Félags- og vinnumarkaðsráðuneytið

04/09/2026

Hjartanlega til hamingju Kvennaathvarfið með nýtt og stærra kvennaathvarf!

Húsnæðið var formlega opnað í gær og verður tekið í notkun síðar í þessum mánuði. Meðal gesta við opnunina í gær var Ragnar Þór Ingólfsson, félags- og húsnæðismálaráðherra.

Um 500 konur leita til Kvennaathvarfsins á hverju ári til að fá ráðgjöf og stuðning.

Nýtt og stærra Kvennaathvarf var formlega opnað í dag. Um 500 konur leita til athvarfsins á hverju ári til að fá ráðgjöf og stuðning.

03/09/2026

90 ár af sameiginlegu öryggi: Níutíu ára sögu almannatrygginga á Íslandi verður fagnað með opinni ráðstefnu í Hörpu þann 30. september nk. Árið 1936 tóku lög um alþýðutryggingar gildi og sama ár var Tryggingastofnun ríkisins sett á laggirnar. Þar með var grunnur lagður að því almannatryggingakerfi sem landsmenn búa við í dag. Með tímanum varð Tryggingastofnun ríkisins síðan að Tryggingastofnun, Sjúkratryggingar og Vinnumálastofnun.

Ráðstefnan er öllum opin en skráning er nauðsynleg. Þú finnur skráningarhlekkinn í fréttinni hér að neðan og allar nánari upplýsingar!

16/07/2026

Við auglýsum eftir umsóknum um styrki úr þróunarsjóði innflytjendamála! Umsóknarfrestur er til og með 15. september nk. Félags- og hagsmunasamtök innflytjenda eru sérstaklega hvött til þess að sækja um.

Við úthlutun styrkja úr þróunarsjóði innflytjendamála árið 2026 verður áhersla lögð á verkefni sem:

✅Stuðla að virkri notkun íslensku í daglegu lífi, bæði í starfi og frítíma, og skapa þannig tækifæri til að læra og nota íslensku og stuðla að því að íslenska sé eðlilegt fyrsta val í samskiptum. Áhersla verður lögð á verkefni sem byggja á raunverulegum aðstæðum, sérstaklega fyrir ungmenni á aldrinum 16-25 ára og fullorðna.

✅Styðja ungt fólk sem er nýkomið til landsins og foreldra framhaldsskólanema úr röðum innflytjenda. Verkefnin hafi það að markmiði að rjúfa félagslega einangrun, efla jákvæð samskipti og styrkja félagsleg tengsl með virkri þátttöku innflytjenda sjálfra, meðal annars með brúarsmiðum ogmiðlun milli menninga.

✅Vinna gegn fordómum, hatursorðræðu og rangfærslum í stafrænu umhverfi meðal annars með fræðslu, forvörnum og hagnýtum verkfærum til að bregðast við mismunun og áreitni á netinu.

Þú finnur allar upplýsingar á frn.is og government.is.

08/07/2026

Félags- og húsnæðismálaráðuneytið og Samband íslenskra sveitarfélaga hafa lagt fram sameiginlega framtíðarsýn og aðgerðaáætlun um stafræn verkefni og gagnamál í félagsþjónustu til ársins 2028.

Framtíðarsýnin og aðgerðaáætlunin byggja á samkomulagi ríkis og sveitarfélaga um öflun og nýtingu gagna og stafræna þróun hins opinbera í velferðarþjónustu. Markmiðið er að allir lykilaðilar sem starfa að félagsþjónustu hafi sameiginlega sýn á grunnskipulag, gögn, gagnasöfn, tengingar og hagnýtingu gagna. Með því er leitast við að tryggja samfellda þjónustu þvert á stjórnsýslustig, betri nýtingu fjármuna og markvissari stefnumótun í þágu notenda þjónustunnar.

Í dag skortir samræmd gögn á landsvísu, kerfi tala ekki nægilega vel saman og yfirsýn yfir veitta félagsþjónustu, þarfir fólks og biðlista er takmörkuð.

Í framtíðarsýninni er meðal annars gert ráð fyrir samræmdri grunnskráningu í allri lögbundinni félagsþjónustu, að upplýsingar um réttindi og þjónustu verði aðgengilegar á einum stað á island.is og að unnið verði að sameiginlegri umsókn og samræmdu umsóknarferli óháð því hvar fólk býr á landinu.

Áhersla er lögð á að bæta aðgengi að gögnum þannig að allir aðilar sem þurfa á þeim að halda til að sinna lögbundnum verkefnum hafi betri yfirsýn og aðgang að samræmdri tölfræði. Jafnframt verði unnið að því að gögn flæði stafrænt milli þjónustuaðila eftir því sem við á, í stað þess að þau séu vistuð á mörgum stöðum.

„Við þurfum traust og samræmd gögn til að geta tekið réttar ákvarðanir og veitt fólki bestu mögulegu þjónustu. Með sameiginlegri framtíðarsýn og aðgerðaáætlun ríkis og sveitarfélaga leggjum við traustan grunn að því að gögn nýtist betur, nauðsynleg yfirsýn náist og félagsþjónusta verði samfelldari. Þannig bætum við þjónustuna og förum um leið skynsamlega með fjármuni,“ segir Ragnar Þór Ingólfsson, félags- og húsnæðismálaráðherra.

„Með þessari sameiginlegu framtíðarsýn erum við að stíga mikilvægt skref í átt að samræmdari og skilvirkari félagsþjónustu um land allt. Betri gögn og sterkari stafrænar lausnir munu auðvelda sveitarfélögum að veita fólki markvissari þjónustu og skapa um leið betri grunn fyrir stefnumótun og ákvarðanatöku,“ segir Jón Björn Hákonarson, formaður Sambands íslenskra sveitarfélaga.

Aðgerðaáætlunin nær til áranna 2026 til 2028 og skiptist í verkefni sem miða að því að ná meginmarkmiðum framtíðarsýnarinnar fyrir lok tímabilsins. Meðal aðgerða í ár eru heildstæð stafræn innleiðing í stuðningsþjónustu, þróun heildstæðs mats á stuðningsþörf, undirbúningur nauðsynlegra lagabreytinga og miðlægt aðgengi að gögnum fyrir yfirsýn og tölfræði.

Aðgerðaáætlunin verður uppfærð í lok hvers árs með nánari upplýsingum um aðgerðir næsta árs og þau verkefni sem heyra þar undir.

06/07/2026

Hvað gerist þegar manneskja veikist, missir starfsgetuna eða nær þeim aldri að hún getur ekki lengur treyst á atvinnutekjur til að framfleyta sér? Í dag finnst flestum líklega sjálfsagt að samfélagið standi með fólki við slíkar aðstæður en þannig hefur það ekki alltaf verið.

Ragnar Þór Ingólfsson, félags- og húsnæðismálaráðherra, skrifar hér um 90 ára af sameiginlegu öryggi í grein á Vísi:

Í ár eru 90 ár liðin frá því að lög um alþýðutryggingar tóku gildi á Íslandi og Tryggingastofnun ríkisins hóf starfsemi sína. Árið 1936 var stigið eitt stærsta skref í sögu velferðarsamfélagsins hér á landi þegar grunnur var lagður að því öryggisneti sem við þekkjum í dag sem almannatryggingar.

Þegar þessu tímamótakerfi var hleypt af stokkunum bjuggu rétt ríflega 100.000 manns á Íslandi. Heimskreppan hafði skilið eftir sig djúp spor. Atvinnuleysi og efnahagsörðugleikar voru verulegir og framtíð margra var óviss. Mikil þörf var á sameiginlegum úrræðum til að styðja við þau sem áttu erfitt með framfærslu og höfðu lent í áföllum.

Lögin fólu í sér slysatryggingar, sjúkratryggingar, elli- og örorkutryggingar og atvinnuleysistryggingar. Með þeim var lagður grunnur að kerfi til að tryggja fólki aðstoð og öryggi við veikindi, slys, örorku og þegar aldurinn færðist yfir.

Tíu árum fyrr höfðu lög verið sett um slysatryggingar ríkisins sem mörkuðu fyrstu skrefin í þessa átt. Alþýðutryggingalögin sameinuðu hins vegar ólíkar tryggingar undir einum hatti og hafa verið nefnd sem einn af mikilvægustu áföngunum í sögu íslenskrar félagsmálalöggjafar.

Á næstu áratugum þróaðist kerfið í takt við samfélagið. Lögunum var breytt, réttindi voru aukin og nýjar stofnanir urðu til. Heitið alþýðutryggingar vék fyrir heitinu almannatryggingar sem lýsir betur þeirri hugsun að tryggingarnar séu fyrir alla landsmenn. Verkefni sem áður voru á einni hendi færðust með tímanum yfir til sérhæfðra stofnana, meðal annars á sviði atvinnumála og sjúkratrygginga. Grunnhugsunin hefur þó haldist sú sama í 90 ár: Að tryggja fólki stuðning þegar á reynir.

Það er auðvelt að líta á almannatryggingar sem sjálfsagðar og fæst leiðum við líklega hugann að kerfinu fyrr en við þurfum sjálf á því að halda eða sjáum mikilvægi þess í gegnum vini og vandamenn. En á hverjum degi snerta almannatryggingar fólk um land allt.

Í gegnum almannatryggingakerfið fær fatlað fólk, fólk sem misst hefur starfsgetu vegna veikinda eða slysa og fólk í endurhæfingu mikilvægan stuðning. Eldra fólk fær lífeyrisgreiðslur og foreldrar langveikra eða alvarlega fatlaðra barna geta fengið umönnunar- og foreldragreiðslur. Kerfið kemur sömuleiðis að greiðsluþátttöku vegna heilbrigðisþjónustu, lyfja og annarrar þjónustu. Svona mætti áfram telja. Allt byggir þetta á þeirri hugmynd að samfélagið beri sameiginlega ábyrgð þegar fólk stendur frammi fyrir veikindum, slysum, örorku eða kemst á aldur.

Það var ekki sjálfgefið á sínum tíma að fámenn þjóð sem glímdi við afleiðingar heimskreppunnar legði í jafn metnaðarfulla uppbyggingu á félagslegu öryggisneti og raun bar vitni. Því er sannarlega tilefni til að staldra við nú þegar 90 ár eru liðin. Það er ánægjulegt að vera í forsvari fyrir félags- og húsnæðismálaráðuneytið á þessum tímamótum og taka þátt í að minnast upphafs almannatryggingalöggjafarinnar á Íslandi. Þann 30. september verður haldin ráðstefna þar sem litið verður yfir sögu, þróun og framtíð almannatrygginga á Íslandi, auk þess sem frekari greinar og umfjöllun munu birtast á opinberum vettvangi.

Við stöndum enn á þeim grunni sem lagður var fyrir 90 árum. Grunni sem byggir á samstöðu og þeirri einföldu en mikilvægu hugsun að tryggja að til staðar sé sameiginlegt öryggisnet fyrir okkur öll.

30/06/2026

Góðar fréttir! Hjúkrunarrýmum á Akranesi fjölgar um 80% þegar nýtt hjúkrunarheimili á Sólmundarhöfða á Skaganum verður tekið í notkun.

Samkomulag var í dag undirritað um stækkun hjúkrunar- og dvalarheimilisins Höfða en þar búa í dag 75 manns, þar af tveir í skammtímarýmum. Með tilkomu nýrrar byggingar á Sólmundarhöfðanum bætast 60 hjúkrunarrými við.

Akraneskaupstaður leggur til lóðina og auglýst verður eftir aðila til að hanna og byggja nýja heimilið. Ríkið leigir húsið síðan með leigusamningi til 20-30 ára. Gert er ráð fyrir að verklegar framkvæmdir við heimilið hefjist á næsta ári.

„Við höfum sett málefni eldra fólks í forgang og látum verkin tala. Framkvæmdir eru hafnar eða í undirbúningi vítt og breitt um landið og stækkunin á Höfða er enn einn áfanginn í þeirri uppbyggingu. Þessi mikla viðbót á Akranesi er stórt og mikilvægt skref fyrir Skagamenn og fyrir allt Vesturland. Með 60 nýjum hjúkrunarrýmum getum við betur mætt þörfum eldra fólks á svæðinu og veitt fleiri fjölskyldum það öryggi og þá þjónustu sem þær eiga rétt á,“ segir Inga Sæland, mennta- og barnamálaráðherra, sem einnig fer fyrir uppbyggingu hjúkrunarheimila.

„Akraneskaupstaðar fagnar því að þessi mikilvægi áfangi sé í höfn, enda þörfin brýn og biðlistinn langur. Akraneskaupstaður fyrir sitt leyti leggur áherslu á að áætlun um uppbyggingu gangi eftir þannig að framkvæmdir geti hafist á árinu 2027 og að taka megi heimilið í notkun á árinu 2028 eða fyrri hluta árs 2029,“ segir Steinar Adolfsson, sem er starfandi bæjarstjóri Akraneskaupstaðar.

„Sveitarfélögin Hvalfjarðarsveit og Akraneskaupstaður hafa lengi unnið að stækkun á hjúkrunarheimilinu Höfða, enda rík þörf fyrir stærra heimili og biðlistar stöðugt að lengjast. Áfanginn í dag er því langþráður og við væntum þess að stækkun gangi vel fyrir sig. Það er mikilvægt og afar brýnt. Stækkun um 60 rými er stór áfangi. Þetta er því afar ánægjulegur dagur,“ segir Haraldur Benediktsson, oddviti sveitarstjórnar í Hvalfjarðarsveit.

Valdís Eyjólfsdóttir, framkvæmdastjóri Höfða, fagnar sömuleiðis samkomulaginu. „Höfði hefur verið einn af hornsteinum samfélagsins á Akranesi frá árinu 1978. Heimilið hefur notið trausts og góðs orðspors í gegnum tíðina, ekki síst vegna starfsfólksins sem hefur í gegnum árin lagt metnað og alúð í að veita íbúum góða og faglega umönnun. Því er það mikið gleðiefni að nú eigi að ráðast í þessa verulegu stækkun sem mun stytta bið eftir hjúkrunarrýmum á Höfða og gera heimilinu kleift að mæta vaxandi þörf í samfélaginu.“

25/06/2026

Tillögur Húsnæðis-, mannvirkja- og skipulagsstofnun að nýrri byggingarreglugerð voru kynntar á opnum fundi með Ragnari Þór Ingólfssyni, félags- og húsnæðismálaráðherra í dag.

- Gert er ráð fyrir styttri málsmeðferð byggingarleyfa og aukinni neytendavernd með bættu eftirliti.
- Lagt er til að fella niður óþarfa stjórnsýslukröfur og láta kröfur í reglugerðinni heldur byggja á skýrum markmiðum, ábyrgð og faglegri þekkingu auk þess sem taka skuli mið af fyrirhugaðri notkun mannvirkja.
- Á næstu mánuðum munu einstakir hlutar byggingarreglugerðar fara í opið samráð hjá HMS.

Ráðherra sagðist á fundinum telja verkefnið vera eitt það mikilvægasta sem ráðist hefði verið í á sviði mannvirkjamála á Íslandi um langt árabil. Um kerfisbreytingu væri að ræða. Ekki væri verið að minnka kröfurnar eða draga úr gæðum mannvirkja heldur gera reglurnar einfaldari, skýrari og markvissari.

„Við viljum einfalda ferla þar sem það er hægt, en án þess að það komi niður á gæðum. Við viljum fella niður óþarfa stjórnsýslukröfur þar sem þær þjóna ekki skýrum tilgangi. Við viljum skýra ábyrgð þar sem hún hefur verið óljós,” sagði hann og undirstrikaði að fólk yrði að geta treyst því að húsnæðið sem það keypti, leigði eða byggi í stæðist þær kröfur sem gerðar væru til öryggis og gæða.

Breytingarnar eru liður í heildstæðu átaki stjórnvalda til að einfalda regluverk á sviði mannvirkjagerðar, stuðla að skilvirkari stjórnsýslu og skapa betri skilyrði fyrir uppbyggingu húsnæðis og annarra mannvirkja. Jafnframt er lögð áhersla á að viðhalda öryggi og gæðum mannvirkja með markvissari og áhættumiðaðri nálgun í byggingareftirliti.

Markmið breytinganna er að:

- auka samkeppnishæfni mannvirkjaiðnaðarins með því að fella niður óþarfa stjórnsýslukröfur og innleiða áhættumiðað byggingareftirlit
- styrkja neytendavernd og fækka byggingargöllum í íslenskum mannvirkjum
- lækka byggingarkostnað og stuðla að aukinni nýsköpun í mannvirkjagerð

Sjá frétt um málið í fyrstu athugasemd.

23/06/2026

Nýtt og glæsilegt hjúkrunarheimili fyrir 90 íbúa mun opna við Keilisbraut í Reykjanesbæ. Ráðist verður í gagngerar breytingar og endurbætur á húsnæði við Keilisbraut 753 og 754 og eru aðgerðir vegna uppbyggingarinnar þegar hafnar. Áætlað er að nýja hjúkrunarheimilið verði tekið í notkun vorið 2028.

Heilbrigðisstofnun Suðurnesja (HSS) mun annast rekstur hjúkrunarheimilisins en ríkið leigir húsið með leigusamningi til 25 ára af Icelandic Home ehf. Heimilið verður ríflega 6.500 fermetrar og öll herbergin einbýli með baðherbergjum.

Fyrir skemmstu var annað hjúkrunarheimili opnað í Reykjanesbæ og stendur það við Nesvelli. Þegar bæði hjúkrunarheimilin verða komin í gagnið mun hjúkrunarrýmum á Suðurnesjum hafa fjölgað um tæp 80% frá því í janúar sl.

Til viðbótar munu 24 skammtímahjúkrunarrými bætast við í bænum í haust þegar hjúkrunarheimilið Hlévangur opnar á nýjan leik og verða þau starfrækt fram að opnun hjúkrunarheimilisins við Keilisbraut.

„Við höfum sett málefni eldra fólks í forgang og látum verkin tala. Stjórnvöld eru í stórsókn í uppbyggingu hjúkrunarheimila vítt og breitt um landið og nýja hjúkrunarheimilið við Keilisbraut verður mikilvægt framfaraskref fyrir eldra fólk á Suðurnesjum og fjölskyldur þeirra. Með þessu fjölgar hjúkrunarrýmum verulega á svæðinu og fleiri fá þá þjónustu og það öryggi sem þeir eiga skilið,“ segir Inga Sæland sem fer fyrir uppbyggingu hjúkrunarheimila.

„Stundum gerast góðir hlutir hratt og óhætt að segja það um uppbyggingu hjúkrunarrýma um þessar mundir. Þetta er óendanlega mikilvægt, auðvitað fyrst og fremst gagnvart öldruðu fólki í brýnni þörf fyrir slíka búsetu en einnig fyrir heilbrigðiskerfið í heild, ekki síst Landspítala og bráðamóttökuna þar - og raunar samfélagið allt. Það er grundvallaratriði í heilbrigðismálum að fólk fái þá þjónustu sem það þarfnast á réttum stað og réttum tíma. Svo sannarlega er það mikil áskorun en við höfum ríka ástæðu til að gleðjast yfir þeirri kraftmiklu uppbyggingu hjúkrunarheimila sem við sjáum nú víðsvegar um landið,“ segir Alma D. Möller heilbrigðisráðherra.

„Heilbrigðisstofnun Suðurnesja fagnar mjög þessum áfanga í þjónustu við aldraða á Suðurnesjum. Aðstaðan á Keilisbraut býður upp á marga möguleika til að mynda fallega umgjörð fyrir íbúa heimilisins og móta þar fyrirmyndar samfélag. Með opnun nýja hjúkrunarheimilisins á Keilisbraut skapast einstakt tækifæri til að efla sjúkrahússtarfsemi HSS enn frekar og mun það hafa víðtæk áhrif á heilbrigðisþjónustu til framtíðar,“ segir Guðlaug Rakel Guðjónsdóttir, forstjóri HSS.

Hjúkrunarheimilið við Keilisbraut er hluti af framkvæmdaáætlun um uppbyggingu hjúkrunarheimila fyrir árin 2026-2030 en þar er gert ráð fyrir að ríflega 1.500 hjúkrunarrými verði tekin í notkun á tímabili áætlunarinnar. Í dag eru alls 160 hjúkrunarrými í Reykjanesbæ en með nýja hjúkrunarheimilinu verða þau orðin 250.

20/06/2026

Alþingi hefur samþykkt lög um réttindavernd fatlaðs fólks. Um ný heildarlög er að ræða sem leysa af hólmi lög um réttindagæslu fyrir fatlað fólk.

Meginmarkmið nýju laganna er að tryggja fötluðu fólki viðeigandi stuðning við vernd hvers konar réttinda og stuðla að bættu jafnrétti og aðgengi í þjónustu við fatlað fólk.

Jafnframt er áhersla lögð á að tryggja að sjálfsákvörðunarréttur fatlaðs fólks sé virtur og fyllsta réttaröryggis gætt þegar brýna nauðsyn ber til að grípa inn í líf þess. Við gerð frumvarpsins var tekið mið af samningi Sameinuðu þjóðanna um réttindi fatlaðs

Lögunum er ætlað að skerpa á hlutverki réttindagæslu fyrir fatlað fólk og tryggja skýrari verkaskiptingu á milli sýslumanna og réttindagæslu svo ljóst sé til hvers ætlast sé af þeim.

Þeim er einnig ætlað að bregðast við kerfislægum hindrunum sem ákveðinn hópur fatlaðs fólks hefur mætt við aðgang að fjármálum sínum, einkum þeirra sem búa í búsetukjörnum og geta ekki notað rafræn skilríki.

Þá er lögunum ætlað að auka skilvirkni í málsmeðferð og ákvarðanatöku í málum sem varða nauðung í þjónustu við fatlað fólk, einfalda ferla, minnka biðtíma eftir ákvörðun, auðvelda eftirlit og tryggja að mál séu áfram afgreidd á samræmdan hátt.

„Lögin marka mikilvægt framfararskref í því að tryggja fötluðu fólki jafnræði og auka þátttöku þess og inngildingu í samfélaginu. Með þeim er réttindavernd styrkt, sjálfsákvörðunarréttur betur tryggður og skýrari umgjörð sköpuð um þá þjónustu og þann stuðning sem fólk á rétt á,“ segir Ragnar Þór Ingólfsson, félags- og húsnæðismálaráðherra.

Ástæða þótti til að breyta heiti laganna í réttindavernd fatlaðs fólks þar sem heitið lög um réttindagæslu fyrir fatlað fólk endurspeglar ekki að fullu efni þeirra. Lögin fjalla ekki eingöngu um réttindagæslu, heldur einnig um hlutverk persónulegra talsmanna við að styðja notendur við að taka eigin ákvarðanir og ráðstafanir til að draga úr beitingu nauðungar í þjónustu við fatlað fólk.

19/06/2026

Alþingi samþykkti í dag frumvarp Ragnars Þórs Ingólfssonar, félags- og húsnæðismálaráðherra, um framkvæmd öryggisráðstafana samkvæmt dómsúrlausn. Nýrri stofnun verður komið á fót með öryggisgæslustað fyrir allt að 16 einstaklinga sem þurfa sérhæfða þjónustu og er gert að sæta öryggisgæslu en ekki er talið viðeigandi að vista í fangelsi. Ekkert slíkt sérhæft úrræði er til í dag. Þá er heildstæð lagaumgjörð nú í fyrsta sinn til staðar um framkvæmd öryggisráðstafana samkvæmt dómsúrlausn.
Ráðherra segir að lengi hafi verið ljóst að þörf væri á að taka heildstætt utan um málaflokkinn. Kerfið hafi hingað til ekki náð utan um hópinn sem um ræðir:

• Á öryggisgæslustaðnum munu vistast einstaklingar sem dæmdir hafa verið fyrir alvarleg brot en eru taldir ósakhæfir eða refsing ekki talin líkleg til að bera árangur. Þeir eru því ekki taldir eiga heima í fangelsiskerfinu en þó er talið nauðsynlegt að gera viðeigandi ráðstafanir til að hætta stafi ekki af þeim.

• Þar er einnig gert ráð fyrir einstaklingum sem taldir eru þurfa slíka vistun að lokinni afplánun í fangelsi. Frumvarp dómsmálaráðherra þess efnis varð einnig að lögum á Alþingi í dag.

• Ríkið hefur þegar tryggt sér lóð á Hólmsheiðarsvæðinu undir Miðstöð um öryggisráðstafanir þar sem öryggisgæslustaðurinn verður og umsjón með öllum öryggisráðstöfunum samkvæmt dómsúrlausn.

„Með breytingunum sem Alþingi samþykkti í dag stöndum við vörð um mannréttindi og réttláta málsmeðferð þeirra einstaklinga sem um ræðir en gætum um leið að öryggi almennra borgara,“ segir Ragnar Þór Ingólfsson, félags- og húsnæðismálaráðherra.

Sem fyrr segir samþykkti Alþingi einnig í dag frumvarp dómsmálaráðherra um breytingar á almennum hegningarlögum sem skýrir lagaheimildir til öryggisráðstafana gagnvart einstaklingum sem metnir eru sérstaklega hættulegir umhverfi sínu. Með breytingunum er skýrt hvenær megi grípa til slíkra úrræða, á hverju matið skuli byggjast og hvernig tryggja megi aukið samræmi og réttaröryggi í framkvæmd. Heimilt verður, að ströngum skilyrðum uppfylltum, að vista einstakling áfram eftir lok afplánunar ef hann hefur gerst sekur um alvarlegt afbrot og telst áfram verulega hættulegur samfélaginu.

„Með samþykkt frumvarpsins er stigið mikilvægt skref í máli sem hefur kallað á úrlausn í langan tíma. Við erum að setja skýrari reglur um mjög íþyngjandi úrræði, þannig að ákvarðanir byggist á vönduðu mati, skýrum lagagrundvelli og virðingu fyrir réttindum þeirra sem eiga í hlut. Um leið erum við að tryggja að samfélagið hafi raunhæf úrræði þegar einstaklingar eru metnir verulega hættulegir umhverfi sínu,“ segir Þorbjörg S. Gunnlaugsdóttir dómsmálaráðherra.

Sjá frétt í fyrstu athugasemd hér að neðan.