Austurbrú

11/09/2026

Fulltrúar allra sjö þekkingarsetra landsins komu saman á aðalfundi Samtaka þekkingarsetra í Vestmannaeyjum á dögunum.

Auk hefðbundinna aðalfundarstarfa var rætt um samstarf og stefnumótun til framtíðar, gervigreind og nýsköpun og auðvitað var tækifærið nýtt til að kynnast öflugu starfi Þekkingarseturs Vestmannaeyja.

👉 Nánar um fundinn og heimsóknina í athugasemd.

10/09/2026

💡 Ertu með hugmynd eða verkefni sem vantar fjármagn til að komast á næsta stig?

Lánasérfræðingar Byggðastofnunar verða á Austurlandi dagana 14.–16. september og bjóða fyrirtækjum og frumkvöðlum á svæðinu að koma í spjall um lánamöguleika og fjármögnun.

Nánari upplýsingar í athugasemd.

07/09/2026

Frá tölvuskjánum upp í þyrlu og stundum að rotnu hreindýri í Vöðlavík!

Dagný Ásta Viðars Þórhölludóttir er sviðsstjóri hreindýrarannsókna hjá Náttúrustofu Austurlands. Starfið er fjölbreytt svo ekki sé meira sagt: gagnaúrvinnsla, samskipti við fólk, hreindýratalningar úr lofti og vettvangsvinna af ýmsu tagi.

Í aðdraganda Starfamessu Austurlands 24. september í Neskaupstað ætlum við að kynna nokkur þeirra fjölbreyttu starfa sem unnin eru á Austurlandi og leiðirnar sem fólk hefur farið að þeim.

Lesið viðtalið við Dagnýju Ástu hér: https://austurbru.is/madur-tharf-ekki-ad-hafa-framtidina-a-hreinu-tvitugur/

04/09/2026

🚀 47 umsóknir í Startup Landið

Góður áhugi er á Startup Landinu en alls bárust 47 umsóknir í hraðalinn víðs vegar að af landinu. Þar af komu 10,5% umsókna frá Austurlandi.

Nú tekur valnefnd við og valin teymi verða kynnt í næstu viku.

Nánar: https://austurbru.is/47-umsoknir-barust-i-startup-landid/

02/09/2026

⚡ Fyrsta Orkuskot haustsins fór fram í Tónspili í Neskaupstað í gær.

Kolbeinn Óttarsson Proppé, framkvæmdastjóri Grænafls, fjallaði um rafvæðingu smábáta og tækifærin sem felast í orkuskiptum minni fiskiskipa.

Við þökkum Kolbeini fyrir fróðlegt erindi og þeim sem mættu fyrir komuna og góðar og líflegar umræður.

🎥 Upptaka frá fundinum verður aðgengileg á miðlum Austurbrúar eftir nokkra daga. Við tökum einnig saman helstu spurningar og umræðuefni sem brunnu á fundarmönnum og birtum svör við þeim á heimasíðunni okkar innan tíðar.

Orkuskotin halda áfram í haust. Næst verður skotið á Vopnafirði 22. september þar sem fjallað verður um orkuöflun og orkusjálfstæði.

Nánar um fundarröðina Orkuskot: https://austurbru.is/orkuskot/

02/09/2026

Úr myndasafni SSA – Seyðisfjörður 2009

Átti Austurland að verða eitt sveitarfélag?

Það var ein af stóru spurningunum á 43. aðalfundi SSA, sem haldinn var í Herðubreið á Seyðisfirði dagana 25.–26. september 2009.

Árið eftir bankahrunið voru sveitarfélög landsins undir miklum fjárhagslegum þrýstingi og framundan var niðurskurður hjá ríki og sveitarfélögum. Á fundinum var þó ekki aðeins rætt um hvernig mætti verjast samdrættinum heldur hvernig Austurland gæti sótt fram. Yfirskrift hluta dagskrárinnar var einmitt Austurland, landshluti í sókn.

Stærsta samþykkt fundarins sneri þó að sveitarfélögunum sjálfum. Samþykkt var samhljóða að fela stjórn SSA að skipa starfshóp til að skoða hugsanlega sameiningu allra sveitarfélaganna á starfssvæði SSA í eitt sveitarfélag. Í samþykktinni var verkefnið kallað „ótvírætt tímamótaverkefni, sem ekki á sér hliðstæðu á Íslandi“.

Hugmyndin kom ekki úr tómarúmi. Á fundinum var einnig rætt um framtíðarskipulag SSA og aukið samstarf sambandsins og stoðstofnana á Austurlandi. Markmiðið var meðal annars að draga úr skörun, nýta betur sameiginlega krafta og einfalda stjórnsýslu. Þarna má sjá upphaf þeirrar vinnu við aukið samstarf SSA og stoðstofnana sem hélt áfram næstu árin og lauk með stofnun Austurbrúar árið 2012.

Þorvaldur Jóhannsson, þáverandi framkvæmdastjóri SSA, rifjaði síðar upp í grein í Morgunblaðinu að hugmyndir um sterkari sameiginlega stjórnsýslu á Austurlandi ættu sér miklu lengri sögu. Fjórðungsþing Austfirðinga hafði þegar um miðja síðustu öld lagt til að Íslandi yrði skipt í s*x fylki og Austurland yrði eitt þeirra. Árið 1950 voru sveitarfélög á Austurlandi 34 en árið 2009 voru þau níu.

Jarðgöng voru að sjálfsögðu líka á dagskrá. SSA ítrekaði að næstu jarðgöng á Austurlandi ættu að vera Norðfjarðargöng, Vopnafjarðargöng og Seyðisfjarðargöng. Norðfjarðargöng voru jafnframt skilgreind sem fyrsti hluti svokallaðra Miðfjarðaganga, framtíðarsýnar um jarðgangatengingu frá Eskifirði um Norðfjörð, Mjóafjörð og Seyðisfjörð til Héraðs.

Heiðursgestur fundarins var Jónas Hallgrímsson á Seyðisfirði, fyrrverandi bæjarstjóri og formaður SSA. Björn Hafþór Guðmundsson, formaður SSA, fór yfir langan feril Jónasar í ávarpi við hátíðarkvöldverðinn – með þeim létta brag að Austurglugginn birti síðar úrdrátt úr ræðunni undir fyrirsögninni: „Jónas er verulega ábyrgur fyrir bankahruninu.“

Meðfylgjandi myndir eru frá aðalfundinum á Seyðisfirði árið 2009 en í tilefni af 60 ára afmæli SSA í haust höfum við verið að gramsa í myndasafninu og rifja upp brot úr sögu samstarfs sveitarfélaga á Austurlandi.

01/09/2026

Síðasti séns!

Ertu með verkefni eða viðskiptahugmynd sem þú vilt koma á næsta stig?

Startup Landið er nýsköpunarhraðall fyrir frumkvöðla og nýsköpunarteymi á landsbyggðinni. Þátttakendur fá aðstoð sérfræðinga og mentora við að þróa hugmyndina, skerpa viðskiptamódelið og byggja upp tengslanet.

Umsóknarfrestur í Startup Landið 2026 er til loka dags í dag, 1. september.

Ekki láta gott tækifæri renna þér úr greipum!

Frumkvöðlar og nýsköpunarteymi á Austurlandi geta nú sótt um þátttöku í Startup Landinu 2026. Hraðallinn býður upp á leiðsögn sérfræðinga, vinnustofur og öflugt tengslanet sem hjálpar þátttakendum að þróa hugmyndir sínar áfram og færa verkefni sín á næsta stig. Umsó...

31/08/2026

Við minnum á aukaársfund Austurbrúar 1. september

Í framhaldi af ársfundi Austurbrúar ses. og aðalfundi SSA 20. mars sl. er boðað til aukaársfundar Austurbrúar.

📅 1. september 2026
🕛 Kl. 12:00–13:00
💻 Fundurinn fer fram í Teams

Á fundinum verður tekin fyrir tillaga að breytingu á 8. grein skipulagsskrár Austurbrúar, vegna breytinga á stjórn Sambands sveitarfélaga á Austurlandi sem hafa áhrif á skipan stjórnar Austurbrúar.

Aðrir liðir ársfundar voru teknir fyrir á ársfundi Austurbrúar 20. mars sl.

Með atkvæðisrétt fara stofnaðilar Austurbrúar og fulltrúar hagsmunaaðila en fundurinn er öllum opinn.

👉 Nánari upplýsingar og hlekk á Teams-fundinn má finna hér: