17/03/2026
Eskifjörður - Eftirprentun - Opið upplag til miðnættis 23.03.2026
Eitt af þeim bæjarstæðum sem ég hef oftast verið beðinn um að mála er Eskifjörður og í gegnum árin þegar mikið er spurt um ákveðin mótíf hef ég reynt að svara kallinu. Svo hérna er hann mættur á strigann. Eskifjörðurinn sjálfur. :)
Á miðjum Austfjörðum liggur Eskifjörður kyrr og djúpur milli fjalla þar sem sjórinn speglar litbrigði himinsins. Þorpið teygir sig meðfram firðinum þar sem húsin mynda fallega röð við ströndina og lífið mótast af nálægðinni við hafið og stórbrotna náttúruna allt um kring. Kyrrðin sem hvílir yfir firðinum gefur manni ró í hjarta þar sem land og sjór renna saman.
Yfir öllu rís svo Hólmatindur, tignarlegur og sterkur. Brattar hlíðar hans bera merki veðra og tíma, en snjórinn efst á tindinum fangar síðustu birtu dagsins. Fjallið stendur sem vörður yfir firðinum og þorpinu sem tákn um styrk og stöðugleika í landslagi Austfjarða. Saman mynda Eskifjörður og Hólmatindur landslag sem er bæði hrífandi og kyrrlátt, þar sem ótrúleg fegurð náttúrunnar nýtur sín til hins ýtrasta.
