefandi að sjá safnkost Kvennasögusafn nýttan á frumlegan og skapandi hátt. Við hlökkum til að sjá hvernig þið þróið rannsóknarverkefnið ykkar áfram!

01/05/2026

Til hamingju með daginn!

---
Ljósmynd úr safni MFÍK (tilvísun: KSS 2018/16). Nánari upplýsingar um myndina fylgdu ekki og eru því vel þegnar.